Genesis 15
15
Dios tsi' sube Abram tal i yalobil
1Che' ujtemix iliyi tsa' tili i t'an lac Yum ba'an Abram ti ñajal: Abram, mach a cha'len bʌq'uen. Joñon a mʌctʌjibon. Wen ñuc a chobejtʌbal mu' bʌ caj a wʌq'uentel. Che' tsi' yʌlʌ lac Yum. 2-3Abram tsi' yʌlʌ: C Yum Dios, ¿chuqui mi mejlel a wʌq'ueñon? come c'ʌlʌl wʌle ma'anic calobil. Jini mu' bʌ caj i ch'ʌm pejtel c chubʌ'an jiñʌch Eliezer ch'oyol bʌ ti Damasco. Awilan, ma'anic tsa' wʌq'ueyon c p'olbal. Mi caj i ch'ʌm c chubʌ'an juntiquil x'e'tel tsa' bʌ i yila pañimil ti cotot, che'en Abram. 4Lac Yum tsi' sube: Ma'anic mi caj i ch'ʌm a chubʌ'an ili winic. Mi caj i ch'ʌm a chubʌ'an ch'iton bʌ a walobil, che'en lac Yum. 5Lac Yum tsi' pʌyʌ loq'uel Abram ti jumpat. Tsi' yʌlʌ: Q'uele jini panchan. Tsiqui jini ec' mi tsa' mejli a tsic. Che'ʌch mi' caj ti p'ojlel a p'olbal, che'en lac Yum. 6Abram tsi' ñopo lac Yum. Lac Yum tsi' q'uele ti toj.
7Tsi' sube: Joñon a Yumon tsa' bʌ c pʌyʌyet loq'uel ti Ur i cha'an caldeojob cha'an mi cʌq'ueñet a lum cha'an ma' wochel ti' yum, che'en. 8Abram tsi' yʌlʌ: C Yum Dios, ¿bajche' mic ña'tan mi mux caj cochel ti' yum? che'en. 9Lac Yum tsi' sube: Chajpʌbeñon alʌ ña' wacax am bʌ uxp'ejl i jabilel, yic'ot i ña'al chivo am bʌ uxp'ejl i jabilel, yic'ot i tat tiñʌme' am bʌ uxp'ejl i jabilel, yic'ot xmucuy, yic'ot alʌ x'ujcuts, che'en. 10Abram tsi' laj pʌyʌ tilel. Tsi' set' t'ojo ti ojlil ti jujuncojt. Tsi' xot'o ti ojlil jini majtañʌl tac. Cojach te'lemut ma'anic tsa' tsejpi ti ojlil. 11Tsa' tili cabʌl mut ti t'uchtʌl ti jini we'elʌl. Abram tsi' nijca majlel.
12Che' bʌ woli' bʌjlel q'uin, tsa' wen wʌyi Abram. Awilan, tsi' wen cha'le bʌq'uen. An ic'ch'ipan bʌ pañimil ba' wʌyʌl Abram. 13Lac Yum tsi' sube Abram: Yom ma' ña'tan muc'ʌch i yajñelob a p'olbal ti lum ba' mach i cha'añobic. Muc'ʌch i yochelob ti majtan e'tel ti' yum. Mi caj i yubiñob wocol jumbajc' jab. 14Pero mi caj c mel jini winicob x'ixicob mu' bʌ i tic'lañob ti jini lum. Ti wi'il mi caj i loq'uelob ti' wenta i yumob yic'ot cabʌl i chubʌ'an. 15Jixcu jatet, ti' ñʌch'tilel a pusic'al mi caj a majlel ba'an a ñojte'elob tsa' bʌ chʌmiyob. Mi caj a mujquel che' wen ñoxetix. 16Jixcu a p'olbal jal mi caj i yajñelob ti yambʌ lum. Ti wi'il mi caj i cha' tilelob ilayi che' i yorajlelix mi cʌq'ueñob i toj i mul amorreojob che' cʌlʌxix, che'en lac Yum.
17Che' bʌ tsa' bʌjli q'uin, che' ac'ʌlelix, awilan, jump'ejl tic'ʌjib am bʌ i buts'il yic'ot xutunte' woli bʌ ti lejmel tsa' ñumi ti ojlil, ba' t'oxbil ti ojlil jini majtan tac. 18Ti jimbʌ q'uin lac Yum tsi' mele xuc'ul* bʌ t'an ti' tojlel Abram. Tsi' yʌlʌ: Mi cʌq'ueñob ili lum a p'olbal c'ʌlʌl ti colem ja' am bʌ ti Egipto c'ʌlʌl ti colem ja' i c'aba' Eufrates. 19-21Jiñʌch i lumal ceneojob, yic'ot cenezeojob, yic'ot cadmoneojob, i lumal heteojob, yic'ot ferezeojob, yic'ot refaimob, i lumal amorreojob, yic'ot cananeojob yic'ot gergeseojob, yic'ot jebuseojob, che'en.
Zur Zeit ausgewählt:
Genesis 15: CTU77
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chol de Tumbalá Bible © Bible Society of Mexico, 1977. Active Translation in Process
