Luka 18

Ŋerep Mala So Wano Wanok Ŋei Erane Don Rokop

1Pakiso Yesu eŋe dokoine don rokop iwa edange. Eŋe eŋine dokoineŋo Kaisale wano naso baŋem mi pelekeu paki, togole more meŋenkaikei wane edange. Eŋe meŋe meŋen urata maine mi qeliŋkaikei, eya wane eŋe don rokop eya iwa yale kito more dokoine edange, 2“Mat maneo wano wanok ŋei mane geke, eŋe Kaisale wane mi kaetkake, so eŋe ŋei mane wane yale waka mi kaetkake, 3pakiso ŋerep ŋaune seuseune maneŋo mat yewao geke. Eŋe wano wanok ŋei eŋano atak loutne sari meŋenka iwa yale rake, ‘Ŋabaneŋo naŋano masi borikine make, ge na mapik nanikene!’ 4Naso kiroroine okangi, so wano wanok ŋei eŋe mi mapik kayakane rake, ŋo, naso kiroroine okangiso, eŋe iwa yale wetino detke, ‘Na Kaisale wane mi kaet nanmaike, so na ŋei mane wane ewine mi kitomaile, 5Ŋo ŋerep iwa, eŋe naso baŋem sari more qesonnane more, sorinnane umat suwaine ninge, eya wane na eŋe mapik kaikale. Na mi mapik kaikaleo, eŋe sari meŋennan mageki, na eŋane don wane zok bauwawa okanikale!’ ”

6Yesu eŋe don kisi eya ra more, takotke edange, “Ŋine wano wanok ŋei qeguŋ maguŋine, eya wane don detkakei. 7-8Yalewaka, ŋine Kaisale mapik ŋuniyakane eŋano kaiwe so ruwo naso baŋem sorin borin aroke meŋenkaikei. Eŋe eŋine ŋei ŋerewekoune wanokone more, ikopka mapitoniyake, ŋo Ŋei Wawainane Gipoleŋo kepo koso zinge sari more, ŋei ŋerep eŋe Kaisale malip kamami, eya maratoniyake, me mida?”

Parisi Ŋei So Takis Mama Ŋei Erane Don Rokop

9Naso yewao, ŋei ŋerep natne eŋe Yesu wane don desikei wane sarikoi, eŋe weteno iwa yale detkoi, “Ŋedomka koboboine gemaine, ŋei ŋerep natne eŋe yau yaup gemami.” 10Yesu eŋe wet dereret eya dere more, don rokop iwa edane rake, “Naso maneo, ŋei etke ere Kaisale wane Bakom Urumgo meŋen kaikeik wane arikoik, ŋei mane eŋe Kaisale wane papa togon welaine ŋei, Parisi mane, ŋei mane eŋe takis mama.

11“Parisi eŋe eŋinane detki waki, koŋka okora iwa yale ra meŋenkake, ‘Na kaŋ bap suwa mida, na masi isisine mi mamaile, na ŋei mane wane ŋanomine kobu mi mamaile, ŋei ŋerep natne eŋe masi qotkoine eya ma okanmami. Na eŋe yale mi okanmaŋkale, eya wane na Kaisalene eŋetŋone bukewe wamaike. Na takis mama ŋei borikine yewa, eŋe yale mida! Na eŋane masi qotkoine mi mogatmaŋkale. 12Soda baŋem eya wane kotine kaiwe etkeka etkeka na ŋara sawe gemaile. Naŋane wesi aboŋne korop, eya na 10go ŋine weku geŋane biŋek qewaremaŋkale, eya wane na Kaisalene eŋetŋone bukewe wamaike.’

13“Ŋo takis mama ŋei eŋe deine qeliwo mi potki ariki, okora more qomine boriki so rake, ‘Na ŋei qotkoine, Kaisale, ge naŋane qomŋone borikep!’ ” 14Yesu eŋe donkisi raki, qoekiso edange, “Na ŋidanmaile, Kaisaleŋo takis mama ŋei eŋane sotine qeliŋka nigetkake. Eŋe Kaisale wane kaitko koboboine okorake, ŋo Kaisaleŋo Parisi eya wane sotine mi qeliŋka nigetkake. Ŋei maneŋo eŋine eŋetine maki suwayakane okaniyake, yemo Kaisaleŋo ma ket birakayake, ŋo ŋei maneŋo eŋe eŋine eŋet biŋekine ma kesiyakeo, yemo Kaisaleŋo ŋei eya ma wa birakayake.”

Yesu Eŋe Medep Nigatne Mosoponge

15Ŋei ŋerep natne eŋe dokoene Yesuŋo metineŋo kuteno more mosop oniyakane ra more, eŋano ebu sarikoi, pakimo Yesu wane dokoine eŋe ŋei ŋerep one more rawetongoi. 16Ŋo Yesu eŋe medep nigatne eŋano sarikei wane edorake, “Qeliŋonbi! Medep nigatne eya naŋane osono maine sariu, ŋine misuk rawetonikei, Kaisale eŋe ŋei ŋerep medep nigatne iwa yaline eŋane rokopko wareoniyakane siminkake. 17Ŋine don iwa detsoroke detlukkei, medep nigatne eŋe Kaisaleŋo ware-oniyakane simin-onmaike, ŋo ŋei natne eŋe Kaisaleŋo ware-oneyakane mi simin-onmaikeo, eŋe Kaisale wane gege togon kepe eya wane kotino mi wakesikei.”

Ŋei Aboŋine Suwaine Eŋane Donkisi

18Yuda ŋei ŋetne mane Yesu wano sari qesonka rake, “Kito ŋebo ŋebon maepne, na dalino okane more, naso baŋem gege togon maratka gemaŋkale?”

19Yale rakimo, Yesuŋo olatke, “Ge onoka wane na ‘Mayakatne’, noramaine? Kaisale wekuŋo mayakatne. 20Ge Kaisale wane papa togon don detmaine, ŋire ŋao ŋanom mi bira nagukeik, so ŋei me ŋerep mane misuk maikeik. Ge ŋei mane mi qenom seukeyake. Ge kobu mi maikene. Ge ŋei mane mi ma baikkaikene. Ge nabok magak erane bango ge more, erane don dereret tewek okanikene.”

21Ŋei yewa eŋe rake, “Kito ŋebo ŋebon, na mo medepnoka Kaisale papa togon don eya mane mi qeliŋkakole, mo korop okane gesakole gemaile iwa.”

22Yesu eŋe don eya dere more olatke, “Ge kine kine weku mi okanine, eya ge makoboenom. Ge ari more aboŋŋone korop eya ŋei natne ebonnom wesi ginbi ma more, wesi yewa ŋei aboŋene midaine eŋe qika ebonikene, eso yalinane ge baŋ qeli wane aboŋ togogole maratkaikene. Pakiso geŋone sari ŋadeno mogatnane sarimaŋkene.” 23Ŋei yewa eŋe don yale dere more, wet dereretine umareki qelige arike. Eŋe wesi aboŋine maune loutne zok manerop pa mange, eya wane.

24Yesu eŋe ŋei eya wane dere umat dere more rake, “Ŋei yaline wesi aboŋene suwaine, eŋe Kaisaleŋo ware oniyakane raikei, ŋo eŋe zok urata suwaine ma more aboŋene qeliŋka more Kaisale wane qeli gege togon numa mogasikei. 25Kamel eŋe samap wane aŋauno wakesikei wane eya mo urata suwaine mida, ŋo baliŋa ŋei eŋe Kaisale wane qeli ewe zonom so gege togongo wane rake, eyamo eŋe zok urata suwaine, zok manerop ma more aboŋine qeliŋkayake.”

26Ŋei ŋerep natne eŋe don eya dere more, Yesu qesonkakoi, “Ge ramaine, Kaisaleŋo baliŋa ŋei maine mi wareoniyake, yale okangi, ŋei ŋerep ketkele gemami, eya eŋe weneŋ Kaisaleŋo mi wareoniyake me?”

27Yesu eŋe mainge rake, “Kepeo ŋei ŋerep ŋine ŋaŋaemami, ŋo Kaisale wekuŋo mi ŋaŋaemaike, Kaisale eŋe kine kine korop ma wareyakane, eŋe maine mi qekayake.”

28Pakiso, Petoroŋo Yesu olatke, “Detmaine, ŋene kepe matze so kine kineze qeliŋone more, ge mogat gangone.”

29Yesuŋo rake, “Na don wele ŋidanmaile, ŋei mane eŋe Kaisale wane ra more, mat me ŋanom medep, me tatiŋon, me nabok, me magak qeliŋonware more, eŋe sari na mogat naniyakeo, 30eya wane turuŋine Kaisaleŋo naso iwao kepeo mo geke, eya yuwane more, zok manerop makoke maniyake, so baŋ koso nasoo ŋado eŋe gege togon kiroine manerop maratka takotke mangi ge ari geyake.”

Yesu Eŋe Koso Atak Mane Seuke More Wiyekane Rake

31Yesu eŋe dokoine 12 yewa koso ebu qeduguone more edange, “Detmami, ŋene wa Yerusalem ariŋem. Kaisale wane qelit ŋeiŋo Ŋei Wawainane Gipole ra more kine kine korop kibi qekoi, eya korop wakoniyake. 32Ŋei natneŋo Yuda ŋadino eŋane meteeno birakaikei. Pakimo, ŋei eya eŋe don isi masirakinerop okane more, sopotka more 33kumunamŋo qe more, kibego qeu seuke more, kaiwe mama karewe deŋesereo pa more, eŋe koso wisikae wiyeyake.”

34Yesu eŋe kine kine iwa rakiso, dokoine eŋe mi detlukwarekoi, Kaisaleŋo don eya wane kine motkeke, eya wane eŋe mi detlukwarekoi.

Yesu Eŋe De Pilik Ma Menaŋkake

35Yesu so dokoine eŋe Yeriko osino lotkekoi, ŋei mane deine pilik pilikine eŋe ŋei ŋerep edo wesi aboŋ natne qesiŋkaikei wane meŋenone more, boka woka metmaŋke. 36Eŋe ŋei ŋerep magu eŋane don ukat dere more qesonone rake, “Eya onokaka?”

37Ŋei ŋerep magu keuwo ŋine natne eŋe olatkoi, “Yesu, Nazaret matko ŋine, eŋe mo iwa sarimaike.”

38Eŋe yale dere more boka rake, “Oo, Yesu, ge Dawit wane ŋaboinane ŋetne, eya Kaisale eŋe mo rake, yewa bira gangi ketkone, ge naŋane wetŋone borikep!”

39Ŋei ŋerep magu yewa eŋe ŋei de pilik eya kuroŋka more rakoi, “Ge aŋaŋone ma wonge metnom!” Yale rau, eŋe soringe togoleka koso boka rake, “Dawit ŋaboinane ŋetne, ge siluŋ naŋane wetŋone borikep!”

40Yale ra bokaki, Yesu eŋe dere more, doŋ mane okora edane rake, “Ŋine ari ŋei yewa ma sariu.” Pakimo ŋei eŋe Yesu wane osino lotkekiso, Yesu eŋe qesonka rake, 41“Na ge dalino okan ganikalane ramaine?” Ŋei eŋe mainge rake, “Waomne, na dene koso posikalane ramaile.”

42Yesu eŋe olatke, “Ge deŋone pore kanom, ge naŋano mena menaŋ wane zonomne detlukka more, malipnannom paki, eya wane menaŋmaine.”

43Yale raki, yewaka ŋei eya deine lotkeki pore ka more, Yesu mogatka more, Kaisale wane eŋetine buke wake, pakimo, ŋei ŋerep magu eŋe masi togole eya ka more, Kaisale wane eŋetine weneŋ bukeu wake.

Zur Zeit ausgewählt:

Luka 18: onsNT

Markierung

Kopieren