Luk 10
10
Jisɔs otigɛ atɔramɔ ɛtɨn ɛtal asɛ juu rafaa
1Kɛgbɔ kedudu mɨnɛ, ƆKƆKƆ ɔraŋɔ atɔramɔ ɛtɨn ɛtal asɛ juu rafaa, mɨnɛ otigɛ bɛ afaafaa wa rɨŋɔ ɛtɨma wa dulɔ kɛfɨrɔ ranchinɛ nchi amɔ ɔnɨŋo du. 2Ɔkani bɛ na, “Radɨnoti esii rawur, gbɔ asia ritumɔ wabi yawɔ. Ri rɔ nyɔm ri nyɛɛ Ɛbɨrɔkpabi ƆKƆKƆ, nyi ɛfɔnɔ kɛtɔkɔ na etigɛ ani ritumɔ ɛrɔ, wawa sii rotumɔ rɔdɛn. 3Ridɔŋ! Ntiga wun kɛmaka bɔna irɔd ra kɛdɔŋ ka ɔrɔwɔ. 4Rika timɔ rɛkpa ra agbuga, rɛkpa ra ibɔwɛ, birɛ ikad, mɨnɛ rikalɛ oni tum wunɛ ra ɛtɨma.
5“Ɛtɔ ranyinɛ nyi rinɔlɔ, ri rɨŋɛtɨma rikani na, ‘Kumkafuɛɛ ka tumɛ ra ɛtɔ nyi.’ 6Abɔ wɔna kumkafuɛɛ ɔrafɛ rɛtɔ ayifɛ, kumkafuɛɛ kawun kɨn ka tumɛ ramɔ, gbɔ abɔ ɔda, kumkafuɛɛ kawun kɨnka mulɛnɛ ka wɔka yimo wun. 7Ri tumɛ ra ɛtɔ ayifɛ yinɛ, rijɛ, riŋɔ mbum rambunɛ mbu wanye wun, kum efuufu na osia rotumɔ ɔjɛ nsɔl rotumɔ rɔdɛn. Rika chɛŋɛ ra itɔ ra itɔ.
8“Kɛfɨrɔ ranchinɛ rinɔlɔ, mɨnɛ wa tama wun, rijɛ mbum rambunɛ mbu wanye wun rijɛ. 9Ri nyɛ ani ɛgbanɛlɛ rifɛn ra ɔfɨrɔ abu, mɨnɛ rikani bɛ na, ‘rɛkɨm ra Ɛbɨrɔkpabi rɛwɔ reyim wun.’ 10Gbɔ ribɔnɔ ra kɛfɨrɔ wabi tama wun, rinɔlɔ rifa ribɛ rikani na, 11‘Tum ifug kɛfɨrɔ kewun ra ikad iyɨl, rɛkpun yɛ fɛb ibarɔ kɛrɨŋ ra wun. Gbɔ rigbɛra na, Rɛkɨm ra Ɛbɨrɔkpabi rekula.’ 12Nkani wun na, ra reyi kɛlam kɛ kɨbikɨbii, esinisini-a Sɔdɔm kɨn etumɛ wɔrɔwɔrɔ esiŋɛ nyi kɛfɨrɔ achifɛ.
13“Kobiwɔ kɔnyɛ wun Korasin! Ɛbiwɔ ɛnyɛ wun Bɛdsaida! Kum asɨna birɛ kɛbɛkpa mbi wa si nla nfa, wa si bɛnla ra Taya akɨla Sidɔn, nla wa sɔsɔ atagɔmɛ kpuu wa fɔranɛ, wa tumɛ ra ibɔwɛ ekur akɨla ritɔ. 14Gbɔ kɨn etumɛ wɔrɔwɔrɔ ɛnyɛ Taya akɨla Sidɔn ra reyi kɛlam kɛ kɨbikɨbi asiŋɛ wun. 15Awun Kapanɔm, kɨn rigbɔ ra reju mbira kayu-ɛ? Ei, kɨn wa tɔlɛ wun ketuu tata rinɔlɔ kɛfɨrɔ kaburɛ.
16“Oni nwu odimɔ wun, odimɔ mɛ, gbɔ oni nwu obo fum wun, ofumɛ mɛ. Mɨnɛ oni nwu ofumɔ mɛ, ofumɔ oni nwu otigɛ mɛ.”
17Atɔramɔ ɛtɨn ɛtal asɛ juu-rafaa wa kɨlɛ ra kɛdɔmetimɔ wa lama na, “ƆKƆKƆ, tum obia nsɨm wɔ tɔlɛnɛkpa wɔnyɛ wul ra ridɨnɔ ridi.”
18Gbɔ Jisɔs ofini bɛ na, “Nchɛ Sɔtan osi ra kayu ɔwa tɔɔ rɔchɛ amɔm gbaŋgbaŋ. 19Gbɔ nyɛ wun nsɨm, risalɔ iyɔ ra nnaŋ akɨla nsɨm a anianjɨŋ fɛb. Mbum tumbunɛ wɔ ra sia wun kebia. 20Gbɔ awun rika tɔmɔ na obia roifɛ wɔ tɔlanɛ wɔ nyaŋa wun, gbɔ rikanɔ na wa chɛrɛ radɨnɔ ra wun ra kayu.”
21Ra kɛgbɔ achi, Jisɔs ɔkanɔ ra Ɔwanɛwanɛ Roifɛ ɔlamɔ na, “Ami nsamɛ Wu Mitɛ, Ɛbɨrɔkpabi ƆKƆKƆ nyi kayu ra rɔchɛ. Kum adɨb ani mafɔlɔ arigɛ kɛgbɛrakɔtag ka birɛ mbifa, gbɔ ayaŋi bɛ anyɛ mbibɔn. Inyii, Mitɛ, kum ɛdawu ɛduayi.
22“Mitɛ Owum otibɔ ra birɛ mbi fɛb ɔnyɛmɛ. Oni tum wunɛ nwu ɔgbɛra Nwɔn ɔda, ebisiŋɛ Mitɛ, mɨnɛ oni tum wunɛ ɔda nwu ɔgbɛra Mitɛ raikpɛraikpɛ ebisɨŋɛ ami nwu nra Nwɔn, arigɛ ani mba Nwɔn odugɔ na ɔyaŋi mɔ ɔnyɛ bɛ.”
23Jisɔs ochimini ɔnɨŋɔ atɔramɔ ɔkani bɛ ra idɨbɔ na, “Ɛmɔlɛmɔlɛ ɛfɔnɔ jɛnɔ nda ra rachɛ bumbu richɛ nla.” 24Kum nkani wun na, “Alamaremu ra Ɛbɨrɔkpabi esii akɨla akɨm, wa dugɔ wa chɛ bumbu richɛ nla gbɔ wa bi chɛ, mɨnɛ wa dimɔ bumbu awun ridimɔ, gbɔ wa bi dimɔ.”
Rɛkanɔ ndi rɛbaŋa Bɨrika oni a Sameria
25Reyi dinɛ, Ɔkɔga Ibina wunɛ ɔbarɔ olumɛ Jisɔs, odimɔ bumbu ɔnɨŋɔ lam. “Ɔkɔgakɔga, Mambum bɛ nnɨŋɔ si fɛɛ nfɔnɔ rokpin rajɛrajɛ?” 26Jisɔs ofini mɔ na, “Mambum bɛ wa chɛrɛ ra ibina? Nnan dɛ ayo yina yɛ?” 27Ofini na, “Fɔnɔ rɛda ra Ɛbɨrɔkpabi eyi ƆKƆKƆ ra etimɔ eyi fɛb, ra nsɨm owu fɛb, ra ɛtalɛtalɛ eyi fɛb; mɨnɛ fɔnɔ rɛda ra ɔchɛmɔ ɔmalɔ owu kɛmanchi afɔnɔ rɛda ra ɛkpaju eyi.” 28Jisɔs ɔkani mɔ na, “Afini olili, sialɛ fɛɛ afɔnɔ rokpin rajɛrajɛ.”
29Gbɔ Ɔkɔga Ibina ɔta rɨŋa kɛkɔgɛlɛnɛ ɛkpa na amɔ ɔra kpɨraŋ, omulɛnɛ ɔbɨbɔ Jisɔs na, “Moni mɔ ɔra ɔchɛmɔ ɔmalɔ owum?”
30Jisɔs ofini na, “Oni osia Jɛrusɛlɛm ɔya Jɛriko, ndi ɔka kpɨmi ayɨbakayɨb. Wa du mɔ wa tama mɔ ibɔwɛ, ɛgbɔ giriri nla ɔba. 31Osiakɔya ka Ɛbɨrɔkpabi ɔwɔ ɔwa siŋ ra ɛtɨma ayi, ɔkɨlɔ chɛ mɔ, osiŋɔ kɛkpɛna kedudu odulɔ. 32Ɛduayi mɨnɛ dɛ Lifait osi ɔwasiŋ, ɔkɨlɔ jag kumaka, ɔchɛ odumini nwɛn, osiŋɔ ɛtɨma edudu. 33Gbɔ onia Sameria nwu ɔya kɔchɛŋɛ ra ɛtɨma ayifɛ, ɔkɨlɔ jag afɛ, ɔchɛ mɔ, ɔfɔnɔ mafɨbɔ ramɔ. 34Odulɔ oyimɔ mɔ, ɔgbanɔ mɔ, ɔwaga manɔ ma Olif arigɛ matug mbi wɛra raka ra ɔdɛmɔ mbɛn, otimɔ ibɔwɛ ɔbɔ ɔdɛmɔ mbɛn. Kadi ɔtamɔ mɔ ra kɔkpamɔ kɔkɛn, odulɔ kumka wa kpɛma itɔ ɔka sii bɨrika rotumɔ ra ɛkpaju ɛyɛn. 35Ɔnyɛgɛ reyi, ɔsaŋɔ dinariɔs afaa, ɔnyɛ oniretu a kumka wa kpɛma itɔ, ɔkani mɔ na, ‘Bagɛlɛ mɔ,’ mbɔ kɨlɛ nwɔ, kɨnkpe wu ogbuga ranwunɛ nwu abinɛ akɨla.
36“Moni ra kɛdɔŋ ka ani mba atal, mɔ ɔkɔgɛlɛ na amɔ ɔra ɔmalɔ ɔnyɛ oni nwu ayibakayɨb wa dunla?”
37Ɔkɔga Ibina ofini na, “Oni nwu ɔkɔgɛlɛ mɔ mafɨbɔ.” Jisɔs ɔkani mɔ na, “Dɔŋ ka sii irigirigɔ.”
Jisɔs odulɔ idiwɔ ɛkpa Meri ra Mata
38Ndi Jisɔs ra atɔramɔ wara waya ra ɛtɨma, Jisɔs ɔnɔlɔ kɛfɨrɔ chinɛ, ɔwani nwu wa yina ridɨnɔ na Mata ɔtama mɔ ra ɛtɔ ɛyɛn. 39Mɨnɛ ɔfɔnɔ ɔmalɔ nwu wa yinɔ Meri, nwu otumɛ okula Jisɔs ƆKƆKƆ odima ɛkɔgɛkɔgɛ ɛyɛn. 40Gbɔ Mata ɔta ojuŋanɛ etimɔ ɔbaŋa rotumɔ ra kɔjɛ kɛyɨbɛlɛ. Odulɔ oyimɔ Jisɔs ɔka kani mɔ na, “ƆKƆKƆ, eliwoliu ndi ɔmalɔ owum ɔgbɛ mɛ nsi orin rotumɔ ndu amiami-ɛ? Kɔɔ remu kani mɔ ɔwa tɔmɛ!”
41Gbɔ Jisɔs ɔkɔkɔ ofini mɔ na, “Mata, Mata, awu ajuŋanɛ etimɔ ra birɛ esii. 42Mbum bunɛ bɛnla araŋɔ, gbɔ Meri ɔraŋ bɨrika mbum mbu woliwɔ wosiŋɔ, mɨnɛ oni tum wunɛ obiyaa ɔtama mɔ abɛ.”
Valgt i Øjeblikket:
Luk 10: Olulumo-Ikom
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation
