Éxodo 20
20
Tonoraain ichaoha cachane coina, lechooncai erenaa rauhi Cana Coaunera tenojoin
(Dt 5.1-21)
1Niritiin ereein jetaote:
2“Canune inara Coauneraneein, cairichaaerinojoineein letononeein neeiche Egiptoone caje, inara rocoheraneeun. Coatiha canu baiha nihei, inara Coaunera. 3Jioanriha, nii chosichuru ichanohichuru ere esenetaain, acaacha tonoraain neeichene.
4Aihana jaun, jioanriha ecuun dede que nenacaauru tocohaneein, ecaanto janaa coaauquichene. Nieichu atane ichoae nenacaauru, nii cucuana cuhane nenacaauru, nii atane jana nenacaauru ecaantooru, naaonjoainuri tocohaneein, coa inara chosineque jaache. 5Canune inara Coauneraneeun, aihana jaun, jioanriha nitohanai ichaain, nacatiha neseeoriaain coroajeein neeichene. Canu inara Coaunera nichaaune, enaacha cha rautaenihanune jaun, caque baasoneein ereeuruha ichauhenaaurune, rai calaohichuru, nichoalacuru, nichoala nichoalacuru, naaonjoainuri aina curuaecaain casetecareeuni. 6Nena laen, jataain cacoelaichaauru, caa caitoonjoan quere quiicha tei tonoraeraaru, oharaanca saneein nefoerateeuruhane nihanatiin, aina curuaecaain acaauru belaicheeuni.
7Jioanriha tonaain, inara Coauneranichaaune coacuhin, baasoneein ereeiche canuquene. Nitohaneein inara Coauneranichaaune coacuhin, baasoneein canuque ereeine casetecareeuni.
8Nii nebetacanaa cojoanonaa quiicha teilu bana, inara Coaunera nichaauneecha jerei ichaain, canu coaacuche. 9Aihana jaun, saota janonejeeicha amihaneein, bana jitariin inaraacha ichana jerei ichacuche. 10Caaunsi janonihane cuhane, canu inara Coaunera nichaaune coacuhin, quiicha jerei ichaain rachoojoeichene jaa cojoanonaa niha, banane jaun. Jioanriha, nii cojoanonaa bana, nii chatoanai amihanenaa ichaquichene, Nieichu nejelau cacha inara aina nenaa nihanatiin, nii ii calaohi, ii cacunu, ii cacha, ii coseenra, ii irihuru, naaonjoainuri nihanatiin, chaachana nainecuruhi. 11Saota janone bana dede, cana rai chauratane, cucuana satiin cuhane nenacaauru coneracuru, naaonjoainuri coaaunaain, caaunsi janone bana nebetacaalu, Cana Coaunerane jaunte, nii nebetacanaa cojoanonaa cojiotaelu, Cana Coaunera”, naain jetaote:
12“Efojiaraauru belaain, acaauru ere tonoraain neeute, canu inara Coaunera nichaauneecha tei, caa atane que raotojoeein ichaohiche.
13Jiaonrihachu sonajaain jaohin, naaonjoaaine. 14Jiaonrihachu sinijiraqui ene dadaain, naaonjoaain neeine.
15Jiaonrihachu asijiauhin naaonjoaaine.
16Jiaonrihachu nohaneein chamute cacha cairichaain, naaonjoaain neeine.
17Jiaonrihachu chamute cacha loreri que necoelaain, niicha sirii sirina coaauquine. Nieichu comasai que necoelaina nainihei, nii rai cacha, rai coseenra, rai boey, rai cabario rijijieein nenaa asno, naaonjoainuri niicha sirii sirina coacuelanaala”, nae jetao, Cana Coaunera.
Cana Coaunera que, necasaauruha isaraelitaaurune
(Dt 5.22-33)
18Satiin isaraelitaauru jetaote, arara aina niha jiacanene jana, toniha jaihane jana, nii ichatane ucuuno suruaa tabainihane coaaraneeure. Nejetaote, coasichuruhane jaun, coriaae netiin coarajeeure. 19Nitohaneein coasichuruhane jaun jetaote:
“Chajaain erenihun Cana Coaunera aina, ii naitoonjoan beei canacaanu rainena, naitoonjoan rijijieein ichaorichaanuhin, canacaanu rai irihanena ohacharichaanu”, naauruha Moisesa raine jaun jetaote:
20“Jioanriha casiichene. Cana Coaunera te, inara coujuhin inara coaraa uuhe, esinae rauhijiriin, inara casetecarichaaine que necasaain neeichene coaraane coina. Nabana osa que nesaruhin neeichene coataa”, nae jetao, acaauru rai Moisesa.
21Niritiin jetaote, coriaae netiin coarajeeuruha, nii cachaaurune jana jetao, nii niha Cana Coaunerane jaa, dede sacari rohan jetao, nichuutaa cue Moisesa.
Lenonecuru mocooruhane coina, atane caje rori jaauruhane coina, aitoha Cana Coaunerane
22Nii jana jetaote:
“Chajaain taa isaraelitaauru rai: ‘Inaen inara raajenihane, inara aina irihanu dede caje coaauneeine aonaain coaraquiche. 23Aihana jaun, jioanriha oro, coriqui, naaonjoainuri caje ecaantooru jaain, canu coroaequichene rijijieein coroaequichene. 24Raujiaaincha, atane caje rori jaain, nichoae teein inara irihuru, coriha cuhane nenacaauru bacaauru sohin mocooche carai, inara que casuujua acatichaaunne coujunacanu que. Nii jerichaaune jaauru teein ichaain, ecu canu coaauquichenena, ecu neein inara coroaereeuni. 25Jioanriha ajeri caje, carai rori jaaichene, coatacuru que bijiin ichaquichene, eruhichene rijijieeincha ichacuche, bijiin ichaquichenete, carai nii rori aasaechareeiche. 26Jioanriha, nii rori jaaichene, esecarera siriin carai ichaquichene, nabana que iniichene, jianacoon niha inara jaberocone coataa’, nanihun acaauru rai”, nae jetao, Moisesa rai Cana Coaunera.
Valgt i Øjeblikket:
Éxodo 20: URA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2005, 2024, Wycliffe Bible Translators, Inc.