Mwanduso 6
6
Nzambi za iwanhu
1Wanhu viwenele mwiisi yose na kulela wana wa kitwanzi, 2viumbe#6:2 Kwa Kiebulania olonga, wana wa kimbigalo wa Imulungu. wayagwe wa kuulanga wawona wandele awo wanoga, avo wawasola waja wawalondile na kuwa wehe zao. 3Abaho Mndewa Imulungu kalonga, “Loho yangu iwagwaa wanhu ugima honda ikale mgati ya wanhu milele, kwavija hewo wa kufa, siku zao za kukala wagima hazibanza miyaka gana na malongo mabili.” 4Mzisiku azo na kumwande, kukala na mizinhu mikulu mwiisi ilawilile mbuli ya viumbe wayagwe wa kuulanga viwawasile na wandele wa wanhu. Mizinhu ayo, iyo ikalile na nguvu na ijuwigwa ng'hani baho umwaka, na ikemigwa Wanefili.
5Mndewa Imulungu viyone kubanza kwa nzambi za wanhu mwiisi, na kila kiwogesa kutenda wanhu mmizoyo yao siku zose kiha, 6Mndewa Imulungu kagelegeza habali kamulumba munhu mwiisi, avo kona usungu ng'hani muumoyo wake. 7Mndewa Imulungu kalonga, “Nowabananga wanhu wose niwalumbile mwiisi, na vivija nowabananga wanyama na wang'onyo otambala mwiisi na ndege. Nokona usungu habali niwalumba mwiisi.” 8Lakini Nuhu kanogeligwa na Mndewa Imulungu.
Nuhu
9Zino azo simulizi za Nuhu na ulelo wake. Nuhu kakala munhu yotenda ganogile, na kakala munhu yelibule kitala mna iwanhu wa kipindi acho. Nuhu kakala koilumba na Imulungu. 10Nuhu kakala na wana wadatu wa kimbigalo, Shemu na Hamu na Yafeti. 11Isi ikala inangike mgameso ga Imulungu, isi yose imema gehile, 12Imulungu kailola isi na kayona isi yose ikala ibanangike ng'hani, kwavija kila munhu kakala kokweleleza nzila zake zihile.
13Imulungu kamulongela Nuhu, “Nowabananga wanhu wose kwavija isi imema gehile mbuli yao. Ona, nowabananga hewo hamoja na iisi! 14Avo izengele mwenyego safina kulu kwa mibiki ikemigwa Gofe. Gola magati mdisafina dijo na ukande tongo tongo kunze na mgati. 15Vino vivo vonda udizenge safina dijo, utali wake diwe makono gana na malongo madatu na ndatu na ugazi wake diwe makono malongo mabili na mbili na utali wake wa kuchola uchanha diwe makono longo na ndatu. 16Zenga kiswili cha safina dijo na wike nyafasi ya nusu mkono kulawa kiswili na kukanho. Wike mulango mulubavu lwa disafina na utende makanho madatu, kanho da hasi na da kabili na da kadatu.
17“Lola, nogala mazi mengi mwiisi nibanange kila kinhu kili na ugima mwiisi. Kila kinhu kili na ugima mwiisi chofa. 18Lakini notenda lagano na gweye. Kokwingila mdisafina gweye na mwehe wako na wanago na wehe zao. 19Kolondigwa wingize mdisafina kila mng'onyo, wabili wabili mtwanzi na mbigalo ili wawe wagima hamoja na gweye.
20“Kila aina ya ndege na kila aina ya wanyama na kila aina ya wang'onyo otambala mwiisi, wabili wabili okwiza kumwako ili uweke goya. 21Vivija ugale kila ndiya idigwa, wike mgati mbuli ya ndiya yako na ndiya ya hewo.” 22Nuhu katenda kila kinhu kamba viyalagizwe na Imulungu.
Zur Zeit ausgewählt:
Mwanduso 6: King'hutu
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT: © 2014 Pioneer Bible Translators and The Word for the World
OT: © 2019 Pioneer Bible Translators
