Tio 4

Uvaʼs tetxhbʼul ikuʼ quBʼaal Jesuus t-paʼv taʼn Satanaas

Kuxh 1.12-13; Luk 4.1-13

1Yaʼne iqʼol vet Jesuus taʼn viTiuxhil Tiuxh tu txʼavaʼ uvaʼ yeʼl xaol jeqlel s-tuul. Tul tzitzi laʼich etxhbʼulik ikuʼ Jesuus t-paʼv taʼn diaavlo. 2Tan aʼetz vet uvaʼs tel kaʼviinqil qʼij, atz kaʼviinqit aqʼbʼal imaqt tibʼ Jesuus tiʼ itxʼaʼon tiʼ inatxhax Tiuxh, tul vaʼy vet Jesuus.

3Yaʼne aqʼbʼ vet diaavlo, u subʼunal, tiʼ tetxhbʼul ikuʼ Jesuus t-paʼv. Tul ech tal diaavlo te Jesuus s-eche: —Oqetz axhxh iKʼaol Tiuxh nik aaleʼ, tul aqʼetz bʼen inqʼa sivan inqʼae s-paan, tul laʼ eetxhbʼu, —xeʼt diaavlo.

4Yaʼne ech tal Jesuus s-eche: —Yeʼle. Tan ech val u yol tzʼibʼamal ka s-eche:

«Jit kuxh taʼn u paan

laʼ itzʼeʼvsan inqʼa xaol.

Pet aʼ laʼ itzʼeʼvsan

inqʼa xaol

jankʼal inqʼa yol

uvaʼ nik tal quBʼaal Tiuxh,»

chich u yol,

—xeʼt Jesuus.#Deuteronoomio 8.3

5Yaʼne iqʼol vet Jesuus taʼn diaavlo tu tenam Jerusaleen, uvaʼ ichʼex quBʼaal Tiuxh s-natxhkʼuulabʼ tetz. Tul yekich jaʼ Jesuus titzʼuten jaʼp iviʼ u tostiuxh taʼn diaavlo.

6Tul ech tal diaavlo te Jesuus s-eche: —Oqetz axhxh iKʼaol Tiuxh nik aaleʼ, tul kʼonietz bʼen eebʼ tzitza qileʼ. Tan ech tzʼibʼamal ka s-eche:

«Laʼ itxhaq tzaan Tiuxh

inqʼa iaanxel tiʼ akoloxeʼ.

Tul yekxh axh tiqʼabʼ

inqʼa aanxel.

Echetz yeʼl avoq

laʼ bʼen akʼonoq kuʼ viʼ

sivan,»

chich u yol,

—xeʼt diaavlo.#Saalmo 91.11-12

7Tul ech tal Jesuus s-eche: —Yeʼle. Tan echatxh nik tal vaʼt u yol tzʼibʼamal ka t-viyolbʼal quBʼaal Tiuxh s-eche: «Yeʼ laʼ utxhi uvaʼ, aʼ ex laʼ bʼekʼon veBʼaal Tiuxh tiʼ ibʼanax invaʼq kam,» chich u yol, —xeʼt Jesuus.{*}#4.7 Nuumeros 21.5-6; Deuteronoomio 2.16, 21. Eche u yol uvaʼ: —Yeʼ laʼ etxhok tul ikʼaʼnal quBʼaal Tiuxh, —chiche. Aʼ nik taleʼ uvaʼ yeʼ laʼ itxhok inqʼa xaol ixeʼt paʼvinoq vatz quBʼaal Tiuxh, oq tootzaql vet inqʼa paʼv uvaʼ yeʼ nik isaʼ quBʼaal Tiuxh laʼ bʼanaxi. Deuteronoomio 6.16; Vibʼanoʼm inqʼa Apoostol 15.10; 1 Koriintios 10.9

8Yaʼne iqʼol Jesuus inpaqte taʼn diaavlo. Tul yekich vet Jesuus viʼ jaʼ val u mamaʼ vitz taʼn diaavlo. Tul ikʼutxh diaavlo tatin inqʼa mam tenam te Jesuus. Atz ikʼutxhat diaavlo vijosqʼilil tatin inqʼa mam tenam vatz txʼavaʼ te Jesuus.

9Tul ech tal diaavlo te Jesuus s-eche: —Jankʼaletzxh inqʼa nik eeleʼ, tan toq vaqʼ see tiʼ abʼant iqʼesalil s-tiibʼa, oq uvaʼ laʼ joqeʼv kuʼ axh sinvatz tiʼ innatxhkʼuulaleʼ, —xeʼt diaavlo te Jesuus.

10Yaʼne ech tal Jesuus s-eche: —¡Palen el sinvatz, Satanaas! Tan ech val u yol tzʼibʼamal ka t-viyolbʼal quBʼaal Tiuxh s-eche: «Taʼn kuxh vaBʼaal Tiuxh laʼ anatxhkʼuula. Atz taʼn kuxh uvaʼe laʼ anima,» chich u yol, —xeʼt Jesuus.#Deuteronoomio 6.13

11Tul bʼen vet diaavlo. Tul aʼ vet inqʼa aanxel ul tiʼ ikʼuulal Jesuus.#Evreeos 2.18; 4.15

Uvaʼs ixeʼt vet quBʼaal Jesuus tiʼ ipaxsal inqʼa bʼaʼnla txhaq yol tuulbʼal Galileea

Kuxh 1.14-20; Luk 4.14-15; 5.1-11; 6.17-19

12Ant atich Jesuus tuulbʼal Judeea, tul tabʼi Jesuus uvaʼ atich vet kuʼ Xhun t-tzeʼ. Tul qʼaʼv vet Jesuus tuulbʼal Galileea. 13Paletz kuxh vet paʼl Jesuus t-Nasareet, tul yekich vet Jesuus atinoq tu tenam Kapernauum titziʼ u mam aʼ Galileea, tal uvaʼ jeqbʼalik inqʼa tij imam Savuloon tuchʼ inqʼa tij imam Neftalii. 14Echetz telaʼpune val u yol uvaʼ itzʼibʼa ka Isaiias, u qʼexsanich tetz viyol quBʼaal Tiuxh, uvaʼ ech nik tal s-eche:

15—Laʼ tabʼi vet inqʼa xaol

viyolbʼal quBʼaal Tiuxh,

inqʼa jeqlel tu txʼavaʼ

uvaʼ jeqlich

inqʼa tij imam Savuloon,

atz uvaʼ jeqlich

inqʼa tij imam Neftalii,

tal uvaʼ atil u nimla bʼey

uvaʼ yekl tziʼ u mam aʼ,

uvaʼ jala el u xaomla aʼ

Jordaan tu tzaebʼ qʼij,

atz uvaʼ tuulbʼal Galileea,

tal uvaʼ jeqlel jolol inqʼa xaol,

inqʼa jit tij imam Israeel.

16Tan jankʼalxh inqʼa xaol,

inqʼa at tuulbʼal

u txʼavaʼ uvaʼe,

tan ayaʼl inqʼae at bʼen

tu tokto.

Poro aʼetz inqʼa xaole

inqʼa qat aqʼbʼ u bʼaʼnil

s-xoʼl,

eche toybʼ invaʼq mam

txiqubʼal.

Atz jabʼiste inqʼa xaol

uvaʼ aʼl vet tok tibʼeyil

u kamchil,

tul aʼetz inqʼa xaole

uvaʼ qat opoon u bʼaʼnil

s-xoʼl,

eche ilitzʼul invaʼq kam

taʼn txiqubʼal,

—chich u yol.#Isaiias 9.1, 2{*}#4.16 Isaiias 9.1, 2. Eche u yol tiʼ u ‹tokto,› tan aʼ nik elkaʼpun tiʼ inqʼa xaol uvaʼ tira yeʼl tootzaqibʼal tiʼ kam laʼ tule taqʼbʼ kʼatz quBʼaal Tiuxh. Pet u txiqubʼal, tan aʼ nik talvat tiʼ quBʼaal Jesuus. Tan aʼ quBʼaal Jesuus kʼutxhul tetz vibʼey quBʼaal Tiuxh, eche invaʼq u txiqubʼal s-aqʼbʼal. Pet u kamchil, tan aʼ nik talvat tiʼ inqʼa xaol uvaʼ, aʼ vet u kamchil kʼaqel taʼn vatz quBʼaal Tiuxh.

17Tzitzietz ixeʼt vet Jesuus tu tenam Kapernauum tiʼ ipaxsal inqʼa bʼaʼnla txhaq yol tiʼ quBʼaal Tiuxh. Tul ech nikich tal Jesuus te inqʼa xaol s-eche: —Itzʼavaq etibʼ t-inqʼa epaʼv, tan xeʼtiy vet vibʼant quBʼaal Tiuxh, uvaʼ tu amlikaʼ, viqʼesalil xoʼl inqʼa xaol, —chichich Jesuus.#Danieel 2.44-45

Uvaʼs pal tiqʼot quBʼaal Jesuus inqʼa txeyol txay tiʼ itxhʼuyeʼv s-tiʼ

18Nikichetz ixaon Jesuus tziʼ u mam aʼ Galileea, tul til Jesuus kaʼvaʼl u vinaq uvaʼ titzʼinich tibʼ. Vaʼl uvaʼ Simoonich ibʼij, uvaʼ xamtich ok ibʼij s-Luʼ taʼn Jesuus; vaʼt uvaʼ Lixhich ibʼij, itzʼinaich tiʼ Luʼ. Sebʼtichaqetz taqʼt bʼen inqʼa ikʼatxh xeʼ u mam aʼ tiʼ itxeyex txay. Tan txeyolich txay inqʼa vinaq inqʼae.

19Yaʼne ech tal Jesuus te inqʼa vinaq s-eche: —Etulvaq. Tul txhʼuyeʼvoqvaq ex s-viʼ. Tan in toq bʼanon uvaʼ ech laʼ emolt inqʼa xaol sinkʼatza, eche nik emolt inqʼa txay, —xeʼt Jesuus.

20Taʼnetzxh tabʼi inqʼa vinaq viyol Jesuus, tul nal kuxh taqʼ vet ka inqʼa ikʼatxh. Tul bʼenaq vet tiʼ Jesuus.

21Bʼiiletz kuxh xaon bʼen Jesuus, tul til Jesuus kaʼvaʼt inqʼa vinaq uvaʼ antxh titzʼinich tibʼ. Vaʼl uvaʼ Jakoovoich ibʼij; vaʼt uvaʼ Xhunich ibʼij; ikʼaolich Sevedeeo s-kaʼbʼil. Tul atichaq ok tuul val u vaarko tuchʼ vibʼaal. Tul sebʼtichaq ikʼoat inqʼa ikʼatxh. Yaʼne sikʼlelaq taʼn Jesuus. 22Tul nal kuxh taqʼ vet ka inqʼa vinaq vibʼaal tuchʼ u vaarko. Tul bʼenaq vet tiʼ Jesuus.

Uvaʼs itxhusun quBʼaal Jesuus, atz ibʼant quBʼaal Jesuus bʼaʼn inqʼa xaol t-inqʼa yaabʼil

23Motx ixaj Jesuus inqʼa tenam tuulbʼal jankʼal Galileea tuchʼ inqʼa vinaq inqʼae. Tul nikich itxhusun Jesuus t-junun inqʼa tenam t-inqʼa kʼulbʼal ibʼ, tal uvaʼ nikich ikʼulvat tibʼ inqʼa tij imam Israeel tiʼ inatxhax Tiuxh. Aʼetz nikich ipaxsa Jesuus vinuqul inqʼa bʼaʼnla txhaq yol, tiʼ uvaʼ, aʼ vet quBʼaal Tiuxh laʼich bʼanon iqʼesalil tatin inqʼa xaol. Tul tira atich tiqleʼm Jesuus tiʼ teesal el kamxh yaabʼilil nikich bʼanon inqʼa xaol, atz kʼuxh kamxh txhoʼmil nikich motx bʼanon. 24Tul paxin vet itziulal Jesuus tuulbʼal Siiria tiʼ vibʼant inqʼa yaabʼ bʼaʼn. Yaʼne motx iqʼol vet tzaan jankʼal inqʼa yaabʼ vatz Jesuus, jankʼalxh inqʼa nikich motx ipal t-txhoʼm, atz inqʼa bʼeeno kuxh nikich motx ikʼaxbʼ taʼn kalabʼaq yaabʼil, atz inqʼa sichʼiʼmxh nikich motx ibʼan taʼn txhoʼm, atz inqʼa atich ok demoonio t-taanima, atz tuchʼ inqʼa kʼulich yaabʼil atich s-kʼatza, atz inqʼa tzeʼuʼxaqich kuxh itxhiʼoʼl t-yaabʼil. Tul tira motx ibʼan bʼaʼn taʼn Jesuus.#Isaiias 53.1-12; 35.5-6; 61.1-3 25Echetz mamala vet xaol okaq bʼen tiʼ Jesuus. Tan okaq vet bʼen inqʼa xaol tiʼ Jesuus, inqʼa tzaj tuulbʼal Galileea, atz inqʼa tzaj tuulbʼal Dekaapolis, atz tuchʼ inqʼa tzaj tu tenam Jerusaleen, atz tuchʼ inqʼa tzaj tuulbʼal Judeea, atz tuchʼich inqʼa xaol, inqʼa een tzajk t-inqʼa tenam, inqʼa atich jala el u xaomla aʼ Jordaan.{*}#4.25 Eche u yol Dekaapolis, tan aʼe u txʼavaʼ uvaʼ at txala el u xaomla aʼ Jordaan, atz txala el u mam aʼ Galileea. Tul aʼ atil tiibʼa jaʼul Pereea. Lavalenetz tenam at tuulbʼal u Dekaapolis. Jit tijaq imam Israeel inqʼa xaol inqʼae. Aʼ inqʼa tename inqʼaa: Damaasko, Iipos, Gadaara, Peeya, Filadeelfia, Jeraasa, Dioon, Kanaata, Rafaana, Esitoopolis. Ayaʼletz inqʼa tename inqʼa aʼ atil vatz el u xaomla aʼ Jordaan.

Zur Zeit ausgewählt:

Tio 4: ixlC

Markierung

Kopieren