Luki 21

Kogu a kanomoʼmo ofalinimo huʼniya kavafeʼmo huʼniya gemae

(Mk 12:41-44)

1Yesuʼa Yu vayaʼmogi alopa mono nopiʼmo maiʼnenoʼaeʼmo alino maku huno apakeyana kagemi yaʼapimo haneʼniya vayaʼmogi ofalini monimo fiku neʼmalaya kesifiʼmo ofalinimo huʼnageno apakeʼniye. 2Mago kogu a kanomo kagemi yaʼamo alagi ohaneʼniya a kanomoʼmo eno lole sagalifa monimo ofalini huʼnigeno agetenoʼaeʼmo, 3#2 Ko 8:12lama gemo lapa nepauve, huno, ani kagemi yaʼamo ohaneʼniya kogu aʼmoʼa huʼniya ofalinimoʼmo muki vayaʼmogi huʼnaya ofalini monimo ago aeno aga seʼniye. 4Kagemi yaʼapimo haneʼniya vayaʼmogi aliʼyaʼamo ohaneʼniya monimo huʼnayaʼmonanafa kogu a kanomoʼmo muki moniʼamo neʼyaʼmo miya faino nesiya moniʼeʼmo ago ofalini huʼniye, huno hapa paiʼniye.

Yesuʼa alopa mono noʼmo heʼa halagape vaigae, huno huʼniya gemae

(Mt 24:1-2; Mk 13:1-2)

5Mago vayaʼmo geʼamo neʼafiya vayaʼmogi huʼapaeʼmo, alagepa yafaʼaletikeʼmo noʼmo ki maleteʼa ofalini nehaya konali yatetiʼmo hu maleʼnaya kanale noʼmo haneʼniye, huʼa huʼnagenoʼaeʼmo, 6#Lu 19:44hemenimo ageʼnaya noteʼmo haneʼniya yafaʼmo akalo akalo huno haneʼniyanageʼa muki yafaʼamo aliʼa nakupaeʼa aliʼa atagu faeʼa atalegae, huno hapa paiʼnigeʼapaeʼmo, 7Tisao, huʼa, hainu afinaʼmo ani kavaʼmo afole aigiye. Hogoteta na agufa alagena kavaʼmo agetesunagenoʼaeʼmo afole aigiye, huʼa ge huʼa afi geʼnagenoʼaeʼmo, 8humi olapatesayafeʼmo ehetapiye. Alagepa huta yagaiyo. Asole vayaʼmogi eʼa nagiʼnimo aeteʼapaeʼmo, Kalaisi vekamo maiʼnove, huʼa huge, ani afinaʼmo ago afole aiʼniye, huʼa huge hisagetapaeʼmo apakame osiyo. 9Mago vayaʼmogi kamemo hisaya kavafeʼmo apava gemo huge lusi kaveta hisaya kavafeʼmo apava gemo huge hisagetapaeʼmo koli osiyo. Ani agufa kavakoʼmo hogoteno afole aisigetapaeʼmo hemenimo alagi ago hano hisiya afinaʼmo hogo nehiye, hutapa osiyo. 10Mago nofi vayaʼmogi alu nofi vayaʼmo kame hapaege mago gamani vayaʼmogi alu gamani vayaʼmo kame hapaege hugae. 11Muki haopalegamo lusi imimaʼmo alige kafu kavaʼmo afole aige kaita hapausiya kavaʼmo aino atagu faeno uneno hisigeʼapaeʼmo asole vayaʼmo lusi kaitaʼmo hapauge hugiye. Kokuʼnate alagena kavaʼmo ageteʼapaeʼmo lusi kava huʼa koli hugae. 12-13Ani kavaʼmo afole oʼaiʼnisigeʼapaeʼmo hogoteʼa apaini huʼa lapatege kalavusi huʼa lapatege mono nokopiʼmo agoti huʼa lapateteʼa kalavusi huʼa lapatege hugae. Apakaemo nagiʼnilefeʼmo lapavaleli eʼa alaʼapimo yagaiʼa neʼapataya vayaʼaitegaʼe gamani vayaʼaitegaʼeʼmo aliʼa he tiʼa lapatesagetapaeʼmo nagae nava gemo huta faigoko geʼnimo hapa paigae. 14#Lu 12:11-12Lapakaemo hogoteta lapakesamo afitapaeʼmo, nagaemo geʼapileʼmo na agufa gemo huʼna aeʼna atagaina huʼna hapa paiguve, huta lapakesamo oʼafiyo. 15#Ap 6:10Nagaiʼnimo alagepa huʼa afiteʼa ageʼnaya gemo aliʼna lapamisugetapa hapa paisageʼa afiteʼapaeʼmo getapileʼmo ge huʼa aeʼa ati kaeʼa ge osugae. 16#Mt 10:21-22Itatapi afotapimogimo lapavaleliʼa uge konagatapimogimo lapavaleliʼa uge vayatapimogimo lapavaleliʼa uge huʼa agoti huʼa lapatesageʼapaeʼmo mago vayaʼamogi lapakaemo lapamagisagetapa faligae. 17Nakame nehayaʼmofeʼmo muki vayaʼmogi lapakaefeʼmo apaini hugayaʼmonanafa 18#1 Sam 14:45; Lu 12:7alagepa huta maisageno magoke lapayokaʼmo lageso osugiye. 19#Hi 10:36Lapakaemo alagepa kaʼmo oʼataleta lokiya vaitapa maisayaʼmoʼmo maige maige huta maisaya yaʼmo aligae.

Yesuʼa, Yulusalemu taonifiʼmo lusi hanageke yaʼmo afole aigiye, huno huʼniya gemae

(Mt 24:15-21; Mk 13:14-19)

20Lapakaemo apakesageʼa ati vayaʼmo eʼa Yulusalemu taonifiʼmo faiʼa vego hisagetapa apaketetapaeʼmo, muki ani taonifiʼmo maiʼnaya vayaʼmo hapaeʼa hano huʼa apatalesaya afinaʼmo alagi hogo hiye, hutapa lapakesamo afiyo. 21Ani afinaʼmo Yutiya kotega maiʼnisaya vayaʼmo apaune hetaleʼa avelegamo uʼa haiyo. Alopa taonifiʼmo maiʼnisaya vayaʼmo ataleʼa apaune heʼa viyo. Malaga maiʼnisaya vayaʼmogimo Yulusalemu taonifiʼmo uʼa ohaiyo. 22#Loa 32:35; Yel 5:29; 46:10; Hos 9:7Goti mukufiʼmo avoʼmo kae maleʼnaya gemo afole aisiyafeʼmo Gotiʼa ani afinaʼmo anonaʼapilefeʼmo lusi kava huno kayoʼmo apamigiye. 23#1 Ko 7:26Gotiʼa ani vayaʼaifeʼmo aipamo leno apateteno apakafu kisiya kayoʼmo apamigiyaʼmofeʼmo vaehae, huʼna, apaipaguʼeʼmo maiʼnisaya aʼne anagaʼe mafaʼnemo nu neʼapamisaya aʼne anagaʼefeʼmo nahau huʼna apatove. 24#Esa 9:7; Sam 79:1; Aiy 63:18; Lo 11:25; Le 11:2Ati vayaʼmogimo mago vayaʼamo naipeletiʼmo lugoʼapimo heʼa hatagauteʼa mago vayaʼamo kalavusi huʼa apateteʼa muki alu nofi vayaʼaitegamo apavaleli uʼa apategae. Alu nofi vayaʼmogimo eʼa Yulusalemu taonifiʼmo kamemo huteʼa aliʼa hosu huʼa ateme ateme neʼvisageno alu nofi vayaʼmogi kanaʼapimo alagi hano hugiye. 25#Sam 46:2-3; 65:7-8Kokuʼnapi alagena kavaʼmo yege lenagi kai lenagi kanefi tenagi huno alu kava alu kavaʼmo afole aigiye. Solovala aniʼmoʼa aino holakau holakau huno uneno nehisigeʼapaeʼmo muki kotegamo maiʼnaya vayaʼmogi na agufa kavaʼmo hisune, huʼa huteʼa lusi kava huʼa koli hugae. 26Kokuʼnapi maiʼnaya apaune vayaʼmo lokiyaʼapimo aino atagu faisigeʼapaeʼmo, na agufa kavaʼmo ma mopafiʼmo afole aigefe nehifi, huʼa apakesamo afiteʼapaeʼmo faliʼnaya vayakana huʼa maigae. 27#Nen 7:13; Mt 26:64; Le 1:7Ani kavaʼmo hutesigenoʼaeʼmo Vemo Mafaʼnemo hiyateʼmo himamuʼaʼe alopa ha le konali yaʼaʼeʼmo eminesigeʼa agegae. 28#Lo 13:11Ani kavaʼmo aepa faino afole aisigetapaeʼmo hatu maeno lapatesiya afinaʼmo alagi hogo hugiyaʼmofeʼmo alita maku hutapa agetetapaeʼmo lapamogaga aiyo.

29Agaemo aeno kalafefa gemo huno hapa painoʼaeʼmo, lapakaemo fiki yosaʼe muki alu yosaleʼeʼmo ageyo. 30Saufa anupamo maleʼnigeta agetetapaeʼmo, koʼmo neʼaiya afinaʼmo alagi hogo hiye, hutapa nehae. 31Ina kavaʼmo huno ani kavaʼmo afole aisigeta agetetapaeʼmo, Gotiʼa yagaino apatesiya afinaʼmo alagi ago hogo hiye, hutapa hugae. 32Lama gemo lapa nepauve, huno, hemeni afinaʼmo maiʼnisaya vayaʼmo ofaliʼa afaʼa maiʼnisageno muki ani agufa kavaʼmo afole aigiye. 33#Lu 16:17Kokuʼnaʼe ma mopaʼeʼmo hano hugiyaʼmonanafa geʼnimo alagi hano osuno afaʼa hanege hanege huno hanegaiye.

34 # Mt 24:48-50; Mk 4:19; Lu 17:27; 1 Te 5:3 Lapakaitapileʼmo alagepa huta yagaita lapateyo. Fiku yanageta lusi yagita huge lokiya aniʼmo netetapa negi nagi gemo huge ma mopafi yafeʼmo lapakesa alaʼamo afige lapausoli huge nehisageno ani afinaʼmo malage huno kesi katetiʼmo afole aigiye. 35Ma mopafi muki haopalegamo maiʼnaya vayaʼmo aneʼaiʼmoʼmo yagagafamo neʼatafaiya agufa kavakana huno apatafaugiye. 36#Mk 13:33; Le 6:17Inagi muki afinaʼmo kava yagaita maiyo. Muki afole aisiya kavaʼamo aeta agasesaya agufa kavaʼmo huta maiʼnetapaeʼmo Vemo Mafaʼnemo aulagaleʼmo he tita maisayafeʼmo nunumuʼmo hiyo, huno hapa paiʼniye.

37 # Lu 19:47 Muki afinaʼae afinaʼaeʼmo alopa mono nopiʼmo alino apaya malege malege huno maiʼnigeno haniʼmo nehigenoʼaeʼmo Alifiʼaepa avefiʼmo uno haino havaete havaete huno maiʼniye. 38Muki afinaʼmo gotilamiyapiʼmo muki vayaʼmo geʼamo afisayafeʼmo agaetegamo ege ege huʼa maiʼnae.

Zur Zeit ausgewählt:

Luki 21: kyg2013

Markierung

Kopieren