Байбихьи 1
1
Аллагьас дунял бижи
1Бищунго цебе Аллагьас зобги ракьги бижана. 2ЧӀобого букӀана жеги ракь ва гьелъул куц букӀинчӀо: бецӀаб накӀкӀ тӀад тӀупараб тӀину лъалареб гъварилъиги, гъваридал лъиназда тӀад гьури гӀадин боржанхъулеб гӀицӀго Аллагьасул РухӀги букӀана.
3Аллагьас абуна:
«Бижа канлъи!» – ян.
Ва канлъи бижана. 4Аллагьасда бихьана канлъиялъул лъикӀлъи, ва Гьес канлъи бецӀлъиялдаса батӀа гьабуна. 5Канлъиялда цӀар къойилан лъуна, бецӀлъиялда цӀар сордойилан ахӀана.
БукӀана къасимех, нахъеги рогьел – гьедин ана тӀоцебесеб къо.
6Цинги Аллагьас абуна:
«Лъинал кӀийиде рикьизе, гьезда гьоркьоб къвакӀараб пардав бижа!» – ян. Ва гьедин ккана. 7Аллагьас къвакӀараб пардав бижана ва гьелда гъоркьги тӀадги лъинал кӀийиде рикьана. 8Гьеб пардавалда цӀар Аллагьас зобилан лъуна.
БукӀана къасимех, нахъеги рогьел – гьедин ана кӀиабилеб къо.
9Ва Аллагьас абуна:
«Зобалазда гъоркь ругел киналго лъинал цойиде ракӀаре ва ракъдаллъи къватӀибе бакка», – ян.
Ва гьедин ккана. 10Ракъдаллъиялда цӀар Аллагьас ракьилан лъуна, цоцазде данделъарал лъиназда цӀар ралъадал абун ахӀана. Аллагьасда бихьана гьеб лъикӀ ккей.
11Аллагьас абуна:
«Ракьалъ батӀи-батӀияб гӀурччинлъи бижизабе: хьон бугеб тӀегь-херги, бугӀа-ролъги ва хьон бугеб пихъ кьолел гъутӀбиги».
Ва гьедин ккана. 12Ракьалъ бижизабуна батӀи-батӀияб гӀурччинлъи: тӀегь-херги, бугӀа-ролъги, пихъ кьолел гъутӀбиги; гьезул щибалъул жинди-жиндир тайпаялъул хьонги букӀана, ракьулъ бекьани, цӀидасан жиб бижулеб. Аллагьасда бихьана гьеб лъикӀ ккей.
13БукӀана къасимех, нахъеги рогьел – гьедин ана лъабабилеб къо.
14Аллагьас абуна:
«Зодил пардавалда рижа, сордоги къоги батӀа гьабулел, заманалъул батӀи-батӀияб ригьги гӀужги бихьизабулел ва къоялги соналги рикӀкӀине бажарулел, гвангъарал чирахъал. 15Зодил пардавалда кенчӀезе риччанте гьел, ракьалъе канлъи кьезе».
Ва гьедин ккана. 16Аллагьас кӀиго кӀудияб чирахъ бижана: гьезул кӀудияб – къоязе ханлъи гьабизе, гьитӀинабаб – сардазе ханлъи гьабизе, гьединго цӀвабиги рижана. 17Аллагьас гьел зодил пардавалда лъуна: гьез дунял гвангъизабизе, 18къоязеги сардазеги ханлъи гьабизе ва канлъиги бецӀлъиги цоцаздаса батӀа гьабизе. Аллагьасда бихьана гьеб лъикӀ ккей.
19БукӀана къасимех, нахъеги рогьел – гьедин ана ункъабилеб къо.
20Аллагьас абуна:
«Лъиназ бижизабе гӀемераб рухӀчӀаголъи. Зодихъ гьаваялда хӀанчӀиги роржанхъе».
21Гьедин Аллагьас рижана ралъдал аздагьабиги, лъадалъ рукӀунел гӀемерал батӀи-батӀиял рухӀчӀаголъабиги, зодихъ роржанхъулел батӀи-батӀияб тайпаялъул хӀанчӀиги.
Аллагьасда бихьана гьеб лъикӀ ккей 22ва, гьеб киналдаго баракатги лъун, Аллагьас амру гьабуна:
«Нужерго тӀинчӀ-къед цӀикӀкӀинабе, нужго гӀемерлъизаре ва ралъадазул лъинал нужедалъун цӀезаре. Риччанте ракьалда тӀад хӀанчӀиги гӀемерлъизе».
23БукӀана къасимех, нахъеги рогьел – гьедин ана щуабилеб къо.
24Аллагьас абуна:
«Ракьалъ рижизаре батӀи-батӀияб тайпаялъул рухӀчӀаголъаби: хӀайваналги, ракьалдасан шурулел жалги ва гӀалхул жанаваралги».
Ва гьедин ккана. 25Аллагьас рижана батӀи-батӀияб тайпаялъул гӀалхул жанаварал, хӀайванал ва ракьалдасан шурулеб батӀи-батӀияб рухӀчӀаголъи. Аллагьасда бихьана гьеб лъикӀ ккей.
26Аллагьас абуна:
«РачӀа Нилъер сураталда ва Нилъер сипаталда рекъон инсан#1:26 Инсан – жугьутӀ мацӀалда, «адам». «Адам» абураб рагӀул магӀна буго «инсан» ялъуни «инсаният». вижизе Нилъеца, ва биччанте гьес ралъдалъ ругел ччугӀбуздаги, зобалазда роржанхъулел хӀанчӀаздаги, хӀайваназдаги, ракьалдасан шурулелщинал жалаздаги, тӀолабго ракьалдаги тӀад кверщел гьабизе».
27Гьедин Аллагьас инсан вижана Жиндирго сипат-сураталда рекъон.
Аллагьасул сипат-сураталда вижана Гьес инсан:
бихьинчиги чӀужугӀаданги – кӀиялго рижана.
28Аллагьас гьезда баракат лъуна ва гьадин абуна:
«Нужеца лъимал цӀикӀкӀун гьаре, нужго гӀемерлъизе рукӀине – ракь цӀезабе ва гьелда тӀад кверщел гьабе. Ралъадазулъ ругел ччугӀбуздаги, зобалазда роржанхъулел хӀанчӀаздаги ва ракьалдасан хьвадулелщинал жалаздаги тӀад кверщел гьабе».
29Жеги Аллагьас абуна:
«Гьале дица нужее нигӀматлъун кьуна ракьалда бижарабщинаб – хьон бугеб тӀегь-хер ва хьон бугеб пихъ кьолел гъутӀби. 30ГӀалхул жанаваразеги, хӀанчӀазеги, ракьалдасан шурулелщинал жалазеги, ай рухӀ бугебщиналъе, Дица кинабниги гӀурччинаб хер кьолеб буго кваназе».
Ва гьедин ккана. 31Аллагь валагьана Жинцаго бижанщиналъухъ – цӀакъ лъикӀ букӀана гьеб.
БукӀана къасимех, нахъеги рогьел – гьедин ана анлъабилеб къо.
Valgt i Øjeblikket:
Байбихьи 1: АварАК
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Институт перевода Библии, 2005-2023