ЛукӀа 14

Киш хуьнилай регьим вине я

1Са Киш юкъуз Иса, фарисейрин кьиле авайдахъ галаз фу тӀуьн патал, адан кӀвализ фейила, ана авайбуру Адалай вил алуд тийиз хьана. 2Исадин патав беден яд кӀватӀ хьунин азарди кьунвай са кас гвай. 3И арада Исади тавратдарривайни фарисейривай: «Киш юкъуз сагъар хъувун дуьз яни-тушни?», – лагьана хабар кьуна. 4Абуру сивяй са гафни акъуднач. Исади гъил хкӀуна а кас сагъарна ва ам рекье хтуна. 5Ахпа Исади инал алайбурувай жузуна:

– Куь хва, я тахьайтӀа яц къуйдиз аватайтӀа, куьне, Киш юкъузни килиг тавуна, ам анай гьасятда акъуддачни?

6Абурувай жаваб гуз хьанач.

Демина хъсан чкайрикай кьиса

7КӀвализ эвернавайбуру къвез хъсан чкаяр хкягъиз ацукьиз акурла, Исади абуруз кьиса ахъайна:

8– Ваз мехъерин межлисдиз эверайла, фена хъсан чка кьаз алахъмир, валайни машгьур касдиз эвернаваз хьун мумкин я. 9Ам атайла, ваз кӀвализ эверайда: «Инал и кас ацукьрай», – лугьун мумкин я. ГьакӀ хьайила, беябур хьана, вун фена лап гьа ракӀарив гвай чкадал ацукьуниз мажбур жеда. 10Амма ваз са межлисдиз ша лагьайла, жув фена гьа ракӀарив ацукь. Гьа чӀавуз иесиди ваз: «Я дуст, акӀ жедач, фена вини кьиле ацукь», – лугьуда. ГьакӀ хьайила, ацукьнавайбурун виликни ваз хатур-гьуьрмет жеда. 11Гьар ни вичи вич вине кьуртӀа, гьам агъуз вегьида, вичи вич агъуз кьурди виниз акъудда.

12Вич илифарай фарисейдизни Исади лагьана:

– Мугьманвилиз эвердайла, вуна ви дустариз, стхайриз, ви мукьвабуруз, девлет авай ви къуншийриз эвермир: абуру вунни илифар хъийида ва куьн кьилера кьил хъжеда. 13-14Амма вуна эвердайла, эвелни-эвел элкъвена ваз хгудай шей авачир къекъверагриз, набутбуруз#14:13-14 Набут – бедендин са ва я са шумуд пай, месела, гъил, кӀвач сагъ тушир кас., кьецӀибуруз, буьркьуьбуруз ша лагь. Гьадалди вун бахтавар жеда. Гьахъ-михьи тир вири инсанрал чан хтайла, ваз Аллагьди хгуда.

Деминиз эвернавайбурукай кьиса

(МатӀай 22:2-14)

15И гафарин ван хьайила, Исадихъ галаз ацукьнавайбурукай сада лагьана:

– Аллагьдин Пачагьлугъда ни фу тӀуьртӀа, гьам бахтавар я.

16Исади жаваб яз лагьана:

– Са инсанди зурба межлис кутуна гзафбуруз эвернай. 17ТӀуьн-хъун ийидай вахт хьайила, ада вичи ша лагьанвайбуруз: «Вири гьазур хьанва, буюр» лугьуз, вичин лукӀ ракъурна. 18Амма эвернавайбур, гаф-чӀал сад авунвайди хьиз, гьар жуьредин багьнаяр акъудиз эгечӀна. Сада адаз «Зун къачунвай чилиз килигиз фин лазим я; ваз тавакъу ийида, закай кефи хамир», – лагьана. 19Муькуьда лагьана: «За вад жуьт яцар къачунва, зун абуру цана чеб гьикӀ тухудатӀа чириз физва; ваз тавакъу ийида, залай гъил къахчу». 20Пуд лагьайда лагьана: «За паб гъанва, гьакӀ хьайила завай къвез жедач». 21ЛукӀрани хтана, вичин агъадиз хьайи-хьайивал ахъайна. КӀвалин иесидиз хъел атана: «Гьерекатна, – лагьана лукӀраз, – фена шегьердин куьчейрайни ккӀарай къекъверагар, набутар, буьркьуьбурни кьецӀибур галаз хъша». 22Са герендилай, лукӀра хтана: «Я Агъа! – лагьана. – Ви эмир кьилиз акъуднава, ятӀани суфрадихъ чкаяр мад ама». 23«Рекьерайни жигъиррай алад, – лагьана агъади, – зи кӀвал ацӀун патал, абур гьанрайни галаз хъша. 24За ваз лугьузва хьи, за эверна татайбуру зи фу недач!»

Тилмизвилин къимет

(МатӀай 5:13; 10:37-38; Мрк. 9:50)

25Исадихъ галаз гзаф инсанар физвай. Ада абурухъ элкъвена лагьана:

26– Зи патав къвезвайда вичин бубадилайни дидедилай, папалайни аялдилай, стхайрилайни вахарилай ва вичин чандилайни гъил къачуна къвезвачтӀа, адакай Зи тилмиз хьун мумкин туш. 27Вуж Вичин азабрин хаш кӀулаз яна, Захъ галаз къвезвачтӀа, гьадакай Зи тилмиз жедач.

28Квекай садаз минара эцигиз кӀан хьайитӀа, сифте ада минарадин къимет, ахпа жувахъ авай такьатар гьисабдачни мегер? 29-30ТахьайтӀа, минарадин бине кутуна, ам эцигна куьтягь тавурла, ам акур вирибур а касдал, «И инсандивай бине кутунвай минара эцигна куьтягьиз хьанач», – лугьуз, хъуьреда.

31Я тахьайтӀа, маса пачагьдин аксиниз дяве ийиз экъечӀзавай пачагьди ацукьна, цӀуд агъзур кас галаз вичивай къад агъзур аскер галаз къвезвай пачагьдин хура акъвазиз жедани лагьана, сифте веревирдер ийидачни кьван? 32Адаз вичивай атӀадан хура акъваз тежедай чӀал чир хьайитӀа, ада, атӀам яргъа амаз, ислягьвилин шартӀарикай меслят авун паталди, адан кьилив вичин векилар ракъурда. 33Куьнни гьакӀ я, куьне квехъ авай-авачирдалай гъил къачунвачтӀа, квекай садакайни Зи тилмиз хьун мумкин туш.

34Кьел хъсан шей я; кьелен ери квахьайтӀа, адаз гьикӀ дад хгуз жеда? 35Ам чил миянар ийизни виже къведач; ам гьакӀ гадарна тада. Нихъ ван къведай япар аватӀа, гьадаз ван атурай!

Zur Zeit ausgewählt:

ЛукӀа 14: ЛезПК

Markierung

Kopieren