Tharu, Dangaura: Dangaura Tharu (New Testament)

Dangaura Tharu

सृष्‍टि हुइनासे आघहेँ वचन रलह। वचन परमेश्‍वरकसँग रलह ओ वचन परमेश्‍वर जो रलह। सृष्‍टि हुइनासे आघहेँ वचन परमेश्‍वरकसँग रलह।
यिह वचनद्वारा परमेश्‍वर सब चिजिक सृष्‍टि कर्लह। उहाँद्वारा बाहेक कुछु चिजिक सृष्‍टि नैहुइल्। वचन सृष्‍टि हुइल् चिजह जीवन देहुइया रलह। यी जीवन देहुइया मनैन्‍हक लाग ज्‍योति रलह। यी ज्‍योति अन्‍धकारम चम्‍कठ। अन्‍धकार ज्‍योतिह बुटाइ नैसेक्‍लहो।
परमेश्‍वरक पठाइल एकठो मनैया अइल, हुँकहार नाउँ यूहन्‍ना रलहन। ऊ उह ज्‍योतिक बारेम साक्षी देहक लाग अइलह। सब मनै ज्‍योतिह चिह्‍न्‍क विश्‍वास करहीँ कना उद्देश्‍यले ऊ अइलह। यूहन्‍ना अपन्‍हे उ ज्‍योति नैरलह, तर ज्‍योतिक बारेम साक्षी देहक लाग अइलह। हरेक मनैन ज्ञान देना सत्‍य ज्‍योति संसारम आइटलह।
उहाँ संसारम रलह, संसार उहाँद्वारा जो बन्‍लहा, तर फे संसार उहाँह नैचिन्‍हल। उहाँ आपनऽ मनैन्‍हकठे अइल, तर उहाँक आपनऽ मनै उहाँह इन्‍कार कैदेल। तर उहाँह स्‍वीकार कर्ना ओ विश्‍वास कर्ना सबजहन उहाँ परमेश्‍वरक सन्‍तान हुइना अधिकार देल। हुँक्र मनैन्‍हक वंशसे, शारीरिक इच्‍छले, या कौनो पुरुषक कल्‍पनाद्वारा जन्‍म पाक परमेश्‍वरक सन्‍तान हुइल् नैहुइट। हुँक्र त परमेश्‍वरसे जन्‍मल् रठ।
उ वचन मनैया हुइल ओ हमार बीचम रल। उहाँ अनुग्रह ओ सत्‍यले भरिपूर्ण रलह। हम्र उहाँक महिमा देख्‍ली। उ त परमेश्‍वर बाबकठेसे आइल एक्‍कठो छावक महिमा रलहन।
यूहन्‍ना उहाँक बारेम गवाही देल। ऊ उच्‍च स्‍वरले कल, “म्‍वार पाछ अउइया महीसे धेर महान् बाट, काकरकि उहाँ मै जन्‍मनासे आघहेँ रलह। म्‍वार कहल यी बात उहाँकऽ बारेम हो।” उहाँक अनुग्रहक भरिपूर्णतामसे हम्र सबजन एक पाछ और आशिष पारख्‍ली। काकरकि व्‍यवस्‍था मोशाद्वारा देगैल्, तर अनुग्रह ओ सत्‍यता येशू ख्रीष्‍टद्वारा आइल। परमेश्‍वरह कुई फे कबु नैदेख्‍लहो। परमेश्‍वर बाबकसँग रना एक्‍कठो छावा उहाँह प्रकट कैदेरख्‍ल।


जब यरूशलेमसे यहूदीहुँक्र पूजारीहुँकन ओ लेवीहुँकन यूहन्‍नकठे “टुँ के हुइटो?” कैक पुछ पठैल, तब ऊ का कल कलसे, “मै ख्रीष्‍ट नैहुइटुँ” कैक स्‍वीकार कर्ल। ऊ स्‍पष्‍ट रूपले यी बात कैदेल।
हुँक्र हुँकहीन पुछ्‌ल, “का टुँ एलिया हुइटो तो?”
ऊ कल, “नाहीँ, मै नैहुइटुँ।”
हुँक्र कल, “का टुँ संसारम हमार आशा करल अइना अगमवक्ता हुइटो तो?”
ऊ जवाफ देल, “नाहीँ।”
हुँक्र कल, “टुँ के हुइटो? हमन जनादेओ, तब हम्र जाक हमन पठुइयन जवाफ देह सेक्‍बी। टुँ अपन्‍हेह के हुइटुँ कठो तो?”
ऊ कल “यशैया अगमवक्तक कहलअस, उजार ठाउँम चिल्‍ला-चिल्‍लाक बोलुइयक मै आवाज हुइटुँ, ‘प्रभुक डगर स्‍वाझ बनाओ।’”
उ बात पुछ आइल मनैन फरिसीहुँक्र पठारख्‍लह। हुँक्र हुँकहीन पुछ्‌ल, “ओसिन हो कलसे, टुँ ख्रीष्‍ट फे नैहुइटो, एलिया फे नैहुइटो, ओ हमार आशा करल अगमवक्ता फे नैहुइटो कलसे, काजे बप्‍तिस्‍मा देठो?”
यूहन्‍ना हुँकन जवाफ देल, “मै त पानीक बप्‍तिस्‍मा देठुँ, तर टुन्‍हक माझम एक जन बाट, जेहीह टुह्र नैचिह्‍न्‍टो। म्‍वार पाछ अउइया उहाँ जो हुइट। मै त उहाँक जुत्तक टेनी छोर्ना योग्यक फे नैहुइटुँ।”
यी सब बात यर्दन लद्‍यक उपार बेथानियम हुइलहा। उ ब्‍याला यूहन्‍ना यिह ठाउँम बप्‍तिस्‍मा देहटलह।

द्वासर दिन येशूह आपनओर आइट देख्‍क यूहन्‍ना कल, “हेरो, सारा संसारह पापमसे छुट्‌कारा देहक लाग बलि हुइना परमेश्‍वरक पठ्‌रू! मै उहाँकऽ बारेम कनहुँ, ‘म्‍वार पाछ एक जन अइटीबाट, उहाँ महीसे महान् बाट, काकरकि उहाँ मै जन्‍मनासे आघहेँ रलह।’ पैल्‍ह मै उहाँह चिन्‍ह्‍ल नैरनहुँ, तर इस्राएलीन्‍हक बीचम उहाँह चिन्‍हाइ सेकम कैक मै बप्‍तिस्‍मा देटी आइटुँ।”
यूहन्‍ना आम्‍ही का कल कलसे, “मै पवित्र आत्‍मह स्‍वर्गमसे ढुकुरअस आक उहाँकम परट्‍ देख्‍नु। यी घट्‍नासे आघ मै उहाँह चिन्‍ह्‍ल नैरनहुँ, तर पानीले बप्‍तिस्‍मा देहो कैक महीह जे पठैल, उहाँ जो महीह कल, ‘जौन मनैयकम पवित्र आत्‍मह आक परट्‍ देख्‍बो, पवित्र आत्‍मले बप्‍तिस्‍मा देहुइया उहाँ जो हुइट।’ मै पवित्र आत्‍मह ढुकुरअस येशूकम परट्‍ देख्‍नु। उहओर्से मै साक्षी देठुँ, कि उहाँ जो परमेश्‍वरक छावा हुइट।”

द्वासर दिन फेदोस्र यूहन्‍ना आपन दुइ जन चेलन्‍हकसँग उह ठाउँम ठह्र्‍याइल रलह। ऊ येशूह नेङ्‌ग्‍टी जाइट्‍ देख्‍ल त कल, “हेरो, उहाँ परमेश्‍वरक पठ्‌रू हुइट।”
हुँकहार कहल यी बात सुन्‍क उ दुइ जन चेलावँ येशूक पाछ लग्‍ल। येशू घुम्‍क हेर्ल, ओ हुँकन पाछ-पाछ आइट्‍ देख्‍क हुँकन पुछ्‌ल, “टुह्र का चाहटो?” हुँक्र उहाँह कल, “रब्‍बी” (याकर अर्थ हो, गुरुजी), “अप्‍न कहाँ रठी?”
उहाँ हुँकन कल, “आक हेरो ना।” हुँक्र गैल, ओ उहाँक बैठल ठाउँ देख्‍ल। उ ब्‍याला चार बजटह। उहओर्से उ दिन हुँक्र उहाँकसँग बास बैठ्‌ल।
यूहन्‍नक बात सुन्‍क येशूक पाछ लग्‍ना दुइ जनमध्‍ये एक जन त सिमोन पत्रुसक भैया अन्‍द्रियास रलह। ऊ सबसे पैल्‍ह आपन दादु सिमोन पत्रुसह भेँटैल ओ कल, “हम्र मसीह अर्थात् ख्रीष्‍टह भेँटैली।” अन्‍द्रियास सिमोनह येशूकठे लैगिल। येशू सिमोनह हेर्क कल, “टुँ योआनेसक छावा सिमोन हुइटो। आबठेसे, टुँ केफास कैजिबो।” (केफासक अर्थ पत्‍थर हो ओ यहीह ग्रीक भाषम पत्रुस कैजैठा।)

द्वासर दिन येशू गालील क्षेत्रम जैना विचार कर्ल ओ गैल। उ ब्‍याला उहाँ फिलिपह भेँटैल ओ कल, “म्‍वार पाछ लागो।”
फिलिप फे पत्रुस ओ अन्‍द्रियासकअस बेथसेदा सहरक मनैया रलह। तबदोस्र फिलिप नथानेलह भेँटैल ओ कल, “धर्मशास्‍त्रम मोशा ओ अगमवक्ताहुँक्र ज्‍याकर बारेम लिख्‍रख्‍लह, उहाँह हम्र भेँटैली। उहाँ त नासरतम रना योसेफक छावा येशू पो हुइट।”
यी बात सुन्‍क नथानेल हुँकहीन कल, “का नासरतसे कौनो असल चिज आइसेक्‍ठा तो?”
फिलिप हुँकहीन कल, “आक हेरो ना!”
येशू नथानेलह आपनठे आइट्‍ देख्‍क हुँकहार बारेम कल, “एकठो पक्‍का इस्राएलीह हेरो। हुँकाहारम कुछु छलकपट नैहुइटन।”
नथानेल कल, “अप्‍न महीह कसिक चिह्‍न्‍ली?” येशू हुँकहीन जवाफ देल, “फिलिप टुँहीन बलैनासे आघ टुँ अञ्‍जीरक रूख्‍वटर रहलब्‍याला जो मै टुँहीन देखरख्‍नहुँ।”
नथानेल उहाँह कल, “गुरुजी, अप्‍न परमेश्‍वरक छावा हुइटी, अप्‍न त इस्राएलक राजा हुइटी।”
येशू हुँकहीन कल, “का मै टुँहीन अञ्‍जीरक रूख्‍वटर देख्‍नु कलक कारण टुँ विश्‍वास कर्लो? टुँ यहीसे फे महान चिज देख्‍बो।” उहाँ हुँकहीन कल, “जाट्‌टीसे मै टुँहन कहटुँ, टुह्र स्‍वर्ग उघ्रल ओ परमेश्‍वरक स्‍वर्गदूतन मै मनैयक छावकम उप्‍पर जाइट् ओ टर ओल्‍हाइट्‍ देख्‍बो।”

Höre यूहन्‍ना 1