Beliebte Verse in Iohane 1

Teilen

Agáiáná heáná peá to motarima hai mepoinálái i Hia, hira miꞌi to Napopewaliꞌ ánáꞌna Pueꞌ Ala.

Rungu-runguna, hangko tiꞌara mani duniáꞌ rapopewaliꞌ, to rapándiriꞌ hai Ngkóráꞌ ara miꞌi ami. Ngkóráꞌ iti, ambiꞌna miꞌi ara hingkakani hai Pueꞌ Ala, hai Ngkóráꞌ iti ia miꞌi Pueꞌ Ala haduduáNa.

Ia miꞌi pewangkaꞌ to mewangkaꞌ oaꞌ i lalu duniáꞌ to makáindi deꞌe, hai Ia tiꞌara haweꞌ hangkani nanangi kamakáindi.

Ngkóráꞌ iti mewaliꞌ tauna, hai toroꞌ i oloꞌtaꞌ i duniáꞌ deꞌe. Kiꞌita miꞌi kamaróhóna kuasaꞌNa. KuasaꞌNa iti Natarima hangko i UmáNa, láwiꞌ Ia miꞌi ÁnáꞌNa to HaduduáNa. LaluitaNa toꞌu ntepuꞌu, hai tongawaꞌ upu-upu kabulána laluNa i kitaꞌ.

Ia miꞌi to napontóáꞌ Pueꞌ Ala mampopewaliꞌ hinángkáꞌna to ara. Tiꞌara ara hampákáꞌ to mewaliꞌ ane tiꞌarai Ngkóráꞌ. Ia miꞌi ntóáꞌna katueꞌ. Ia to mampoweꞌi katueꞌ i tauna hai mopamabaa laluraꞌ.

Kahalona, Iohane moita Iesu lao i hia, hai nahángáꞌáheꞌ tauna to handaꞌ, “Nipeita! Domi maiꞌo tauna to rapándiriꞌ nodo Ánáꞌ Dimbá to napatimama Pueꞌ Ala. Ia miꞌi to ina mohuhuꞌ wátáNa mosulewátáikeꞌ bona tehómpókikeꞌ hangko i huku dósántaꞌ.

Ia miꞌi to napontóáꞌ Pueꞌ Ala mampopewaliꞌ duniáꞌ deꞌe. Agáiáná i tempóNa ara i duniáꞌ, tauna tiꞌara moisá kaheánáNa. Mogalo riꞌi hangka toSáráeliꞌNa, handaꞌheꞌ to tiꞌara motarima.

Ngkóráꞌ iti Topoánti pewangkaꞌ to toꞌu to mopamabaa laluna upu-upu tauna. Ia to haweꞌ miꞌi i duniáꞌ.

Musa moweꞌikeꞌ áturá peá. Agáiáná Iesu Kerisitu mopatongawaꞌákeꞌ kabulána laluna Pueꞌ Ala, hai moliu paturoꞌNa to toꞌu, taisá kaheánána Pueꞌ Ala.