Mateo 9

Jesús ja deja ase bue mahue saisiametana

(Marcos 2.1-12; Lucas 5.17-26)

1Da su beju Jesús canoa aida su nubiana. Neicha bai su anipetutaibana u maje je. Satsuati putsu, mesa ejude su putibana. 2Dapia Jesús yani su, deja ase bue mahue chahui su dusutana huecuana. Beju Jesús ja nedaji duseji cuana tu peje su ebia su enimetucheatitani ba putsu, uja atana nedaji:

—Deja, janimetucheatique, yama mique jucha cuana perdonaitia putsu.

3Da su piada piada jabuetsuati ebuetsuaji, dapia netitana cuana tuneda cama japibatitana uja: “¿Ai deja ja juchaji cuana perdonata cua bata? Diusu ja bahui juchaji cuana perdonata cua. Ye Jesús ja mesa mimi neje Diusu emadhabatani. Beju Diusu puja epuani.” 4Da su Jesús ja tuna sa piba cuana eshanapatani putsu, uja atana huecana:

—¿Ai puji micuaneda daja madhada epibatiani? 5Ahua yama deja, “Mique jucha cuana yama eperdonainia”, ya su, ahua yama, “Netianaque, aseque”, ya su, beju quema puji mu tupupai hue. 6Daja yama deja yainia micuana ebame puji, ye mundo su ema tucheda eni cristiano cuana sa jucha cuana eperdona puji.

Da su Jesús ja uja deja nedaji cuatsasiatana:

—Netianaque. Mique chahui jemitsuaque. Putiyuque mique ete su.

7Da su beju deja netianana. Mesa ete su saisijiji putibana. 8Cristiano cuana ja ba putsu, ebia su nimetiunetitana huecuana. Diusu sa puji saida mimitana huecuana, Diusu ja Jesús daja tucheda tiatana putsu.

Jesús ja Mateo dharetana

(Marcos 2.13-17; Lucas 5.27-32)

9Beju da jenetia Jesús putiana. Chuadera pad'i deja Mateo banime batana. Tueda impuesto chujebaja jude su anina. Jesús ja tueda uja atana:

—Tije ema aque.

Da su Mateo netianana Jesús ebuque puji.

10Jesús da Mateo sa ete su putiana mesa discípulo cuana neje ediadia puji. Tuna neje misha su ediadia puji deja juchaji cuana anitaina. Impuesto chujebajaji cuana di anitaina. 11Da su fariseo cuana ja ba putsu, discípulo cuana uja quisabatana huecuana:

—¿Jucuaja su ni micuaneda impuesto chujebajaji, juchaji deja cuana neje ediadiani?

12Jesús ja fariseo daja equisabatani id'abatana putsu, uja atana huecuana:

—Beju jaiduenetiji da aimue saida cuana sa puji mahue. Nedaji cuana sa puji bahui. 13Uja Diusu ja deremetaidha mesa quirica su: “¿Ai puji saida ni da pu cua ema peje su animalo cuana eirutsua emitsutsua puji, micuaneda edue cuana aimue ibuneda ebainia mahue biame?” Da su jabuetsuati taji Diusu puidha derejiji ai cuana. Aimue ema pue butsepi ebatitani cuana ema peje su eihua puji mahue. Juchaji cuana bahui eihua puji ema pueana Diusu peje su papibaturucatita huecuana puji.

Jesús ayuno jepuiti quisabatana

(Marcos 2.18-22; Lucas 5.33-39)

14Da su beju Juan Bautista sa ebuqueji cuana ja Jesús nariatana. Uja quisatana huecuana:

—Ecuanaju fariseo cuana neje tupupai ayuna epuani. ¿Jucuaja su ni da mique discípulo cuana aimue ayuna eputani mahue?

15Jesús ja bahue quisa neje uja jeutsutana huecuana:

—¿Ai jahuaneti tsine su ihuajiji cuana ebia su japadaritita cua bata, ehuanetisa deja tuna neje yani tupu? Ehuanetisa deja tuna neje yani tupu, ihuajiji cuana aimue ayuna eputa mahue. Tueda ihuajiji cuana duju jenetia ejemicuinata su chu, da hora su ihuajiji cuana ayuna eputa, aimue tueda tuna neje yani mahue putsu. Daja nime da quema discípulo cuana. Aimue ayuna eputani mahue huecuana, ema tuna neje yani hue putsu.

Jesús sa jabuetsuati da eichacua

16‘Aimue detse etse ejud'uji edhi remetia cua mahue pia eped'u eichacua neje. Beju tueda remetia eichacua ja ejud'uji edhi d'iuta cua. Da su d'iujiji detse ebia su ainameta cua. 17Daja huecha aimue vino eichacua etse emeji edhi su ichaseta cua mahue. Ahua daja etse a cua su, vino eichacua ja emeji pujuta cua. Da su vino, emeji neje tupupai taitana cua. Da putsu, vino eichacua emeji eichacua su icha taji. Daja a putsu, pamapa saida epu. Vino, emeji neje tupupai saida epu.

Daja Jesús ja bahue quisa neje buetsuatana huecuana. Mesa jabuetsuati eichacua cuana da vino, eped'u eichacua nime. Fariseo cuana sa jabuetsuati cuana mu emeji, ejud'uji edhi nime. Beju aimue huamahuama ehuaruti mahue.

Jesús ja epuna saisiame tana. Jairo sa ebaquepuna id'emetaibana

(Marcos 5.21-43; Lucas 8.40-56)

18Beju Jesús ja daja ebuetsuatani cama, piada judío cuana sa edusuji cuinana. Jesús butse su tururuana. Tururu putsu, uja atana Jesús:

—Quema ebaquepuna beju jiahue quita manuitia. Pueque ema neje quema ete su. Dapia mique eme tu bia su ichaque tu eid'eyu puji.

19Da su Jesús netiana putsu, tu neje putiana. Discípulo cuana di tu neje putitana. 20Beju tuneda epuhu cama, piada epuna nedaji ja Jesús etibeini je nariatana. Tueda epuna piada tunca beta ejaitiana mara aimue mesa ami riji puja mahue puana. Beju naria putsu, Jesús sa ejud'uji tihue d'apabatana. 21Uja epuna japibatiana: “Ahua mesa ejud'uji biame yama d'apaba cua su, ema saisi cua beju.” 22Jesús da jababarereati putsu, epuna batana. Beju uja atana:

—Epuna chidi, janimetucheatique. Mi ema peje su jei puitia putsu, beju mida saisitia.

Da hora su hue epuna saisiana.

23Beju Jesús da edusuji sa ete su cuinati putsu, mui turuji deja cuana ebasetatitani epapapapati puji batana. Cristiano cuana di ebia su epadarititani batana. 24Da su uja Jesús ja atana huecuana:

—Mecuinanaque u jenetia. Epuneje aimue emanu mahue. Tueda mu etahuisa hue.

Da su cristiano cuana tu neje jaid'ebatitana, Jesús ja daja atana huecuana putsu. 25Da su etseque su cuinanametana huecuana. Epuneje esa su nubiana. Mesa eme ina putsu, id'emetaibana. 26Beju Jesús ja epuneje id'emetaibana jepuiti, cristiano cuana pamapa tueda yahua je ebia su quisaquisa putana.

Jesús ja beta deja padha detse tuaji ametana

27Jesús da jenetia cuinanana su, beta deja padha detse ja tije atana. Beju tsiatsia neje uja bajatana tse:

—¡Jesús, David chenu sa familia jenetia, ibunebaque etseju!

28Jesús da ete su cuinati putsu, nubitiana. Deja padha detse ja nariatana. Da su Jesús ja tuatseda uja quisabatana:

—¿A da metseda jei epuani yama metse tuaji yame puji?

Da su jeutsutana tse:

—Ehe, Echua Puji. Jei epuani etseju.

29Da su Jesús ja tuatse sa etua d'apaba putsu, uja atana tse:

—Beju daja papu cuaja metse jei epuani batame.

30Da hora su beju tuaji puana tse. Jesús ja jubida cuatsasiatana tse aimue tuatseda aidhe papu paquisata mahue puji.

31Jesús ja daja cuatsasiatana biame, pamapa cuaja Jesús ja atana tueda yahua je quisapuniunetiana.

Jesús ja mimi bue mahue saisiametana

32Beju tuatseda ete jenetia cuinanana su, deja mimi bue mahue Jesús peje su dusutana pia cuana ja. Tueda deja einid'u madhadaji puina. 33Jesús ja einid'u madhada deja peje jenetia jusiacuinatana su, deja mimipiruana. Dapia aniji cristiano cuana nimetiunetitana. Uja putana huecuana:

—Quetsunu su biame ecuana sa yahua su ye nimetiuda aida cuana ba bue mahue.

34Beju fariseo cuana sa tsada mahue puana. Uja atana huecuana:

—Ye deja ja nimetiuda ai cuana yatani Ishahua sa tucheda neje.

Jesús ja cristiano cuana ibunebatana

35Beju Jesús da ejude meamea ebuetsua puniunetiana. Jadhitati jude ete cuana je buetsuatana. Diusu sa ai quisa saida cuana quisaquisa puniunetiana. Pamapa piapiati nedaji cuana saisiametana. 36Daja ba putsu, Jesús ja ebia su ichenubatana cristiano cuana, huisha cuana equinaji mahue nime batana huecuana putsu. Ebia su jatacuamadhatitana huecuana. 37Da su Jesús ja mesa discípulo cuana uja atana:

—Enei hue, dueji yani ehuiru puji biame, ehuiruji cuana beju pishihue. Cristiano cuana da ejaja esuru ehuiru puji quitaita nime. 38Diusu da huiruhuiru emetse nime. Mebajaque tueda mesa quisaquisa puji cuana cristiano cuana peje su pabeituta puji, mesa quisa saida cuana tuna peje su quisaquisa epu puji.

Valgt i Øjeblikket:

Mateo 9: tna

Markering

Del

Kopiér