Yoni 11
11
Layosiʼa ago faliʼniya gemae
1 #
Lu 10:38-39
Mago vekamo agiʼamo Layosiʼa Metani taonifiʼmo maiʼniya vekamo kaita hauʼnigeno maiʼniye. Asaʼalaʼmoganimo Maliyaʼe aganaʼamoʼmo Mataʼeʼmo Metani taonifiʼmo magokepi lokaeʼa maiʼnae. 2#Yo 12:3Ani Maliyaʼa hogoteno alagepa atumo neʼaiya uvelimo Ala kava neʼmo aiyaleʼmo lakino faleno ateteno ayokatetiʼmo alino hau huno ateʼniye. Asaʼamoʼmo Layosiʼmo kaita hauʼniye. 3#Yo 11:36Asaʼalaʼmoganimo Yesutegamo ge huʼana atalaʼageno uʼniya gemo huʼanaeʼmo, Ala kava nene, huʼana, ani kahau kayamopafiʼmo kahauʼniya vekamo kaita hauʼniye, huʼana huteʼana mago vekamo aliʼana ateʼnaʼageno uʼniye. 4#Yo 9:3; 11:40Yesuʼa ani gemo afitenoʼaeʼmo, ani kaitaʼmo falisiya agufa kaitaʼmo ohauʼnifa Goti ha le konali yaʼamo ageteʼapaeʼmo agiʼaleʼmo aliʼa asaga huge Goti mafaʼneʼamo agiʼaleʼeʼmo aliʼa asaga huge hisayafeʼmo ani kaitaʼmo hauʼniye, huno hapa paiʼniye.
5Yesuʼa Mataʼagi aganaʼamoʼagi asaʼamoʼmo Layosifenagi huno hau ayamopafiʼmo hauʼnigenoʼaeʼmo 6kaita hauʼniye, huʼana huʼnaʼa gemo afitenoʼaeʼmo lole afinaʼmo ani maiʼniya kotegamo maiʼniye. 7Lole afinaʼmo utegenoʼaeʼmo Yesuʼa geʼamo neʼafiya vayaʼaifeʼmo, halate Yutiya kotegamo vigetao, huno hapa paiʼnigeʼapaeʼmo, 8#Yo 8:59Tisao, huʼa, ani kotega maiʼnaya Yu vayaʼmogimo yafa kayotetiʼmo kamagisayafeʼmo huʼnayana halate Yutiya kotegamo visanafeʼmo nehapiye, huʼa afi geʼnagenoʼaeʼmo, 9#Yo 9:4-5Magoke afinaʼmo yegemo tuolofuʼa aovamo letegeno haniʼmo nehiye. Vayaʼmogimo yegemo neleya afinaʼmo ma mopafiʼmo aeno ha leʼnigeʼa umenitata nehayaʼmofeʼmo nohapae. 10#1 Yo 2:11Hanipiʼmo umenitata nehisayaʼmoʼmo apaipafiʼmo ha le yaʼmoʼa aeno ha noleyaʼmofeʼmo nehapae. 11#Mt 9:24Lao vekamo Layosiʼmo ago au kaleno maiʼniyaʼmofeʼmo uʼna aupatiʼmo hauneʼna ategauve, huno hapa paiʼnigeʼapaeʼmo, 12Ala kava nene, huʼa, au kaleno maiʼnisiyana kanalene, huʼa ha paiʼnae. 13Yesuʼa Layosiʼmo ago faliʼniya kavafeʼmo au kaleno maiʼniye, huno hapa paiʼniyaʼmonanafa afaʼa au kaleno maiʼnigenoʼaeʼmo huʼniye, huʼa apakesamo afiʼnae. 14Yesuʼa huʼniya gemo afiʼa aeto osuʼnagenoʼaeʼmo Yesuʼa huno afole aino hapa painoʼaeʼmo, Layosiʼmo ago faliʼniye. 15Nagaemo agaeʼeʼmo ani afinaʼmo magokepi lokaeʼna oʼmaiʼnovaʼmofeʼmo lapakaetefeʼmo nagesamo afiteʼna namogaga neʼauve. Nagaefekeʼmo lapakesamo afitapa fatago hisayafeʼmae. Agaetegamo vigetao, huno hapa paiʼniye. 16#Mk 14:31Tomasifeʼmo lagoʼya mafaʼneyo, huʼa agi neʼaya vekamoʼa Yesu geʼamo neʼafiya vayaʼaifeʼmo hunoʼaeʼmo, agaegiʼeʼmo magokepi falisunafeʼmo lokaeta vigetao, huno hapa paiʼniye.
Yesuʼa faliʼnayatetiʼmo alino he tino apatetenoʼaeʼmo afaʼa maisaya yaʼmo neʼapamiya gemae
17Yesuʼa uno avaʼyi huteno afiʼniyana Layosiʼmo ago faliʼnigeta kita ateʼnonageno loleʼe loleʼe afinaʼmo uʼniye, huʼa ha paiʼnageno afiʼniye. 18#Mt 21:17Metani taonimo Yulusalemu taonimo haopaleʼmo haneʼnigeno tali kilomita agufa aise afagiʼaleʼmo haneʼniye. 19Asole Yu vayaʼmo Mataʼe Maliyaʼeʼmo anasaʼanimoʼmo ago faliʼniya kavafeʼmo hapau huʼa anatesayafeʼmo anakaetegamo eʼnae. 20Yesuʼa neʼe, huʼa huʼnageno Mataʼa ani gemo afitenoʼaeʼmo kategamo neʼvisigeno esigeʼana fotu hisaʼafeʼmo uʼnigenoʼaeʼmo Maliyaʼa nopiʼmo maiʼniye. 21#Yo 11:32Mataʼa uno Yesuʼeʼmo fotu huteʼanaeʼmo, Ala kava nene, huno, manileʼmo maiʼnanesinana nasaʼnimoʼmo ofaliʼniyesinaʼmonanafa 22ago afiʼnovana hemenimo kagaemo Gotifeʼmo namiyo, huka ge huka afi gesanageno afaʼa alino kamigiye, huʼna nagesamo afiʼnove, huno ha paiʼnigeno 23Yesuʼa hunoʼaeʼmo, kasakamoʼmo halate he tigiye, huno ha paiʼnigenoʼaeʼmo, 24#Yo 5:29ago afiʼnovana ma mopamo hano hisiya afinaʼmo halate he tigiye, huʼna ago afiʼnove, huno ha paiʼnigenoʼaeʼmo, 25nagaemo faliʼnayatetiʼmo aliʼna he tiʼna apatege afaʼa maisaya yaʼmo apamige nehuve. Nagaefeʼmo apakesamo afiʼa fatago nehisaya vayaʼmo falisayana halate ago he tiʼa afaʼa maigae. 26#Yo 8:51Ina lagimo afaʼa maiʼneʼapaeʼmo nagaefeʼmo apakesamo afiʼa fatago nehisafigeʼa ofaliʼa afaʼa maige maige huʼa maigae. Geʼnieʼmo kagesamo afika fatago nehapiye, huno afi geʼnigenoʼaeʼmo, 27#Yo 6:69He, Ala kava nene, huno, kagaemo Kalaisi vekamo Goti Mafaʼneʼamo ma mopafiʼmo eminegaiye, huʼa huʼnaya vekamo maiʼnane, huʼna nagesamo afiʼna fatago nehuve, huno ha paiʼniye.
Yesuʼa aviʼyaʼmo huʼniya gemae
28Mataʼa ani gemo hutenoʼaeʼmo halate aino atagi neno uno vayaʼmogimo oʼafisayafeʼmo aganaʼamoʼmo Maliyafeʼmo sumi huno ha painoʼaeʼmo, Tisa vekamo ago eno manileʼmo avaʼyi huteno kagaefeʼmo eno, huno ge nehiye, huno ha paiʼnigeno 29#Yo 11:20Maliyaʼa ani gemo afiteno malage huno he tino uno fotu hisaʼafeʼmo uno lamiʼniye. 30Yesuʼa taonifiʼmo uno avaʼyi osuʼnifa Mataʼeʼmo fotu huʼnaʼa yateʼmo maiʼniye. 31Maliyaʼeʼmo magokepiʼmo lokaeʼa maiʼneʼa hapau huʼa anateʼa maiʼnaya vayaʼmogi agayana Maliyaʼa malage huno he tino uno lamiʼnigeʼa ageteʼapaeʼmo kiʼa ateʼnaya kanolulegamo uno aviʼyaʼmo hisiyafeʼmo uʼniye, huʼa huteʼa akame huʼa uʼnae. 32#Yo 11:21Maliyaʼa Yesutegamo uno avaʼyi huteno aiyafiʼmo asagauno aino maiʼnenoʼaeʼmo, Ala kava nene, huno, manileʼmo maiʼnanesinana nasaʼnimoʼmo ofaliʼniyesine, huno ha paiʼnigenoʼaeʼmo 33Yesuʼa ageyana Maliyaʼa aviʼyaʼmo huʼnigeʼapaeʼmo agaeʼeʼmo magokepi eʼnaya vayaʼmogiʼeʼmo aviʼyaʼmo huʼnageno apaketenoʼaeʼmo lusi kava huno aipamoʼmo kana huʼniye. 34Agaemo hunoʼaeʼmo, haiyateʼmo kitapa ateʼnae, huno apafi geʼnigeʼapaeʼmo, Ala kava nene, huʼa, eka ago, huʼa ha paiʼnae. 35#Lu 19:41Yesuʼa aviʼyaʼmo huʼniye. 36Aviʼyaʼmo huʼnigeʼapaeʼmo Yu vayaʼmogi huʼapaeʼmo, Ageyo, huʼa, ani vekaeʼmo lusi kava huno hau ayamopafiʼmo hauʼniye, huʼa huʼnae. 37#Yo 9:6Mago vayaʼamogi huʼapaeʼmo, ani vekamoʼa aulagamo ageno yaʼnokeya vekamo aulagamo alino ayakeno ateʼniya vekamo eno manileʼmo maiʼniyesinana himamuʼaletiʼmo alino hageno atesigeno ofaliʼniyesipiye, huʼa huʼnae.
Yesuʼa Layosiʼmo alino he tino ateʼniya gemae
38 #
Mt 27:60
Yesuʼa halate lusi kava huno aipamoʼmo kana huʼnigenoʼaeʼmo kanolulegamo uʼniye. Yafa kapiʼmo kiʼa ateteʼa avayaleʼmo yafatetiʼmo aiʼa akani maleʼnae. 39Yesuʼa hunoʼaeʼmo, ani yafaʼmo alitapa heleve hulitutapa ataleyo, huno hapa paiʼnigeno Mataʼa faliʼniya vekamo asaʼamoʼmo hunoʼaeʼmo, Ala kava nene, huno, faliʼnigeta kita ateʼnonageno loleʼe loleʼe afinaʼmo ago uʼniyaʼmofeʼmo ago kano atumo aiʼniye, huno ha paiʼniye. 40#Yo 11:4,23-26Yesuʼa hunoʼaeʼmo, kagesamo afika fatago huʼnisanaʼmoʼmo Goti ha le konali yaʼaʼe himamuʼaʼeʼmo agegane, huʼna kaha opaiʼnofiye, huno ha paiʼnigeʼapaeʼmo 41yafaʼmo aliʼa heleve huʼa ataleʼnagenoʼaeʼmo Yesuʼa alino maku huno kokuʼnategamo ageʼnenoʼaeʼmo, Afoʼnimogae, huno, geʼnimo ago afiʼnanaʼmofeʼmo kahao keʼmo nehove. 42#Yo 12:30Muki afinaʼmo geʼnimo neʼafine, huʼna ago afiʼnove. Afiʼnovaʼmonanafa manileʼmo nagaeʼeʼmo magokepiʼmo lokaeʼa maiʼnaya vayaʼmogimo afiteʼapaeʼmo, Gotiʼa alino ateʼnigeno emineʼniye, huʼa apakesamo afiʼa fatago hisayafeʼmo ani gemo nehuve, huno huteno 43alopa gefatiʼmo hunoʼaeʼmo, Layosiyo, huno, he tika emikeno, huno ge huʼniye. 44Kenaletiʼmo faliʼniya vekamo augosafiʼe aiya ayategaʼeʼmo hayaeʼa ateʼnaya vekamo he tino emineʼniye. Inagi Yesuʼa hunoʼaeʼmo, kenamo hakalu heta ategeno vino, huno hapa paiʼniye.
Yesuʼmo amagisayafeʼmo vegemo huʼnaya gemae
(Mt 26:1-5; Mk 14:1-2; Lu 22:1-2)
45 #
Yo 4:48; 7:31 Asole Yu vayaʼmo Maliyategamo eʼa maiʼnaya vayaʼmogimo Yesuʼa huʼniya kavaʼmo ageteʼapaeʼmo agaefeʼmo apakesamo afiʼa fatago huʼnae. 46#Lu 16:31Huʼnayaʼmonanafa mago vayaʼamogimo uʼa Falasi vayaʼaifeʼmo Yesuʼa huʼniya kavafeʼmo ava gemo huʼa hapa paiʼnae. 47Afiteʼa kanisole vayanagi mono huʼa neʼapataya vayaʼaiteʼmo yagaiʼa neʼapataya vayanagi Falasi vayanagi huʼa aliʼa anupa huʼa maiʼneʼapaeʼmo, na agufa kavaʼmo hisune. Ani vekamoʼa noʼagona agufa asole aune kavaʼmo nehiye. 48Oʼatafauta afaʼa ageta ataleʼnisunageno ani agufa kavakeʼmo hulino neʼvisigeʼapaeʼmo muki asole vayaʼmogimo agaefekeʼmo lama gemo nehiye, huʼa huteʼa akame hugae. Lomu gamani vayaʼmogimo eʼa alopa mono notimo heʼa halagape vaiʼa ataleteʼa kame huʼa latesageta ataleta atagu faetuteta hugune, huʼa huʼnae. 49Apakaepatiʼmo mago vekamo agiʼamo Kaiyafasiʼa ani kafugamo mono huʼa neʼapataya vayaʼaiteʼmo yagaino neʼapateya vekamoʼa hunoʼaeʼmo, lapakaemo aiseʼamo oʼafiʼnae. 50#Yo 18:14Magoke vekamoʼa muki vayaʼmogitalefeʼmo falino latesigeta hano osuta afaʼa maisunafeʼmo kanalene, hutapa hutetapa lapakesa afifi hutapa noʼmaiye, huno hapa paiʼniye. 51#Aep 50:20Agaiʼamo ani gemo osuʼnifa ani kafugamo mono huʼa neʼapataya vayaʼaiteʼmo yagaino neʼapateya vekamo maiʼniyaʼmofeʼmo aune gemo huno Gotitegati gemo alinineno aeno hakalo huno hapa painoʼaeʼmo, Yesuʼa Yu nofi vayaʼaitefeʼmo falino apategaiye. 52#Yo 10:16; 17:21; 1 Yo 2:2Yu nofi vayaʼalefekeʼmo falino oʼapategaiyaʼmonanafa muki Goti mafaʼneʼamo atagu faeʼuʼeʼa huʼa maiʼnaya vayaʼmo apavalelineno alino anupa huno apateteno magoke nofi vayaʼmo alino ha maleno apategaiye, huno hapa paiʼniye. 53#Yo 5:18Ani afinatetiʼmo haiya kava huta amagisupi, huʼa huteʼa vege huʼnae. 54#Yo 7:1Huʼnayaʼmofeʼmo Yesuʼa magoʼe huno Yu vayaʼai apaulagaleʼmo umenitata osuno ataleno kaʼme kotegamo uno Ifalemu taonifiʼmo geʼamo neʼafiya vayaʼeʼmo maiʼniye.
55 #
2 Sit 30:17; Ap 21:26 Yu vayaʼai Pasova afinaʼmo hogo huʼnigeʼapaeʼmo hogoteʼa muki vayaʼamogimo mono kavaʼmo akame hisayafeʼmo alo huteʼa neʼyaʼmo nesayafeʼmo muki koʼapiletiʼmo ataleʼa Yulusalemu taonifiʼmo uʼnae. 56#Yo 7:11Uʼa haiʼa alopa mono nopiʼmo he tiʼa maiʼneʼapaeʼmo Yesuʼa agesayafeʼmo apakaiʼapimo huʼapaeʼmo, na agufa yane, huta lapakesamo neʼafiye. Neʼyaʼmo nesayategamo oʼmegaiye, hutapa lapakesamo neʼafifiye, huʼa huʼnae. 57Mono huʼa neʼapataya vayaʼaiteʼmo yagaiʼa neʼapataya vayaʼe Falasi vayaʼmogiʼeʼmo huʼapaeʼmo, mago vekamogamo agesanaʼmoʼmo eka laha paigetao kalavusi huta ateno, huʼa hu maleʼnae.
Zur Zeit ausgewählt:
Yoni 11: kyg2013
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.
