Khuurakikha 12

Khuulaangibwa khwa Iburamu

1 # Makh 10.5; Bur 7.2-3; Heb 11.8 Umukasya waalomela Iburamu ari: “Rura mu linaambo lyoowo, ni mu be muungo mwoowo, ni mu baalebe boowo, utsye mu shibala sheesi ise kane ikhwookese iwe. 2Kane ikhwikyelisemo iwe linaambo lye kamaani, naluundi ikhuwe tsikhabi naabi. Kane ikhole lisiina lyoowo limanyikhane naabi, naluundi kane ikhwikyelise iwe khuuba uwe tsikhabi isi babaandu babaandi. 3#Gal 3.8 Buli muundu yeesi ukane akhuwatsake iwe tsikhabi, nase kane imuwatsake niye tsikhabi, ni nooyo yeesi ukane akhakekho khuukhutsuba iwe, nase kane imutsubatsake niye. Naluundi khuubirira mwiiwe, babaandu boosi be mu shibala, kane bafune tsikhabi naabi.”

4Aryo Iburamu wenyukha waatsya nga Umukasya n'amulomela, ni Loti naye wenyukha waatsya ni naye. Khu mbuka yino iye khukhwaama i Harani, abe Iburamu oolesa kimiiko kamakhumi musaafu na kiraano (75) kye buukhulu. 5Iburamu waatsya n'umukhasi weewe Sarayi, ni Loti, umwaana wa wandaaye, ni buyiindifu bwoosi bweesi baaba ni nabwo, atweela ni baakulwa beesi baabusanisa nga bali mu Harani. Baryo baarakikha lukyeendo lwaabwe lwe khuutsya mu shibala sha Kanaani.

Ne nga boolile mu shibala sha Kanaani, 6Iburamu waakyeendaana waatsya woola i Shekemu, a kuusaala kwe kamaani kwa More. Khu mbuka iyo, babaandu ba Kanaani abe nibo babashiimenya mu shibala isho. 7#Bur 7.5; Gal 3.16Lwanyuma Umukasya waabonekhela Iburamu, waamulomela ari, “Liiswa lino ikhaalikabile babetsukhulu boowo.” Ni abweene awo, Iburamu woombekhawo shisheeso isi Umukasya mweene uwamubonekhela.

8Khukhwaama awo, Iburamu weeloosela waakyeenda waatsya mu ngoongo tsitsiili ibwaama inyaanga wa Beseli, woombekha ibweene iyo lisari lyeewe, akari a Beseli ni Ayi. Ibweene iyo nayo woombekhayo shisheeso, weesaaya Umukasya. 9Lwanyuma Iburamu wenyukha waakyeenda wekhilila nga atsya kwe kumubiimbi kwe Mwaalo#12.9 Kwe Mwaalo: Shaamanyikhana nga Negebu.

Iburamu nga ali mu Misiri

10Imbuka yoola, intsala ingali yaakwa khu shibala sha Kanaani. Niyo yaakila Iburamu atweela n'umukyelama weewe benyukha baatsya khuumenyakho i Misiri imbuka injeekhe iri. 11Ne Iburamu n'aba nga ali aambi khukhwiinjila mu Misiri, waalomela umukyelama weewe Sarayi ari, “Ilala Sarayi iwe uli umukhasi uubonekha buulayi naabi! 12Ni ba Misiri nga baakhuboonekho lwe buulayi bwoowo, kane bashimanye bari uli umukhasi wase, baantsire ise. Ne bakhulekhe iwe ube umulamu. 13#Rak 20.2; 26.7Nashiryo ubaboolela uri, iwe uli umukooko wase, nio baambirise ise buulayi khulwoowo. Ni abweene awo kane bandekhe imbe umulamu.”

14Baryo Iburamu ni Sarayi ni benjila mu Misiri, ba Misiri baabona nga Sarayi ali umukhasi uubonekha buulayi naabi. 15Nga baakhulu ba Faraawo baamubonekho, baatsya baamuruuyila isi Faraawo. Lwanyuma baamuyila mu lubili lweewe. 16Khulwa Sarayi, Faraawo waabirisa Iburamu buulayi naabi, waamuwa kamasheese, tsikhaafu, tsisikilya, baakulwa, ni tsiŋamila.

17Ne khulweesho she khuuyila Sarayi, Umukasya waareera khu Faraawo, ni khu be muungo mweewe buulwaale buubi naabi. 18Lwanyuma lwayo kila Faraawo arumanisa isi Iburamu, waamulomela ari, “Lwashiina ukholile ise shishiindu shishifwaana nga shino? Lwashiina ukhambooleele ise uri umukhasi yuno ali umukyelama woowo? 19Lwashiina iwe walomile uri niye ali umukooko woowo, isho shaakila ise naamuyila niye nga umukhasi wase? Umukyelama woowo uyo. N'umuyile, murure ano mutsye.”

20Aryo Faraawo waalakila basaani beewe bibiwaamba khu Iburamu n'umukyelama weewe. Kila bamulekha waatsya, atweela n'umukyelama weewe, baamulekhela ni bibiindu byoosi byeesi aaba ni nabyo.

Zur Zeit ausgewählt:

Khuurakikha 12: LCE

Markierung

Kopieren