Fúcihum 11
11
Gáguuhoor gúlobum gaagu to Babel
1No unu bugan gaagu peepe gúlobumiil ganur ban baloberiil banur. 2Ngutoosoorúl gápurum tinak jaram gúpur nꞌgásilimb gáamak gara Sineyaar, ngucong to. 3Funak fucee, anooan narok apaalool : « Ujaal ukaanaal síbirik nusowaal so nꞌéfuur. » Síbirik saasu nguŋar so gukaan sílankiin sara gateep min egodoroŋ yaayu yóoni esimoŋ. 4Ngubaañ gurok : « Ujaal uyihenaal ésuk nuteepaal etaah yárookene bu ró nꞌémit, mo ujowolaal bu gajamo ban mat uyiisooraal jaram ucinaal banooban nꞌdúniya. » 5Ñeer Acehériit mee nawaloúl be eñow ésuk yaayu son etaah yárooken mee yan bugan gaagu gommee ngateep. 6Narok dó mꞌbúyegehool : « Gukaane fiil fanur ban baloberiil banur. Gajamooriil béy ngubile eŋariil ! Biloot kum ebaj wabiliil eniŋ ekaan wan gujok mee. » 7Narok benen : « Uwaloaal bu nꞌetaam min ukaanaal gúlobumiil ngúguuhoor jambil gújuh gujamoor balober. » 8Acehériit mee nayiisiil to min gufanjoor gucin banooban nꞌdúniya. Gateep ésuk yaayu to ngurehe. 9Yo ecil mee ngusen ésuk yaayu gajow gurok yo Babel mara to Acehériit mee akaan mee min gúlobumiil gúguuhoor. To may nafanjen mee bugan gaagu peepe ngucin banooban nꞌdúniya.
Fiil fara Seem káŋ bu nꞌAburam
10Ufe fiil fara Seem. Nan Seem abaj mee símit ceme, (100) nabaj aleeh amaañen gurogool Arupakasad. Tootook búyiik bara mal máamak maamu min buwuje símit síruba. 11Arupakasad abajibaj, Seem nabaak benen símit siceme futok (500), nabugoor guleeh gumaañen nꞌukoña.
12Arupakasad nan abaj mee símit gafaakan nꞌguñen gaat (35), nabaj Seela. 13Seela abajibaj, Arupakasad nabaak benen símit siceme sibaagiir nꞌsímit sífaajiir (403), nabugoor guleeh ásuupoor.
14Seela nan abaj mee símit gafaakan nꞌguñen (30), nabaj Hebeer. 15Hebeer abajibaj, Seela nabaak benen símit siceme sibaagiir nꞌsímit sífaajiir (403), nabugoor guleeh gumaañen nꞌukoña.
16Hebeer nan abaj mee símit gafaakan nꞌguñen nꞌsibaagiir (34), nabaj Peleg. 17Peleg abajibaj, Hebeer nabaak benen símit siceme sibaagiir nꞌsímit gafaakan nꞌguñen (430), nabugoor guleeh ásuupoor.
18Peleg nan abaj mee símit gafaakan nꞌguñen (30), nabaj Réehu. 19Réehu abajibaj, Peleg nabaak benen símit siceme síruba nꞌsímit futok nꞌsibaagiir (209), nabugoor guleeh gumaañen nꞌukoña.
20Réehu nan abaj mee símit gafaakan nꞌguñen nꞌsíruba (32), nabaj Séerug. 21Séerug abajibaj, Réehu nabaak benen símit siceme síruba nꞌsímit futok nꞌsíruba (207), nabugoor guleeh ásuupoor.
22Séerug nan abaj mee símit gafaakan nꞌguñen (30), nabaj Nahoor. 23Nahoor abajibaj, Séerug nabaak benen símit siceme síruba (200), nabugoor guleeh gumaañen nꞌukoña.
24Nahoor nan abaj mee símit gafaakan nꞌfutok nꞌsibaagiir (29), nabaj Teera. 25Teera abajibaj, Nahoor nabaak benen símit ceme nꞌsímit guñen gaat nꞌsibaagiir (119), nabugoor guleeh ásuupoor.
26Teera nan abaj mee símit gafaŋ gúfaajiir nꞌguñen (70), nabaj Aburam, Nahoor bugo nꞌAran.
Fiil fara Teera
27Fiil fee fara Teera. Teera nabaj Aburam, Nahoor bugo nꞌAran. Aran nabaj Loot. 28Aran acehe paayool Teera mꞌburoŋ, dó mꞌmof man abaji mee man guroge mee Uúr yara bugara Kalide. 29Aburam bugo nꞌNahoor nguyab ukoña. Aburam akoñaool gajaool Saaray. Nahoor akoñaool gajaool Milika aleeh Aran. Aran ho abaj mee Milika bugo nꞌYisika. 30Tooge Saaray abajut aleeh, ájuhut sah afaret.
31Funak fucee Teera naŋar aleehool Aburam bugo nꞌLoot han Aran ammee aleeh Teera abaj mee, nꞌásaabulool Saaray ammee akoña Aburam, ngúpur mꞌmofiil Uúr mara bugara Kalide, min gujow bu mꞌmof mara Kanaan. Bare nan gútiiŋ mee Haran, ngucin to. 32Nan Teera abaj mee símit siceme síruba nꞌsímit futok (205), nacet to Haran.
Valgt i Øjeblikket:
Fúcihum 11: gsl
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023 (Active), Wycliffe Bible Translators, Inc. All rights reserved.