Ngigua, San Marcos Tlalcoyalco - WBT Version (NT) Non-Drama

Ngigua, San Marcos Tlalcoyalco - WBT Version (NT) Drama

Kuthimejan kainxin xi thetuꞌan bingathjen xa ko bikao xa Jesús ngain Pilato. Ko nthi̱ꞌa̱ kuexiꞌin xa kjuangiꞌi xa Jesús ko ndachro xa:
—Jaꞌan ná bikon ná xii jiꞌi ncheketo xa chujnina ná, kai ndachro xa ixin sajonꞌa ná thi tumi jikininxin sajon ná ngain César, ko ndachro xa ixin jeꞌe xa thi Cristo, ko mee ruchro ixin jeꞌe naa xi thetuꞌan kai.
Kuthimejan Pilato banchiangiꞌi Jesús:
—¿Ajaꞌa Rey chujni judío?
Jesús ndachro:
—Jaan, inchin jaꞌa ndachro.
Ko Pilato ndachro ngain xi daana baketuꞌan ngain icha xi daana ko ngain kain chujni xrathe nthi̱ꞌa̱:
—Jaꞌan xruꞌin jianꞌa dithjaa xii jiꞌi.
Aro kain xa icha kuyao xa ko ndachro xa:
—Xii jiꞌi bancheketo xa chujni jii nguii nunthe Judea ixin thi tjaago xa. Kuexinxin xa ngain rajna Galilea, ko jai unthiꞌi jincheꞌe xa jamee.

Ko are Pilato kuiꞌin jiꞌi, banchiangi a Jesús juixin Galilea. Ko are Pilato kunuꞌe ixin juixin xa ngain nunthe thetuꞌan Herodes, ruaꞌan xa ngain jeꞌe. Ko ngain nchaꞌon teꞌa kai Herodes beꞌe nthi̱ꞌa̱ Jerusalén. Ko Herodes anto chee are bikon Jesús ixin jeꞌe anto see jixraxaon rugikon, ixin jeꞌe tsjé kuiꞌin ixin Jesús. Ko Herodes binao rugikon naa thi naꞌa bagikunxin ni runcheꞌe jeꞌe. Mexinxin Herodes anto tsjé banchiangiꞌi Jesús, aro Jesús xruꞌin batheꞌe. Ko nthi̱ꞌa̱ binthe tsjé xi daana baketuꞌan ngain icha xi daana ko tsjé xi tjaago ley, ko icha binthekjangiꞌi xa Jesús. Kuthimejan Herodes kunixin kain xi soldadue, chrjuinꞌa nichja xa ixin Jesús ko binthekjanua xa, ko binchengaa xa naa luntho anto chrjuin inchin lunthue xi thetuꞌan. Kuthimejan Herodes ruaꞌan Jesús ngain Pilato inaa. Pilato ko Herodes baningakuꞌen choo, aro ngain nchaꞌon mee kuexiꞌin bakao choo jian.


Ko Pilato baye̱e kain xi daana baketuꞌan ngain icha xi daana ko kain xi thetuꞌan ngain chujni judío, ko kain chujni rajna, ko ndachro ngain na̱:
—Jaꞌa ra bikuꞌna ra xii jiꞌi inchin naa chujni ncheketo ni rajna, aro jaꞌan banchiangia xa ngathexin kon ra, ko jaꞌan xruꞌin jianꞌa bithjaa xa ixin thi jaꞌa ra tetjangiꞌi ra xa. Kai Herodes binchekjan xii jiꞌi inaa ixin jeꞌe xruꞌin thi jianꞌa bithjeꞌe xa. Ko xii jiꞌi xruꞌin thi jianꞌa bincheꞌe xa ko jikininxinꞌa seꞌen xa. Mexinxin jaꞌan tsetuꞌan sikaon xa suji, kuthimejan tsanchrjanda xa satsji xa.
Ko ngain kiee rajna, Pilato bakanchrjanda naa thi teaxiꞌin. Aro kain chujni kuexiꞌin na̱ kuyao na̱ suji ko ndachro na̱:
—¡Ncho deꞌen xii yaa ko tanchrjanda Barrabás!
Ko Barrabás jiꞌi kuiaxiꞌin na̱ ngain nduꞌa xiiso ixin jeꞌe bancheketo chujni ngain rajna Jerusalén ko ixin naguenxon chujni. Pilato binao rukanchrjanda Jesús, mexinxin jeꞌe kjan nichja ngain na̱ inaa, aro jeꞌe na̱ icha seen kuyao na̱ ko ndachro na̱:
—¡Tenganito xa ntha cruz! ¡Tenganito xa ntha cruz!
Ninxin nthi̱ꞌa̱ ndachro Pilato ngain na̱:
—Mexinxin, ¿keꞌe jianꞌa bincheꞌe xii jiꞌi? Jaꞌan xruꞌin jianꞌa dithjaa xa ixin jikininxin seꞌen xa. Jaꞌan tsetuꞌan sikaon xa suji, kuthimejan tsanchrjanda xa satsji xa.
Aro jeꞌe na̱ bithuexinꞌa na̱, ko icha kuyao na̱ ko banchieꞌe na̱ Pilato tsenganito Jesús ngain ntha cruz. Aro icha suji kuyao na̱ ko bacha na̱ thi banchia na̱. Ko Pilato bincheꞌe inchin jeꞌe na̱ binao na̱. Ko jeꞌe kuanchrjanda sakjui Barrabás thi bancheketo chujni ko naguenxon chujni. Ko jeꞌe Pilato bajon Jesús ngain na̱ ixin runcheꞌe na̱ thi jeꞌe na̱ binao na̱.


Ko are satedikao na̱ Jesús ixin rukenganito na̱ ntha cruz, kayakuen na̱ naa xii biꞌin Simón, naa xi rajna Cirene jikjanxin xa ngataon jngi, ko bincheka na̱ ntha cruz ko jeꞌe ruee Jesús.
Ko anto tsjé chujni jiruee, ko tsjé nchrii tetsjanga nchra ixin juachjauen Jesús. Aro Jesús tsjeꞌe kain nchrii mee ko ndachro:
—Jaꞌa ra nchri Jerusalén, tsjangaxinꞌa ni ra jaꞌan. Icha jian tsjanga ra ixin tangi tsuꞌan ra ko tsjangaxin ra xaꞌan ra. Ixin ujitunchiaon nchaꞌon are chujni rundachro na̱: “Anto chrjuin ixin thi nchrii chroꞌa ruchunda chjan, ko binchekunkjinꞌa nchra xan ko thi nchrii binchekaiꞌa xan.” Ko are mee chujni sanchieꞌe jna setsingataꞌa na̱ jna ko jnachjan tsjamatja na̱. Ixin ja̱ ngain ntha yua jaꞌin ncheꞌe na̱, ¿mee keꞌe runcheꞌa na̱ ngain ntha xema?
Ko kai nthi̱ꞌa̱ tedikao na̱ yoo xi cheꞌe ixin sinthegeꞌen xa kai. Are ubiji na̱ ngain jna diꞌin Ntha Luro Jaa Chujni, nthi̱ꞌa̱ kuenganito na̱ Jesús ngain ntha cruz ko kai thi yoo xi cheꞌe, naa no rajianxiin Jesús, ko inaa xa no rakjon. Ko are Jesús ujinganito ntha cruz, ndachro:
—Suixin Ndudana, nchetjañeꞌe na̱ ixin nueꞌa na̱ keꞌe tencheꞌe na̱.
Ko kain xi soldado kuengaxin xa cha ixin kensen rugacha lunthue Jesús. Ko tsjé chujni beꞌe nthi̱ꞌa̱ ixin tatetsjeꞌe na̱, ko xi thetuꞌan rajna kjuanua xa Jesús ko ndachro xa:
—Jeꞌe nchao kjuengijna icha chujni, ko ncho danianxin ntha cruz, ja̱ ndua jeꞌe thi Cristo, thi ruaꞌan Ndo Dio.
Ko kain xi soldado kjuanua xa Jesús, ko binthekunchieꞌen xa ngain ntha cruz ko bajon xa vino san ixin biꞌi Jesús, ko ndachro xa:
—Ja̱ ndua jaꞌa thi Rey thetuꞌen chujni judío, danianxin nthacruz.
Ko ngain kon ntha cruz benganito Jesús beꞌe naa nthaa betaxin ngigua griego, latín ko hebreo thi ndachro:
“Xii jiꞌi thi Rey thetuꞌen chujni judío.”
Ko naa xi cheꞌe jinganito ntha cruz chrjuinꞌa nichja xa ngain Jesús ko ndachro xa:
—Ja̱ ndua jaꞌa thi Cristo, danianxin ntha cruz ko nchegania ni ra jaꞌan ná kai.
Aro inaa xi cheꞌe binchesatheꞌe choo xa ko ndachro xa:
—¿Axraguenꞌa Ndo Dio, jaꞌa thi kai ridathuꞌe tangi? Jaꞌan ná jikininxin ná jituan ná jiꞌi ixin tethjenga ná ꞌna thi jianꞌa binthoꞌo ná, aro xii jiꞌi xruꞌin jianꞌa bincheꞌe xa.
Kuthimejan ndachro xii mee ngain Jesús:
—Xraxaon na jaꞌan, are Suixin tsexiꞌin tsetuꞌan.
Ko Jesús ndachro:
—Jaꞌan rindathjo ixin jai jaꞌa sariꞌi ngajin nthi̱ꞌa̱ ngajni.


Are inchin ngusine nchaꞌon, ndakunaxin xeꞌe nguixin ngataꞌa nunthe, ko mee kunchrjeꞌen nii hora. Ko are ndabanga nchaꞌon, thi manta bethua ngaxiꞌin niꞌngo icha jié, ndabichjedunga manta. Kuthimejan Jesús suji ndachro:
—Suixin Ndudana, ngaa raa Suixin sakee espirituna.
Ko are jeꞌe juexin ndachro jiꞌi, ndabeꞌen.
Ko are bikon xi capitán romano ixin kexreen kuꞌen, jeꞌe xa xraon xa ko binchesayeꞌe xa Ndo Dio ko ndachro xa:
—Jaan, ndua xii jiꞌi xruꞌin jianꞌa jika xa.
Ko kain chujni te nthi̱ꞌa̱, are bikon na̱ kain mee, sabinthekji na̱ ko xrangii na̱ thon pechue na̱ ixin anto kuaa na̱ juachjaon. Ko kain ni jian bechunxin Jesús ko kain ni nchrii juixin Galilea ixin baruee nchra jeꞌe. Kjínxin tabinthe na̱ ixin bikon na̱ kain jiꞌi.


Beꞌe naa xii biꞌin José, ko xii jiꞌi anto jian xa ko rajnee xa Arimatea jii nuntheꞌe Judea, ko xii mee, naa xi thetuꞌan ngain niꞌngo. José jiꞌi jichuꞌen are siketuꞌan Ndo Dio ngataꞌa nunthe. Ko jeꞌe binchexruxinꞌa thi bincheꞌe chujni ngain Jesús. Mexinxin jeꞌe kjui bitsjeꞌe Pilato ixin biganchia juachaxin ixin sasikao Jesús. Kuthimejan bincheganianxin na̱ Jesús ntha cruz ko jeꞌe kuensia naa manta rua ko bikiin ngadoꞌo naa thjaue jna thi xra xruꞌin chujni dixrabaa. Mee kjui viernes tsukjin ko techuꞌen na̱ thi nchaꞌon nchejugaꞌa na̱.
Ko kain nchrii juixin Galilea ixin ruee nchra Jesús chiaon jidikauxin nchra José ixin binthetsjeꞌe nchra kexreen bixranxiꞌin na̱ Jesús ngain chinthi. Ko are sakjan nchra nchianduꞌa nchra, binchechjian nchra ndaxrajni ixin rukinga nchra nthauꞌe Jesús. Kuthimejan ngain thi nchaꞌon nchejugaꞌa na̱, jeꞌe nchra binthenchejugaꞌa nchra kai inchin thetuꞌan ley bayée Moisés.

Höre San Lucas 23