Éxodo 19
19
1Nichata atiha Egipto caje amuuruhane batene cuhane jetaote, Sinaain nenaa cacha areroo caohacha curuaeconaa jetao, turuha cuure isaraelitaauru. 2Nitohaneein jetaote, Refidiin caje amuuru baiha jetao, Sinaain nenaa cacha areroo turuhin jetao, ecu neloanaritecure, nii ecu nenaa ichatane ucuuno rohan teein. 3Ecu neeuru jana jetaote, nii ichatane ucuuno netiin cotihaca Cana Coaunerane jaun jetao, nii ichatane ucuuno que iniin coaraa cuha Moisesane jana jetaote:
“Caa ichei aitorichaaunine rijitojoeein, Jacobo nefoerateeuru isaraelitaauru rai benihu: 4‘Inara te, egipto cocoaichacuru cairichaain, ena cau nihanune jaun, cau inara turuhanune jaun, leinjiin uujirii itaro ichoae unaa rijijieein, cau turuhin neeichene coaaraneein coitucuhiche. 5Aihana jaun, caa inara rai caitoonjoan tonoraain ichaain neeichenete, satiin caa atane que nenacaauru cachaauru amurijiriin, canu cachaneein quiicha jereineein neriquicheein. 6Inara te, le lauriin cacha saserdoteneein, quiicha janijiineein neeichera’, naain caa ichei aitocohaune rijitojoeein, isaraelitaauru rai benihunra”, naain jetao, letohae Cana Coaunera.
7Niritiin letohane jaun cuhin jetaote, acaauru bichauhenaauru cotijiaain, nii rai aitoha Cana Coaunerane rijitojoeein, nii cachaauru rai biha Moisesane jaun jetao, 8ita rijitiin jachaatorohaain jetao:
“Nii jeriha Cana Coaunerane rijijieeine, naitoonjoan ichajeein nerichaanuhincha”, naauruha isaraelitaaurune jaun jetao, nii jerecuruha cachaaurune biha cue jetao, Cana Coaunera rai Moisesa.
9Nii jaun jetaote:
“Aonaaun, ii renena dede sacari jana fauhin, ii aina erereeunni, iniha irihanune aonacuruhane, ichei suujua acatecuruha cachaaurune coina”, naa Cana Coaunerane jaun jetaote, nii jerecuruha cachaaurune bee jetao, nacoaauneein Cana Coaunera rai Moisesa. 10Nii jaun jetaote:
“Chajaain, nii cachaauru rai aitonihute, enene neruujueein, jatoroaain neeurumiinte, eresi caatiha netaojiaaruhine. Aihana jaun, chajaain rai cajione bichorohin, 11neruujuerumiin eresi cojoanoo netojoiraineein. Eresi cojoanoo, canu Cana Coauneranichaaune, nii Sinaai bichatane ucuuno fauha urichaauni, satiin cachaauru notaracaene jaune aitoon. 12Chaaen, nii ichatane ucuuno auha ramara coujunacateein, nii cachaauru rai aitoo, nabana, nii coujunaca rerohin, nii ichatane ucuunoque inihuruhane coataa. Nii coujunaca rerohin, satiin rohan nichuutai cacha te, ateinanohiniha cureein. 13Nii chuni, nichoae biji meracaain, naaonjoanaanainihei, nabana ajeri jaberoco que bodoosiin sonojoineein, soririji que nihanatiin situujiin sonojoinihane coataa. Nii chaque aasaai cacha, acaauru iri, naaonjoainiha natiin, ichaolanohineein ratirinojoinerihaain. Inaen toniha carenero jicho caje nenaa jaihane aonacuruhane banaachate, nainecurure, nii ichatane ucuunoque inihuruha cachaaurune”, naa rai Cana Coaunerane jaun jetaote, 14nii ichatane ucuuno caje fauhin jetao, neruujueein Cana Coaunera acatiha netaojiaauruha cachaaurune coina jetao, aitoha cue Moisesa. Nii jaun jetaote, satiin rai cajione bichorojoacoaauruha cachaaurune jana jetao:
15“Eresi cojoanoo netojoiraineein neruujueein, jioanriha inara sinijeraauru dadaaiche, que turuhane reetiaainera”, nae jetao, acaauru rai Moisesa.
16Inaen nichata janoha, nii aitohane cojoanonaa bana jetaote, janohetiin arara raineein niha jiacanena jana jetao, nii ichatane ucuuno ichoae jetao, fae dede sacari. Nii jana, jataain tonihaca jaihane jaun jetaote, coasinacaaun satiin rijijijianecure lohanari asae nenacaauru. 17Nii jaun jetaote, nii lohanari caje cachaauru amaain, nii ichatane ramara ratirinajaain Cana Coaunera coaraa cuha Moisesane jana jetao, nii tonohanau ramara chujurijiatiin jetao, cohacure cachaauru. 18Satiin nii Sinaai bichatane ucuuno jetaote, suruaa tabaineein nedae, usi ichoae ecu fauha Cana Coaunerane jaun. Nii jana, suruaa jetaote, ocoana mocohacane ainane tocohaneein, ecu sichohacohane jana jetao, jataain nerurujuae nii ichatane ucuuno. 19Nii jana, jaihacuru jetaote, jataain nauruta naurutaain tonijiaain tonihane jana jetao, iriha Moisesane jana jetao, toniha ararane rijitiin jetao, tonorae Cana Coaunera.
20Nitohaneein jetaote, jataain Sinaain bichatane ucuuno fauhin jetao, nii nihane jaun, rene iniha cuha Moisesane coina jetao, cotijiae Cana Coaunera. Nii jaun jetaote, rene iniha cuha Moisesane jaun jetao:
21“Chajaain taa neeuruha cachaaurune jaun fauhin, acaauru rai aitonihute, nii coujunacateeine jaa rerohin cacoaranaa nainecureneeine, ainihanete, arajiin ohin comoorureein. 22Nii saseredotecuru nihanatiin, carohan turunaa jereraauru, sinacaain neeurumiin, ainihanena acaauru que nejeratereeunni”, naa Cana Coaunerane jaun jetaote:
23“Nii aitohine rijijieein, coatiha nii Sinaain bichatane que ininaa coaaucuruhin cachaauru, ichei banijiaain niha jelaine coina, coujunacaterateeine jaun”, naa Cana Coaunera rai Moisesane jaun jetaote:
24“Fauhine baiha te, nacoaauneein Aaroon aina iniha uriquiin. Jana saseredotecuru aina, cachaauru nii coujunaca rerohin, caa ena nihanune jaun, iniin turunaa nainecuruhi, acaauru que nejeratihanune coataa”, naa Cana Coaunerane jaun jetaote, 25fauhin isaraelitaauru rai biha cue Moisesa.
Valgt i Øjeblikket:
Éxodo 19: URA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2005, 2024, Wycliffe Bible Translators, Inc.