Beliebte Verse in San Mateo 17

Teilen

Saa ndi̱kaꞌan ra xiꞌin nda, káchi ra saa: ―Köo kándixa ndo Ndioxi yakan köo ndi̱kuchiñu ndo tava ndo ya. Saa chi vani loꞌo ni kándixa ndo ra án nda tá káa iin ndikin loꞌo mostaza kuꞌva saa kándixa ndo ra, ta kuchiñu ndo kaꞌan ndo xiꞌin iku yóꞌó ya kutaꞌa ya, ta xaa súvi ya tuꞌun káꞌan ndo xiꞌin ya, kutaꞌa ya. Saa chi tá kándixa ndo Ndioxi, vani loꞌo ni kándixa ñaꞌa ndo, ta kuchiñu ndo xaa súvi ndiꞌi ndo ya, chi nda iin ñaꞌa köo uꞌvi tá kándixa ndo ra.

Saa káꞌan ka ra Pedro xiꞌin ra, ñaa iin ndi̱kava nduu ndiꞌi viko yéꞌe taxan sata nda, ta tañu viko ikán xi̱ni soꞌo nda tachi Ndioxi, ndi̱kaꞌan ya xiꞌin nda, káchi ya saa: ―Ra yóꞌó ku seꞌe i, ra kúꞌvi ni ini i xíni i, ta kúsini ni i xiꞌin ra. Kuni soꞌo ndo ya káꞌan ra xiꞌin ndo ―káchi tachi Ndioxi xiꞌin nda.

Saa ndi̱kuiin Jesús ndi̱kaꞌan ra: ―¡Ndachu tuun ni ini ndo, köo xíin ndo kandixa ndo Ndioxi! ¿Án ndiꞌi saa vi kivi koo i xiꞌin ndo, kaꞌán ndo? ¡Ni kündee ka ini i xiꞌin ndo! ¡Vaꞌa! ¡Taxi ndo ra loꞌo ñaa ná kixi ra nuu i! ―káchi ra xiꞌin nda. Saa xa̱ꞌnda Jesús chiñu nuu tachi nduvaꞌa ikán, ndi̱kaꞌan ra xiꞌin ya keta ya kuꞌun ya. Saa ke̱ta ya kuaꞌan ya, ta ndikun ndu̱vaꞌa ra loꞌo ikán mí hora ikán.