Matayu 10

Aposel 12 Eŋane Eŋet Tegoene

1Yesu eŋe dokoine 12 edoraki sari qeturaŋgoi, paki eŋe zonom ebonge, asu qotkoine esoponbi saket arikei wane, so zoma kine kine-enerop so kubet kine kine-enerop ebuwi menaŋ ongei wane. 2Iwa yemo aposel 12 eŋane eŋetene, lewet yemo Saimon, Petoro orake, so eŋane ŋole Andrea, Yakop, so eŋane ŋole Yohane, Zebedi gipoletkine. 3Pilip so Bartolomu, Tomas so Matayu, takis mama, Yakop, Alpius gipole, so Tadius. 4Saimon Patriot, so Yudas Iskariot, oŋo Yesu ŋaba eŋane meto birakayake.

Yesuŋo Dokoine 12 Urata Don Ebonge

5Yesu eŋe dokoine 12, don iwa yale edangi paki tale ongi arikoi, “Ŋine qelaŋ ŋei eŋane kepeo, me Samariya ŋei eŋane mat maneo misuk arikei. 6Eya wane tungo yemo ŋine Yuda wane lama yau yaup ket kere wete ari gemami, Israel ŋei ŋerep magu eŋano ariu. 7Ariu paki don iwa yale edanbi, ‘Qeli gege togon nasoine mo bomile osop sarimaike!’ 8Zomarop ma menaŋongei, seuseune ma wisikae ongei, kubetenerop ebuwi solaene libe qe osiyake, asu qotkoine eya esop onbi saket ariwarekei, ŋine zonom yewa lewine midaine makoi, eya wane ŋine lewine midaine yaup ebongei. 9Ŋine gol natne, me silwa, me wesi mane misuk malo kite ŋino more ma gekei. 10Ŋine kiyeke arikei, naso yewao kite, gerep, eya misuk ma numa arikei, me takot etkeka, me kiye tabe so maun, me qesi etkeka mane misuk magekei, urata ŋei, eŋe onoka wane ŋaŋae more ziyaŋmaike, eyamo yaup lewine midaine manikei.

11“Ŋine mat suwaine maneo me mat nigatne maneo ariu paki, mat koto wau paki onikei, ŋei mane maŋo eweke more don awo ŋuniyake, yemo ŋine eŋeropka mere kito okane ge mage, mat eya qelige arikei. 12Ŋine mat maneo waketpi paki rakei, ‘Peyamŋo gerop pakep.’ 13Mat eya wane ŋei ŋereune eŋe don awo ŋunikeiwo, yemo ŋinane peyam donŋo motpi eŋano payake, ŋo eŋe don mane mi awoŋunikeiwo, yemo ŋine peyam donŋine eya koso ma zinge arikei. 14So mat natne edo me mat suwaine natne edo don mi awo ŋunikei, me ŋinane don mane mi desikeiwo, yemo ŋine mat eya qeliŋgei paki, kiye ŋino lube lube eya sitogeu ket eya mesiyake, ŋei ŋerep eya sotene weneŋ gekei. 15Na welekatne ŋidanbe detpi! Wano wanok kaiwe naso yewao Kaisale eŋe Sodom so Gomora ŋei ŋerep borikine welaine, eŋe seseone more, umat ewekine eboniyake, ŋo mat suwaine donŋine mi detkoi, eya wane ŋei ŋerep eŋe yemo wikile so umat kakapa eboniyake!”

Ŋei Eŋe Yesu Dokoine Dongo Biraone More Engu Kito Baŋ Okanongei

16“Detpi! Na ŋine lama yale, kasi zubaine eŋane keuweno bira-ŋunmaile ŋine diyamŋine seleleine, koma eŋane masi yale makei, so naŋi baluse yale ŋine pelelekatne ŋei ŋerep okan-onikei. 17Diyamŋine togogole makei, onoka wane ŋei eŋe baŋ ŋibu ari dongo bira-ŋungei, so kumunamŋo Yuda lewa lewaŋeno baŋ ŋingukei. 18Ŋine baŋ ŋibu ari ŋei wawaine so ŋei waom eŋane kaitko biraŋunbi, naŋane rau paki don urata makei, yemo eŋe don maine edanmami, so qelaŋ ŋei, Yuda ŋadino gemami edanmami, eya wane wikile desikei. 19Eya wane, eŋe ŋibu dongo bira-ŋunbi, ŋine onoka don rakene, me don daleo baŋ rakene rau paki, dere mezet misuk okangei, don raikei wane naso bomile sariki, don daleo rakei, eya wane numaine yemo baŋ Kaisaleŋo wetŋino mosiyake. 20Ŋine don rakei, yemo baŋ ŋinane mi okaniyake, yemo eŋe baŋ Magaŋinane Asu wano ŋine sari wetŋino more ŋidaniyake.

21“Ŋei eŋe baŋ enŋene weŋem sotak kopene eŋane kine ra dongo biraonbi ebu ari kawali ŋei edo enguwi seukkei, so magakopene eŋe rokop weku yewaka doko kopene okanongei, dokokopene eŋe baŋ zinge naga magakopene ŋaba-ongei paki, ebu ari engukei. 22Ŋei korop eŋe baŋ onoka wane naŋane rau paki qik ŋungei, ŋo mane eŋe togogole malipka okora mageki naso qoeyake mo, Kaisaleŋo ŋei eya baŋ mayake. 23So eŋe mat maneo masi qotkoine okan ŋunbi, so ŋine kakakone more wiye mat maneo arikei, na welekatne ŋidanbe detpi, ŋine urataŋine Israel eŋane mat pamaike, yewao korop mi mawareu qoeyake, eŋe yeka paki Ŋei Wawainane Gipole eŋe sari lotkeyake.

24“Kibi medepŋo kito man maninane suwaine eya mi yuwan-kamaike, me qelit medepŋo ware wareinane suwaine eya mi yuwan-kamaike. 25Eso eya wane kibi medep mane eŋe konapkeki paki, yemo maine kito man manine yale okaniyake, so qelit medep mane eŋe yaleka konapkeki paki, eŋe maine ware wareine yale okaniyake. Na mat wane magaine, borikine welaine, Belzebul norakoiwo, yemo naŋane dokone eŋane eŋetene yemo zok manerop qotkoine edorakei!”

Ŋene Kaisale Wane Weku Kaet Okanikene

26“Eya wane ŋine ŋei eŋane kaet misuk okangei, onoka wane kine kine kaweunerop pamaike, eya baŋ kawet lalaŋgi didiwo wakoniyake, so yeye kine kine sane pamaike, eya mo korop baŋ didiwo wakongi detwarekei. 27Na panaman koto don iwa ŋidanmaile, ŋine yewaka koso kaiweo didiwo rawa-kongei, soŋine don bonepŋine detokangoi, yewa ŋine mat bakine kutnoka okora ra wakongei. 28Solaŋineka qeu seukeyake, ŋei yewa eŋane misuk kaetŋuniyake, yewa edo asuŋine maine mi qeu seukeyake. Ŋo Kaisale wane yemo maine kaet-ŋuniyake, oŋo sola so oŋa oŋaŋine weneŋ orodoŋ maine sora gerepko matali osiyake. 29Ŋine naŋi zowoliliŋ etke eya wan toyaŋo maine qolekei, ŋo siluŋ eŋano ŋine mane Magaŋineŋo mi okki, kepo mi ket kitoyake. 30Eso ŋinane, yemo leweŋine zoune eya wane zaleine yemo korop mo dapotwareke. 31Eso eya wane ŋine kaet misuk okangei, ŋinane ra more Kaisale detmaike, leweŋine yemo zok manerop lewine suwaine, zowoliliŋ loutne eŋane rokop yuwanmaike!”

Yesu Wane Eŋetine Ra Qelaŋangene

32“Mane eŋe na ŋei eŋane kaitko ra qelaŋan-naniyake, na rokop yalewaka Magak qeliwo gemaike, eŋane kaitko eŋe ra qelaŋankakale. 33Ŋo mane eŋe na ŋei eŋane kaitko bisopnaniyake, na yalewaka Magak qeliwo gemaike, eŋane kaitko eŋe baŋ bisopkakale.”

Yesu Eŋe Peyam Ma Wakoniyakane Kepeo Mi Ketke. Eŋe Kawali Wane Pilaŋ Ma Ketke

34“Ŋine naŋane misuk wetke rakei, eŋe kepeo peyam ma wakoniyakane ketke. Midakaka! Na kepeo peyam ma wakongalane mi ketkole, na kawali pilaŋ mane ma wakongalane ketkole. 35Na ŋei mapokonbe poripkekei wane ketkole, eya wane naŋane ra more maga gipon ere ŋaba nagukeik, so naŋane ra more naga boraso ere ŋaba nagukeik, so naŋane ra more ŋerep eŋe atolekopene ŋabaonikei. 36Ŋei mane wane ŋabakoune qotkokoine, yemo baŋ eŋine weŋem sotawekoune edo okankakei.

37“Ŋei mane eŋe eŋine magaine me nagaine wet maep manerop okankaki paki, na nigatnemde okan naniyake, eŋe naŋane biŋek mi geyake. Mane eŋe eŋine gipole me borasine wet maep manerop okankaki paki, na nigatnemde okannaniyake, eŋe naŋane biŋek mi geyake. 38Ŋei mane eŋe kibeŋ qabeŋ ŋine ma tewekki paki, naŋane ŋadeno mi sariyake, eŋe naŋane biŋek mi geyake. 39Ŋei mane eŋe eŋine gegeine wakoniyakane urataine mayake, eŋe baŋ qeliŋgi siuke maniyake. Mane eŋe gegeine naŋane raki paki qaisik kayake, eŋe baŋ wakone maniyake.”

Yesu Wane Ra Kima Maulukone More Eya Wane Lewine Makene

40“Ŋei mane eŋe ŋine ŋibu mauluk ŋuniyake, eŋe na mauluk naniyake, so mane eŋe na mauluk naniyake, eŋe talenangi sarikole, eŋe mauluk kayake. 41Ŋei mane eŋe Kaisale wane propet kima okanka mauluk kayake, eŋe baŋ Kaisale wane propet wane lewet nat parom, eŋe mayake. So ŋei mane eŋe ŋei maine koboboine mane kima okanka maulukayake, eŋe baŋ Kaisale wane ŋei koboboinane lewet nat parom, eŋe mayake. 42So iwa welekatne rawe detpi! ŋei mane eŋe dokone ketkele iwa eŋane keuwo ŋine mane doku momoine mangi neyake, onoka wane eŋe naŋane dokone, eya wane eŋe baŋ welekatne ŋei momoinane lewineine mayake.”

Zur Zeit ausgewählt:

Matayu 10: onsNT

Markierung

Kopieren