Lucas 13

Uc'ani tua' ich'ami uyojroner e Dios

1Pues entonces tama e momento era c'otoyob' cora winicob' xe' cay uyareob' e Jesús tamar lo que numuy jax tocto taca cora winicob' tua' e departamento Galilea xe' arob'na tua' achamesnob' tama e templo umen e gobernador Pilato. Jaxirob' war uxuriob' unuc cora arac tua' uputob' tujor e altar conda jajpnob' chamesnob' ub'an, y tin e cay chamsan uyapru uch'ich'er e winicob' era taca uch'ich'er e arac'ob'. 2Y che e Jesús:

—¿War ca ib'ijnu que e winicob' era cay unumse ub'ob' cocha era umen que más ani ayan umab'amb'anir que e inmojr winicob' tama e departamento Galilea? 3Pues c'ani inwareox era que majax b'an. Pero nox, jay machi ixsutpa iwacta imab'amb'anir, nox ub'an tua' ixixin ixchamesna. 4¿Y tuc'a ib'ijnu tama e dieciocho winicob' xe' chamesnob' conda cucrema inte' nuxi otot xe' uc'ab'a Siloé xe' c'aspa tari tama ujorob' y ya mactz'ob' macuir e otot era? ¿War ca ib'ijnu que e winicob' era más ani ayan umab'amb'anirob' que e inmojr winicob' xe' turob' tama e chinam Jerusalem? 5Pues c'ani inwareox era que majax b'an. Y nox, jay machi ixsutpa iwacta imab'amb'anir, nox ub'an tua' ixixin ixchamesna, che e Jesús.

Uyojroner e Jesús tama inte' te' higuera

6Entonces e Jesús cay ojron taca inte' ojroner xe' mucur cora y che:

—Ayan inte' ojroner tama inte' winic xe' ayan inte' uwerto, y tama urum era ayan inte' uterar higuera. Y ixin e winic era tua' uwira jay war ach'uan uyutir ute'. Pero conda c'otoy uwira ute' era, matuc'a uyutir tamar. 7Entonces e winic era xe' ajyum rum cay uyare inte' uman xe' war ucojco e rum y che: “Ayanix tres año que war inyopa tua' insajca uyutir e te' era, y ma ingojr uyutir intajwi. Y tamar era cucrun tua' machi usati más e rum.” 8Pero e man uyare upatron y che: “Nen inware que más ani bueno tua' cacojco otronte' año tua' cawira jay ac'awan. C'ani imb'ut'i usuy e te' era taca e rum y c'ani inyari e abono tama usuy. 9Y taca e abono era b'ajc'at axin ac'awan tama e año xe' watar y cawira jay ac'awan, y jay machi erer cacucru ixto ya'”, che e man era, che e Jesús.

Conda e Jesús utz'acpes inte' ixic xe' c'ototoj upat

10Pues entonces tama inte' día tua' e jiriar e Jesús ixin ochoy tama inte' sinagoga y cay canseyan. 11Y tujam e gente xe' turob' tama e sinagoga era ya turu inte' ixic xe' ayanix dieciocho año que ajmuac. Pues e ixic era quetpa c'ototoj upat umen inte' mab'amb'an mein, y tamar era machi uyub'i a'chpa awawan. 12Y conda e Jesús uwira e ixic era, upejca y che:

—Ixic, loc'oyix amuaquir y tz'acpesb'iret ixto ya', che e Jesús.

13Entonces e Jesús upacb'u uc'ab' tama ujor e ixic, y wacchetaca tutz cajb'a upat y cay utattz'i uc'ab'a e Dios. 14Pero uwinquir e sinagoga q'uijna conda uwira que e Jesús war utz'acpes e ajmuacob' tama e día tua' e jiriar, y tamar era uyare e gente y che:

—Ayan seis día conda erer capatna, y tamar e seis día era erer watox tua' ixtz'acpesna, pero machi tua' iche tama e día tua' e jiriar, che uwinquir e sinagoga era.

15Entonces ojron Cawinquirar y che:

—Ajq'uecranerox, ¿machi ca iwiti iwacax o ichij tua' iq'ueche axin tua' iwajc'u e ja' tua' uyuch'i tama inte' día tua' e jiriar? 16Pero e ixic era xe' jax inte' uwijch'oc catata viejob'ir Abraham y xe' turu dieciocho añoix ajmuac umen e Satanás, ¿machi ca uyub'i atz'acpesna tama e día tua' e jiriar? che e Jesús.

17Pues conda c'apa ojron e Jesús cocha era, sub'ajrob' tunor tin e war aq'uijna uwirob' e Jesús. Pero tunor e sian gente war atzay uwirob' tunor e nuxi milagro lo que cay uche e Jesús.

E ojroner tama ut e semilla mostaza

Mateo 13:31-32; Marcos 4:30-32

18Pues ojron e Jesús otronyajr y che:

—¿Tuc'a tua' inwareox que lar tacar uchinam e Dios? ¿Tuc'a ojroner tua' inchecsu tiut que b'an uchinam e Dios? 19Uchinam e Dios lar tacar ut e mostaza que motor que chuchu ut e semilla era pero conda apajc'a umen inte' winic y acay ach'i' aquetpa inte' nuxi te' tia' erer ac'otoy aturuan e mut tama uc'ab' y tia' erer uche usijcob'. Y b'an uchinam e Dios ub'an. Tama ucajyesnib'ir imb'ijc taca ayan e gente tamar, pero axin ab'oro este que aquetpa inte' nuxi chinam, che e Jesús.

E ojroner tama e levadura

Mateo 13:33

20Entonces ojron e Jesús otronyajr y che:

—C'ani inwareox otronyajr era tuc'a lar tacar uchinam e Dios. 21Uchinam e Dios lar tacar imb'ijc e levadura lo que uche asib'i e pan conda ayajra tama e harina conda war achena e pan umen inte' ixic, che e Jesús.

E puerta xe' int'um taca ut

Mateo 7:13-14, 21-23

22Pues conda war axana e Jesús tama e b'ir tua' ac'otoy tama e chinam Jerusalem, war uchecsu uyojroner e Dios tut tunor e sian gente tama e chinamob' y tama e aldea tia' war anumuy. 23Entonces checta inte' winic tut e Jesús xe' uyub'i tua' y che:

—Niwinquiraret, ¿ma ca jax meyra xe' tua' acorpesnob'? che e winic.

24Y e Jesús che:

—Turb'anic ib'a tua' ixochoy tama e puerta xe' int'um taca ut tua' ixc'otoy tama uchinam e Dios, porque c'ani inwareox era que ayan meyra gente xe' c'ani uyusre o'choyob' tamar, pero machi tua' o'b'nob'. 25Conda inte' ajyum otot ac'apa umaqui e puerta tua' axin awayan, nox xe' warox patir c'ani icay ipejca tut e puerta y che: “Cawinquiraret, pasa apuerta.” Pero e ajyum otot tua' asutpa uyareox y che: “Machi innata tia' tariox.” 26Y de allí nox xe' turox patir tua' ixsutpa iware e ajyum otot y che: “Non cay cac'uxi e pa' tacaret, y net cay acansion tama cachinam.” 27Pero e ajyum otot asutpa uyareox y che: “Inwareoxix que machi innata tia' tariox. Loq'uenic tara tunorox xe' ajmab'amb'anirox.” 28Y tama e día yaja' conda ixixin ixyajra patir uc'ani tua' ixaru y tua' ic'uxi ut iwej conda ixixin iwira que turob' e Abraham taca e Isaac y e Jacob taca tunor e profetob' macuir uchinam e Dios, pero que nox war ixquetpa patir. 29Y c'ani ac'otoyob' meyra sian gente tama tunor or e rum. Watob' tama e lugar tia' atob'oy watar e q'uin, y watob' tia' anamtz'a e q'uin, y b'an teinxejr yaja' y b'an teinxejr b'ana. Tama tunor or e rum c'ani watob' e gente tua' umorojse ub'ob' tor e mesa tua' awiob' tama e nojq'uin tia' tua' acay ac'otori Cadiosir. 30Y tama e tiempo yaja' tin e nuquir winic tara tor e rum c'ani aquetpa que majax nuquir winic, y tin e majax nuquir winic tara tor e rum c'ani aquetpa nuquir winic yaja', che e Jesús.

Conda aru e Jesús tama e gente xe' turob' tama e chinam Jerusalem

Mateo 23:37-39

31Y tama e día era c'otoyob' cora fariseob' xe' cay uyareob' e Jesús y che:

—Loq'uen tara porque e rey Herodes c'ani uchamset, che e fariseob'.

32Pero che e Jesús:

—Quiqui arenic e ajmajresiaj yaja' xe' jax e Herodes y che: “C'ani inwareox era que coner y ejc'ar c'ani inwajnes axin e mab'amb'an meinob' y c'ani intz'acpes tin e ajmuac, pero que chab'ij c'ani ac'apa tunor nipatnar.” 33Pero uc'ani tua' inxin tama nib'ir tua' inche lo que aquetpa tua' inche coner y ejc'ar y chab'ij, porque ma cocha erer achamesna inte' profeta najtir e chinam Jerusalem, che e Jesús.

Entonces uch'ujcu uwira ejmar tia' turu e chinam Jerusalem y che:

34—Nox xe' turox tama e chinam Jerusalem, cay ichamse tunor e profetob' xe' turuanob' tama e onian tiempo y cay chamsanox taca e tun tunor tin e eb'etb'ir tari umen e Dios. Meyra unsre tua' ani incorpes imaxtac b'an cocha incojt ac'ach xe' umeq'ue tunor uyarob' taca uwich, pero nox machi ic'ani. 35Ub'inic, e Dios machix tua' ucojco más e chinam era, y c'ani inwareox era que machix tua' isutpa iwira niut este que ac'otoy e tiempo conda ixixin iware y che: “Chojb'esb'ir jaxir xe' war watar tama uc'ab'a Cawinquirar”, che e Jesús.

Valgt i Øjeblikket:

Lucas 13: caa

Markering

Del

Kopiér