मत्ती 11
11
1ओउः बारजनकायः एत तोती स्यान्ती दप्आक्तीको येसु आल्ती ओहाङःकोः गाव् गाव्गन तोमःती परमेस्वर्कोः कुरा स्यान्तीमा थोल्ह्ती तोतीमा वाह्आकाय्। 2ओहाङःसैको “येसुइ आन ताङ्ह्ओ काम्लम् जाङ्ह्नौ” त दाय्ह्ओ बाप्तीस्मा बयःओ युहनाइ झ्याल्खानहाङः मुतोक्हाङः सायःआकान्। ओउः कुरा सायःआक्तीको युहनाइ येसुकःताङ् नीस्चाक् लयःकुस् वाह्ओमयः ल्होक्आकान्। 3ओउः नीस्चाक् येसुकःताङ् वाङ्ती “लौ ओउः परमेस्वर्इ तोती गम्ओ वाङ्सा खेःचाक्ओ नाङ्लेःतेः खेःतेःनाःया खेःतेःलया। खेःतेःल त खेःयाकायः ङी अरुकायः ल्युङ्ह्ती योसा खेःनाङी” त दाय्ह्ती व्हत्थातो 4“लौ ङाइ जाङ्ह्ओ काम्लम्कोः दोह् दोह्लो नीङ्जीइ च्यवःतेःआकाजु सायःतेःआकाजु ओउःलेः युहनाकायः ल्हाक्ती छ्यानःलाङ् आल्ज दा। 5मीक्इ च्यवःआक्मालो मान्तालम्इ द्याह् च्यवःसा खाय्नानी क्ल्योय्बाङ् मान्तालम्इमा द्याह् पेतो वाह्सा खाय्नानी कोह्र् चाओलम् द्याह् सेलः मुनै नो लोक्ओलम्इ पेतो सायःसा खाय्नानी जुगाङ् सीओलम् उह्ती च्योक्नै ओहाङःसै ह्र्यात् मान्तालम्कायः परमेस्वर्कोः पेओ कुरा तोओलेः मुनाः। 6लौ सुसुइपाय् गलकायःमा ङाकायः ल्हुङ् क्रोङ्तोलेः ङ्हाम्नानी ओउःलेः ल्हुङ् चोङाय्तो स्याव्नै” त दाय्ह्ती येसुइ तोआथाच।
7ओहाङःसैको येसु ओउःत त्याङ्आक्तीको ओउः नीस्चाक् युहनाकुस् वाह्ओमयः ओउःकःताङ् द्यान्ह्ती पाय्ह्आकाच। ओउःमयः द्यान्ह्ती पाय्ह्आक्तीको ओउःहाङः हुम्ती मुओ मान्तालम्कायः येसुइ युहनाकायः नोःओ कुरा स्यान्आथास “लौ युहना मुओ याक्गार्सीःमालो देस्ताङ् आल्तोक् बेलाहाङःपाय् दोह् योलाङ् आल्तेःआकाय्। मारुःइ ल्हङ्गाय्ताक्ओ बेर् ह योलाङ् आल्ओ खेःतेःइली। 8खेःल त खेःया दोह् हायःलाङ् आल्तेःआकाय् पेओ दीङ्ह्ओ नाय् लावओ मान्ता योलाङ् आल्ओ खेःतेःइली ओउःत पेओ नाय् लावओ मान्ता योसाकायः राजाकोः दर्बाल्ताङ् आल्सालेः खेःतो। 9लौ उया दोह् योलाङ् आल्तेःआकाय् दाय्ह्सा परमेस्वर्कोः कुरा छ्यानःती तोओ मान्ताकायः योलाङ् आल्तेःआकाय् बा। माः रैस बुरु दोङ्सी दाय्ह्भनाङ् उय्ह्लेकोः परमेस्वर्कोः कुरा छ्यानःओमयःसै युहनापाय् ताङ्ह्लेःनाः बा। 10ओउःकायः नोःओ कुरा उय्ह्लेहाङःसै परमेस्वर्कोः आखरःहाङः लेखती मुनाः। इखेकायः ‘लौ नाङ् वाङ्माःतोक्हाङःसै यात्चाक् ङाकोः कुरा तोसा मान्ता ङ्हासैलेः ल्होक्नेःनाङ्। ओउःइपाय् नाङ् वाङ्साकायः ल्याम् पेतो जाङ्ह्ताक्लेःनौ’ त दाय्ह्ओ कुरा युहनाकायः लेखती मुलेःनाः। 11दोङ्सीलेः दाय्ह्भनाङ् ल्हाव्ह्दैबाङ्कोः सबै मान्तालम्सै युहनापाय् ताङ्ह्लेःआनाः बा। माःसापाय् माः लेःआः सुसुखेइ ङाइ स्यान्ओ परमेस्वर्कोः कुरा ङ्हाम्ती ओउःकोः राजीहाङः मुलेःनै ओउःपाय् युहनासै ताङ्ह्लेःनै। माः रैस ओउः राजीहाङः मुओ अरुसै मीओ मान्तापाय् ओउःमा बाप्तीस्मा बयःओ युहनासै ताङ्ह्लेःनाः। 12-13बाप्तीस्मा बयःओ युहना वाङ्तोक्हाङः सबै परमेस्वर्कोः कुरा छ्यानःओमयःइमा मोसाइ बयःओ ऐन्इमा इ राजीकोः कुरा छ्यानःती तोआकानी। ओहाङःसैको युहना मुओ दीन्हाङःसै तेन्छ्याङ्च्युक्कायःलेः परमेस्वर्कोः राजीहाङः जोक्ओ मान्तालम् मीन्ह्काय्लाङ् वाङ्नै। 14नीङ्इ सायःसा ग्यातेःनै त खेःया ‘ओउः वाङ्सा खेःओ एलीया त तोओपाय् युहना लेःआः बा’ त ङाइ दाय्ह्ती तोनेःनाङ्स। 15इ ङाइ तोओ कुरा पेतो सायःनु दा। 16लौ नीङ् तेन्छ्याङ्कोः मान्तालम् बजार्हाङः साङ्ह्ओ हौलम्लो लेखा मुतेःनै। 17ओउः हौलम्पाय् ‘लौ ङीइ बीहा जाङ्ह्सा बाङ्सुली मुत्ती साङ्ह्तोक्हाङःमा नीङ्पाय् ङीकुस् चोङाय्ती स्याह्सामा ग्यातेःइली। ङी सीओकायः क्रेस्ती साङ्ह्तोक्हाङःमा नीङ्पाय् ङीकुस् र्याःसामा ग्यातेःजेःतेःइली’ त दाय्ह्ती ओउः हौलम्इ साथीलम्कायः क्लुङ्ती तोनानी। 18ओउःलो लेखालेः बाप्तीस्मा बयःओ युहना वाङ्ती मुतोक्हाङः ओउःइ हान् तुङ्माःत उपाङ् काःओ जवती झ्यान्ते 19‘लौ इपाय् लान्इ ङायःओ चाक् लेःआः बा’ त दाय्ह्ती नोःकाय्तेःइतो ङा मान्ताकोः चोः त तोओ मुतोक्हाङः ङाखेइ जेःती तुङ्तो मुओआः ङ ओउःत झ्यान्ते ङाकायःपाय् ‘लौ इ मान्तापाय् जेःक्राक् तुङ्क्राक् लेःआः बा। इपाय् पैसा जेःओ मान्ताकुस्मा रेव्तो जाङ्ह्ओ मान्तालम्कुस्मा ब्राङ्तोलेः वाह्नाः’ त दाय्ह्ती नोःकाय्तेःनै। ओउःत नोःकाय्तेःइतो बुरु व्हाय्ओ मान्ताकायःपाय् ओउःइ जाङ्ह्ओ काम् योधार्नालेः तय्ह्सालेः खाय्नाः बा” त दाय्ह्ती येसुइ तोआथास।
20एत तोआक्तीको येसुइ खोराजीन् बेथ्सैदा र कफर्नाहुम् त तोओ सुम् सहर्हाङः मुओ मान्तालम्कायः जान्आकान् दोह् हायःती दाय्ह्सा ओउः सुम् सहर्हाङः येसुइ आन ताङ्ह्ओ ग्याङ्ह्राय्लम् जाङ्ह्ओ खेःतो ओहाङःकोः मान्तालम्इ लःलयःकोः रेव्ओ काम् फेमामाःत येसुकायः ङ्हाम्नीली। 21“लौ नीङ् खोराजीन् र बेथ्सैदा सहर्कोः मान्तालम्य नीङ्पाय्तेः न्युम्ह्तोतेः स्याव्सा खेःतेःनै दोह् हायःती दाय्ह्सा नीङ्कोः सहर्खेहाङः जाङ्ह्ओ ग्याङ्ह्राय्लम्पाय् तायर् सीदोन् त तोओ नीस् सहर्खेहाङःमा जाङ्ह्ओ खेःतो त खेःयाकायः ओहाङः मुओलम्इपाय् आन ज्याङःतोहाङःसै जुगाङ् ल्हुङ् द्यान्ह्ती लयःकोः रेव्ओ काम्लम् फेचानी खेःतो। 22दोङ्सी दाय्ह्भनाङ् परमेस्वर्इ न्युम्ह्ताक्ती तोसा दीन्हाङःपाय् ओउः तायर् सीदोन् नीस् सहर्कोः मान्तालम्सै नीङ् खोराजीन् बेथ्सैदानीस् सहर्कोः मान्तालम्पाय् न्हाङ्तोलेः न्युम्ह्तोतेः स्याव्तेःनै। 23आने कफर्नाहुम्कोः मान्तालम्य नीङ्कोः सहर्पाय् ‘लाङ्काकोः सहर्लो ताङ्ह्लेःनाः’ त म्हर्तेःचनै ओउःपाय् कामः नालाताङ् क्लाःती ह्र्योङःती वाय्तो स्याव्लेःनाः बा। दोह् हायःती दाय्ह्सा नीङ्कोः सहर्हाङः जाङ्ह्ओ काम्लम् ङाइ सोदोम् त तोओ सहर्हाङःमा जाङ्ह्ओ खेःतो त खेःयाकायः ओउः सहर्कोः मान्तालम् ल्हुङ् द्यानःती झ्यान्ते ओउः सहर्मा सहर्कोः मान्तालम्मा वाय्तो खेःआक्इली सहर्पाय् तेन्छ्याङ्मा मुचाः खेःतो। 24दोङ्सी दाय्ह्भनाङ् ओउः परमेस्वर्इ न्युम्ह्ताक्ती तोसा दीन्हाङः ओउः सोदोम् देस्कोः मान्तालम्सै नीङ् कफर्नाहुम्कोः मान्तालम्पाय् न्हाङ्तोलेः न्युम्ह्तोतेः स्याव्तेःनै बा” त दाय्ह्ती येसुइ जान्आथास।
25-26ओहाङःसैको ओउः बेलाहाङः येसुइ परमेस्वर् आपाकायः ताङ्ह्ताक्ती तोआकान् “लौ परमेस्वर् आपाय नाङ् फेल्बाङ् ल्हाव्ह्दैबाङ्कोः प्रभुलेः ङाइ तोओ कुरापाय् व्हाय्तो चीःओ मान्तालम्कायः छ्यान्ह्माःत इलो खेःओ मीओलम्कायः ह नाङ्इ लयः झाक्तीलेः छ्यान्ह्तेःआकान्। 27ङाकोः परमेस्वर् आपाइ सबै कुरालेः स्यान्साकायःमा जाङ्ह्साकायःमा बयःआताङः। चोःकायःपाय् आपाइ ह तय्ह्नाःथै चोःइमा ह आपाकायः तय्ह्नौ। अरुइ आपाकायःमा चोःकायःमा तय्ह्नीली सुसुखेकायः चोःइ छ्यानःआथै ओउः मान्ताइ ह परमेस्वर् आपाकायः तय्ह्नानी। 28लौ सुइतेः चाक्ओ ह्र्याम्सीःओ काम् जाङ्ह्लेःनानी ङाकःताङ् वाङ्चाक्न दै वाङ्आक्तीको ओउः काम्सै ङाइ न्यास्ताक्चेःनाङ्स। 29ङाकोः काम् जाङ्ह्सा थेङा ङाकःताङ् स्यान्लाङ् वाङ्न। ङापाय् खह्र्ओमा ज्योङःओ ल्हुङ्कोः मान्ता खेःङल ङाइ बयःओ काम् हाःतो लेःआः बा। 30ओउःत झ्यान्ते ङाकोः काम् जाङ्ह्तोक्हाङः नीङ् ल्हुङ् लीह्माःत स्याव्तेःनै” त दाय्ह्ती येसुइ स्यान्ती तोआथास।
Valgt i Øjeblikket:
मत्ती 11: CDM93
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 1993 Wycliffe Bible Translators Inc., All Rights Reserved.
