KECHENG 18
18
Abraham Aphan Inut Asopo Kepiji Kechak
1Mamre athengpi kangthir along Abraham aphan Hemphu cheklang-lo. Kephang-oknei arni apehem ajakan along Abraham kangnilun ahut, 2alangli lang-lo, lapen bangkethom amonit atum karjapding thek-long lo.#Ibr 13.2 Halatum aphan alangli thek-long-lok pen, halatum aphan kechetong jisi alangli kat-lo. Longle paphosi alangli angphun patongkilo, 3alangli pulo, “Akehai atum, kanghon pen sangsepin pen nelihem hatpet-ri; nanglitum aphan kangdukjisi neli ladak dolo. 4Nanglitum akeng kechamjile neliphan lang pavanlongtha; nanglitum laso athengpi arum sang iktha. 5Neli an vanchom lang; nanglitum kedambomji aphan la jakong nangpipo. Nelihem nanglitum kevang pen ajok neliphan nanglitum man pilo, la apotsi nanglitum aphan neli pangduk longtha.”
Latum thak-lo, “Nangliphan chorolo, Nelitum deng-lo.”
6Abraham apehem arlo chelutdam seraksi Sarah aphan pulo, “Serak-ra nangkemenei ahim aduk thoila isi pen enra ajehak ahim pangdangtha.” 7Anke alangli pi ahur anat katsi athu kedo-op achainong aloso enlo, lapen la inut aban aphan pilo, la seraksi sikkoilo. 8Alangli ajehak chulang athu, ajehak chulang, lapen ok pon si, monit atum angno bidamlo. Hadak thengpi arum halatum aphan alangli-methangsi ruthailo, lapen latum cholo.
9Anke latum alangliphan arjulo, “Nangli piso Sarah konat-lo?”
“Bangpi hadak pehem arlosi do,” alangli thak-lo.
10Latum angbong inut abang pulo, “Nonpen chiklo jonsirkep#mate moning laso apor aphi neli vangthuji, lapen nanglipiso Sarah sopo inut longpo.”#Rom 9.9
Sarah ke alangli nungsi dolo, pehem ajakan along arjuding lo, 11Abraham atum sarpik-lo, lapen Sarah ke arloso-ape ave det-lo. 12Lasi Sarah ke amethang chingnek-khuk-lo lapen pulo, “Non ne sarpi tang-lo lapen ningjoinolo, ne pinso-arlo aning kehang akam keklem ningchepajang-thekjilangma? La apar nepenan ta sartang-lo.”#1 Pit 3.6
13Anke Abraham aphan Hemphu arjulo, “Kopisi Sarah kangnek-lo, lapen ‘Ne kesar ahut ne oso long-un binongji langma’ pu keningje lo? 14Hemphu aphan pine keklem un-e ason doma? Ne putang-lo, non pen chiklo jonsirkep aphi Ne vangthujilang, lapen Sarah sopo inut longpo.”#Luk 1.37
15Pima Sarah chepheretang-lo, bangpi la kroimolo. “Neli ingnekne-det ke,” pusi bangpi pulo.
Kalang, nangli klemlo, alangli thak-lo. “Nangli ingnek-lo.”
Sodom Aputhak Abraham Kechoningri
16Anke bangpo atum osi latum Sodom kechecharphlot adim dodam lo, lapen Abraham ta latum aphan tovar kethondunjisi latum along dunlo. 17Lapen Hemphu amethang chepulo, “Ne kopima keklemji akam Abraham aphan patutelo. 18La aso-asu isi thedung lapen ingtang rak akhei#mate nangphan ahirjume nangkepi asonthot khei atum ahirjume aphan nangchohangpo plangpo, lapen alangli pen ajok Ne, khei kedo-an aputhak pahirjumepo. 19La asomar atum aphan lapen la aso-asu atum Nephan kepakroiji lapen kopisi kechokma lapen ahokpet keklemji aphan hukum kepapijisi Ne laphan ingvailo. Jongsi latum klemlote, Ne la aphan kopima kechechak ason an klem pi-etpo.”
20Anke Abraham aphan Hemphu pulo, “Sodom lapen Gomorrah aphan kepherememe akebok-heihei do, lapen latum apap thepik-lo. 21Lahei akebok Ne karjulongtang an ahok lone ahok-he lone, Ne langdam nangjilang.”
22Anke banghini amonit damjuilo, bonta Hemphu ke Abraham along dokok-lo. 23Hemphu adung Abraham damsi arjulo, “Nangli ahokpet pen adaikave atum aphan adai-kedo atum penpen pavirdetpoma? 24Rongsopi along jongsi bang 50 adai kave arat do pulote, rongsopi kangthim nangli pavirdetjima? Bang 50 atum aphan kepajokjile nangli la rairedetpoma? 25Chenamsi nangli ke adai-kave atum aphan adai-kedo atum penpen pathi-un-e. Nangli jongsi klemlote adai-kedo atum penpen adai-kave atum anta aduk phodap-po. Lake kaita klem-un-e. Pirthe adang kangsai abang ahokpet pensi ingsai nangji.”
26 Hemphu thak-lo, “Sodom along jongsi bang 50 adai-kave amonit Ne long-lote, halatum pen ajok, Ne rongsopi kangthim pavirve.”
27Abraham ningjethulo, “Neli nangliphan keningje-thuvoiphit apot kanghon pen neli diyanon, Hemphu. Neli ke monitchot, lapen thangnat ta keningje ji ajakong ave. 28Bonta bang 50 adim bang 45 adai-kave amonit atum do tahaimene ke. Bangpho kavechot pen nangli rongsopi kangthim pavirdet poma?”
Hemphu thak-lo, “Bang 45 adai-kave amonit Ne, long pulote rongsopi Ne pavirve.”
29Abraham ningjethulo, “Jongsi bang 40 amonit dochot pulote kosonlo?”
Alangli thak-lo, “Hadak jongsi bang 40 do pulote Ne la pavirve.”
30Abraham pulo, “Kanghon pen nanglining thiri, Hemphu, bonta neli ningjethuvek nangji, Jongsi hadak bang 30 dokokte kopusonpo?”
Alangli pulo, “Ne jongsi bang 30 long-lote la Ne klemkle.”
31Abraham pulo, “Kanghon pen nangliphan neli keningjelen apot neli diyatha, Hemphu, Bisar-alam hadak bang 20 ansi longchot-lo?”
Alangli thak-lo, “Bang 2o anbak jongsi Ne long-lote la Ne pavirve.”
32Abraham pulo, “Kanghonpen ning thi-ik-ri, Hemphu, neli ephong si lam ningjechotpo. Jongsi bang 10 anbak longchot pulote?”
Alangli thak-lo, “Hadak bang 10 anbak do pulote la Ne pavirve.” 33Abraham pen alangli kechingki pajut si, Hemphu damjuilo, lapen Abraham ta ahem chevoijuilo.
Valgt i Øjeblikket:
KECHENG 18: KARBIBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Karbi Holy Bible © Bible Society of India, 2010.
Used by permission. All rights reserved worldwide.