Aposolo 5
5
Ananiyas So Sapira Erane Don Kisi
1Ŋei mane geke, eŋetine Ananiyas, ŋanomine eŋetine Sapira. Ananiyas eŋe kepeine natne ŋei mane mangimo, oŋo lewine wesi mange. 2Pakimo, eŋe wesi natne eŋine ma walukki metke, yewa ŋanomine eŋe mo weneŋ detke, Ananiyas eŋe wesi natneka ma ari isi one more rake, “Na wesi mo iwa korop ma sarimaile,” yale ra more aposolo ebonge. 3Pakimo, Petoroŋo olale rake, “Ananiyas ge onoka wane Ŋei Borikineŋo detkanom, wetŋone waket more ma siukki, Asu Koboboine isika more kepeŋonane lewine natne geŋone motkenom metmaike? 4Ge alakan kepe yewa ebonine, yemo geŋone simileŋonane, ŋo wesi mene, eya eŋe geŋane biŋek, paki onoka maikenane wetke simileŋone yewa mogare maine manom rap, ŋo onoka wane dereret qotkoine yewa mene? Ge misuk raikene, na ŋeika isionmaile, midakaka, ge yewa mo Waom eŋine isikene!” 5Yale raki, Ananiyas eŋe don dere, eyaka ket rasu more seukke, pakiso ŋei ŋerep korop eŋe Ananiyas wano masi wakonge, eya detwarekoi paki, oŋaene qaeki zok kaet onge. 6Pakimo, ŋei medep edo wiye sari more, pareŋine yewa lap lapŋo kawetka wokomge so tewekka ma ari dukkakoi. 7Naso nigatne auwa karewe (3) wane rokop qoeki, ŋadino Ananiyas ŋanomine Sapira eŋe sari saketke, eŋe tanik manik pa daleo ŋaunano wakonge, yewa mi detke. 8Pakimo, Petoroŋo iwa yale qesonka rake, “Ge nolatnom, kepe eya wane lewine ge so ŋaoŋone ŋire memik, mo korop rokouno iwa me, mida?” Ŋerepŋo rake, “O, mo korop rokouno yewa.” 9Eso Petoroŋo olale iwa yale rake, “Ge so ŋaoŋone ŋire onoka wane Waom wane Asu liwek kaikeik wane wet qeturage don ma togolimik? Detmaine ŋei medep pa ŋaoŋone ma ari dukkemi, eŋe mo madetko sari saket okoramami, wane mo ge koso yaleka geu ari koso ge weneŋ yewaka duk-ganikei!” 10Rakiso, eyaka ŋerep eŋe Petoro wane kino ket rasu more seukke, pakiso ŋei medep eŋe mat koto wa kau, eŋe mo seuke pake, eso eŋe ma teweke ari more ŋaunane wazaino dukkakoi. 11Eso doku tau tau magu so ŋei ŋerep natne korop eŋe don kisietne yewa korop dere, kaet suwaine zok manerop okangoi.
Aposolo Eŋe Masi Kine Kine Makoi
12Aposolo eŋe masi togole kine mane kine mane ŋei ŋerep eŋane keuweno makoi, pakiso doku tau tau magu mali malip korop wet qeturage more, Solomon wane Touŋ, Bakom Urum wane kotino, yewao lewage gekoi. 13Lewage geu, ŋei ŋerep natne eŋane tegoo mi takotke gekoi, eŋe ewe kito kitoinerop okane mawa one gekoi, ŋo ŋei ŋerep yewa eŋe kaet okangoi, yalinane eŋe eŋerop lewa lewaŋ wane mi sariu weneŋ lewaŋ maŋkoi. 14Pakiso, ŋei ŋerep zok manerop eŋe Waom detlukka malip kakoi, eŋe sari eŋane maguwo takotkekoi. 15Aposolo eŋe masi kine kine ŋei ŋerep keuweno makoi, eya wane ŋei ŋerep eŋe zoma ŋeikopeene tewekone sari numao yaup tewino uwam kine kineene lameke mauluke biraonbi pa arikoi, so eŋe wetke rakoi, Petoroŋo eŋane osoenoka sa ariki, so oŋa lulupineŋo qoe ket eŋane kuteno wa rokop ongi, so menaŋgei eŋe yale rau paki okangoi. 16So Yerusalem mat loli lolik yewao ŋei ŋerep gekoi, eŋe korop yaleka sari aposolo eŋano watkekoi, eŋe zoma ŋei so asu borikineŋo kotoeno ket matali ongi gekoi, yewa ebu sariu, korop solaene koso menaŋ onwareke.
Aŋeloŋo Aposolo Mulap Urumgo Ŋine Makokonge
17Ŋo Pris Wawaine so eŋane magukoune Sadusi korop, eŋe onbi, aposolo edo kine kine eya korop mau, eŋe manerop dere worikongoi, paki mulapko bira onikei wane rakoi. 18So eŋe wiye more, aposolo malip one ebu ari mulap urum suwaino, ŋei borikine eŋerop biraongoi. 19Ŋo ruwo yewao yemo Waom wane aŋelo maneŋo mulap urum wane madetine lalage more, inat ŋadino ebu saket biraone more, edane rake, 20“Ŋine ari Bakom Urum koto wa okorau paki, ŋei ŋerep korop gege musele iwa wane don tanik manikine ebu kito edanbi.” 21Aposolo eŋe don yewa dere more kepe qaeki ruworopka Bakom Urumgo wa more ŋei ŋerep kisi maep don ra qelaŋane edangoi. Pris Wawaine eŋine so kimakoune, eŋe sari Israel suwaine so Kaunsol korop edorau sariu qeturage lewaŋgoi, paki don edane qebinonbi, mulap urumgo ari edanbi aposolo ebu eŋano sarikei wane arikoi. 22Ŋo tebe ŋei eŋe mulap urumgo ari lotke more, onbi aposolo eŋe mi metkoi, eŋe zuwaŋonbi boriki, eŋe koso zinge sari more Kaunsol edane rakoi, 23“Ŋene ari mulap urumgo lotke more kaŋem, madet mo togoleka ki okora warike, so diyam ŋei eŋe korop madetko diyam okora warimi, ŋo ŋene madet lalagine naso yewao ŋei mane urum kotino mi metpi onine!” 24Bakom Urum wane diyam gege tebe ŋei suwaine, so pris ŋetne suwaine, eŋe don yewa dere more, dereret urata loutne mau paki rakoi, “Iwa daleo wakonmaike? Ŋei eya eŋe daleo siukmami?” 25Pakimo, ŋei mane oŋo wa more edane rake, “Detmami! Ŋine ŋei eya mulap urumgo bira onimi, eŋe mo Bakom Urum kotino okora ŋei ŋerep kisi maep don ra qelaŋane edanmami!” 26Yale edanbiso, Bakom Urum wane diyam gege, tebe ŋei suwaine so ŋeikoune eŋe ari koso aposolo ebu sarikoi, eŋe engu kito mi okangoi, onoka wane eŋe ŋei ŋerep edo wesiŋo engukei wane kaetonge.
Aposolo Eŋe Kaunsol Eŋane Lewa Lewago Don Kaet Midaine Rakoi
27Tebe ŋei eŋe aposolo ebu ari biraonbi Kaunsol eŋane kaiteno okorakoi, pakiso, Pris Wawaine maneŋo edane rake, 28“Ŋine ŋei yewa wane eŋetine ŋei ŋerep eŋano mi ra qelaŋane kito edanikei wane, ŋene mo togogoleka rawetŋune more, mi ra togole ŋungone me? Ŋo ŋine yemo siluŋ don yewa Yerusalem matko ra suwae motpi, suwa arimaike, pakimo, ŋenane solazo qe more, ŋei yewa ŋedo qeŋem seukkane weŋeminane turuŋ so sot yewa baŋ ŋenane kutzo payake, yale ra ŋei ŋerep edanmami.” 29Rakimo, Petoro so aposolo natne eŋe iwa yale mainge olatkoi, “Lewine, Kaisale wane don tewekkene! Ŋei don yewaŋo ŋado kitomaike! 30Ŋine Yesu kibeŋ qabego rasukoi so qeu seukki, ŋenze ŋabokopze eŋane Kaisaleŋo ma wirikkaki wisikae wiyeke. 31Wiyeki, Kaisaleŋo mawa more, eŋine metine wonino Ŋetne so Mapi Mapit Ŋeize birakake, oŋo Israel ŋene qesiŋ ŋongi, wetze maingeŋem borikineze ŋebu mayake. 32Ŋene kaŋem, Waomŋo urata eya mamaike, paki ŋene kisi maep don eya ra qelaŋanmaine, so Asu Koboboine eŋe yale waka kine kine korop eya wane ra qelaŋanmaike, so Kaisale eŋe mo eŋane don tewek okanmami, eŋe Asu Koboboine sunka ebon okanmaike.”
Gameliyelŋo Kaunsol Wetene Kito Peseke
33Kaunsol magu eŋe Petoroŋo don yale edangi detpi, qomene kito poke ebu ket biraongi, dere worik suwaine okane more, aposolo ebu engukei wane okangoi. 34Ŋo Kaunsol eŋane keuwo ŋine ŋei mane eŋetine Gameliyel, eŋe Parisi, ra rokop don wane kito ebo ebon, eŋe ŋei ŋerep koropŋo ewine kitou geke, oŋo Kaunsol eŋane keuwo wiye okora more ra ongi, aposolo ebuwi nigatne qeinat waketkoi. 35Eŋe qeinat ŋadino ketpiso, Gameliyelŋo Kaunsol natne edane rake, “Israel ŋei, ŋine ŋei iwa kine kine daleo okan ongei, wane rau paki, ŋine siluŋ mikep detluke more kauluke okan onikei. 36Ŋine mo detmami, naso natne mo arike, eya wane bano qei, Teudas eŋe wakone more rake, na ŋei waom eŋane suwaineene, yale raki, ŋei 400 eŋe eŋano takotke ŋadino mogare arikoi, ŋo gavaman eŋe qeu seukki, ŋeikoune eŋane don detpi wele okangi aŋaine teweke gekoi, eŋe korop din bun wiri ket yeo yeo ari wareu, urataene wele midaine okange. 37So eya wane ŋadino ŋei mane Yudas, Galili ŋine, oŋo kepe ware wareŋo ŋei ŋerep natne ebu waraŋ ongi, eŋane don teweke ŋadino mogare arikoi, paki kepe ware ware esopkaikei wane kawali ma wakone qekoi. Ŋo eŋe yaleka qeu seukki, so ŋeikoune aŋaine teweke ŋadino mogare gekoi, eŋe kakakone ket yeo yeo ari warekoi. 38Eso na kine yalewa, wane na ukude don iwa ŋidanmaile, ŋine ŋei yewa sulu kine kine mane misuk okanongei, midakaka, ŋine qeliŋonbi enŋeneka geu, onoka wane dereret so urata yewa ŋei enŋene dereretko ŋine sarimaikeo, yemo baŋ bori more siukeyake. 39Ŋo Kaisale oŋom eya wane kine okangi paki wareki, eŋano ŋine sarimaikeo, yemo ŋine maine mi kitat onikei, pakimo ŋine kawali qekeimo, ŋine Kaisale ŋaba kamami, yale okaniyake!”
Aposolo Eŋe Yesu Wane Eŋet Wane Gamu Makoi, Eya Wane Bakom Kitokoi
40Kaunsol eŋe Gamelielŋo yale ra edangi detpi menaŋgi, so eŋane don dere, aposolo edorau sariu, ŋei edo kumunamŋo dime ongoi. Pakiso, Yesu wane eŋetine ora don kisiine ŋei ŋerep koso manerop mi ra edanikei wane togoleka rawet one more biraonbi arikoi. 41Aposolo eŋe Kaunsol qeliŋ one more qeinat mat ŋadino ketkoi, paki, eŋe Kaisaleŋo detongi, Yesu wane eŋet wane ra more wikile so gamu marat kakoi, eya wane wetene peseki, bakom kitokoi. 42So kaiwe baŋem Bakom Urumgo me enŋene mateno eŋe ŋei ŋerep kisi maep don kito eda edan urata eya mane mi qeliŋgoi, midakaka, eŋe Yesu Mesiya wane kisi maep don, yewaŋo tako rakot iwa yale ra qelaŋane edane gekoi. Kaisale eŋe ra rokop donine mo rake, yewa teweke more, Yesuŋo birakaki, ŋei okangi paki, ŋei ŋerewekoune koso borikino ŋine mainone sa biraonge.
Zur Zeit ausgewählt:
Aposolo 5: onsNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
