Matayu 12

Qezarek Kaiwe Naso Eya Wane Kine

1Mi azoŋgi, Yesu eŋe wit eu keuwoka kitare Qezarek Nasoo arike. Eŋine dokoine eŋe ŋaraenane seukkoi, pakiso eŋe kiyeke more wit woune eya peikeu paki, nekoi. 2Parisi eŋe eya kau paki Yesu olale rakoi, “Kanom, iwa yemo ŋenane ra rokop don eya qebarakeu paki, geŋane dokoŋone eŋe Qezarek Nasoo masi iwa okanmami!”

3Rau Yesuŋo doneene turuŋine mainge iwa yale ra edange, “Ŋine don iwa Dawitŋo mo sogino daleo okange, eya ŋine mi dapore det okanmami me? Eŋe naso yewao eŋe eŋine so ŋeikoune eŋe ŋaraenane seukkoi, na yewa wane ramaile. Kine eya ŋine mi dere qelaŋanmami! 4Eŋe Kaisale wane urum kotino waki paki, eŋine so ŋeikoune eŋe Kaisale wane biŋek kasap motpi metke, eya yemo pris edoka weku yewa ŋine nekei wane raraine, ŋo eŋe siluŋ yaleka eŋe ra rokop don qebarakeu paki, kasap eya nekoi. 5Me ŋine Mose wane ra rokop don eya mi dapore det okanmami. Qezarek naso baŋem Pris eŋe urata wane Bakom Urum koto wa okanmami, eyaŋo ra rokop don eya eŋe qebarak okanmami, yale okanmaike, ŋo eyaŋo sot mi okanmaike me? 6So na iwa yale ŋidanbe detpi, yeye mane eyam na noŋo mo kakapa suwaine okanmaile, Bakom Urum wane wawaine, kine kine yewaŋo Bakom Urum yuwanmaike. 7Kaisale wane ekapŋo iwa yale qe wakone ramaike, ‘Na osomŋo soe soep mire ningei wane, mi simile nanmaike, ŋo wet maepŋo ŋinane keu ŋino korop paki gekei, na eya wane simile nanmaike.’ Ŋine welekatne iwa wane kine mane detlukeu rap, yemo ŋine ŋei sotene midaine, eŋe don umat mane kuteno more mi edanbi rap. 8Onoka wane Ŋei Wawainane Gipole eŋe Qezarek Naso eya wane Waom so oŋo warekaki pamaike.”

Yesuŋo Ŋei Mane Metine Seu Seune Ma Menaŋkake

9Yesu eŋe eya qelige more koso eya ŋine ari Yuda eŋane mat maneo lewa lewaŋ urum maneo waketke. 10Ŋei mane eya metke metine seuseune, so ŋei natne eŋe yewa weneŋ metkoi, eŋe Yesuŋo sot mane okangi kau paki dongo birakakei wane, eso eŋe eya wane Yesu qesonka more rakoi, “Iwa ŋenane ra rokop don qebarake more, Qezarek Nasoo ŋei ma menaŋkakene me dale?”

11Yesuŋo mainge qeson one rake, “Ŋinano ŋine mane eŋe lama mane mageyake, pakimo lama eya eŋe qezarek nasoo lom kiroine maneo kesiyake, pakimo Qezarek Nasoo, daleo okangei, ŋine eya baŋ qesiŋka more ma birau sayake, me ka ŋadeka more qeliŋkau yeine okorayake.” 12“Ŋei me ŋerep mane eŋe lewine suwaine so zok manerop wawaine okanmaike, so eŋe lama mane wane rokop yuwanmaike! Eso yalinane mo, ŋenze ra rokop donzeŋo yemo ŋei natne Qezarek Naso eyao mapik ongenane maine det-ŋonmaike.” 13Yale raki paki ŋei olale rake, “Meteŋone biranom.”

Rakiso eŋe metine biraki ma menaŋkaki metine mane eya wane rokop okange. 14Pakiso Parisi eŋe wiye ari lewage, Yesu qeu seukeyakane don aukoi.

Kaisaleŋo Qelit Ŋeiine Yesu Ma Wakonka Birakake

15Yesu eŋe don so ŋaba ŋaba kine kine eya Parisi edo eŋe okankaikei wane rakoi, eya detki pakiso, mat eya qelige arike, paki ŋei ŋerep loutneŋo giririŋka ŋadino mogare arikoi, eŋe ŋei zomarop eya korop ebuki menaŋ warekoi. 16Pakiso, eŋe ŋei ŋerep natne eŋine don kisiine eya mi edangei wane ra togole one more rawotonge. 17Masi tanik kine kine yale rawotongi paki okangi, Kaisaleŋo don mane propet Isaiya iwa yale olatki qeke, eya wane wele wakonge, 18“Iwa eŋe naŋane qelit ŋei, eŋe noŋo ma wakonkakole, na eŋane zok manerop simin-nanmaike, na eŋane ra more wet maep okanŋungale, weku na eŋane simile-nanmaike, na eŋane zok detpe menaŋmaike. Na baŋ Asune eŋane kutno mosikale, paki eŋe baŋ naŋane kine ma wakon ma wakon don koboboine eya ra qelaŋane more, kepe wane kutno ŋei ŋerep korop edaniyake. 19Ŋo eŋe baŋ kim sorin so busu me don suwaine mi okaniyake, me don ukatine mane suwaine numa suwaino mi raki ŋei ŋerep eŋe desikei. 20Ŋei ŋerep eŋe gim mane togole mida, so kuŋ kuŋine me eŋe mo dumeniyakane okanmaike yale, ŋo eŋe baŋ mi dumeniyake. So lam mane lawe pilik oka okane yale, eŋe mi pilik-lukeyake, eŋe urataine koboboine ma met mage baŋ don urata Koboboineŋo yuwan-kayake. 21So ŋei ŋerep magu mane qelaŋ kisi maepene midaine, yewa korop eŋe baŋ wetene so mali malipene eŋano mot warekei.”

Parisi Eŋe Yesu Wane Rakoi Eŋe Belzebul Asu Qotkoinane Lewetŋo Qesiŋkaki Asu Qotkoine Esoponmaike

22Naso yewao ŋei natne eŋe ŋei mane deine pilik pilikine don mi raraine, eya Yesu wano ma sarikoi, onoka wane eŋe asu qotkoineŋo kotino geke. Yesu eŋe ŋei yewa ma menaŋkake, eso ŋei yewa eŋe eweke more, don maine rake, so deine maine potke. 23Ŋei ŋerep magu suwaine okorakoi, eŋe koropŋo eŋe kau paki, welelepke more qeson nagu rakoi. Eŋe eya Dawit wane ŋaboine, Kaisaleŋo bira-kayakane rake, eya eŋe me?

24Parisi eŋe don eya detpi paki mainge rakoi, “Eŋe asu qotkoine esopongi saketmami, eyamo Belzebul asu qotkoinane lewetŋo zonom mangimo, eŋe asu qotkoine yewa esopongi saketmami.”

25Rau, Yesu eŋe wetenane kine detki paki edane rake, “Ŋine iwa detpi, gavaman kepe mane eyao ŋei eŋe edomka mapoke magu etke okane more, kawali yakuwi rap, baŋ kepe yewa naso kiroine mi okaniyake, siuki rap. So mat mane me ŋei magu mane eŋe oŋomka mapoke magu etke okane, kawali yaku aito okanbi rap, baŋ poripke warekei, paki mat yewa eŋe siukeu rap. 26Eso yalinane magu maneŋo daleo kimaine Ŋei Borikine wane magu mane esop-kayakeo, mi kopkemaike, eŋe yale okaniyakeo, yemo urataine maine mi pa wayake, eyamo eŋe yeine siukeyake! 27Ŋine yale ramami, na asu qotkoine esop-onikalane Belzebulŋo zonom ningi, na asu qotkoine eya esop-onmaile, eya maine welekatneo, yemo na qeson-ŋunmaile, ŋo ŋinŋine dokoŋine eya eŋe yemo maŋo zonom ebongimo, eŋe asu qotkoine yewa esop-onbi qelige saket arimami, ŋinŋine dokoŋine eya edo kineŋine ma wakonmami, yemo ŋine donŋine yewa koboine mida soŋine sot korop okanmami! 28Belzebulŋo mi qesiŋ-nange, midakaka! Iwa yemo Kaisale wane Asu, oŋo zonom ningimo, na asu qotkoine esoponbe saket arimami, eyaŋo kine ma wakonmaike, yemo Kaisale wane qeli gege togon wane nasoine ŋinano mo sari saketwareke.

29“Ŋei maneŋo ŋei togogole mane wane mat koto kito barake waket more, aboŋ kine kineine maine yaup ma ariyake me? Eŋe yale okaniyakane ra, eŋe ŋei togogole eya mikepka ma wokomkaki paki, ŋado yemo maine matine eya kito barake, waket kine kineine eya mat koto pamaike, maine kobu mayake.

30“Ŋei mane eŋe na kima mi okan-naniyake, eŋe na ŋaba-naniyake. Ŋei mane eŋe na qesiŋ nane more lamakopne wekuwoka ebu mi biraoniyake, eŋe welekatne esopongi, yau yaup ari warekei. 31Eya wane na ŋidanbe detpi, ŋei eŋe borikine kine kine natne makei, so don borikine natne rakei, eya wane turuŋene yemo Kaisaleŋo maine bira eboniyake, ŋo ŋei mane eŋe Asu Koboboine eŋane ra more don borikine rayake, yemo sotinane turuŋine mane Kaisaleŋo maine mi biraka maniyake. 32Ŋei mane eŋe Ŋei Wawainane Gipole eŋane ra more don borikine rayake, yemo turuŋine Kaisaleŋo maine bira maniyake, ŋo mane eŋe Asu Koboboine eŋane ra more dere worik okan-kayake, eŋe turuŋine eya Kaisaleŋo mi biraka maniyake, naso iwa gemaineo, me naso qoiqoine ŋado sariyake, yewao eŋe mi bira maniyake, midakaka!”

Eki Welerop Eya Wane Kine

33“Eki wele maine yemo kine, kebaŋine qogine mi seuseune so mi takele bori more gununutne, yemo wele bile qe okanmaike. Eŋe kepo ŋine ŋara bile waraŋ-maikane. Eki welaine eŋe ka more simile dere warekaki wele qeki mane okanmaike, ŋo eki mane eŋe kine sip me samugon edo qekei. Yemo wele mi qe more, metine takele posiki kaki bauine wayake. Eki mane wane kine yemo wele qemaike, eyao ka more desikene. 34Ŋine koma borikinane dokoine, ŋine borikine geu paki mo daleo don maine rakei? Wetŋine borikineŋo watke pamaike, eyaka aŋaŋo ra okanmaike. 35Ŋei maine eŋe dereretine maine kotino pamaike, eya wane eŋe masi tanik maine okan okanmaike. Ŋei borikine mane eŋe dereret qotkoine loutne kotino pamaike, eya wane eŋe masi tanik qotkoine ma okanmaike.

36“Na iwa ŋidanbe, ma wakon ma wakon kaiwe naso qoiqoine, eyao ŋei ŋerep korop eŋe don kine kine yau yaup raraine, korop ra gekoi, eya wane don urata makei. 37Ŋinŋine donŋine eyaŋoka baŋ kine ma wakoniyake. Ma wakongi, sotŋine midaine okanikei, me ma wakongi sot korop okanikene.”

Ŋei Eŋe Yesuŋo Masi Togogole Maki Kakei Wane Sorinkakoi

38Yale edangiso, ra rokop don wane kito ebo ebon natne, so Parisi natne eŋe Yesu olale rakoi, “Kito ŋebo ŋebon, ŋene masi togogole mane manom kakenane ŋonmaike, ge manom kaŋem paki, ŋene raikene ge Kaisale wane urata mamaine.”

39Rau, Yesuŋo edange, “Ukude naso iwa wane ŋei ŋereune yemo borikine, so eŋe weteneŋo Kaisale mi malip kamami, so Kaisale midaine gemami! ŋine masi naso baŋem togogole mane mawe kakeiwane ranan okanmami? Midaka! Masi togogole weku baŋ ŋibongale, yemo propet Yona wano masi togogole wakonge, eya wakongi kaikei. 40Numa weku yewaka Yona eŋe kaiwe karewe so ruwo karewe zawon suwainane wouine koto wete metke, wane Ŋei Wawainane Gipole eŋe yaleka baŋ kaiwe karewe so ruwo karewe kepe koto ket mesiyake. 41Kine ma wakon ma wakon kaiwe naso yewao Niniwe mat welaine ŋei ŋerep eŋe baŋ wiye okorau paki, kineŋine tilekkei, onoka wane Kaisaleŋo Yona eŋano birakake, eŋe Yonaŋo kisi maep edangi dere worikene eya ŋadekka warekoi, na ŋidanbe, kine kine mane iwa, eya yemo Yona wane suwaineine! 42Kine ma wakon ma wakon kaiwe naso, eyao yemo raiwoken ŋine qelaŋ ŋerep oŋo wiye okoraki paki, Waom wane kaitko kine ŋine tilekeyake, onoka wane eŋe kepe kiroine keuwo ŋine kitare lolike numa kiroroine ari mage, Solomon wane dereret koboboine eya detke, so wetine main gemaike, na welekatne ŋidanbe detpi, yewao kine kine mane iwa pamaike, eya yemo Solomon wane suwaineine!”

Asu Qotkoinane Kine

43Yesuŋo donkisi mane edane rake, “Asu qotkoine eŋe ŋei mane wane kotino ŋine sakesiyake, paki eŋe kepe wetataine yewao mat mane maratka ma metpe ra, zuwage ariyake. Ari mat mane mi marat-kayake. 44Paki eŋe oŋomka iwa yale rayake, ‘Na baŋ koso zinge ari, matna qelige sarile, eyao waketkale.’ Eso eŋe koso zinge ari kaki matpa qamen, kotine sino kito mauluk mageumo, mayakatne payake. 45Pakimo, eŋe saket ariki paki, asu qotkoine natne sewen, eŋine rokop mida, qotkokoine ebuki sarikei, eŋe sariu pakimo, mat yewa wane kotino waket gekei. Eso ŋei yewa eŋe alakan borikine geke, wane iwa yemo zok manerop boriluluke geyake. Numa tanik iwamo ŋei ŋerep borikine ukude naso iwao gemami, ŋinano yale wakoniyake.”

Yesu Nagaine So Ŋolekoune Welekatne Eŋe Ma?

46Yesu eŋe ŋei ŋerep don yeka edane okoraki, Nagaine so ŋolekoune lotkekoi, eŋe mat ŋadino qeinat okora Yesu don olatkei wane qesongoi. 47Pakiso ŋei maneŋo olale rake, “Detmaine, geŋane nagaŋone so ŋolekopŋone eŋe qeinat okoramami, so eŋe gerop don aukei wane simin-onmaike.” 48Rakiso, Yesuŋo mainge olatke. “Maŋo naŋane nagane? Diyawa edo naŋane ŋolekopne?” 49Yale raki paki dokoine eŋano metine qesikane more rake. “Onnom! Iwa edo naŋane nagane so ŋolekopne okanmami! 50Ŋei mane eŋe Magane qeliwo gemaike, eŋane simile mogare ge okanmaike, eŋe naŋane ŋonne, so naŋane kiyarone, so naŋane nagane.”

Zur Zeit ausgewählt:

Matayu 12: onsNT

Markierung

Kopieren