Yohane 18

Yesu Ma Lukkakoi

1Yesu eŋe meŋe meŋen iwa meŋenkaki qoeki mat yewa qelige dokoine eŋerop arikoi. Eŋe ari Kidron doku roino yuwane ket kito erinat wakoi. Kepe yewao eu mane pake, eso Yesu eŋine so dokoine eŋe eu yewa wane kotino waketkoi. 2Yudas Yesurop kima isi isi okangi makei, eŋe eu yewa mo detke, onoka wane naso baŋen Yesu eŋe eu yewa ari dokoine marat onmaŋke. 3Yalinane Yudas eŋe eu koto arike. Eŋerop ebuki arikoi, yemo kawali ŋei magu mane so bakom urum wane diyam gege tebe ŋei, eŋe pris suwaine edo biraonbi arikoi, so Parisi natne, eŋe kawali aboŋ weneŋ peike arikoi, eso lam so kiwa weneŋ makoi. 4Yesu eŋe masi kine kine korop daleo wakon kayake eya mo korop detwareke. Eso eya wane eŋe osoeno ari qesonone rake, “Ŋine ma zuwaŋkamami?”

5Eŋe donine mainge more rakoi, “Ŋene Yesu Nasaret welaine zuwaŋ kamaine.”

Yesu eŋe doneene turuŋine mainge edane rake, “Na iwa.”

Ŋo Yudas, balip matiwan, kima isisi ŋei, eŋe yewa eŋerop weneŋ okorake, 6Eŋe dere okorau, Yesu eŋe edane rake, “Na iwa.” Raki eŋe ŋade ŋade ari more kepo ket rasu pakoi. 7Yale okanbi Yesu eŋe koso manerop qeson one rake, “Ŋine ma zuwaŋkamami?”

Eŋe rakoi, “Yesu Nazaret mat welaine.”

8Yesuŋo edange, “Na mo ŋidanile, na iwa. Ŋine na zuwaŋ nanmamiwo yemo natne iwa eŋe qeliŋonbi ariu.” 9Yesu eŋe iwa rake yemo alakan meŋenka rake, eya wane wele wakoniyakane iwa rake. “Magak, ge ningone eŋano ŋine weku mane mi qeliŋkawe siukke.”

10Saimon Petoro eŋe pilaŋ mageke, Eya wane eŋe maki paki Pris Suwainane qelit medep qe more ketne woninoken yewa kito qokke. Qelit medep eya eŋetine Malkus. 11Yale okangi, Yesuŋo Petoro olatke, “Pilaŋŋone yewa koso biranom kaweuno wetekep! Ge Maganeŋo wikile naso more ninike, yewa mi makalane wetkemaine me?”

Yesu Anas Wane Kaitko Birakau Okorake

12Kawali ŋei magu enŋene so ware wareene weneŋ so Yuda ŋei eŋane tebe ŋei edo Yesu ma muga mugaŋo lukkakoi. 13Pakiso mikepka Anas wano ma arikoi. Eŋe Kaiyapas wane atpine, eŋe koma yewao Pris Wawaine geke. 14Kaiyapas oŋo Yuda ŋei edane rake, “Ŋei weku oŋo maine ŋei ŋerep korop eŋane turuŋene seukeyake.”

Petoroŋo Yesu Bisopkake

15Saimon Petoro so medepine mane ere Yesu ŋadino mogare arikoik, medepine mane yemo Pris Wawaineŋo eŋe mo det lukkake, eya wane ere Yesurop Pris Wawainane sen koto waketkoik. 16Ŋo Petoroŋo yemo mat ŋadino madet osino metke, medepine mane, Pris Wawaineŋo detlukkamaike, eŋe koso zinge sari sen ŋadino saket more madetko ŋerep mane okorake, eŋe olatki paki Petoro wetinat senkoto iwenka waketke. 17Ŋerep madet ware ware oŋo Petoro olale rake, “Ge ŋeiwa eri wat na eŋane dokoine eŋano ŋine mane iwa ge me?” Petoroŋo rake, “Midaka, na mida.”

18Kepe momoine okangane qelit medep so tebe ŋei eŋe koropŋo gerep puwanbi zeki, lolikka more qenagare okorakoi, Petoro eŋe waketki pakiso, eŋerop okora gerep qenagatke.

Pris Wawaineŋo Yesu Qesonkake

19Pris Wawaine eŋe Yesu dokoine eŋane so ŋei ŋerep don dereret natne kito ebo okanmaŋke, yewa wane qesonkake. 20Qesonkaki, Yesuŋo iwa yale mainge olatke, “Na naso baŋen don didiwo ra ŋei ŋerep edan okanmaŋkole, naŋane kito ebo ebonne yemo korop lewa lewaŋ urumgo so bakom urumgo Yuda ŋei sari qeturaŋ-maŋkoi, yewao didiwo edan maŋkole. Na don mane sanka qe wazae mane siu siuko mi ramaŋkole. 21Paki mo ge onoka wane na qeson-nanmaine? Ŋei ŋerep pa don edanbe det okangoi, eŋe qeson onnom, na don ra okangole yemo korop edo mo detmami.”

22Yesu eŋe don iwa raki, diyam gege eŋano ŋine tebe ŋei mane yewa okorake, oŋo mete tabeŋo qeki paki rake, “Goŋo Pris Wawaine don yaline olatmaine me?”

23Yesuŋo mainge olale rake, “Na don qotkoine ramaileo, yemo ŋei ŋerep iwa daleo ramaile eya edannom. Ŋo siluŋ na don rele yemo don maine, Paki mo ge onoka wane nekumaine?”

24Eso Anasŋo taleongi, Yesu mulap wokom kakoi, siloke more so iwenka Kaiyapas, Pris Wawaine eŋano ma arikoi.

Petoroŋo Yesu Koso Manerop Bisopkake

25Petoro eŋe yewaka gerep qanagare okorake, eso natne eŋe qesonka rakoi, “Ge ŋeiwa eriwat wane medep mane iwa ge me?”

Ŋo Petoro eŋe bisopkeki paki rake, “Midaka, na eŋane medep mida.”

26Pris Wawainane qelit mama medep mane, eŋane weŋem sotak ŋei mane, eya Petoroŋo ketne nat pilaŋŋo kito qokke, oŋo rake, “Ge eŋerop euwo genom na mi ganile me?”

27Koso manerop Petoroŋo rake, “Midaka, na mida.” Yale rakiso yewaka tiyak mane bokake.

Yesu Pailat Wane Kaitko Okorake.

28Eŋe Yesu Kaiyapas wane matko ŋine mau paki Pailat wane matko ma arikoi, eya mo tutupko so sakoka yewao, Yuda ŋei eŋe ware ware wane matkoto mi wakoi, onoka wane eŋe edomka sauke mauluknaguwi paki Kaisaleŋo loloŋ onge eya wane Peyadaino ŋara weneŋ maine mere nekeiwane yale okangoi. 29Eso Pailat eŋe qeinat ketki paki qeson one rake, “Ŋine ŋei iwa onoka wane dongo birakamami?”

30Eŋe iwa yale mainge rakoi, “Eŋe sot mane mi okangirap yemo ŋene eŋe geŋano mi ma sariŋem rap.”

31Pailatŋo edane rake, “Ŋine ŋidomka mau paki ŋin ŋine ra rokop Don ŋinane rokopko dongo birakau.”

Yuda ŋei eŋe mainge rakoi, “Ŋene ŋei mane mi qeŋem seukeyakane mo rawet ŋonge.” 32Masi iwa wakonge, yemo Yesu eŋe seuseu daleo seukeyakane rake, don eya wane weleine wakoniyakane yale wakonge.

33Pailat eŋe mat koto zinge waketke, paki Yesu oraki waki qesonka rake, “Ge Yuda ŋei eŋane ŋei Waom me?”

34Yesuŋo mainge olatke, “Qeso qeson iwa geŋono ŋine sarimaike me ŋei natne edo naŋane ra golatmami?”

35Raki Pailatŋo olatke, “Ge naŋane ramaine eŋe Yuda ŋei? Iwa yemo geŋone ŋei kopŋone so ŋetne kopene pris edo ge naŋano geu sari biraganimi. Ge onokaka makone?”

36Yesuŋo rake, “Naŋane ŋei waom gegene eyamo kepe iwa wane biŋek mida, naŋane ŋei waom gegene eyaŋo kepe iwa wane biŋek ra yemo ŋei-kopne eŋe mapit-nanbi, Yuda eŋe baŋ na maine mi neuwi-rap, yemo midaka, ŋo iwa yemo na kepe iwa wane waom midakaka!”

37Eso Pailatŋo qesonka rake, “Paki mo ge ŋei waom me?”

Yesuŋo mainge olatke, “Mo goŋom ramaine, na ŋei waom. Na wakonbe paki kepeo sari lotkekole, yemo kine weku iwa yale wane, don wele ra qelaŋan galane ketkole. Ŋei mane eŋe don wele kima okanka okanmaikeŋo yemo naŋane don det okanmaike.”

38Pailatŋo qesonka rake, “Don wele eya mo onokaka? Kepe ŋeika eya wane don wele mane daleo det kayake? Don korop wele midaine!”

Yesu Seukeyakane Pailatŋo Rakokkake

Pakiso Pailat eŋe koso qeinat Yuda ŋei eŋano ketki paki edane rake, “Na eŋane sot mane dongo birakaikenane mi marat kamaile.” 39Ŋo ŋinane masiŋine mane ma ge okan okanmami, yemo na loloŋon loloŋon Peyadao naso baŋem mulap ŋei mane ŋinane siwotka ŋibon okan okan maŋkale. Wane ŋine Yuda ŋei waom siwotka ŋibonikalane ŋunmaike me?

40Eŋe aro koli boka kito kaŋ kuroŋ suwaine manerop kakapa okane more, qazom romatkeu dumengi mainge olale rakoi, “Mida, eŋe midaka! ŋene Barabas siwotka ŋebonikene!” Barabas eŋe ŋei enguki paki aboŋene kobu mamaŋke.

Zur Zeit ausgewählt:

Yohane 18: onsNT

Markierung

Kopieren