Aghul - 2005 IBT (Luke) Drama

Ӏисайил юркӀв алихьас завал вей хьуная кӀилди налукар завал аркьаттарна гунагьар кеяттар. Фарисеярина Ӏелимари, хъел вей, агъай хьуная:
– Ге инсанди гунагьар кеяттар кьабул аркьа, гунира кехӀей Ӏелди гебурихъай!
Тегуна Ӏисайи ахъакьуная гебурис мисала:
– Белекин, чвакес сайихъ верш хӀуб хъая. Гебурикес са хӀуб гулучин, атуна чӀирил ежчӀурна ерчӀу хӀубра, гулуна сайихъас руцастту ге, джикӀесттегьен? ДжикӀигуна, шатти алгъихьуна учин гӀунил хӀубра, весе ге хулади. Унахъуна дусттарисра, къуншибурисра, пасе ги: «Шад ухь захъай, зас зе гулуна хӀуб джикӀине!» Зун чвас агъая, гьегиштти заварилла шатти ахьасе са инсандихъас, нагагь ги учик тахсирар кеяф мутӀеӀ хьуна, учин гунагьар, учин гардандиъ гъушухаб, ежчӀурна ерчӀу гунагьар кидава инсандихъас дала.

– Магьа хъара мисала: Нагагь са дишагьлин йицӀу арсуран манатикес са манат гулухаб, кикӀуна лампара джикастту ги хал, руцай учин манат джикӀесттегьен? ДжикӀигуна, унахъуна къучмабурисра, къуншибурисра, пасе ги: «Шад ухь захъай, зас зе гулуна манат джикӀине!» Хъугъ Захъ, гьелиштти шад хьасе Аллагьдин малайикара, учик тахсирар кеяф мутӀеӀ хьуна, учин гунагьар учин гардандиъ гъушу са инандихъас.

Ӏисайи хъара ахъакьуная:
– Са инсандихъ хъахьуная Ӏу кӀиркӀ. БицӀи кӀиркӀа пуная дадас: «Е дад, нан ве девлетикес зас рукьа пай». Дадара пай акьуная девлет Ӏудар шиниккварис. Са Ӏу ягъалас бицӀи кӀиркӀа учин пай кӀилди масса йиная, фай пулла ушуная ге варха са хӀуькуматтиди. Тисаъ, кефунилди ешемиш вей, кӀилди учин аяттар хардж акьуная ги. Ги кӀилди хардж акьугуна, те хӀуькуматти ппара Ӏайи гаш архьуная, ге кӀиркӀ дарвелдиъ архьуная. Ушуная ге тисаъ ешемиш вея са инсандис кар акьас. Те инсанди гьикуная ге учин галуди ваккар ухӀас. Гашила луькӀей, ге рази ахьуная ваккарис ккерхъа хурар ӀуьтӀанас, сара фера адавай. КӀилиъ ачархьуна, пуная ги учи учис: «Фидегьен курар аркьа инсанар хъая зе дадахъ, тебурис фун ацӀасттегьен гуни ая, хъамилгвайра кехӀей э, ппай зун мисаъ гашила луькӀея! Ушуна зе дадалди, пасе зун: „Е дад, Аллагьдин удигьра, ве удигьра зак гунагьар кея. Ве кӀиркӀ э пас сара зун лайикьлу дава. Ве кар аркьа инсанаригӀди хьунара кьабул акье сара зун“».
Ге ушуная учин дадалди. Дадас вархайил алми димари агуна, Ӏегвал хьуная учин кӀиркӀ. Дад гьуккай гьучушуна, архьуна кӀиркӀан гардандиъ, мач икӀуная гис. КӀиркӀа пуная дадас: «Е дад, зун Аллагьдин удигьра, ве удигьра гунагьин курар акьуная. Ве кӀиркӀ э пас сара зун лайикьлу дава». Дада пуная учин лукӀарис: «ТегӀди файдина ке батӀар кунара аликӀ мил, гъилихъ тӀубулла хъикӀ мин, лекара аликӀ мил. Файдина, рукк идже кук урчра, ягӀа хьин Ӏелди ухай шадвел акьасе. Ме зе кӀиркӀ кӀина уйи, гьал джан керхьуне мик, ме гӀачагулунуйи, гьал джикӀине ме». Гебури ӀуьтӀуб ухуб акьуна шадвелар акьуная. Ппай хӀа кӀиркӀ ге вахттуни хуйиъ ахьуная. Тисаас адина, хулагьди гьучарукьагуна, макьамаринна лехъунарин ун унихьуная гис. Унахъуна са лукӀус, хабар гъушуная ги: «Фи э тисаъ аркьаяф?» ЛукӀу пуная гис: «Ве чу адиная, те сагъ саламатти адехӀела, ве дада идже кук урч руккуная». ХӀа ччуччус, Ӏайи хъел адина, хулади ачевесра кехӀей кканхьуна адава. Дада, аттина миннат акьуная гис, хулади ачашаб пуна. ХӀа кӀиркӀа пуная дадас: «Магьа хьиму ис э зун, ве лукӀ суман, кар аркьай, вун петтара аркьай, амма вун зас мудур хьунара ефттава, зе дусттарихъай ӀуьтӀуб ухуб акьас. Ппай ве ме кӀиркӀ адегуна, вун йина пайра кефунилди хардж акьуна, вун гис идже кук урч руккуная». Дада пуная гис: «Е зе кӀиркӀ, вун гьемишан захъай аяф э, кӀилди зе аяттар вас э. Вун шад хьуна кканеф э, ве чу кӀинуйи, гьал джан керхьуне, гӀачагулунуйи, гьал джикӀине».

Höre Лука 15