Zenezi 5
5
Adãhã nhihudu norĩ wasu'u
1Ã hã rob'ui'éré, Adãhã nhihudu norĩ za'ratazém na.
'Re ihâimana u'âsi mono, a'uwẽ te te apoto mono wamhã, ma tô tisine da hã ab'manha. 2Tawamhã aibâ na duré pi'õ na ma tô ab'manha. Duré iwẽ te te tãma 're apisutu mono wamhã, ma tô a'uwẽ na wamri za'ra.
3Tawamhã duré Adã 130 na ãma iwahub ãma, ma tô i'ra isine uptabi hã tãma podo. Tawamhã ta hã ma tô sisi, Seti na. 4Taha pari Adã, 800 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me, tãma poto za'ra pari, 5ma tô oto dârâ, 930 na ãma iwahub ãma.
6Tawamhã duré Seti 105 na ãma iwahu te te i'manharĩ ãma, ma tô i'ra Enosi na isisi hã tãma podo. 7Duré taha parimhã Seti hã 807 na ãma iwahum na hã ma tô 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 8ma tô duré oto dârâ, 912 na ãma iwahub ãma.
9Tawamhã Enosihi ãma 90 na ãma iwahub ãma, ma tô i'ra Caĩna na isisi hã tãma podo. 10Taha parimhã Enosi 815 na ãma iwahum na hã ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 11ma tô oto dârâ, 905 na ãma iwahub ãma.
12Tawamhã duré Caĩnahã ãma 70 na ãma iwahub ãma, ma tô i'ra Ma'alaléu na isisi hã duré tãma podo. 13Taha parimhã Caĩna, 840 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 14ma tô oto dârâ, 910 na ãma iwahub ãma.
15Tawamhã Ma'alaléu ãma 75 na ãma iwahub ãma, ma tô i'ra Zaredi na isisi hã tãma podo. 16Taha parimhã Ma'alaléu ãma 830 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 17ma tô oto dârâ, 895 na ãma iwahub ãma.
18Tawamhã duré Zaredihi ãma 162 na ãma iwahub ãma, ma tô i'ra Enoqui na isisi hã duré tãma podo. 19Taha parimhã Zaredihi ãma 800 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 20ma tô duré oto dârâ, 962 na ãma iwahub ãma.
21Tawamhã Enoquihi ãma 65 na ãma iwahub ãma, ma tô i'ra Matuzarẽ na isisi hã tãma podo. 22Taha parimhã Enoqui, 300 na ãma iwahum na ma tô 'Re ihâimana u'âsi mono ãma 're hâimana. Ma tô duré i'ra si'aibâ norĩ, i'ra sipi'õ norĩ me tãma tipoto za'ra. 23Tawamhã Enoqui, 365 na ãma iwahum na, ma tô duré 're hâimana. 24Tawamhã duré õne u'â, ma tô 'Re ihâimana u'âsi mono ãma 're mo. Tahawa nimahã bâtâ na ma tô oto sô tirobaba. E marĩ wa. 'Re ihâimana u'âsi mono, sitẽme te te oto âri wa.
25Tawamhã Matuzarẽ ãma 187 na iwahub ãma, ma tô i'ra Rameti na isisi hã duré tãma podo. 26Taha parimhã Matuzarẽ ãma 782 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 27ma tô oto dârâ, 969 na ãma iwahub ãma.
28Tawamhã duré Rametihi ãma 182 na ãma iwahub ãma, ma tô i'ra hã tãma podo. 29Tawamhã te ãne tinha:
— Uburé Danhib'apito ti'ai ma, ma tô niha hã pisutu, wasété u'âsi 're sa'wari mono da. Tahawa wanhimiromhuri te pire na wama 're hâimana za'ra. Ãhã nherẽ, ã hã 'watébrémi si te za tihâiba na 're iwawa'utu za'ra mono zéb da hã sina wama wazere za'ra.
Tawamhã Rameti, ti'ra hã ma tô sisi, Nowé#5.29 Nowé hã hebreu norĩ mreme na “dawa'utuzé” aiwa prã na ne iwapari na hã. na. 30Duré taha parimhã Rametihi ãma 595 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari, 31ma tô oto dârâ, 777 na ãma iwahub ãma.
32Tawamhã duré 500 na ãma iwahu te te i'manharĩ ãma, ma tô Nowéhé ma, si'ubdatõ i'ra tãma tipoto za'ra, ãne isisi za'ra hã: Sẽ, Cã, Zafé.
Valgt i Øjeblikket:
Zenezi 5: xavBP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2011, Wycliffe Bible Translators, Inc.All rights reserved.