Матфейица бицараб Рохалил хабар 10

10 бетӏер

Гӏисаца халкъалъухъе чапарзаби ритӏула

1Анцӏила кӏиго муридги ахӏун, Гӏисаца гьезие ихтияр кьуна жундул рачахъизе ва кинабго унти, кинабго щокълъи гӏадамазда тӏаса инабизе. 2Гьале гьев анцӏила кӏиявго чапарасул цӏарал: Пётр абун Гӏисаца тӏокӏцӏар кьурав Симон ва гьесул вац Андрей, Зебедайил Якъуб ва гьесул вац Иоанн, 3Филипп ва Бартоломей, Фома ва магъало бакӏарулев чи Матфей, Алфейил Якъуб ва Фаддей, 4Симон Кананит ва хадув Гӏисае хилиплъарав Ягьуда Искариот#10:4 Искариот (Ишкӏерийот) – «Кӏерийот шагьаралдаса чи» абураб магӏна буго гьеб цӏаралъул. . 5Гьев анцӏила кӏиявго чапар витӏана Гӏисаца, гьадинаб насихӏатги гьабун:

– Гьересиаллагьзабазе гӏибадат гьабулел гӏадамазухъе унеб нухдеги лъугьунге нуж, самариязул шагьараздеги хӏетӏе чӏоге. 6Нуж а нух къосун хутӏарал чахъаби гӏадин бугеб Исраилил халкъалъухъе. 7Инеги ун лъазабе Аллагьасул Парччахӏлъи тӏаде гӏунтӏун бугилан. 8Унтарал сахлъизаре, хварал чӏаголъизаре, барасалъ черх бацарал рацӏцӏалъизаре, жундул рачахъе; нужееги чӏобого щвана, нужецаги чӏобого кье. 9Я месед, я гӏарац, я пахьул шагьаби цадахъ росуге; 10таргьа-къвачӏаги босуге, хисизе ретӏелги босуге, хьиталги росуге, гӏунтӏизе гӏунсбиги росуге. Хӏалтӏухъанасе квен хӏалалаб бугелъул. 11Пуланаб шагьаралде яги росулъе щведал, нужго тӏад рещтӏине мустахӏикъав чи валагье ва нахъе инегӏан гьесухъ гьоболлъухъ чӏа. 12Рокъоре жанире лъугьунаго саламги кье. 13Саламалъе мустахӏикъаб рукъ гьеб бугони, биччанте салам гьезде щвезе, гьечӏони – гьеб нужедего буссине биччанте. 14Ваамма нуж къабулги гьаричӏони, нужер рагӏабазухъ гӏинги тӏамичӏони, гьеб рокъоса яги шагьаралдаса къватӏире рахъунаго нужерго хьитаздаса хӏурги кӏутӏун те. 15Хӏакълъун абулеб буго дица нужеда: къиямасеб къоялъ Содомалъул ва Гоморраялъул халкъ гӏемерго лъикӏ букӏина гьеб шагьаралъул халкъалдаса.

16Бацӏазда гъорлъе чахъаби гӏадин ритӏулел руго дица нуж. Борхьал гӏадин цӏодорго рукӏа, маккал гӏадин хӏеренго рукӏа. 17Гӏадамаздаса цӏуне. Гьез нуж тӏадегӏанаб судалде ахӏила, жидерго синагогабазда жанир цӏалаца рухила. 18Дун сабаблъун нуж наибзабазухъе ва парччахӏзабазухъе рачина, гьезда цебеги цогидал халкъазда цебеги дир муридал рукӏиналъе нугӏлъи гьабизе. 19Судалде ахӏидал щибдай бицинаян ургъел ккоге нужеда. Гьебсагӏат нужерго рекӏелъе бачӏараб жо абе. 20Щайгурелъул, нуж гуро гьебмехалъ кӏалъазе ругел, нужер рекӏелъе нужер Инсудасан рещтӏараб Рухӏин кӏалъазе бугеб. 21Вацас вац кьезе вуго чӏвазе, инсуца вас кьезе вуго; жидерго эбел-инсуда данде рахъун лъималаз гьелги кьезе руго чӏвазе. 22Дун сабаблъун киналго гӏадамазда рихина нуж. Амма ахиралде щвезегӏан сабру гӏурав чи хвасарлъила. 23Цо шагьаралда нужее гӏазаб-гӏакъуба кьуни, цоги шагьаралде лъуте. Хӏакълъун абулеб буго дица нужеда: Гӏадамил Лъимер къудратгун вачӏинегӏан Гӏизраилалъул киналго шагьаразде щвезе бажариларо нужехъа.

24Жиндирго мугӏалимасдаса тӏадегӏанав вукӏунаро мутагӏил, лагъги вукӏунаро жиндирго бетӏергьанасдаса тӏадегӏанав. 25Жиндирго мугӏалимасда ващалъани, гӏола мутагӏиласе, жиндирго бетӏергьанасда ващалъани, гӏола лагъасеги. Рукъалъул бетӏергьанасда жундузул ханилан цӏар лъун бугони, гьесул рукъалъул агьлуялда кигӏан квешаб цӏардай лъела. 26Гьедин бугониги, гьезукьа хӏинкъуге нуж! Щайгурелъул кинабго балъгоябщинабги загьирлъулелъул, бахчун тарабги тӏатунелъул. 27Гьаб сардил бецӏлъукье дица нужеда бицунеб бугеб рагӏи бакъул канлъухъе бице нужеца; нужер гӏинзукье дица щурулеб бугебабги тӏохаздеги рахун лъазабе нужеца. 28Нужер черх чӏвазе кӏолезукьа хӏинкъуге нуж, – рухӏ чӏвазе кӏоларелъул гьезда. Нуж хӏинкъа нужер рухӏги черхги жужахӏалъубе рехизе кӏолев Аллагьасукьа. 29Цо пахьул шагьиялъухъ гурищ щолеб кӏиго къадако. Амма нужер Инсул хӏукму гьечӏони, гьезул цонигияб хун ракьалде бортун бачӏунаро. 30Нужер хӏакъалъулъ абуни, бетӏералда чан рас батаниги, гьелги рикӏкӏунин ругел. 31Гьединлъидал нуж хӏинкъуге: киналго къудкуздаса хириял руго нуж. 32Гӏадамазда цебе дир рахъ ккурав чиясул дицаги зобалазда вугев дир Инсуда цебе рахъ кквезе бугебха. 33Гӏадамазда цебе диде инкар гьабурав чиясдаса зобалазда вугев дир Инсуда цебе дицаги инкар гьабила.

34Нужеда ракӏалде ккоге дун ракьалде рекъелги босун вачӏун вугевилан. Рекъелги босун гурев, хвалченги босун вачӏун вуго дун. 35Дун вачӏун вуго васасдаги инсудаги гьоркьоб, ясалдаги эбелалдаги гьоркьоб, нусалдаги якьадалдаги гьоркьоб рикьи ккезабизе. 36Инсанасул тушман ккола гьесул рукъалъул агьлу. 37Дидаса цӏикӏкӏун жиндирго эбел-эмен рокьулев чи ярагьунаро дие. Дидаса цӏикӏкӏун жиндирго лъимал рокьулев чиги ярагьунаро дие. 38Живго тӏад вазе хъанчги баччун, дида цадахъ вилълъунарев чиги ярагьунаро дие. 39Жиндирго гӏумру цӏунун чӏарав чи гьелдаса махӏрумлъила; дие гӏоло гӏумруялдаса махӏрумлъарас гьеб хвасар гьабила. 40Нуж къабул гьарурав чи ккола дунги къабул гьавурав чилъун, дун къабул гьавуравги ккола дун витӏарав Аллагь къабул гьавурав чилъун. 41Гьев авараг вугилан абун, авараг къабул гьавурав чиясе аварагасе гӏадинаб кири щвела. Гьев муъминчи вугилан абун, муъминчи къабул гьавурав чиясе муъминчиясе гӏадинаб кири щвела. 42Дир мурид вугилан абун, цо пуланав, пакъирав чиясе гел цӏун цӏорораб лъим кьуравги, хӏакълъун абулеб буго дица нужеда, кириялдаса махӏрумлъиларо.

Zur Zeit ausgewählt:

Матфейица бицараб Рохалил хабар 10: AvrNT

Markierung

Kopieren