THRÜNTAN 15
15
Abram kheak Thrünpuh Tangzüng
1Ha dunglim Atungpuh yu michih khülang ching Abram kilim arüde tha, “Dütre Abram. I nü tsung, khide ato nü thsambah ah.”
2Tüshe Abramnü alo, “ Atungpuh Thrünpuh , nünü I tümü jihba, tümütüsho I a tsührü mülade lah, tüsho I yamrüplurüp lupü thsüde Damaskarü Eliezer lah?” 3Tüsho Abramnü tha, “Nünü I kilim tsührü müjih; jumonü I yamkhün ching azhorü khülangnü I yamrüplurüp lubah.”
4Judüki Atungpuh yu api kilim arü: “Ha mihtsürü nü yamrüplurüp lurü müthsü, tüshe nü pang chingnü arükhi tsührü khülang nü yamrüplurüp lurü thsübah.” 5Apinü anihbuh wungdo ching bekhit tüsho tha, “Thüning lim kheahang, tüsho chiningbo nünü khekhamkhuksho kheang.” Tüsho apinü anihbuh ki tha, “Junangde nü tsühsoniusobo labah.”
6Abramnü Atungpuh kheak kin, tüsho api kilim anihbuh ju thiyuro-lungki khejih.
7Judüki Atungpuhnü api ki tha, “I ha lomi nü kilim jih-a yamrüplurüp lushihpü Kaldea ching lakhi Ur chingnü nü bekhitbuh Atungpuh ah.”
8Tüshe Abramnü keokhi, “Atungpuh Thrünpuh , ha lomi yamrüplurüp lupü küde thsah inü amükheahba?” 9Jumonü apinü anihbuh ki tha, “I kilim kam mahsam bankhitkhibo moshi 1, mihnu 1, namfimihnupung 1, tüsho guduru 1, müthrithrümpü nunu 1 de lubah arang.” 10Abramnü harü alala api kilim lude arü tüsho aphulungnü mahne thsüde khaprüp, tüsho büthsüthsü thrip abande zo; tüshe apinü wuhnu a mahne thsüde mükhaprüp. 11Küyimki müleangtopübo shihmibo kheak akikheanü, Abramnü yana tsoshih.
12Ani yüzahde alachoki, Abram yapshede yü, tüsho amiting akheah tüsho atrebe api kheak arü. 13Judüki Atungpuhnü api ki tha, “Nü tsühsoniusobo khiungke lomi ching hanrü thsüpü tüsho arü tankihpü lakhi tsükjide mükheahang, tüsho arünü arübo kam chi phüyi thsümüchibah. 14Tüsho arünü atankihpü lakhi trükshih she inü mahkhapbah; ju dunglim arübo lakhit ato lubah akhiukbah. 15Kheakü nü a sühakhim ching nüsa jipürü lung yübah; nü a shinde labah kiuyuka bahbah. 16Nü tsühsoniuso ha ching alode marüchoki lün phüyi labah, tümütüsho inü Amorrü yankhitpü thsüde arü mülimkhi musuhdahyi.”
17Küyimki ani yüzahbah mitingdo akamkhea, mokhühkhi mophüh khülang tüsho tsünduphung khülang akhiukbah shiwüh khapnakkhi phulung chingnü hode yü. 18Ju nimung Atungpuhnü Abram kheak tangzüng khülang thsü tüsho tha, “Nü tsühsoniusobo kilim inü ha lo jihchoh, Ijip ayung chingnü Euphra ayung ato– 19lomibo berukhi ju Kenrü, Kenizrü, Kadmonrü, 20Hitrü, Perizrü, Repharü, 21Amorrü, Kananrü, Girgashrü tüsho Jebusrü.”
Zur Zeit ausgewählt:
THRÜNTAN 15: YIMCBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
