Лука 17
17
Гунагь ляхникан, швумал хьубкан ва хил алдабгъбакан
1Исайи чан ученикариз кӀуру:
– Инсан гунагьвалиъ тӀаъру тямягьяр чарасуз гъиди. Аммаки тямягьяр шлиланмина гъюруш, гьадгъан гьял пис хьибди. 2Думу касдиз, тямягьвал кипну, зяифдарикан саркьан рякъʼан адаайиз, чан гардандиъ рягънин ахал ипну, учв гьюлиз гатӀахьнийиш, ужу шлийи. 3Уягъди гъузай. Эгерки яв чвуччву увуз къаршу гунагьвал апӀураш, мапӀан йип дугъаз, ва эгер тахсир гардандиъ гъибисиш, дугълан хил алдабгъ. 4Сад йигъан увуз къаршу вуди ургуб ражари гунагь ляхин дапӀну, ва ургубан швумал вуза гъапиш, дугълан хил алдабгъ.
5Ученикари Исайиз кӀуру:
– Ич хъугърувал артухъ апӀина, Агъа!
6Агъайи дурариз кӀуру:
– Эгер учвуъ бицӀи дилсибкьан хъугъувал аш ва учву инжирин гьариз: «КудубчӀвну гьюлиъ убс» гъапнийиш, думу учвухъ хъпехъидийи.
Ужудар лукӀар йихьай
7Чаз хутӀил хъапӀру вая маларихъ гъягъру лукӀ ади, думу чюлиан гъафиган, дугъаз: «Гьяракат апӀин, суфрайихъ деъ» шли кӀуру? 8Дугъаз аьксина вуди: «Узуз хябяхъдин хураг гьязур апӀин ва, юкьвʼан идибтӀну, узу ипӀури ва убхъури имиди, узуз гъуллугъ апӀин, хъасин уву ипӀин ва убхъ», пидаринхъа? 9Му лукӀру чан буйругъ тамам гъапӀну пну, дугъаз аферин пидинхъа? Пидар пну, фикир апӀураза. 10Гьаци учвура, учвуз буйругъ дапӀнайи ляхнар тамам гъапӀиган, йипай: «Учу фтинкӀа ккадру лукӀар вуча, гьаз гъапиш учу буржлу вуйиб гъапӀунча».
Хамран аьзар кайидар сагъ апӀуб
11Ерусалимдиз гъюрайи Иса Самария уьлкейинна Галилей уьлкейин арайиъ айи 12саб гъулаъ учӀврайиган, Дугъаз цӀиб ярхласи дийигъну, хамран аьзар кайи йицӀур кас алахъуру. 13Дурари аьхю сесниинди кӀуру:
– Я Мялим Иса! Ич язухъ апӀинава!
14Дурар дяркъну, Исайи дурариз кӀуру:
– Душну учву маллйириз улупай.
Дурар, гъягъюри имиди, уьзрихьан марцц шулу.
15Дурарикан сар, учв сагъ гъашиб дябкъну, Аллагьдин ад за апӀури, кьяляхъ хътакуру 16ва, Исайин ликарикк дахъну, дугъу Исайиз чухсагъул кӀуру. Му Самария уьлкейин агьали вуйи. 17Гьадмуган Исайи гьерхру:
– Учву йицӀридра сагъ гъахьундайинхъа? Имбуну урчӀвур нашди? 18Дурарра гьаз, сар гъураба самариялу ктарди, Аллагьдиз чухсагъул пуз кьяляхъ хътакундар?
19Хъа мугъаз гъапи:
– Гъудужвну гъарах, яв хъугъували уву гъюрхну.
Аллагьдин Паччагьлугъ улубкьуваликан
20Фарисйири, Аллагьдин Паччагьлугъ фила улубкьиди, кӀури, гьерхиган, Исайи дурариз жаваб тувру:
– Аллагьдин Паччагьлугъ рябкъруси гъибдар. 21Ва сарира пидарки: «думу дуфну магьа гьамшваъ а», вая «магьа гьатшваъ а», фицики Аллагьдин Паччагьлугъ ичв арайиъ а.
22Гьацира Исайи ученикаризра кӀуру:
– Гьацдар йигъар гъидики, сад йигъанкьан Инсаниятдин Бай учуз рякъюз ккунийкӀан пидичва, амма рякъидарчвуз. 23Ва учвуз «гьатмагьа гьатушвахь», вая «магьа, гьамушвахь хьа» гъапишра, мягъянай ва мехъерганай: 24фицики кьюркьлин цӀаси, завун саб кӀулихъ крибчубди фици завун тмуну кӀулиз нур тувруш, гьаци хьиди Инсаниятдин Байра Чан йигъан. 25Хъа гъи Думу гизаф аьзабар ккюргъбакк ва гьамусдин наслари нигь апӀбакк ккуркьди. 26Нюгьдин йигъари фици гъабхьнуш, Инсаниятдин Балин вахтарира гьаци хьибди: 27Нюгь гимийиъ эу йигъʼина гъяйиз, вари халкь ипӀури-убхъури, швушвар хури, швуваз гъягъюри гъахьну, хъа вари дюнʼяйиин шид улубчӀвиган, дурар вари пуч шулу. 28Лутдин вахтарира гьаци гъабхьнийи: вари халкь, гъайгъусузди, ипӀури-убхъури, ариш-вериш апӀури, тум убзури, хулар тикмиш апӀури гъахьну; 29хъа Лут Содомдиан удучӀву йигъан завариан цӀинна гугуртин мархь гъубгънийи ва вари тӀанкь гъапӀнийи. 30Инсаниятдин Бай гъафи йигъанра гьаци хьибди.
31Думу йигъан фуж гъваин алди гъашиш, хъа мутму – хулаъ, дурар гъадагъуз хулаз дурушри, фуж хутӀлиъ ади гъашиш, думура дурушри. 32Лутдин хпир кӀваин апӀинай. 33Фуж чан уьмур уьбхюз хъюгъиш, думу дугъу пуч апӀиди, хъа шли думу пуч гъапӀиш, гьадгъу думу чӀиви апӀиди. 34КӀуразачвуз: думу йишван саб аьхникк кьюр хьиди, дурарикан сар гъадагъиди, хъа тмунур гъитди. 35Кьюр хпир ахларихъ хъаш, дурарикан сар гъадагъиди, тмунур гъитди. [36]#17:36 Грекарин саспи БикӀбариъ кӀура: «Кьюр кас хутӀлиъ хьиди, дурарикан сар гъадагъиди, тмунур гъитди».
37Хъа гьадмуган ученикари Исайихьан гьерхру:
– Мици наан хьибди, Агъа?
Дугъу дурариз гъапи:
– Майит наан аш, гьадина люкьярра уч хьиди.
Zur Zeit ausgewählt:
Лука 17: ТабГК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010, 2013, 2016, 2018, 2023
