Matthieu 5

Sulá lɨ́ ecwɨ̂ʼ kʉ́

(Matthieu 5-7)

1Mbeá Yésʉs á bee entumo e bʉ̂r yɨ́, nye ntɔ̂ʼ bére lɨ́ ecwɨ̂ʼ kʉ́, di sí. Ompʉ́n bé, bê nzě sîhlě gúmó nyé á be yɨ́. 2Nye nzě táare édwe bé milɛ́ʼlá mbi wɨ̂.

Metyɛʼ me mpóm mémpâ

(Luc 6.20-23)

3Yésʉs nzě lɛ́ɛ ó:

«Metyɛʼ me mpóm, mé díʼee e bʉr o dí egʉ́a ó,

misísǐm myɔ́ɔ́, myé dína ó le edyêb ɨ́ páʼ mé Nzyɛ̌m bá,

ebě, Mpóʼo mé Dâ Nzyɛ̌m, nye tyélá ó, lɨ́ esú é bʉ̂r o dí mpʉ bé bá.

4Metyɛʼ me mpóm, mé díʼee e bʉr o dí ejɨ médwê bá,

ebě, Nzyɛ̌m ódila médwé mɔ́ɔ́ ó e bisʉhʉʉ.

5Metyɛʼ me mpóm, mé díʼee e bʉr o mû sí tyɛʼ mínjwɨr bá,

ebě, bé ó ngá lîʼ e sí yɨ̂.

6Metyɛʼ me mpóm, mé díʼee e bʉr o dí ejóʼǒ dwéh le ebuú gwɨ̂m

ésâ bísyɛ́ɛla bi dí tîtyěl bí bá,

ebě, Nzyɛ̌m ólóŋlo bé yǎ.

7Metyɛʼ me mpóm, mé díʼee e bʉr o dí ejɨ̂ʼ bʉ́ʉ́ bʉ̂r nkoó bá,

ebě, Nzyɛ̌m ójɨ̂ʼ bé ntémé nkoó.

8Metyɛʼ me mpóm, mé díʼee e bʉr o dí e miléme ɨ́ sɔ́ɔ́ɔ́ bá,

ebě, bé ó ngá beě Nzyɛ̌m.

9Metyɛʼ me mpóm, mé díʼee e bʉr o dí egbâ mépyɛbla páʼ bʉ̂r e bʉr bá,

ebě, bé ójwɨr bé ó “bwán mé Nzyɛ̌m”.

10Metyɛʼ me mpóm, mé díʼee e bʉr o dí etíblɔɔ

ebe bé dí etiʼe lɨ́ otîtyěl mé Nzyɛ̌m bá,

ebě, Mpóʼo mé Dâ Nzyɛ̌m, nye tyélá ó,

lɨ́ esú é bʉ̂r o dí mpʉ bé bá.

11Metyɛʼ me mpóm, mé díʼee e bɨ̌n ɨ́ jɔʼ bé ópya bɨ́n, le etíble bɨ́n, le elaʼ bɨ́n milɔ̌b mí ébébe mimbi mimbi ɨ́ lɔ̌b wâm yɨ́. 12Sohaa gâ, mɛɛlaa gâ, ebě, myɛ́na ménɨ́nɨ́ɨ́ le embɨa, mé lɨ́ ebóno bɨ́n ɨ́ jʉ́o kʉ́, ebě, bé á tîtible ogwíha o mílɔ̌b bé á nyɛɛ pyâl e bɨ̌n bá ó mpʉ́nʉ̌.»

Kɨkɛna ékpa

(Marc 9.49-50; Luc 14.34-35)

13«Bɨ̌n ó dí ekpa é sí yɨ̂. Sâ gwár, ékpa, lé óbe, akǎ jómo nó, bé óbáʼǎ sâ ó, lé jwɨ́ʼwɨɨ ejómo e yé? Lé ójaá kǎ jala ó, njɨ esʉ́ŋɔɔ̌ kʉ̌l, bʉr tyéele lé e mekʉ̌.»

Kɨkɛna éláma

(Marc 4.21-22; Luc 8.16; 11.33)

14«Bɨ̌n ó dí njʉl sí yɨ̂. Nkana dí sumá ɨ́ nkɛ̌l ecwɨ̂ʼ yɨ́, yé abe lɨ́ eswab. 15Bé abe lɨ́ etumo éláma ó, bé óbûr lé ɨ́ mpɨ̌. Yé jala ó, bé tyélɨɨ lé ɨ́ tyélátyéla éláma kʉ́, gúmó lé ókʉn bʉ̂r bɨ́bɛ̂h o dí ɨ́ mbɛ̌r bá yɨ́. 16Nó njʉl wɨ́n, wé ɨ́ jala le epǎn myɛ́n ɨ́ bʉr, ó bé nkʉ̂ gwa bee bísyɛ́ɛla bimpâ bín, le edwe Sɔ́ŋ wɨ́n dí ɨ́ jʉ́o kʉ́ nyá kûm tɨ̂.»

Metié mé Nzyɛ̌m

17«Abûʼla gá ó, me á nze ó, nzě gbɛ́ɛ métié, nkʉ̂ gbɛ́ɛ mílɛ́ʼlá ógwíha o mílɔ̌b á dwe mí. Me á bé anzě gbɛ́ɛ. Me á nze ó, nzě lóŋlo. 18Mě lɛ́ɛ́ bɨ́n lɨ́ otyeetye ó, tó pyâl ɨ́ jɔʼ kʉ́ e sí ngá síe yɨ́, kaŋá gwár tɨ̂, nkʉ̂ mâ etɔ́n égwár e tɨ̂, byé ákóʼó pʉʼa, tó pyâl ɨ́ jɔ̌ʼ sá yɨ́yɛ̂h ngá syɛ́ɛ yɨ́. 19Mʉ̂r ógbah étié, le elɛ̂ʼle bʉ̂r ó, bé sâʼ nó wá, nye óbe ó mpʉ mʉ̂r dí aláŋɔɔ ɨ́ nkɔb sɔ́má bʉ̂r o Mpóʼo mé Dâ Nzyɛ̌m, damá jóʼo ó, etié laá, lé á be ɨ́ buú twâʼwo. Tó kœb ó, mʉr nyɨnyɛ̂h óbaʼle métié maá, le elɛ̂ʼle bʉ́ʉ́ bʉ̂r esâ nó nyá, ódi mʉ̂r nɨ́nɨ́ɨ́ ɨ́ Mpóʼo mé Dâ. 20Nó mě lɛ́ɛ́ bɨ́n ó: ótîtyěl wɨ́n, wé óbe, alaa waá óFarizyɛ̂n le olɛ̂ʼla o métié nó, bɨ̌n bé ákóʼó nî ɨ́ Mpóʼo mé Dâ.»

Lɛ́ʼlá ɨ́ lɔ̌b ébúʼ

21«Bɨ̌n bé á be ó sí jóʼǒ mpʉ bé á boo lɛ́ɛ bimpám gá bíná ó: “Ajʉ̂ mʉ̂r; mʉ̂r jʉ̂ mɨ́ɔɔ́ wé mʉr nó, nye ótóŋɔɔ e yé ɨ́ mpáh milɔ̌b.” 22Nó mɛ̌m lɛ́ɛ́ bɨ́n ó: mʉr nyɨnyɛ̂h dí elɛ̂ʼle mɨ́ɔɔ́ wé nkpaa nyé nyá, ótóŋɔɔ e yé ɨ́ mpáh milɔ̌b. Mʉ̂r lwɨ́ɨ́ mɨ́ɔɔ́ nó, nye ótóŋɔɔ e yé ɨ́ bʉ̌m nɨ́nɨ́ɨ́. Mʉ̂r lɛ́ɛ́ e mɨ́ɔɔ́ ó, nye ó gʉ̌ nó, nye ótóŋɔɔ e yé Gehên, bɨ́ siʼe dí adímedime yɨ́. 23Yé sí kǎ pyâl ó, go mû lɨ́ etô alatâr lɨ́ etó lɛ̂ʼlě Nzyɛ̌m bisá gô nze dwé nyé bí, go kǎ símsa mɨ́ʉ̌ dí etɛ́ɛ gó nó, 24líʼáá bísâ byaá náǎ bǎʼ le alatâr. Tááráá étó komlǒ lɔ̌b dí páʼ nyɨ́n wɨ́. Píe tɨ̂, gó obáʼǎ nzě dwě Nzyɛ̌m bisá gô pa nzé e byé bí.

25«Gó óbe, go mû sí byǎʼ lɔ̌b e nyʉ́ʉ́ mʉ̂r, bɨ̌n e mʉr waá mû lɨ́ etô ɨ́ mpáh mílɔ̌b nó, kpáhwá sâ ó, bɨ̌n kómlaa, bɨ̌n dína nzɨ́ e nzɨ̌. Nye ámû jaá tô e go kwá tîʼ milɔ̌b, tîʼ milɔ̌b tyen gó kwá bisója, ó bé gbâʼ go ɨ́ mbʉʼ. 26Me lɨ́ elɛ́ɛ gó lɨ́ otyeetye ó, go ákóʼó pɔʼǎ sûm yaá, tyé yɨ́yɛ̂h gó dína apǎ jána mpʉ́lá nyǒ nyɨnyɛ̂h, pára gwár alîʼ yɨ́.»

Medyɛ̂n

27«Bɨ̌n bé á be ó sí jóʼǒ mpʉ bé á boo lɛ́ɛ ó: “Asâ médyɛ̂n” yɨ́. 28Nó mɛ̌m lɛ́ɛ́ bɨ́n ó: mʉrʉ̂m nyɨnyɛ̂h dwɛ́ʼ mʉ́má nye onkán le egwɨ̂m nyé ɨ́ léme tʉ́ŋlʉ̌ nyá, nye mû náǎ ó, sí sâ médyɛ̂n e né ɨ́ lémé wé ó nɨ̌. 29Nó yé bé ó, díh lé éjʉ́m lô, lé ó dí esâ ó, go sâʼ syóm nó, pɛʼɛɛ lê; go e myáh lé ká ká lɨ́ ejaa, ebě, yé mbɨa ɨ́ páʼ gô ó, go dímlaa yʉ́ʉ́ tíl nyʉ̂l yô gwár, laa ó, nyʉ̂l nyǒ nyɨnyɛ̂h, nye gúhɔɔ lɨ́ Gehên, bɨ́ siʼe dí adímedime yɨ́. 30Yé bé mbó éjʉ́m gô, wé ó dí esâ ó, go sâʼ syóm nó, tíʼáá wê, go e myáh wé ká ká lɨ́ ejaa, ebě, yé mbɨa ɨ́ páʼ gô ó, go dímlaa yʉ́ʉ́ tíl nyʉ̂l yô gwár, laa ó, nyʉ̂l nyǒ nyɨnyɛ̂h, nye tôʼ ɨ́ bɨ́ siʼe dí adímedime yɨ́.»

Ejwɨ́ɨ́ lé ébâ

(Matthieu 19.9; Marc 10.11-12; Luc 16.18)

31«Yé á si lɛ́ɔɔ ntémé ó: “Mʉ̂r gwɨ́m ó, nye bwóolaa mʉmá wé nó, nye e cɛ́má mékaná mé éjwɨ́ɨ́ lé ébâ, dwe nyé mǎ.” 32Nó mɛm, mě lɛ́ɛ́ bɨ́n ó: mʉ̂r óbwóolo mʉ́má wé ɨ́ lɔ̌b swîh, abe ɨ́ lɔ̌b médyɛ̂n nó, myɛ́l ótó bâ mʉ̂r swîh nó, nyɨ́ lómo nyé ó, nye sâʼ medyɛ̂n e mʉr waá. Mʉr bá mʉ́mâ bé sí bwóolɔɔ nyá nyɨɛ, nye ntémé, nyɨ́ sâ médyɛ̂n.»

Lɛ́ʼlá ɨ́ lɔ̌b mínkâl

33«Bɨ̌n bé á si jóʼo ntémé mpʉ bé á boo lɛ́ɛ e bimpám gá bíná ó: “Alêh ɨ́ minkâl gó á ntaa mí. Go ɨ́ jala le elóŋlo nkɛ́ʼ gó á pa kɛʼ Dâ Nzyɛ̌m ɨ́ jɔʼ gó á ntaa myé yɨ́.” 34Nó mɛ̌m lɛ́ɛ́ bɨ́n ó: mʉr antaa gá minkâl. Agbâ gá díé é jʉ́o ɨ́ minkâl, ebě, yé ó mecwɨ́ɨ́ mé jwɨ́ɨ́ mé Nzyɛ̌m. 35Agbâ gá díé é sí ɨ́ minkâl, ebě, yé ó tyélátyéla mékʉ̌ mé Nzyɛ̌m. Agbâ gá díé é Yerʉ́zalɛm ɨ́ minkâl, ebě, yé ó nkana mé Njwɨ́ɨ̌ nɨ́nɨ́ɨ́. 36Akáale ntémé, gbâ díé é lʉ́ gô ɨ́ minkâl, ebě, gó abe e nkul líŋ mpuo gwár yô ó, yé sâʼ mpî, nkʉ̂ ó, yé díʼee dwîdwîn. 37Yalá yô sí bě “eee” nó, yé díʼee sɔ̂ʼ njɨ “eee”. Yé bé yé ó “heʼé” nó, yé díʼee sɔ̂ʼ njɨ “heʼé”, ebě, ekǎn e dí ekǎ kɛlɔɔ tɨ̂ʼ kʉ́ lɨ́, lé duho ó kwá mé Sátan.»

Mpɔlá

38«Bɨ̌n bé á si jóʼo mpʉ bé á boo lɛ́ɛ ó: “Dîh táa dîh; edye táa édye” yɨ́. 39Nó mɛ̌m lɛ́ɛ́ bɨ́n ó: alwímla gá e mʉr dí esâ bɨ́n ebébe nyá. Mʉ̂r ŋmɛ́h gó bɛ̂h lɨ́ emúʼ lé éjʉ̂m nó, bírɨ́ɨ́ ntémé ó, nye ŋmɛ́hɛɛ ɨ́ laá lé émyɛ̌l. 40Mʉ̂r sí kpɛl étô e go mpáh milɔ̌b, le esáa édɛn gó dur nó, bírɨ́ɨ́ ntémé ó, nye tôʼ ti e kʉ̂r. 41Mʉ̂r sá gó mpêl, sâ ó, go nkɛ́yɨɨ nye mimbeʼ tâŋ kíloméra ngwár nó, gua, go e sá óbá. 42Mʉ̂r sí gwâm gó sɔ̂ʼ nó, go e dwé nyé yǎ. Waá dí gó kʉlá nyá, go e kʉ́l nyê.»

Kpɛlɨɨ óntɨ̂m le obɨn bô

(Luc 6.27-28, 32-36)

43«Bɨ̌n bé á si jóʼo mpʉ bé á boo lɛ́ɛ ó: “Kpɛlɨɨ mɨ́ɔɔ́ gǒ mʉr. Go e nwím óntɨ̂m le obɨn bô” yɨ́. 44Nó mɛ̌m lɛ́ɛ́ bɨ́n ó: kpɛlɨɨ gá ontɨ̂m le obɨn bɨ́n. Bɨ̌n a jɨ́ʼlá e Nzyɛ̌m lɨ́ esú é bʉ̂r o dí ebene bɨ́n bá. 45Jɔʼ yaá ó bɨ́n ódi bwán mé Sɔ́ŋ wɨ́n dí ɨ́ jʉ́o kʉ́ nyá yɨ́. Nye lɨ́ esâ ó, dʉ́o lé, lé káhaa lɨ́ esú é bʉ̂r o dí ɨ́ bébe, le baá o dí ɨ́ mbɨa bá. Nzyɛ̌m, nye lɨ́ esâ ntémé ó, mpíé nwɨ́yɨɨ lɨ́ esú lé ótîtyěl le onzyɛ́h ó bʉ̂r. 46Bɨ́n ójaá kpɛ̌l njɨ bʉr o kpɛ́l bɨ́n bá nó, á bɨ̌n bé óbóno myɛ́na mé Nzyɛ̌m náǎ yáǎ sûm ɛ̌? Bʉr o dí enʉǎ mɔnɨ́ tœ́a bá, bé sá ntémé ó, jwɨʼ gwár mpʉ bɨ́n dí esâ nɨ̌! 47Bɨ́n ójaá sohǒ njɨ bɨ́ɔɔ́ bɨ́n nó, yé dí sá édwán tɨ̂? Bʉr o dí agʉ́ǎ Nzyɛ̌m bá, bé sá ntémé ó, jwɨʼ gwár yaá! 48Diʼee gá bʉr o dí mbɨ̂mbɨá ɨ́ mipáʼ mímyɛ̂h bá, mpʉ Sɔ́ŋ wɨ́n dí ɨ́ jʉ́o kʉ́ nyá dí yɨ́.»

Zur Zeit ausgewählt:

Matthieu 5: ozm

Markierung

Kopieren