Matiu 5
5
Atonu den wat aipakam warapen
1Wam da, Iesu waenapan to iamene yawamo, menan me dot ae tunup nawanep ae wanden. Me wadiamot megawa inewa tauan iamene. 2Amba me opata mega manega wan,
3“Guewa gapan dai momeni nagirewa,
God wat aipakam mumiwan,
toemu kimaniwa amun megawa iravi mugawa di.
4God wat aipakam megawa,
irip turup waine nagirewa mugawa,
iwa mu wabibigam mumeta.
5Imua ae bigaren taine nagirewa,
God wat aipakam megawa wariwanum,
iwa mu piup ma yon borain.
6Waenapan tamana tapen menan,
imu pose kanda mutane taine nagirewa,
God wat aipakam mega munep umamup tamota.
7Waenapan munan bagu sisi anuine nagirewa,
God wat aipakam mumeta, God gare munan bagu sisi anuta.
8Potamu nenengawa nagirewa,
God wat aipakam mega wariwanum,
evi amba mu God yawain.
9God menan nonup baigan barine nagirewa,
God wat aipakam mega mu inamup,
iwa God otu waiwa diamota.
10God menan inak tamana taine nagirewa,
wa koeragam mumiwanumune menan,
God wat aipakam mumiwan,
toemu kimaniwa amun megawa iravi mugawa di.
11Waenapan nenan nipep diae wa koeragam imaepi nop koewa ugup ugup inayap aopan wapi ame gapan aton anun amba God wat aipakam imaeta. 12Menan daramuya wap, aton tan, iwa kiman gapan garewa ega arita. Ap mini, e umayap, wataget God no oise waiwanumune nagirewa wa koeragam mumane.”
Siuran ge ganat maibewa
13Iesu sia anega wan, “Taba siuran den natawa dansewa da di, ap mini sia e piup ma siuran megawa, go siuran dansewa mega ni nen sepiwa, e anenen tane amba dansewa sia wata? Ame umap uon, siuran ame denanu mini ae damagep, waenapan tau gagap amuin.
14E piup ma ganat megawa. Sewa baware da awana tune gungunu ya wanumoin go pa iravi aroga yaviwanumain. 15Apan dun mega ire ware karaua unup ninokap ya baraeta. Go dun aroga baraepi ame gapan waenapan pa gwanape iravi ganat muneta. 16Ap umap, ganat ega waenapan inamup ganase wap, ame gapan mu kakaewa ega taianawa yavepi mamaya kimani wandini mu wa taragatain.”
Iup namua tavewa tauen
17Iesu sia wan, “Iup namua amba God noa waiwanumune nagire nop muga den, ise wat mutapen menan ya tauan, ap ya anu nimanegene. Go nop muga tavewa mega tauapen menan tauan. 18Ne tave di wadiaivin, wam da piup ge kiman aiwandan uon tata go namu God iup mega iravi, semu otu koentu den, aiwandan tavewa mega iragi taitamep amba uon tata.
19Ap menan orup ansena iup namua semu otu koentu to paise yone ae evene wai iup namua to paitapen wadiamopi, mu toemu kimaniwa gwanap nutu uoni nagirewa diamoin, go mu da da iup namua ayamase ta amba waenapan iup mame wadiamopi mu toemu kimaniwa gwanap mu bawarewa nagirewa diamoin. 20Ne ma kaimakaet wadiaivin. E God menan inak tamana taiana ame Parisi nagirewa ge iup wadidiaine nagirewa tat muga garawasepiwa e toemu kimaniwa tauai go e ya tanewa e ya tauai.”
Gari gangan ge baigan nopewa
21Iesu sia wadidiamon, “Waenapan watageta nagirewa wane guturewa e anuyan. Ame mam,
Apan da ya togura boep.
Go waenapan da togurep boepiwa,
me ware wanene paewa gapan tauain.
Watagaet ap anega wane. 22Go ne sia aigap wadiaivin, e da da evenae wai inamup gari gangan anunewa, ap gapan wanene tae itan enapen tain. Sia, evenae da kaimakaet nipep anega dianewa, ‘Ge dantaga uon di!’ Ap gapan kansoro nagirewa namumup wanene taepen menan yonai. Amba waenapan da bumbawam nagirewa diamonewa, ap gapan oma merao arewa aisepen taiwanin.
23Ap menan, God Paewa gwanap, puraput sine watarewa gapan, puraput gega yan tapen anua go evenaga da inap ta koeragamean ap me anua, 24menan puraput gega God ya wana, ap mepe ae ve, go evenaga baigane ta amba sia onak, yan garaet gegawa God wan.
25Evenaga da koewa gega menan wanene tagepen anupi, menawaet ni gwane ae amupen, wat nauge wanene paewa tauepi tawa. Negina wa nengamene uon tap. O uon wandepiwa, wanene i apanewa nanip bat gimageta amba wanene i apane punip nagirewa nanimup bat gimagain, mu waregep gwat nokap bat gimagain. 26Tave di waivin, ge ya tau agai, wanene garewa mega iragi taitamewa amba tau agai,” ap anega wan.
Togane tapatap
27Iesu sia wadiamon, “Waenapan watageta nagirewa wane guturewa e anuyan. Ame,
Togane tapatap ya tane.
Wataget ap anega wan. 28Go ne nop ewakewa wadiaivin, orup da waen yave, imua gapan wainan gogo den tat anupiwa ame gaset wainan gogo waen ame den tan. 29Menan yamaga nutup nauge aep koewa tawa, ae ma warup aipa uat ena aep. Etuga semua da wakaumawa ame kakae di, iwa ap ya tawa ge tawaga uruga oma meravewa gapan uat enagain. 30Amba naniga nutup wat nauge ae koewa tapiwa, to ketnak aipa uat! Naniga ame wakaumeawa ame kakae iwa ap ya tawa ge tawaga uruga oma meravewa gapan uat enagain.”
Waenewa tandayase ae vepi nopewa
31Iesu sia wadiamon, “Watageta nagirewa anega wane,
Apan ansena da waen mega ae veat anupi,
waenewa ae vea vea ogewa waenewa se wanep.
Ap anega wan. 32Go ne endi aigap sia wadiaivin, apan ansena da waenewa union ae ya veta, go waenewa apan dawa den aeni menan ae vepiwa, ame umap. Go waenewa union ae vepiwa memewa ta pariseni gapan waen ame apan dawa naiseni togane tapatap di tata, amba naiseni apanewa ap anega den sia di.” Ap anega wan.
Wa agi taine nopewa
33Iesu sia wadidiamon, “Watageta nagirewa anega wane, e den anuyan,
Agi ega ya to paitane, go Ayop inap agi wayana,
wat natan om gapan taiwanian.
Watageta mu ap wane. 34Go ne ewake wadidiaivin, evenae wai munat wa agiat mumane nop ega tavewa mu anupen menan tanop ya tone. Kiman amun mega gapan den tanop ya tone iwa kiman God wandini arewa. 35Amba piup amun mega gapan den tanop ya tone iwa piup mame, God pusiwa amuini arewa. Pa sewa Ierusalem, God wandini arewa, amun mega gapan den ya tone iwa pa sewa ame Ayop bawarewa God pa megawa. 36Amba iaya gapan tanop ya tone iwa ap tane iaya gumewa daiton da pomponu go pumpuni ya entan tata, ap menan iwa dimen iaya gapan tanop toi. 37Menan agi tavewa wandepiwa, tave di wapen, amba agi tave uon wandepiwa ame uon di wapen. Ame use aigapewa da sia wawa, ame Seitan arok wana taueta.”
Koewa garewa ya tapen tantanewa
38Iesu sia wadiamon, “Watageta nagirewa anega wane, e anuyan.
Apan da evene yame make warupepi,
gare yone evenewa yame make warupep.
Evene no done to bunaepi,
gare yone evenewa no done to bunaep.
Mu ap anega wan. 39Go ne sia aigap wadiaivin, waenapan da inagap koewa tapi garewa ya tane. Orup da nawanegap togepi gare ya ta go nawanega yamu entane sia togep. 40Amba apan da enu yawage wa wanup gega aigape warupe, wanup gauarape menan den wapiwa, goandage ya anu den sia wan. 41Apan da wandap aepen anuni, ge ik mega yongotu ago ta aget wapi go ge wandap wat ak. 42Apan ansena inagap mup wapi di wan amba puraput gega mondi wariwandan evi sia genat wapi goandage ya wa.” Ap anega wan.
Anavi munan anu gurinampen
43Iesu sia wadidiamon, “Watageta nagirewa anega wane anuyan,
Pa maineyape nagire munan anu guran,
amba anavi ega tandayat muman.
Watageta nagirewa ap anega wan. 44Go ne sia aigap wadiaivin anavi ega munan anu guran. Amba ta koeragam imaine nagirewa munan God inap mup wan. 45Ame tanewa, e Mamaya kimaniwa otu waiwa. Iwa me wapi wam mega kakaewa koewa nagirewa dere aigamup ganase waiwandata, amba ugin watu enep tamanawa taine ge gegerawa taine nagirewa aigamup visiwandata. 46Waenapan imumu potamu inayap warepi ame e gare mugenat munan anu guranewa, ap gapan God wat aipakam mega ya warai. Iwa koewa taine nagirewa mu den ap anega di, mu evene wai den muk gare gare baigan taiwanum. 47Amba evenak waigawa mugenat gaunamu tawa, piup gueguewa taine om daiton di taiana, aigapewa da uon. Iwa ya anu tumasine nagirewa mu ap anega di, evene wai den muk gare gare taiwanum. 48Ap menan kakaevet tan, e Mamaya kimaniwa kakaevet taini mini.”
Valgt i Øjeblikket:
Matiu 5: dgz
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2013, Wycliffe Bible Translators, Inc. All rights reserved.
