ማቶሳ 5
5
የሱሳ ዎዳሚ ጉት ላላባኖ
1የሱሳ ጎሳ ካኮድያረ ጎራታ ዎዳም ቶስ ቤጉረ ሀማጼ፤ ኡሱኮ ኦአጋልሳታረን ኡሱ ቶስ ኤመተን። 2ሃ አማ አጋልስሳኖ ሀጋአበ።
ካሶማሳመ እባዶ
(ሉቃ. 6፡20-23)
3“አያናክሶይ ዋ ኦዶታታራን ኦሶማሳመንያን፤
ዎኖናት ካዳሩረ ካክሶያ።
4ኦጋዳራን ኦሶማሳመንያን፤
ዋኮ ጎጎኢና ሄላይናራን።#ማዛ. 24፡3-4።
5ፋያንካኒዕ ኦሶማሳመንያን፤ ኡልና ኤልናራን።#ማዛ. 37፡11።
6ቁሉማ ኦኡኣራና ኦሱጉባታራን
ኦሶማሳመንያን ባራራንዋ።#ኢሳ. 55፡1-2።
7ሻጋ ኦየላራን ኦሶማሳመንያን፤ ዋኮ ሻጋ ሄላይናራን።
8ዎዳና ቁሉ ኦኮንሌተታ ኦሶማሳመንያን፤ ዋ ድናራን።#ማዛ. 24፡3-4።
9ኦዎጋርሳራን ኦሶማሳመንያን ይስ ካዋ አማም ኡማምናራን።
10ቁሉማ ማራን አመረነ ኦሆሮራማራን ኦሶማሳመንያን፤
ዎኖናት ካዳሩረ ካክሶያ።#1 ጴጢ. 3፡14።
11“እባዶ ኣላንቲቴይ እስን ጎሀባረ ጎሆሮረና፤ ሜላነ ዱባ እስን ጉት ጎአዬሰ ኦሶማሳንቴታን።#1 ጴጢ. 4፡14። 12ዳሩሪ እስን ታአታይናታን ሙራ ታአቲ ማንኮሌተ ማራን ገጌላየን፤ ገጌሎ ቱሳ። እስንኮ ሆረነ ኦግረን ኦሄገሮል ሂካማሌ ሆሮረራን።”#2 ኦዱ 36፡16፤ ኦፋ. ፈ. 7፡52።
ኢፋና ኤሰቦ
(ማር. 9፡50፤ ሉቃ. 14፡34-35)
13“እስን ታኡሌ ኤሰቦታን። ኤሰቦ ታኤሰቦ ኦኖሞንጀ ጎዋተ አባባይ ኦኖሞንጀ የላዪን ዳንዳታ? ሳር ሻፋምደ ሉክ ታእባዶይ ዳዳራምን ኳሬ ላኦ ላኮአብቶ።#ሉቃ. 14፡34-35።
14“እስን ካአላም ኢፋታን። ዎዳም ጉት ታግታ ካታማ ስያምን ላኮዳንዴቶ።#ያን. 8፡12፤ 9፡5። 15ዳብ ሀንቃይሳተረ ዳቾ ሄገሊ ጎልሳተ ካካታራ እባዶ ላኮግሮ። ምን ኦሮ ካግሮ ዱባን ጎጎሀንቃይሮ ቦላንሶ ጉት ካይን ኳሬ።#ማር. 4፡21፤ ሉቃ. 8፡16፤ 11፡33። 16ሂካማሌና እባዶ ኦኢዳን ፈሎኦትስን ዲጉረ ዳሩሪ ካግሮ ኣቦክስን ጎጎካባጅሮን ኢፋክስን እባዶ ሆረ ሀሃንቃዎ።”#1 ጴጢ. 2፡12።
ሴራ ካኦርት ፈሎ ሃኖ
17“አን ሴራ ካሙሴና ካሄገሮ ኢግልስን ካኤመየሮ አን እስኑን አሮሌኖ፤ ፈሎ ሀይስን ኳሬ ኢግልስን ላኮኤሜየሮ። 18አን ሩምና እስኑን አማራ፥ ኡልና ዳሩርና ታ ሮራኒ ሴራ ዱባ ፈሎ ሀይናራ ኳሬ ሴራኮ ፍዳለ ቶ ጎርቱን ኤጋኖ ኮ ዱዶ ላኮኢግልሳምሮ።#ሉቃ. 16፡17። 19ሃንሱን ማዮና ሂካ አጃጃ ዱባኮ ክጫርክ ጎባሰ ካካለና ጎጎባስሮ ጎአጋልስሰ ዎኖናት ካዳሩረይ ዱባንኮ ክጫርክ አማም ኡማምናራ። አየሱን ጎአመን ሂካ አጃጃል ፈሎ ሀይሳ ኦካለና ፈሎይ ጎጎሀይስናዉን ካአጋልስሳራ ሀሱ ዎኖናት ካዳሩሬት ካንጂንክ አማምናራ። 20ቁሉማትስን ታፋራሳውልኮና ሴራ ካሙሴ ኦአጋልስሳራንኮት ቁሉማኮ ሮር ጎሙቶን ዎኖናት ካዳሩረ ቶስ ኢጂ ታብን ላኮዳንዳታን አን አማራ።”
የሱሳኮ ኤንገ ማራን ካስሳመሮ አጋልስስ
(ሉቃ. 12፡58-59)
21“ካሆሬ እባዶነ ‘እባዶ አሮላጋዴን ካአማመሮ እስን ማልቴታን፤ እባዶ ካላጋዳራ ፍርዳምናራ ካአማመሮ ማልቴታን።’#ብያ. 20፡13፤ አዳ. 5፡17፤ 16፡18። 22አን ጎአመን ሃ አማራ፤ አቢኬሳ ራካሊ ካኢንጋማራ ዱባ ፍርዳምናራ፤ ጎርቱን አቢኬሳ ‘ካማድኖን’ ካአማራ ታአይሁድ ሾንጎይ ሆሳምናራ፤ ‘ታቶዋ’ ካአማራ አደ ታጋነም ኤሌንኮክ ፍርዳ ኡሱ ኦራታራ።#5፡22 አቢኬሳ ካሀባራራኮኮ ካሆርኮ ማጻፋል፥ “አዳ” ካአማሮ ሃፉራ አዳራ።
23“ሃንሱን ጃርሶካ ባንኤ ታፋላ ጉት ካይተደ ዋዉን ካኮስሳቶ ጎራታ አቢካ ኩ ካኮቁቃመራ አየስ ኩን ቃል ጎአመ፥ 24ጃርሶካ ኤሰ ባንኤ ታፋላ ሆረ ኢሳግጉደ ሆራርጀ ሴጉዴ አቢካነ ዎታ ዎጋር፤ ኤሰኮ አባባደ ጃርሶካ ዋዉን ስስ።
25“ኩ ካሞታራ ባራጋራካ ኩ ጎጎፍርድሶንኮ፥ ዳናና ካሻሮን ሮርስ ኩ ጎጎስሶንኮና ምን ካሻኖ ጎጎታብሶንኮ ራድ ግራን ሳም ባራጋራካነ ዎታ ዎጋር። 26አን ኩን ሩምና አማራ፥ ኡሱ ኩ ጎፍርድሰ አድ ማራጋደ ዱባ አት ሙር ታጉድሶ ኤሰኮና ላኮብናቶ።”
ሻርሙጡማኮክ ጋራ ካስሳመሮ አጋልስስ
27“አሮሻርሙጢቴን ካአማመሮ ማልቴታን።#ብያ. 20፡14፤ አዳ. 5፡18። 28አን ጎአመን እስኔ ሃ አማራ፤ ሄለል ታሀልቻ እሊ ካድያራ ዱባ ዎዳናቴሳይ ኤሰነ ዎታ ሻርሙጠራ አማኖያ። 29ታመርገ እልታታ ጩቦን ኣላንቲ ጎሌተ ጎርሰዋ ቤስ ሻፍ፥ ማርካ ዱባ ታጋነም ኤለን ቶስ ሻፋማናኮ ማርካኮ ባንኤ ቶ ዋታኖያ ሆረክ።#ማቶ. 18፡9፤ ማር. 9፡47። 30ገነ ታመርገታታ ጩቦን ኣላንቲ ጎሌተ ጎስጉደ ሻፍ! ማርካ ዱባ ጋነም ቶስ ሻፋማናኮ፤ ማርካኮ ባንኤ ቶ ዋታኖ ሆረክ።”#ማቶ. 18፡8፤ ማር. 9፡43።
ከልክ አማማኖኮክ ጋራ
(ማቶ. 19፡9፤ ማር. 10፡11-12፤ ሉቃ. 16፡18)
31“ ‘ኦርቴሳ ከልክ አመ ካቤሳራ ዱባ ከልክ ካኮአመሮ ዎራቃታ ኤሰን ስሳኖ ዶትሳራ አማመራ።’#አዳ. 24፡1-4፤ ማቶ. 19፡7፤ ማር. 10፡4። 32አን ጎአመን እስኔ ሃ አማራ፤ ኤሰ ካካለኔ ዎታ ሻርሙጣ ግራን ጉት ጎአበ ኳሬ፤ ኦርቴሳ ከልክ አመ ካቤሳራ ዱባ ኤሰ ካካለኔ ዎታ ጎጎሻርሙጢቶ ካየላሮያ። ሂካ ጋራይ ከልክ አማንተ ታቤተቶ ሄለልትቲ ካአታታራና ካሻርሙጣሮ ኣን ቶታማራ።”#ማቶ. 19፡9፤ ማር. 10፡11-12፤ ሉቃ. 16፡18፤ 1 ቆሮ. 7፡10-11።
ጋራ ካአማቶ
(ማቶ. 5፡32-38፤ ዎዩ. 19፡12፤ ያይ. 5፡12)
33ካሆሬ እባዶን፥ “ጣራ አሮአማቴን፤ አየሱን ጎአመን ዋይ ሆረ ካአማተቶ ኦራ” ካአማመሮ ማልቴታን።#ዎዩ. 19፡12፤ ቶቶ 30፡2፤ አዳ. 23፡21። 34አን ጎአመን እስኔ፤ “ሱረ አሮአማቴን” አማራ። ዳሩሪ ጎሌና አሮአማቴን፥ ኮርፍንጀ ካዋታ።#ያይ. 5፡12፤ ኢሳ. 66፡1፤ ማቶ. 23፡22። 35ኡሊ ጎሌና አሮአማቴን፤ ሉክ ታዋ ታኮፎልሳቶያ፤ ኢየሩሳለምና አሮአማቴን ታንጂንት ታዎኖ ካታማታ።#ኢሳ. 66፡1፤ ማዛ. 48፡2። 36እስኦታይ ጎሌና አሮአማተ፤ መተካክ ፊጣ ኮ ጉማራ ጎርቱን ጋምባላ የልን ላኮዳንዳቶ። 37ሃንሱን አዬሳ ግራን አዬስክስን ጎኢማና “እ” አደ ጎላአማና “ላ” ሀሌዎ። ሂካኮ ካካለ ዱባ ካሜላንኮ ካኤሜታሮያ።#ዎዩ. 19፡12፤ ቶቶ 30፡2፤ አዳ. 23፡21።
ሀሎ ብን ላኮዶትሳሮ
(ማቶ. 5፡38-42፤ ሉቃ. 6፡29-30፤ ዎዩ. 19፡13-18)
38“እል ማራን ኢል፥ ኢልኮ ማራን ኢልኮ፥” ካአማመሮ እስን ማልቴታን።#ብያ. 21፡24፤ ዎዩ. 24፡20፤ አዳ. 19፡21። 39አን ጎአመን እስኔ ሃ አማራ፤ ታሜላን ካፈላሮ እባዶት አሮኔባቴን፤ አየሱን ጎአመን ሀንጎሮጫካ ካመርጌ ካባሳሮን ካካለ ሀንጎሮጫ ካበተ አድ ቱሳ። 40እባዶት ኮ ቆሎካ አታይን ኩ ጎሞቴ ሳርስ ካባነ አድጉደ ኡሱን ስስ። 41እባዶት ኮ ኩኔ ባንኤ ቶ ሴና አም ኩ ጉት ጎሁኖመ ኡሱ ራኮክ አምባ ኡሱነ ዎታ ሴ። 42ኩኮ ካኤባታሮን ስስ፤ አምአይን ካዶታታሮኮና አሮትራተ።#አዳ. 15፡8፤ ማሱ. 24፡29።
ዲና ጌላታኖ
(ሉቃ. 6፡27-36)
43“ኦላታ ጌላ ዲናካ ዲድ ካአማመሮ ማልቴታን።”#ዎዩ. 19፡18። 44አን ጎአመን ዲናጆልክስና ጌላየን፥ እስን ኦሆሮራራዉና ኤባየን አማራ።#ማሱ. 25፡21-22። 45ሂካ ማለ ማንኮ የላታን ማራንትኑን ዳሩሪ ካግሮ ኣቦክስኑን ይሳስ ልናታን። ኡሱ ካኢዳኑና ካሜላኑን ዱባን አርት ቤሳራ፤ ኢዳሞና ጩባለሳሉና ቁሎሌዉን ኡብስሳራ። 46ካጌላታሮ ካላል ኦጌላታታን ጎሌተን መ ሙራ ሄላይናታን? ቃራጣ ኦኩኩይሳራና ላ ኡሱማሌ የላ ግራና? 47አቢላልትስን ታላልነ ኖጎዳ ኦአታታን ጎሌተን ኦካለኮ መይ ኢዳታን? አይዛብልና ላ ሂካ የላ ግራና? 48ሃንሱን ካዳሩረ ኣቦክስን ቁሉክ ጎጎሌሮይ እስና ቁሉኒዕ ላ።#ዎዩ. 19፡2-18፤ አዳ. 18፡13።
Valgt i Øjeblikket:
ማቶሳ 5: BayNTEth
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
