ЛукӀа 11

Дуьадикай

(МатӀай 6:9-13; 7:7-11)

1Садра са чкада Исади дуьаяр авурдалай кьулухъ, Адан тилмизрикай сада лагьана:

– Я Агъа! Ягьяди вичин тилмизриз дуьаяр ийиз гьикӀ чирнатӀа, Вунани чаз гьакӀ чира!

2– Дуьа ийидайла, куьне икӀ лагь, – жаваб яз лагьана Исади.

– Буба! Ви ТӀвар пак хьурай!

Ви пачагьвилин вахтни алукьрай!

3 Чаз къвезвай кап гьалал фу це

На чаз гьар юкъуз.

4 Гъил къахчу чи гунагьрилай,

чнани чи бурж алайбурулай

гъил къахчузва эхир.

Чун темягьра твамир Вуна.

5Ахпа Исади абуруз лагьана:

– Лугьун чна, кьуланфериз квекай сада дустунин патав фена, лугьуда: «Къала, дуст кас, буржуна зав кьвед-пуд фу гице. 6Рекьяй зи дуст атана акъатнава, захъ адан вилик эцигдай затӀни авач». 7Дустуни кӀвалин къеняй адаз жаваб гана: «Зун икрагь ийимир, ракӀарарни агалнава, аяларни захъ галаз къатканва; завай къарагъна вав фу вугуз жедач».

8За квез лугьузва: ада ваз дуствилелди фу тагуз хьайитӀа, ви кӀевивал акурла, ада, къарагъна, ваз лазим кьван гуда.

9Зани квез лугьузва:

тӀалаба – квез гуда,

къекъуьгъ – квез жагъида,

рак гатут – квез ахъайда.

10 Гьар ни тӀалабайтӀа, гьада къачуда,

вуж къекъвейтӀа, гьадаз жагъида,

ни рак гатайтӀа, гьадаз рак ахъайда.

11Хци гьуьлуьн гъед це лагьайла, квекай гьи бубади гъетрен чкадал адан гъиле гъуьлягъ вугуда?

12Кака це лагьайла, какадин чкадал акьраб гудани?

13Куьн хьтин писбуру чпин аялриз хъсан савкьватар гуз хьайила, цавараллай Бубадивайни Вичивай тӀалабайдаз Пак Руьгь гуз жедачни мегер?

Иса ва Багьал-Зевул

(МатӀай 12:22-30; Мрк. 3:22-27)

14Садра Исади лалдакай чӀуру жин хкудна. Жин хкатайла, лалдай чӀал акъатна. Халкь мягьтел хьана. 15Са бязибуру лугьузвай:

– Жинерар хкуддай къуват Ада жинеррин кьилевай Багьал-Зевулавай къачузва.

16Муькуьбуру, Ам синагъ ийиз кӀанз цавараллайдавай къалуриз жедай хьтин керемат-ишараяр ая лугьуз адавай тӀалабзавай. 17Амма Исади, абурун рикӀера авайдакай чиз, абуруз лагьана:

– Чеб чпиз акси кьве патал пай хьайи пачагьлугъ ичӀи жеда; къал гьатай кӀвални чӀур жеда. 18Иблисни вич вичиз акси хьайитӀа, адан пачагьлугъди давам гьикӀ гуда? Куьне лугьузва хьи, За жинерар хкуддай къуват Багьал-Зевулавай къачузва. 19За а къуват Багьал-Зевулавай къачузватӀа, куь терефдарри ахьтин къуват нивай къачузва? Куь дуван ийидайбур гьабур хьурай! 20Куьне За жинерар хкуддай къуват Аллагьдивай къачузва лагьайтӀа, – им квел Аллагьди пачагьвал ийизва лагьай чӀал жеда. 21Къуват авайда ва яракь гвайда вичин кӀвал хуьз хьайила, адан мулк саламатвиле амукьда. 22Амма адалай гзаф къуват авайди адал гъалиб хьайитӀа, адавай вичин далу акалнавай яракьни къакъудда, адан эменнини тарашна тулкӀ ийида. 23Вуж Захъ галаз туштӀа, ам Заз акси я; ни Зун галачиз вуч кӀватӀнатӀа, гьам вара-зара ийида.

Жин элкъвена хтун

(МатӀай 12:43-45)

24Жин инсандикай хкечӀайла, ам яд авачир кьурумра вичиз секин са чка жагъун тавурла, къекъвез гьатда. «Жуван кӀвализ хъфин кван», – лугьуда ада. 25Элкъвена аниз хтайла, адаз анаг къакъажнаваз жагъида. 26Гьанлай ам фена, вичелайни бетер ирид маса жинни къачуна, вич кваз хьайи инсандиз гьахь хъийида ва архайин жеда. А жинерар акатай инсандиз авайдалайни пис жеда.

27И гафар лугьудайла, халкьдин арадай са папа ван алаз Исадиз гьарайна:

– Бахтавар я Вун хайи, Ваз нек гайи паб!

28Амма Исади лагьана:

– ЯтӀани, Аллагьдин чӀалаз килигиз, Адан Гафар кьилиз акъудзавайбур а папалайни бахтавар я.

Юнус пайгъамбардин ишара

(МатӀай 12:39-42)

29Исадин патав мадни гзаф халкь кӀватӀ жез хьана. Абурухъ элкъвена, Ада лагьана:

– Къенин несил гьикьван чӀур хьанва! И несилди керемат-ишара тӀалабзава, амма адаз Юнусан керемат-ишарадилай гъейри маса керемат-ишара аквадач. 30Ниневдин агьалийриз Юнус гьихьтин ишара хьанатӀа, и несилдизни Инсандин Хва гьахьтин ишара жеда. 31Кьибле патан пачагь-ханум чилин лап а кьиляй Сулейман пачагьдин камал квай гафариз яб гуз атанай. И несилдиз Сулейман пачагьдилайни ЧӀехидан гафарин ван къвезва. ЯтӀани и несил Адаз акси экъечӀзава. Гьавиляй Къияматдин юкъуз Кьибле патан пачагь-ханумди и несилдиз кар кьада. 32Къияматдин юкъуз Ниневдин агьалийри и несилдиз кар атӀуда. Юнус ам несигьатриз яб гайи Ниневдин агьалийри туба авунай ва несилдиз Юнусалайни ЧӀехидан несигьатрин ван къвезва.

Экв ва мичӀ

(МатӀай 5:15; 6:22-23)

33Гьич садани куькӀуьрнавай шем чинебан чкада, я тахьайтӀа, къапунин кӀаник эцигдач. Ам, кӀвализ гьахьзавайбуруз экв акун патал, шемергандал эцигда. 34Ви бедендин чирагъ вилер я; ви вилер сагъ хьайитӀа, вун экуьнив ацӀана жеда, ви вилер чӀурузваз хьайитӀа, вун мичӀивиле гьатна жеда. 35Килиг ви беденда авай экв мичӀивал яз тахьурай! 36Ви беден вири экуь ятӀа ва адак гьич са чӀулав лекени квачтӀа, вун, чирагъдин экуьник квайди хьиз, михьиз экуь жеда.

Фарисейринни тавратдаррин чӀуру крар

(МатӀай 23:1-36)

37Исади Вичин чирвилер гана куьтягьайдалай кьулухъ, са фарисейди Ам вичин кӀвализ илифарна. Ада атана суфрадихъ Вичин чка кьуна. 38Фу недалди Исади Вичин чин-гъил чуьхуьн тавурла, фарисей лап мягьтел хьана. 39Амма Реббиди адаз лагьана:

– Куьне, фарисеяр, куь къаб-къажахдин винел патар михьзаватӀани, куь къене авайди къанихвални писвал я. 40Эй, ахмакьар! Къен пад халкь авунвайди гьа винел пад халкь авурди тушни? 41Къаб-къажахда авайди кесибриз пая – куьн вири патарихъай михьи жеда.

42Гуж я квез хьанвайди, фарисеяр: пурнийрилай, рейгьандилай ва гьар жуьредин векьер-кьаларилай куьне харж гузва, амма эвелни-эвел авуна кӀанзавай адалатвални Аллагь кӀан хьун куьне рикӀелай ракъурнава! Авуна кӀанзавай важиб авай кар гьа им я, амма муькуь крарни рикӀелай ракъурна виже къведач.

43Гуж я квез хьанвайди, фарисеяр: синагугра аквадай чкаяр кьунал куь рикӀ ала, майданрални – квез куьн гьуьрметдалди тебрикна кӀанда.

44Гуж я квез хьанвайди, куьн кьилихъ къван галачир сурар хьиз я: инсанар ана сурар авайди тийижиз къекъвезва.

45Инал тавратдаррикай сада Адаз лагьана:

– Муаллим! Вуна и гафаралди чи гуьгьуьлрани эцязава хьи?!

46Амма Исади лагьана:

– Квезни, тавратдарар, хьанвайди гуж я: куьне халкьдин кӀула диндин къайдайрин зурба парар твазва, амма а парарик куьне гьич тӀубни кязавач. 47Гуж я квез хьанвайди, куьне куь бубайри кьейи пайгъамбарриз гуьмбетар эцигзава. 48Гьадалди куь бубайри авур чӀуру крар дуьзбур я лугьуз куьне къул чӀугвазва; абуру пайгъамбарар кьена, куьне а пайгъамбарриз гуьмбетар эцигзава. 49Гьавиляй тушни Аллагьдин чӀехи Камалди икӀ лагьайди: «За абурун патав пайгъамбарарни илчияр ракъурда; абурукай садбур абуру рекьида, муькуьбур хурук кутада». 50-51Дуьнья халкь авур чӀавалай инихъ экъичнавай пайгъамбаррин иви, Гьабилан ивидилай гатӀунна Аллагьдин КӀвалинни къурбангандин арада кьейи Зекеридин ивидал къведалди, За а несилдин вилерай хкида. Эхь, лугьузва За квез, а несилдиз вичиз къвезвайди вичел агакьни ийида. 52Гуж я квез хьанвайди, тавратдарар: чирвилерин куьлегар куьне куь гъиле кьунва. Я куьн гьахьзавач, я гьахьиз кӀанзавайбурузни куьне манийвал ийизва.

53Иса анай экъечӀайла, тавратдарарни фарисеяр гужуналди Адаз суалар гуз, Ам кӀеве тваз кӀанз, 54Адан сивяй Адак тахсир кутаз жедай хьтин гаф акъатдатӀа лугьуз, алахъзавай.

Zur Zeit ausgewählt:

ЛукӀа 11: ЛезПК

Markierung

Kopieren