Mateyi 5

Yesu akulandulila kwilata vagaju

1Yesu paliwonili lipinga lya vandu, akwenili kuchidunda, kayikala. Vanachuli vaki vamushengitela. 2Pambeli kakanda kuvawula,

Cheleli cha nakaka

Lukasi 6:20-23

3“Vanemiliwa vala yivayimanya kucha veni vakuwesha ha kwikala ngajila Chapanga!

Nongwa wutwa wa kumbindi ndi wawu.

4Vanemiliwa vala yivavelili na lung'ong'u,

Nongwa Chapanga davavafwamushi.

5Vanemiliwa vala vashishamoyu,

nongwa ava ndi davahali mlima wa shonu.

6Vanemiliwa vala yivavelili na njala na yivayikaja kulya kwanongwa ya ugoleki,

Chapanga davayikutishi.

7Vanemiliwa yivaveli na lusungu,

Chapanga davawoneli lusungu. 8Vanemiliwa vala yivamtama Chapanga kwa ndima yawu yosi,

nongwa davamuwoni Chapanga.

9Vanemiliwa vala yivavika kusika, kwanongwa davakemiwi vana va Chapanga.

10Vanemiliwa vala vagobuleka kwanongwa ya ugoleki,

kwanongwa wutwa wa kumbindi ndi wa veni.

11“Munemiliwa yumwi vandu pavavajowola na pavavasulumu na pavavapayishila findu fyosi fya wafu kwanongwa ya nenga. 12Musekileli na kunemelela kwanongwa fupu yenu ngomi kumbindi kwa Chapanga, nongwa pavavasulumili vambuyi ngimu yimusulumiwa ponopawu yumwi.”

Munyu na lwengi

Maliku 9:50, Lukasi 14:34-35

13Yesu kadeta, “Yumwi muva munyu wa mlima lakini munyu pawuyaghamisha chinosi chaki dayinoghishiwi na liki? Yikujakwa chindu kandi ha, ila yikuyasiwa hela na vandu vayivatangi.

14“Yumwi muva lwengi lwa mlima awu! Mbwani yivajengili pachidunda yikufisika ha. 15Kwahela mundu yanamika luliku na kulugubika kwa chiyungu, ila ukuluvika kumbindi ya pachindangawala ili yivang'alikili vosi yivaveli munyumba. 16Wuwowu luliku lwenu lulikili vandu, ili vafiwoni figoli fyenu finofu, vamujumi Tati wenu yaveli kumbindi.

Malawu va Chapanga na Mayandiku va Vambuyi

17“Mukotoo kwihola kucha nyisa kuwusha Malawu va Chapanga vamupili Musa na mayandiku va vambuyi, ila nyisa kugola fivi. 18Nakaka nguvawombela, kumbindi na mlima dawufipeli, lakini kwahela hata liyandiku limu wala lilawu daliwushiwi, mbaka fyosi fivi. 19Yoyonda davifyi hata lilawu limu lidokwa pitu vosi na kuvawula vamonga vavifyi, ayu daghavi mdokwa nendu muwutwa wa kumbindi kwa Chapanga. Lakini yula daavakamuli na kuvawula vengi, ayu daghavi mkomi muwutwa wa kumbindi kwa Chapanga. 20Nguvawombela, ugoleki wenu pawuyongisheka ng'odu pitu wula wa Mafwalisayu na vawula va Malawu, damuyingili ha muwutwa wa kumbindi kwa Chapanga.”

Mawuli yivayilata chifuki

Lukasi 12:57-59

21“Mupikanila kala kucha vandu va pakwandi vawombiliwili, ‘Ukotoo kuwulaya! Yula dawulayi dahighiwi.’ 22Lakini nenga nguvawombela, yoyosi yamukalalila mlongu mundu, ahighiwi. Yamubedala mlongu mundu dayeghiwi kuchitemela. Yamukema mlongu mundu ‘Mpufi’ kava munjifwa ya kuyingila mulifumbika.

23“Topi, pawuyegha fupu yaku pafyalu na pawukumbuka kuva na shoshu na mlongu waku, 24yileki fupu yaku pawulongolu pafyalu, yendi mukajovi tanila na mlongu waku, pambeli wuyi utawuli fupu yaku.

25“Mjovi na muhighi waku kalopu pamuva mkali mudeha pamuyenda kuchitemela. Leki pawugola naha ng'odu muhighi waku dakuyeghi kwa muhigha na muhigha dakuyeghi kwa vadima na yuwi davakuwopi muchijaka. 26Nakaka ngukuwombela, dawufumi ng'odu mula mbaka uhombi ligwala lya mwishu.”

Chilongu cha uwoni

27“Mupikanisha kucha vandu vavawombilili, ‘Mukotoo kugola uwoni!’ 28Lakini nenga nguvawombela, yamulola mdadala kwa dobukelu, kawonja nayu kala mundima yaki. 29Topi, lisu lyaku lya mlilu palikugola ugoli uvifyi, wulikolopoli kaliyasili kutali. Ngiba yuwi uyaghamishi chimu mumvili waku, pitu kuyasa mvili waku wonda mulifumbika. 30Kucha liwoku lyaku lya mlilu palikuvifya, ulidumuli uliyasi kutali. Ngiba yuwi uyaghamishi chindu chimu cha mvili waku pitu mvili waku wosi ugwijuki mulifumbika.”

Milandu ya kulekana

Mateyi 18:9, Maliku 10:11-12, Lukasi 16:18

31“Yiwombiwa kala, ‘mundu yamuleka mwehi waki, yamugayilili talaka.’ 32Lakini nenga nguvawombela, yamugayila mwehi mundu talaka ila kwanongwa yoyosi yingajila uwoni akuvifya kumugola ayu mdala agoli uwoni. Pambeli mlumi yamuheta mdala yula alekiwili na mweni akugola uwoni.”

Milandu ya malapu

33“Kandi mupikanila kucha vandu va pakwandi vawombiwili, ‘Ukotoo kuleka malapu vaku, lakini ugoli malapu vaku kwa Bambu.’ 34Lakini nenga nguvawombela, mukotoo kwilapa, kwa kumbindi kwa Chapanga, kwanongwa chila ndi chigoda cha wutwa wa kumbindi kwa Chapanga, 35Kandi mukotoo #5:35 kwilapa pamlima kwanongwa ndi chigoda chaki cha kuvikila mawulu na mukotoo kwilapa hata kwa Yelusalemu kwanongwa ndi mbwani ya wutwa mkomi. 36Kandi kotoo kwilapa kwa mutwi waku kwanongwa ukuwesha ha kulugola lufwili lumu luvi lukeli awu lutitu. 37Pawudeta, ‘yina’ yivi yina na ‘Ng'odu’ yivi ng'odu topi chochosi dachiyongisheki chikufuma kwa yula mwafu.”

Ng'ulilu yisiyilata Lugotu

Lukasi 6:29-30

38“Mupikanisha kucha yideteka, ‘Lisu kwa lisu, linu kwa linu.’ 39Lakini nenga nguvawombela, ukotoo kumugolela Lugotu mundu mwafu. Mundu pakuvangula likanja lya mlilu mughalambulili na likanja lya mkiyi. 40Mundu pakuyegha kuchitemela kucha kakutolela gwanda yaku, mleki atoli na lihabiti lyaku. 41Mundu pakung'ang'anika kupapa msiwu waki mwanja wumu, yuwi yendi kavili. 42Mundu pakakuluva umupi, kotoo kumupa chisowu mundu yadayila kukopa chindu.

Kuvatama vachimdwama

Lukasi 6:27-28, Lukasi 6:32-36

43“Mpikana kucha vadeta, ‘Mtami mjofi waku na kumunyekwa chimudwama waku.’ 44Lakini nenga nguvawombela muvatami vachimdwama venu na kuvadadavila kwa Chapanga vala yivavasulumu yumwi. 45Ili muvi vana va Tati wenu yaveli kumbindi. Kwanongwa mweni akuvavalila lijuva vandu vawafu na vanofu na kuvatonyela ndonya vandu goleki na va wafu. 46Damupati fupu liki kwa kuvatama vala yivavatama yumwi hela? Kwahela! Kwanongwa hata vala vasumula vakugola wuwowu! 47Kucha pamuvajambusha vaghanja venu hela, mukugola chindu ng'odu? Hata vandu vangajila kumumanya Chapanga vakugola wuwu. 48Topi mugoleki vasangi kucha Tati wenu yaveli kumbindi waveli msangi.”

Zur Zeit ausgewählt:

Mateyi 5: NdBV

Markierung

Kopieren