Aposolo 2

Asu Koboboine Ketke

1Pentikost peyada naso suwaine mo bomileki, ŋei ŋerep Yesu malipka lukkoi, eŋine magukoune eŋe korop sari, mat maneo waket qeturage metkoi. 2Meregeu so yewaka qeliwo ŋine momo togogole puwangi, ukatne suwaine wakon okanmaike, eya wane rokop weti ŋine aroke ketke. Ket more sari mat metkoi, kotine yewa korop watkeke. 3Pakiso eŋe kau gerep bolamine yale lawe tiŋ tuŋ matokki toe ari ŋei ŋerep kuteno kuteno kito more lawe arike. 4Eso eŋe korop Asu Koboboineŋo kotoeno ket ŋei ŋerep yewa qe watongi paki ma ewek ongi aŋaene ewekki kiyeke don kine kine pa arimaike, eya Asu Koboboineŋo welaine welaine weteeno motki, eŋe yewaoka don ra edangoi. 5Naso yewao Kaisale meŋenkakei wane Yuda ŋei kisi maep dereret natne korop eŋe kepe baŋem eya ŋine sari qeqe lewa lewaŋ okangei wane qeturage Yerusalem matko gekoi. 6Eso eŋe ukat suwaine yewa wakongi dere more ŋei ŋerep zok maneropŋo sari lewage more oŋaene qaeke. Pakimo detpi, aposolo magu edo kepe baŋem don kine kine pa arimaike, yewaoka ŋei weku weku eŋe enŋene donenoka ra edan okanbi, eŋe detkoi. 7Paki Yuda ŋei eŋe zok manerop welelepke more, dereret urata ma rakoi, “Ŋei ŋerep iwa don ramami, eŋe korop Galili ŋineka! 8Daleo wane, ŋene koropŋo det onŋem, eŋe koropŋo ŋenze dongoka koboboine welaine welaine, ŋene ŋedom welaineŋo rarainane, rokop ra ŋedanbi, ŋene welaineŋo detmaine? 9Ŋene iwamo Patiyaŋine, Mediyaŋine, so Elam ŋine, Mesopotamiyaŋine, Yudaŋine, so Kapadosiya ŋine, Pontusŋine, so Isaiyaŋine, 10Prigiyan ŋine, so Pampiliya ŋine, Izip ŋine, so Libiya nat parom Sairini osino ŋine, natne ŋene Roma ŋeiŋo iwa kulit sari gemaine. 11Ŋene Yuda ŋei, mat welaine so lobo sari sarine, Yuda ŋei eŋane tanik manik ma gemaine. So natne ŋene Kerataŋine, so Arabiyaŋine. Ŋene yalewaŋo ge more, donzane rokopko Kaisale masiine kakapa meke eya wane don kisiine ra qelaŋanbi detmaine!” 12Ŋei eŋe yale ramore oŋaene qaeki, dere qeka okane au rakoi, “Iwa onokaka masi?” 13Ŋo natne eŋe aposolo don masirakinerop okan one more edane rakoi, “Eŋe wain musele loutne neu paki qelaŋ qe more don yaup qazaŋ ramami.”

Petoroŋo kine ra qelaŋane edange

14Pakiso Petoroŋo wiye more, kimakoune aposolo elewen (11), eŋerop okora togoleka boka ŋei ŋerep magu yewa korop ra qelaŋane edane rake, “Yuda ŋei kimakopne, so Yerusalem gemami, so ŋei lobo, ŋine korop ketŋine motpi na masi iwa wakonmaike eya wane kine ra qelaŋane ŋidanbe detpi. 15Ŋine dere ramami, ŋei iwa eŋe doku ne more qelaŋ qemami, Yale midaka. Kepe yekuwat 9 kilok sako rokop okanmaike. 16Ŋo masi iwa yemo propet Yoelŋo don mane mo qeke, eya wane wele wakonmaike.

17‘Kaisaleŋo iwa yale ramaike, gemage kepe wane naso dagoine qoe yakane okangi, na baŋ Asune ŋei ŋerep korop qe watŋun warekale. Ŋinane gipolekopŋine so borasokopŋine, eŋe baŋ naŋane don propet yale ra wakonikei, ŋo ŋei qaluwit kopŋine eŋe baŋ deene lotkeki kine kine kuneŋine kulu kulu yale kaikei, so ŋei sele eŋe baŋ kulu kaikei. 18So, naso yewao Na Asunane zonom motpe ket more qelit ŋeikopne wikile urata ma okanmami, ŋei so ŋerep, ma ewek ongi, eŋe baŋ propet yale don ra qelaŋanikei. 19Pakimo na masi kuneŋine so tanik mane qeli kebago mawe wakoniyake, so qela kepeo masi natne oŋa qai qaine wakoniyake. Yewao weŋem, so gerep, so kezoŋ umatne sayake. 20Eso kepe deine eŋe panamaniyake, so meso eŋe weŋe weŋem qe more weŋemka okaniyake. Pakimo ŋado Waom wane naso maep bomileyake. Naso Maepine eyamo qelaŋane zok manerop kakapa suwaine. 21Eso naso yewao ŋei ŋerep eŋe Waom wane eŋetine ora malipka newanka gemami, eŋe borikinane ŋetne ŋetnane kotino ŋine mapik oniyake, so baŋ Waom oŋom ebuki, koso eŋine ŋei okane weku mane gekei.’ ” Yewa yemo propet don Yoelŋo mo ra wakonge.

Petoroŋo Yesu Wane Kine Ra Tileke Edange

22“Israel ŋei, na don iwa ŋidanbe ŋine ket more detpi, Yesu Nazaret matko ŋine eŋe Kaisaleŋo nabok okanka more, qesiŋkaki keuŋino ge more, zonomine kakapa yewaŋo masi so tanik manik kine kine de kune ŋine maki paki, Kaisale wanoŋine ketke, eya wane kineine ma qelaŋangi ŋine korop kawarekoi. 23Eŋe Kaisaleŋo mokaka detki paki, don mo ra togoleka mange, eya wane rokopko ŋinane meteo birakaki paki, numa mangi, ŋine mau paki, masi kine kine korop okanka more, borikine mama eŋano birakau edo ma more kibeŋ qabego qeu seukke. 24Ŋo Kaisale ŋo yemo Yesu seuseuwoŋine ma wirikkaki wisikae wiyeke paki, seuseu wane wikile qotkokoine eyaŋine mainka more makokkake, onoka wane seuseuŋo eŋe maine mi ma qorokkake. 25Eya wane Dawitŋo iwa yale Yesu wane ra qelaŋan don rake,

‘Na Waom kakole, eŋe naŋane kaitno naso baŋem ososop okora okanmaike Eŋe naŋane wonno okora okanmaike, eya wane kine kine maneŋo na maine mi mapap nangi qise more, kaet okangale. 26Eya wane na qomne menaŋmaike, so na belakamneŋo bakom kitomaile. Na kepe ŋei, ŋo solaneŋo yale waka kine kine maine eya wane tomaka more pa wiye okaniyake. 27Ge asu oŋa oŋane mi qikka qeliŋkanom ŋei seuseune eŋane kepeo payake, me ge Ŋeiŋone Koboboine Wekumane eŋe mi qeliŋ kanom gotosiyake. 28Ge wisika gege wane numa yewa na mo sikan nangone, wane ge baŋ narop genom na geŋane kaitŋono oi bakom zok manerop okanikale.’ Dawitŋo yale rake. 29Kimakopne, na ŋaboze Dawit, ŋenze ware ware suwaine, eŋane kine ra wakone ŋidanbe. Eŋe mo seukki dukkakoi, deŋesereine ŋenze keuzo mere sa gemageki ukude naso iwa okanmaike. 30Eŋe propet geke so eŋe Kaisaleŋo don mane iwa yale ratogole olatke yewa detke, ‘Dawit, na geŋane ŋabokopŋone eŋano ŋine mane baŋ ma birakawe oŋo geŋane tungo ŋei Waom metmet yewa ma more mesiyake.’ 31Dawit eŋe Kaisaleŋo kine kine daleo mayake, yewa mo kake, pakiso eŋe Kristo wisikae wiye wiyeinane don iwa yale rake,

‘Kaisale eŋe pareŋine mi qeliŋkaki, ŋei seuseune natne yale kepo pa more gotosiyake.’

32Pakimo Yesu eŋe Kaisaleŋo ma wirik kaki, wisikae wiyeki, ŋene korop weneŋ deze weleŋo kauluk kakone. Eso ŋene yewa wane kisi ine ramaine. 33Eŋe mo zinge wa more, Kaisale wane wonino metmaike. Eŋe Magakŋo Asu Koboboine mo biŋek qeke, yewa sunka mangi, Magak wane meteo ŋine Asu Koboboine ma more, qe wat ŋongi, ŋine mo iwa kineine kamami, so detmami. 34Onoka wane, Dawit eŋe oŋom qeliwo mi wake, eŋe iwa yaleka yemo rake,

‘Waomŋo naŋane Waom olale rake, “Ge iwa naŋane wazano wonno metnom, 35Met magenom na ŋabakopŋone baŋ ebu ket biraonbe, geŋane kiyetabe ŋonane bano gesoke togole togoleŋone okane waket mesikei.” ’ 36“Eya wane Israel ŋei, ŋene korop iwa yale detluk warekene, ŋine Yesu ma more kibeŋ qabego qeu seukke, pakimo Kaisaleŋo maki paki Waom so Kristo birakaki gemaike.” Petoroŋo yalewa ra edange.

Ŋei Ŋerep Koropŋo Wetene Mainge More Peyam Doku Taukoi

37Ŋei ŋerep eŋe don yewa detpi korop qomene kitopokke. Pakiso Petoro so aposolo natne ra qeson okane edane rakoi, “Kimakop, ŋene daleo okanŋem menageyake?” 38Rauso, Petoroŋo edane rake, “Ŋine ŋei ŋerep bonep bonep wetŋine maingeu paki, Yesu Kristo wane biŋek okane more, eŋane eŋetko peyam doku tauwi mo, Kaisaleŋo sotŋine yewa qelige ŋibone more, mataliki siukwareyake. Pakimo, Kaisale wano ŋine bakom, Asu Koboboine ŋiboniyakane biŋek qeke, eya ŋibongi maikei. 39Kaisale eŋe mokaka Asu Koboboine, yewa ŋiboniyakane mo rake, ŋo ŋine ŋinŋine so ŋosa ŋabokopŋine, so ŋei ŋerep natne suwaine korop ŋine abaran eri eri zok ge sarimami, ŋine korop Waomze Kaisaleŋo ŋidora newan ŋungi eŋino sariu Asu Koboboine ŋiboniyakane biŋek yemo mo qe ŋibonge.” 40Petoro eŋe yale ra more don natne loutne edane qebin mabin okanonge, paki girem don edane rake, “Ŋine ŋei ŋerep matali qetaliyenerop eŋane maguwo ŋine kakakone zinge sariu ŋibuyake.” 41Pakiso, ŋei ŋerep eŋe Petoro wane kisi maep don dere detluke malipkau paki, kaiwe naso yewaoka ŋei ŋerep 3 tausen peyam doku tau-onbi, Yesu wane magu eŋano takot-kekoi. 42Eŋe sorin borin okane aposolo eŋane don detkoi, paki kito qesiŋ okane weteneŋo malip nagu more gege weku nene weku okane gekoi. So wetene qeturage more meŋe meŋen urata ma gekoi.

Doku Tau Tau Magu Musele Eŋane Masiyene Maine

43Pakimo, Kaisaleŋo aposolo qesuŋongi, eŋe masi kine kine loutne mau ka more oŋaene qaeki, ewe kito kito okane gekoi. 44Pakiso, ŋei ŋerep loutneŋo Yesu malipkakoi, paki doku tau tau magu mali malip korop gekoi, eŋe weteneŋo malip nagu more aboŋ kine kineene korop owoeno pa ebongi magekoi. 45Eŋe kepeene so yeye kine kineene natne ŋei natne sunka ebonbi, eyaŋo wesi kiyare ebongi, kine kine wane zuwage gemaŋkoi, rokop eŋe wesi yewa damo qe ebonmaŋkoi, paki yewaŋo ŋara doku qole ne okanmaŋkoi. 46Eŋe wet weku okane more kaiwe baŋem Bakom Urumgo lewage gekoi, so gege ŋara yemo enŋene mateno maneo maneo lewage mere ne gekoi, paki solaoken ŋara eya yemo wetene ketkele paki, batneka mapoke bororom rokopko ne gekoi. 47Paki naso baŋem eŋe Kaisale eŋetine ora mawakakoi, pakiso, ŋei ŋerep korop eŋe eŋane tanik manikene kau simileonge, eso Waom eŋe kaiwe baŋem ŋei ŋerep mali malipenerop ebu takoton mageki, zaleene kirowone manerop weti weti wake.

Zur Zeit ausgewählt:

Aposolo 2: onsNT

Markierung

Kopieren