Матай 10

Исадынъ он эки элшисине тапшырувы

1Оьзининъ он эки соктасын йыйып, Иса оларга кара йинлерди кувмага эм баьри авырувлардан эм сакатлыклардан савартпага куват берди.

2Он эки элшисининъ атлары: Петер деп аталган Шимон эм онынъ кардашы Эндрей, Зебедей улы Якуп эм онынъ кардашы Яхъя. 3Пилип эм Барталмай, Тома эм ясакшы Матай, Алпай улы Якуп эм Тадай. 4Канай#10:4 Канай: Исраилди урым аскершилерден тазаламага шалыскан аьдем, Зилот. Шимон эм сонъында Исады саткан Юда Искариот.

5Иса бу он эки соктасын сосындай буйырув ман йиберди: «Ювыт болмаганлардынъ ерлерине барманъыз, самарияшы шахарлардынъ бирине де кирменъиз. 6Оннан эсе адаскан койларына усаган Исраил халкына барынъыз. 7Бара турган вакытта: „Алладынъ Патшалыгы энди ювыклаган!“ – деп, хабарланъыз. 8Авырганларды сав этинъиз, оьлгенлерди тирилтинъиз, авыр тери маразлыларды тазаландырынъыз, йинлерди кувынъыз. Сиз бу куьшти бослай алгансыз, босына да йиберинъиз. 9Белинъизде не алтын, не куьмис, не де ез алманъыз. 10Йолга не артпак, не эки кат коьйлек, не шарык, не таяк алманъыз, неге десе ким ислесе, сол азыкланмага тийисли. 11Кайсы шахарга яде элге кирсенъиз де, онда ким тийисли болганын сорап билинъиз эм кеткенге дейим сонда калынъыз. 12Уьйге киргенде, ондагыларды саламланъыз. 13Эгер тийисли болса, тилеген сав-саламатлыгынъыз ога келсин. А эгер тийисли болмаса, сиз тилеген саламатлыгынъыз оьзинъизге кайтсын. 14А эгер ким сизди ювытпаса эм соьзинъизди тынъламага суьймесе, бу уьйден яде шахардан кетеятырган вакытта аякларынъыздынъ шанъын да кагып калдырынъыз. 15Сизге дурысын айтаман: кыямет#10:15 Кыямет: грекше „оькимлик“. куьнинде сол шахарга коьре, Содом ман Гомора ерлерине енъилирек болаяк.

Келеектеги кыйынлыклар

16Мен сизди боьрилер арасына, койлардай этип, йиберемен. Сонынъ уьшин йыландай акыллы эм коьгершиндей шуьшсиз болынъыз. 17Аьдемлерден сак болынъыз! Сизди оькимге берерлер, синагогларында камышы ман согарлар. 18Мени уьшин сизди тоьрелердинъ эм патшалардынъ алдына аькетерлер, сиз оларга да, ювыт болмаганларга да шаат боларсыз. 19Олар сизди оькимге тапшырган вакытта, неди эм калай айтармыз деп, кыйналманъыз. Сизге неди айтпага кереги сол саьатте берилеек. 20Неге десе айтаяк сиз тувыл, а Атанъыздынъ ишинъизде айтатаган Рухы болаяк.

21Кардашы кардашын, атасы оьз баласын оьлимге тапшыраяк эм балалар ата-аналарына карсы турып, оларды оьлтиртееклер. 22Меним атым уьшин сизди баьриси де коьрип болмаяклар. Ама ким сонъына дейим шыдаса, сол куткарылаяк. 23Сизди бир шахарда, артынъыздан туьсип, коймасалар, баска шахарга кетинъиз. Сизге дурысын айтаман: Исраил шахарларынынъ баьрисин сиз оьтпей турып, Аьдем Улы келер.

24Соктасы оьзининъ устазыннан йогары тувыл, кул оьзининъ бийиннен уьйкен тувыл. 25Соктасы оьз устазынынъ аьлине етсе, а кулы оьз бийининъ аьлине келсе, разы болсынлар. Эгер уьйдинъ иесине Баалзабул деп айтатаган болсалар, уьйдегилерине неди айтаяклар!

Сизге кимнен коркпага керек?

26Сол себепли олардан коркпанъыз, неге десе ашылмай калаяк сыр йок, билинмей калаяк ясыртын зат та болмайды. 27Мен сизге каранъада айтатаганымды, куьн ярыгында айтынъыз, сизге сыбырдап эситтиргенимди уьйдинъ тоьбесиннен билдиринъиз. 28Шаркынъызды оьлтиретаган, а янынъызды оьлтирмеге болмаганлардан коркпанъыз. Оннан эсе янынъызды да, шаркынъызды да яханемде йоймага болаяк Алладан коркынъыз. 29Аьше, эки торгайды бир ассарияга#10:29 Ассария: увак акша. сатпайдыларма? Ама олардынъ эш бири де, Атанъыздынъ эрки болмай, ерге йыгылмайды. 30Аьтте, басынъыздагы шаш туьклеринъиздинъ баьриси де саналган. 31Коркпанъыз, сиз коьп санлы торгайлардан баалысыз!

32Ким аьдемлер алдында Мени ашык кабыл этсе, соны Мен де коьктеги Атамнынъ алдында кабыл этермен. 33А ким Меннен аьдемлер алдында тайса, соннан Мен де коьктеги Атамнынъ алдында таярман.

Исага тийисли болганлар

34Мен ерге тынышлык аькелмеге келгенмен деп, ойламанъыз. Мен тынышлык тувыл, тек кылышты аькелмеге келгенмен. 35Мен улын атасыннан, кызын анасыннан, келинин кайнанасыннан айырмага келгенмен. 36Аьдемнинъ душпанлары – онынъ уьйиндегилери. 37Ким Меннен эсе де атасын, не де анасын бек суьетаган болса, сол Мага тийисли тувыл. 38А ким оьзи оьлеек кашын#10:38 Каш дарагаш, ога шуьшлилерди оьлтирер уьшин шуьй мен кергенлер. алып артымнан иермесе, сол Мага тийисли тувыл. 39Ким яшавын сакласа, сол оны йойтар; а ким Мени уьшин яшавын йойтса, сол оны янъыдан табар.

40Ким сизди кабыл этсе, Мени де кабыл этер эм ким Мени кабыл этсе, сол Мени йибергенди де кабыл этер. 41Ким пайхамбарды пайхамбар болганы уьшин кабыл этсе, сол пайхамбардынъ савгасын алар. Ким туврашыл аьдемди туврашыл болганы уьшин кабыл этсе, сол туврашыл аьдемнинъ савгасын алар. 42Ким бу кишкейлердинъ бирине Меним соктам болганы уьшин тек бир тостакай сувык сув иширсе, сизге дурысын айтаман: ол бир заманда да савгасыз калмас».

Zur Zeit ausgewählt:

Матай 10: NOG

Markierung

Kopieren