Lia Uluk Fohon 11

Ema nalo uma tetu boot ida iha kota Babel

1Uluk fohon, ema hotu-hotu iha raiklaran dale nodi lia ida dei. 2Sia balu lori baa lorosaꞌe toꞌo rai fehan ida iha Sinear.#11:2Iha lia Ibrani ‘baa iha lorosaꞌe’ moos bele naꞌak, ‘baa nosi lorosaꞌe’. ‘Sinear’ naran seluk naꞌak ‘Babel’. Hotu, sia nein iha nia.

3-4Hotu, sia kabuar lia fuan naꞌak, “Mamaluk sia! Diꞌak liu, ita hariik hola kota boot ida. Ita halo fatuk mean, tunu toꞌo monas. Hotu, ita hada baa malu hodi hanit atu hariik uma tetu ida mak aas toꞌo laleꞌan. Hodi nunia, ita hetan naran boot. Ita bele dadi klubun boot ida, la faꞌe karin malu ona.”

5Hotu, MAROMAK tuun nateke kota nia no uma tetu boot mak sia nariik nia. 6Naree nunia, MAROMAK naneo naꞌak, “Ema neꞌe sia, ema klubun ida mak dale lia ida dei. Saa mak sia nalo baa oras neꞌe, foin hakat uluk fohon dei. Awan-wainrua, kalo sia metis malu nohuun, sia bele nalo sa-saa dei. 7Diꞌak liu, Ita tuun baa, tokar siakaan lian, nebee sia la bele natene malu lian.”

8Hotu, MAROMAK tuun, tokar lauk siakaan lian. Nodi nunia, Nia nalo ema nia sia faꞌe karin malu baa fatin hotu-hotu iha raiklaran. Sia moos nanawa nariik kota nia. 9Tan MAROMAK tokar lauk siakaan lian, nodi nalo sia keen karin malu baa fatin hotu-hotu iha raiklaran, sia nanaran kota nia naꞌak, Babel, (tan lia fuan ‘babel’ neꞌe, hanesan lia fuan Ibrani ida mak naꞌak ‘benar karin’).

Sem husar-binan toꞌo Abram

10Neꞌe, Sem husar-binan. Motasaꞌe boot nia nanawa tiꞌan tinan rua, Sem moos otas tinan atus ida. Hotu, netan oan mane ida, naran Arpaksad. 11Sem sei moris tinan atus walu tenik, nodi netan tuꞌan oan feto, oan mane.

12Baa oras Arpaksad otas tinan tolu nulu resin lima, netan oan mane ida, naran Sela. 13Arpaksad sei moris tinan atus haat tolu tenik, nodi netan tuꞌan oan feto, oan mane.

14Sela otas tinan tolu nulu, netan oan mane ida, naran Eber. 15Sela sei moris tinan atus haat tolu tenik, nodi netan tuꞌan oan feto, oan mane.

16Eber otas tinan tolu nulu resin haat, netan oan mane ida, naran Pelek. 17Eber sei moris tinan atus haat tolu nulu tenik, nodi netan tuꞌan oan feto, oan mane.

18Pelek otas tinan tolu nulu, netan oan mane ida, naran Rehu. 19Pelek sei moris tinan atus rua siwi tenik, nodi netan tuꞌan oan feto, oan mane.

20Rehu otas tinan tolu nulu resin rua, netan oan mane ida, naran Seruk. 21Rehu sei moris tinan atus rua hitu tenik, nodi netan tuꞌan oan feto, oan mane.

22Seruk otas tinan tolu nulu, netan oan mane ida, naran Nahor. 23Seruk sei moris tinan atus rua tenik, nodi netan tuꞌan oan feto, oan mane.

24Nahor otas tinan rua nulu resin siwi, netan oan mane ida, naran Tera. 25Nahor sei moris tinan atus ida sanulu resin siwi tenik, nodi netan tuꞌan oan feto, oan mane.

26Tera otas tinan hitu nulu, netan oan mane naꞌin tolu, mak Abram, Nahor no Haran.

Tera husar-binan

27Neꞌe, mak Tera husar-binan. Tera oan sia, mak Abram, Nahor no Haran. Haran netan oan mane ida, naran Lot. 28Haran mate iha leo huun, naran Ur iha ema Kasdim rain. Oras nia mate, aman Tera sei moris. 29Abram nola feto ida, naran Sarai, nalo baa feen. Nahor nola nikar Haran oan feto, naran Milka. Hotu, Haran netan oan mane ida, naran Yiska. 30Mais, Sarai sei kiuk.

31Dala ida, Tera nodi oan Abram, oan feen Sarai, no bein oan Lot, sai nela leo huun Ur atu baa rai Kanaꞌan. Mais, toꞌo rai Haran, sia nein iha nia dei. 32Hotu, Tera mate iha nia, baa otas tinan atus rua lima.

Zur Zeit ausgewählt:

Lia Uluk Fohon 11: tetNTPO

Markierung

Kopieren