Luka 23

Ŋei Edo Yesu Pailat Wane Kaitko Iwenka Arikoi

1Kaunsol ŋei korop eŋe wiye more, Yesu, Pailat kepe ŋei waom wane matko iwenka ari more, 2eya Yesu wane don iwa yale kiyeke rau paki birakakoi, “Ŋene ŋei eya kaŋem ŋei ŋerep magu isi don iwa yale edan okanmaike, ‘Ŋine Roma kepe ware ware suwaine, Sisa, takis misuk manikei,’ so ‘Na Mesiya! Na Yuda wane kepe ware ware,’ yale rake.”

3Pailatŋo eŋane don dere Yesu qesonka rake, “Ge Yuda wane kepe ware ware me mida?”

Yesu eŋe mainge rake, “Oo, mo yewa goŋom ramaine yale.”

4Pakiso Pailatŋo Mosop Ŋei Suwaine ŋetne so ŋei ŋerep magu eya edange, “Ŋei iwa kine kine qotkoine mi make, eya wane na wikile mi manikale.”

5Ŋo Mosop ŋei Suwaine ŋetne so eŋane tego eŋe Pailat togole sorinka rakoi, “Eŋe welekatne ŋei ŋerep qebin mabin okane, sorin borin okanongi, donineŋo kepeze rokopke arimaike. So eŋe ŋei ŋerep kito ebongi, Galili kepeo ŋineka ra kiyeke sari mage iwa Yuda kepeo weneŋ yale waka rokopke wakon arimaike.”

Pailatŋo Yesu Herot Wano Birakake

6Pakimo, Petoro eŋe don eya dere more qeson one rake, “Ŋei iwa eŋe Galili kepeo ŋine me?” 7Pailat eŋe naso yewao iwa yale detke, Yesu eŋe Herotŋo kepe waremaike, nat paromine yewao ŋine, eya wane Pailatŋo Yesu eŋe koso Herot wano birakake, Herot eŋe naso yewao Yerusalem matko geke. 8Herot eŋe naso kiroine Yesu marat kayakane dere geke, eya wane eŋe Yesu kaki paki siminkake. Yesu eŋe masi tanik kine kine manerop kine mane kine mane make, eya Herot eŋe mo loutne detke, eya wane Herot eŋe Yesu wane masi togole mane kayakane detke so wetkeke. 9Yalinane Herot eŋe Yesu qeso qeson loutne manerop qesonkake, ŋo Yesu eŋe don mane mi mainge rake. 10Yale okangi Mosop ŋei Suwaine ŋetne so Kaisale papa togon welaine ŋei, Skribe, eŋe sari Yesu wane don togole rau paki, don uratao birakakoi. 11Rau qoekiso, Herot so kawali ŋeikoune eŋe Yesu maket biraka more isi bela okankau paki, masi kine kine qotkoine loutne okankakoi. Pakiso eŋe Yesu wane laplap mayakakatne wekumane biraka more, Pailat wano koso mainge ari birakakoi. 12Kaiwe yewao, Pailat so Herot ere kima kima okangoik, sogino yemo ere ŋaba ŋaba okan nagu gekoik.

Pailatŋo Yesu Kibego Qekei Wane Rake

13Yesu eŋe zinge sarikiso, Pailatŋo Mosop Ŋei Suwaine ŋetne so Yuda ŋei suwaine so ŋei ŋerep korop edoraki lewage okorau, 14edange, “Ŋine ŋei iwa naŋano iwenka sari remi ‘Eŋe don isisine loutne ŋei ŋerep edan okanmaike’. Naso iwao, na ŋinane kaitko eŋe mo qesonkele, ŋo masi qotkoine mane eya ŋine mo remi, eyamo na mi maratkele. 15Herot eŋe weneŋ yale waka kine kine qotkoine mane mi maratkeke, eya wane ŋei iwa eŋe naŋano koso birakeke, sogino eŋe kine kine qotkoine mane mi make, eya wane na eŋe maine mi qewe seukeyake. 16Iwamo na kawali ŋeikopne edanbe kumunamŋoka dime more qeliŋkau ariyake!” 17Aŋelo loloŋon loloŋon koma korop Pailatŋo ŋei ŋerep eŋane simile mogare mulap ŋeiene mane qelige siwotkaki ari mageke.

18Ŋei ŋerep magu don eya dere more, eŋe korop boka rakoi, “Ge ŋei iwa qenom seukkep! ŋo ge Barabas siwotkanom ŋenano sarikep!” 19Sogino, Barabas eŋe ŋei natne enguki seukkoi so Yerusalem matkoto kawali mane kepe ware ware eŋano maki wakonge, eya wane Pailat wane kawali ŋei edo mulap urumgo birakakoi.

20Ŋo Pailatŋo Yesu siwotkayakane dere more, ŋei ŋerep koso sorinone rake, “Na Yesu maine qeliŋkaikale.” 21Eya wane magu suwaine eŋe kakapaka donine boka mainge rakoi, “Ŋine kibego qeu seukkep! Ŋine kibego qeu seukkep!”

22Ŋo Pailat eŋe atak karewe koso soringe edange, “Ŋine eŋane masi qotkoine make, eya nolatpi detpe! Na eŋane masi qotkoine mane mi marat kamaile, eya wane na eŋe maine mi qewe seukeyake! Na kawali ŋei kopne edanbe kumunamŋoka qe more, siwotkau ariyake.”

23Ŋo ŋei ŋerep magu eŋe Pailat wano togogole boka sorinka more olatkoi, “Ge Yesu kibego qem seukkep!” Ŋei ŋerep eŋe yalewa boka olale more Pailat manerop yuwan-kakoi. 24Eya wane Pailatŋo ŋei ŋerep magu eŋane simile mogare kawali ŋeikoune eŋe Yesu kibego qekei wane detonge. 25Barabas eŋe sogino ŋei natne enguki seukkoi so kawali make, Pailatŋo ŋei eya mulap urumgo ŋine ma sari siwotkaki arike. So Pailatŋo Yesu eŋe ŋei ŋerep eŋane simile mogare kawali ŋei eŋane meto birakake.

Eŋe Yesu Kibego Qeu Seukke

26Kawali ŋei eŋe Yesu iwenka Yerusalem mat ŋadino arikei wane arikoi. Ŋei mane, eŋetine Saimon, Sairini matko ŋine, eŋe Yerusalem wane saiwo ŋine sariki, kawali ŋei eŋe malipka more, Yesu wane kibeŋ manbi teweke, Yesu ŋadino mogatkake.

27Ŋei ŋerep magu suwaine eŋe Yesu mogatkakoi, eŋane keuweno ŋerep natne eŋe Yesu wane ra more arokkoi. 28Yesu eŋe aroene dere more mainge don edan rake, “Yerusalem ŋine ŋerep nau! ŋine naŋane ra more misuk arokkei. Ŋine ŋinŋine so medewekop ŋine eŋane ra more yemo maine arokkei. 29Ŋine detpi, baŋ naso maneo ŋei ŋerep korop iwa yale raikei, ‘Ŋerep eŋe medep mama wane rokop mida, so ŋerep eŋe medep mane mi makoi, ŋerep eŋe medep ŋamu mi gumeongoi, eya eŋe bakom maine kitokei.’ 30Naso yewao, ŋei ŋerep eŋe bonaga edora meŋenone more raikei. ‘Ŋine ŋene maine ket supa ŋonikei.’ Eŋe bonaga nigatne edora meŋenone raikei, ‘Ŋine ŋene motŋonikei’. 31Eŋe naŋano kine kine qotkoine manerop okannanmami, eŋe ŋinano yale waka masi qotkokoine natne baŋ okanŋunikei me daleo? Ŋaba edo kine kine qotkoine naŋano naso iwa okannanmami, yalewaka eŋe baŋ qotkokoine ŋine okanŋunikei.”

32Kawali ŋei eŋe mulap ŋei etke Yesurop iwenore more, etkukei wane arikoi. 33Pakiso kepe eŋetine, ‘Lewet Setne’, eya lotke more, Yesu kine so metine kiruŋaŋo kibego qe more, so mulap ŋei etke Yesu wonino so kanaino etkukoi. 34Pakimo, Yesu eŋe rake, “Magak, ge ŋei iwa eŋane masi so sot turuŋene iwa qeliŋka niget gangep! Eŋe kine kine iwa mamami, eŋe eya mi detlukkamami.”

Yale rakiso, kawali ŋei Yesu wane laplap maloine yewa ma more, masisiŋo kine qe wakon masi wezu mane mau paki bare more, yuwane damo qe more anagukoi. 35Ŋei ŋerep eŋe okora kakoi, Yuda ŋei suwaine don rau paki, isi bela okanka rakoi, “Eŋe ŋei ŋerep natne ma menaŋonge, eŋe Mesiya okane, Kaisaleŋo eŋe birakakeo, eŋe oŋom maine ma menaŋ nagu yake!”

36Kawali ŋei eŋe weneŋ don so isi bela okanka more, wain qotkoine manikei wane sari, 37olatkoi, “Ge Yuda kepe ware ware suwaine okanmaineo, ge maine kibego ŋine kesikene.”

38Pailatŋo kibeŋ kutno kibi iwa yale qeke. “Iwa Yuda Kepe Ware Ware Suwaine.”

39Mulap ŋei mane, Yesurop weneŋ engukoi, eŋe don qotkoine Yesu olale more rake, “Ge Mesiya okanmaineo! Ge geŋone qesiŋ nagu more, ŋere weneŋ qesiŋ ŋotnom me?”

40Ŋo mulap ŋei maneŋo ŋei eya don okanka more rake, “Ge seuseu wane biŋek raraineŋo, Kaisale wane mi kaet ganmaike me? Ge eŋe yale koboboineŋo seukkene me? 41Ŋere mo sogino kine kine qotkoine makote, eya wane ŋere maine seukkete, ŋo ŋei iwa eŋe kine kine qotkoine mane mi make.” 42Ŋei eyaŋo koso zinge Yesu olatke, “Yesu, ge zinge sari kepe ware ware suwaine okanikene, naso yewao na weneŋ siluŋ mide detsorok nanikene.”

43Yale raki, Yesuŋo olatke, “Na welekakatne golatmaile, ge ukudeka narop qeliwo gege togon matko weneŋ mesikete.”

Yesu Eŋe Seukke

44Kepe deine oŋabango okangi, kaiwe mi sirike more, kepe eya korop panamane paki, ari 3 kilok kaiwe koso sirikke, 45naso yewao laplap suwaine Kaisale wane Bakom Urum kotino okorake, eya keuwoka bun tuk wiri sari ketki qela qoeke.

46Pakiso, Yesu eŋe boka rake, “Magak, ge naŋane asu oŋa oŋane eya na mo meteŋono motmaile, ge maikene!” Yale ra more asuine saki seukke.

47Yesu eŋe seukkiso, kawali wane ŋei ŋetne mane eya eŋe ka more, Kaisale eŋetine mawakaki paki rake, “Welekatne, eŋe ŋei wele koboboine so wekumane!”

48Pakiso, ŋei ŋerep magu eŋe kine kine wakonge, eya kaikei wane sarikoi, eŋe Yesu seukki dere more, qom borik ongi, so mateno zinge ariwarekoi. 49Ŋei ŋerep eŋe Yesu detlukkakoi, eŋe so ŋerep natne Galili ŋine mogatkakoi, eya eŋe korop osop osop okora masi tanik wakonge eya, korop kawarekoi.

Yosep Eŋe Yesu Pareŋine Kezem Koto Motke

50-51Ŋei mane, eŋetine Yosep, Arimateya mat, Yuda kepeo ŋine, eŋe ŋei koboine, ewinerop. Eŋe Kaisale wane qeli ewe zonom sari sari wane toma geokange. Eŋe Yuda Kaunsol okorake, ŋo Kaunsol eŋe don kine kine ra more, Yesu don togoleka okanka more makoi, eŋe mi oŋge. 52Ŋei eyaŋo Pailat wane kaitko ari lotke more, Yesu pareŋine maine ma ari dukkayake me daleo, eya wane qesonkake. 53Pailat eŋe oŋ rakiso, Yosep eŋe ari laplap mane libeka qoleke, laplap eyaŋo Yesu wane pareŋine makokka more kawetkaki paki, deŋesereo ma ari kezem koto motke. Lom yewa ŋei maneŋo mo wesi weku suwaine eya wane bano yasoki okorake, sogino ŋei mane yewao mi dukkakoi. 54Naso yewa mo nagapko, sogino sarereo Yuda edo qezareko metkoi, eya wane nagapko eŋe Yesu wesi kezemgo birakake.

55Pakiso ŋerep eŋe Yesu Galili ŋine mogatkakoi, eŋe Yosep mogatka more, kezem so Yesu pareŋine dalino paki, eya kakoi. 56Pakiso, mateno zinge ari more, kelok kine kine qounerop maulukkoi.

Kaisale wane ra rokop don pake, eya wane eŋe qezarek naso sarere, eyamo yaup metkoi,

Zur Zeit ausgewählt:

Luka 23: onsNT

Markierung

Kopieren