Beliebte Verse in BEGGAR 1

Teilen

‍Ho Pwnbov benum, “Kuj ngulv nyi loq ngulam guss dvb, hoo ngulug hvb nyidwb pwtuj. Hoo bulam sa-svlog nguiyam hoo doag pvtangam, swcw nvg ao soqg tuun-meengam hoo gwn-xarnbo mwlwngam rvkil doog mvtuj.” Hoqgab Pwnbov nyia koam mwam atam guss dvb pwknum, Pwnboam guss dvb mwam mwv pwnum; bulam nyega bvla nyemwb mwv pwnum.

‍Hoo Pwnbov bulam lvqc cinum. Hoo Pwnbov bulam benum, “Mipar-gooiyiql hoo dumtwq-miilyw gvdwl swcw so bwwr nvka hoo sa-svlog nguiyam hoo doag pvtangam, swcw nvg ao soqg gwl-xarl swwnbo mwlwngam kaol rvkil doogto.”

Hog mwlwngv beggar maatab Pwnbov swcw-nyodongam pwnum.

‍Swcw si rulum-rvl tvl asarnum, hoo kanv rulum-rvl boam pulupnum. Hoo Pwnbog Yalv iss aoho jaakarl yvnum.

‍Hoo Pwnbov benum, “Huto,” hoo huto kunum.

‍Hoo Pwnbov kaanum hog mwlwngam mwwg pwnam mam, hoo kaato, hoq tuluhv aljaqnum. Hoo aal loox deenwg ariyum mvla arv dooknum.

‍Hoo Pwnbo hutongam kaatwl alpa hvnum. Hoo Pwnbo hutongam kan hoqgv mwbwq kunum.

‍Hoo Pwnbov benum, “Kaato, swcw nvg aoso aaxy xeenbo nwmw-nwsinam, hoo aaxy xeel mvm doonbo svvnam ngo nulam jipa kun. Hoq tuluhv nulug dvs gob nyitayin.

‍Pwnbov hutongam Aal hoo kanam Ai hvl eminum. Hoo otuq aalwg ariyum mvla arv dooknum.

‍Hoo Pwnbov benum, “Iss pengko hoqgv kvvc lama iss lywlinto, hoo hoqham iss hoqgv iss luusaq-luusaqb mvpin-mvra mvto.”

‍Hoo swcw nvg ao soqg gunggo-nyiiyongam, hoo doag pvtangam hoo swcw aoso gwn-xarnbo mwlwngam, hoo saql swwnbo mwlwngam, ngo jeenbo nwmw-nwsin svvn tulungam bulug dvs gob jipa kun.” Hoo hoqhv hvb nyiknum.

‍Hoo Pwnbov benum, “Aalam la aiyam mvpin sudwb, doa nvg lywk ao tolo hutongam doomto. Hoo dwr-dvra moodam, hoo aalam hoo vnywngam kaacin dvb lengm to

‍Hoo Pwnbo benum, “Swcw so nwmw-nwsinv hojar-jurabto, mvm doonbo svvn lo swwrab to, hoo luuxy cwr aaxy xeenbo svvn lo bulug aaxiam xeel swcw so swwrab mvto.” Hoo hoqhv hvb nyiknum.

‍Hoo Pwnbo kvvc lama dvb lywnam mam mvnum hoo lywnam niikum hoqg issam la lywnam aog issam asaq-asaqb mwbwq kunum. Hoo hoqhv hvb nyiknum.

‍Swcwngv nwmw-nwsinam, mvm doonbo svvn tulungam at atwg aaxiam xeelin mvdwb mvnum, hoo luuxy cwr svvn tulungv at atwg aaxiam xeelin kunum. Hoo Pwnbov hoqham kaatwl alpa hvnum.

‍Hoo Pwnbov koibo huto vnyi go pwnum—koi yaanbo ak ham aalam huum dvb hoo anyo bo ak ham aiyam huum dvb—hoo takar tulungam kam pwnum.

‍Hoo Pwnbov benum, “Doag niikumho doonbo iss tulungv nyook akin golo hingkum to, hoo pwtw bo kedam lengm to.” Hoo hoqhv hvb nyiknum. ‍Pwnbov pwtw bo kedam Swcwngv hvl eminum, hoo iss tulungv lvkin gob dook nyookam Sa-svlongv hvl eminum. Hoo Pwnbov hoqham kaatwl alpa hvnum.

‍Hoo Pwnbov bulug aoho lvqc cil, begamv, “Sa-svlog iss lo mipar-gooiyiql hoo naleqgo swwnka hoo swcw nvg aoso pvtangv naleq nvka.”

‍Hoo Pwnbov benum, “Swcw soqgv hog luucw-luut swwnbo svdinv bulug at-at dvparv swwlin to—tuun-mee hoo gwn-xarnbo hoo gunggo-nyiiyongv bulug at-at dvparv luuxy cwrv swwlin to.” Hoo hoqhv hvb nyiknum.

‍Hoo Pwnbov benum, “Iss uraho gwn-xarnbo svdin mwlwngam doomto, hoo swcw nvg aob pvta tulungam doa tolo jarl yvmto.”

‍Hoo Pwnbo swcw soqgv luuxy cwr gunggo-nyiiyongam bulug at-at dvparam swwlin mvdwb hoo tuun-meengam bulug at-at dvparam swwlin mvdwb pwnum, hoo ked aoso hoolu deed gwn-xarn boam at-atwg dvparam swwm dvb pwnum. Hoo hoqham Pwnbov kaatwl alpa hvnum.