If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

बल्ति ईशु ने ऐचे बारे मां केहले कि हमेशा प्राथना करनी ते हिम्मत नी छोड़नी चाही छै, वानु हा मिसाल ङिली, “कुई शहरा मां हेक न्यांयी रेहता, जको ना नरीकारा कनु ङरता, ते ना कुई बन्दे ची परवाह करता। ते ओही शहरा मां हेक बांढी असतरी वी रेहती, जको ओचे गोढु आती कर केहती रेहती, ‘माये दुश्मना लारे माया सही न्यां करती ङे।’ ओ कई बेले तक तां ना मनला पर अन्त मां विचार करती कर केहले, ‘मैं ना नरीकारा कनु ङरे, ते ना बन्दा ची कहीं परवाह करे। तां वी हा बांढी असतरी मनु सताती रिहे, ऐवास्ते मैं विचा न्यां चुकावी, कङी इसड़े ना हो कि घड़ी घड़ी आती कर अन्त मां माये नाका मां दम करे।’ ”
प्रभु ने केहले, “सुणा, हा अधर्मी न्यांयी का किहे? ऐवास्ते का नरीकार आपणे चुणले आला चा सच्‍चा न्यां नी चुकावी, जको रात-ङिओ ओची दुहाई ङिते रिहे? का ओ वांचे बारे मां देर करी? मैं तम्हानु किहे पला, ओ तुरन्त वांचा सच्‍चा न्यां चुकावी। तां वी मैं इन्साना चा पूत जिसे बेले आवी, तां का मैं धरती उपर विश्‍वास ङेखी?”

ते ईशु ने कितना नु जको आपणे उपर भरोसा राखते कि अम्ही धर्मी छिऊं, ते नेरा नु तोच्छ जाणते, हा मिसाल ङिली, “ङोन बन्दी मन्दरा मां प्राथना करने वास्ते गेली, हेक फरीसी हुता ते नेरा चुंगी गेहणे आला। फरीसी खड़ा हुती कर आपणे मना मां यूं प्राथना करु लाग़ला, ‘हे नरीकार, मैं दुधा धन्यवाद करे पला, कि मैं नेरा बन्दा आलीकर अन्धेर करने आला, अन्यायी ते व्यभिचारी कोनी, ते ना ऐ चुंगी गेहणे आले चे बराबर छै। मैं हफ्ते मां ङोन वारी उपवास राखे, मैं आपणी कमाई चा ङसवां हेंस्सा वी ङिये।’
“पर चुंगी गेहणे आले ने दूर खड़े हुती कर, स्वर्ग़ा सनु आंखी चवणीया वी ना चाहलीया, बल्कि आपणी छात्ती कोटती-कोटती कर केहले, ‘हे नरीकार, मैं पापी छै, माये उपर दया कर।’
“मैं तम्हानु किहे पला कि ओ ङुजा कोनी, पर ऊंही इन्सान धर्मी ठहराले गेलते आपणे घरे गेले, कांकि जको कुई आपणे आप नु बङे बणावी, ऊं छोटे करले जई, ते जको आपणे आप नु छोटे बणावी, ऊं बङे करले जई।”


बल्ति लौक ब़ाला नु वी ओचे गोढु आणु लाग़ले कि ओ वांचे उपर हाथ मेहलो, पर चैला ने ङेखती कर वानु धमकाले। ईशु ने ब़ाला नु गोढु हकारती कर केहले, “ब़ाला नु माये गोढु आऊं ङिया, ते वानु मना ना करा, कांकि नरीकारा चा राज़ इसड़ा चा ही छै। मैं तम्हानु सच्‍च किहे पला कि जको कुई नरीकारा चे राज़ नु ब़ाला आलीकर स्वीकार नी करी ओ ओचे मां कङी ना जा सग़ी।”


कुई सरदारा ने ईशु कनु पूछले, “हे उत्तम गुरु, अनन्त जीवन चा अधिकारी हुवणे वास्ते मैं का करे?”
ईशु ने ओनु केहले, “तु मनु उत्तम कां किही? कुई उत्तम कोनी, सेर्फ हेक, यानि नरीकार। तु आज्ञा नु तां जाणी, ‘व्यभिचार नी करना, हत्या नी करनी, चोरी नी करनी, ते कूड़ी ग़वाही नी ङेणी, आपणे ब़ा ते आपणी आई चा कद्दर करना।’ ”
ओणे केहले, “यां सब नु मैं बचपन कनु मनता आला।”
ईं सुणती कर ईशु ने ओनु केहले, “दुधे मां हेक बाते ची कमी छै, जा आपणे सब कोच्छ बेचती कर कंगाला नु ङे, ते तनु स्वर्ग़ा मां धन मिली, ते आती कर माये भांसु टुरती पड़।” ओ ईं सुणती कर ब़ोहत उदास हुला, कांकि ओ बङा धनवान हुता।
ईशु ने ओनु ङेखती कर केहले, “धनवाना चे नरीकारा चे राज़ मां जाणे कितने मुश्किल छै। नरीकारा चे राज़ मां धनवान चे जाणे कनु, ऊंठा चे सुई चे दुक्‍का महु निकलती जाणे आसान छै।”
ऐचे उपर सुणने आला ने केहले, “तां बल्ति काया उद्धार हो सग़े?”
ओणे केहले, “जको इन्साना कनु ना हो सग़ी, ऊं नरीकारा कनु हो सग़े।”
पतरस ने केहले, “ङेख, अम्ही तां घर ब़हार छोड़ती कर दुधे भांसु टुरती पले।”
ईशु ने वानु केहले, “मैं तम्हानु सच्‍च किहे पला कि इसड़े कुई कोनी जेह्णे नरीकारा चे राज़ वास्ते घर, जा घराआली, जा भावां, जा आई-ब़ा, जा ब़ाला-ब़च्‍चा नु छोड़ती ङिले हो। ते ऐ समय कई गुणा ज्यादा ना गिहो ते आणे आले युगा मां अनन्त जीवन।”


बल्ति ओणे ब़ारहा नु लारे गेहती कर वानु केहले, “ङेखा, अम्ही यरुशलेम नु जऊं पले, ते जितनीया बाता मैं इन्साना चे पूता चे वास्ते भविष्यवक्‍ता चे जरिये लिखलीया गेलीया, वे सब पुरीया हुवे। कांकि ओ नेरीया जातिया चे हाथा मां सोंपला जई, ते वे ओनु ठठा मां उङारे, ते ओचा अपमान करे, ते ओचे उपर थूके। ते ओनु कोड़े मारे, ते मारती नाखे, ते ओ तीजे ङिओ जीता हुती जई।”
पर वाणे यां बाता महु कुई वी बात कोनी समझली, हा बात वाकनु लुकली रेहली, ते जको केहले गेले हुते वांची समझी मां कोनी आलते।


जिसे बेले ईशु यरीहो शहरा चे गोढु पुज़ला, तां हेक अन्धा सड़के चे किनारे ब़ेहला भीख मांगे पलता। अन्धा भीड़ चे टुरणे ची अवाज सुणती पूछु लाग़ला, “ईं का हुवे पले?”
वाणे ओनु बावड़ले, “ईशु नासरी जाये पला।”
बल्ति ओणे साङ मारती केहले, “हे ईशु, दाऊद ची ऊलाद्ध, माये उपर दया कर।”
वे जको आग़ु-आग़ु जई पलते, वे ओनु दड़काऊं लाग़ले कि चोप रिहो, पर ओ होर वी साङ मारु लाग़ला, “हे दाऊद ची ऊलाद्ध, माये उपर दया कर।”
तब ईशु ने खड़े हुती कर आज्ञा ङिली कि ओनु माये गोढु गेहती आवा, ते जब ओ गोढु आला तां ओणे ओकनु पूछले, “तु का चाहवी कि मैं दुधे वास्ते करे?”
ओणे केहले, “हे प्रभु, ईं कि मैं ङेखु लाग़े।”
ईशु ने ओनु केहले, “ङेखु लाग़, दुधे विश्‍वास ने तनु ठीक करती ङिले।”
ते ओ वे घड़ी ङेखु लाग़ती गेला, ते नरीकारा ची बढ़ाई करता हुला, ईशु चे भांसु टुरती पला, जब सारा लौका ने ईं ङेखले तां नरीकारा ची स्तुति करली।

Höre लूका 18