ମାଥିଉ 7
7
ଲକାରିଙ୍ଗ୍ ବିଚାର୍ କିମାଟ୍
(ଲୁକ. ୬:୩୭-୪୧-୪୨)
1“ଜେକନିକାରିଙ୍ଗ୍ ଏପେଙ୍ଗ୍ ବିଚାର୍ କିମାଟ୍। ଲାଗିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପା ବିଚାର୍ କିଦୁନ୍। 2ଲାଗିଙ୍ଗ୍ ଇନେସ୍ କିଜି ମାନାୟ୍ତିଙ୍ଗ୍ ବିଚାର୍ କିନାଦେର୍, ହେଲେକେ ମିଙ୍ଗେଙ୍ଗ୍ ଈଶ୍ୱର ବିଚାର୍ କିଦ୍ନାନ୍। ଇମ୍ଣି ମାଣ୍ ତାଙ୍ଗ୍ ଲାଜ୍ଜି ହିନାଦେର୍, ହେ ମାଣ୍ ତାଙ୍ଗ୍ ମିଙ୍ଗେଙ୍ଗ୍ ଲାଜ୍ଜି ହିଦ୍ନାର୍। 3ଏପେଙ୍ଗ୍ ଜାର୍ ଟଣ୍ଡେନ୍ ହିରୁ ବୁଲ୍ତିଙ୍ଗ୍ ଇନେକିଦେଙ୍ଗ୍ ହୁଡ଼୍ନାଦେରା? ଇନାକା ଏପେଙ୍ଗ୍ ଜାର୍ କିତି ଗାଜା ବୁଲ୍ତିଙ୍ଗ୍ ହୁଡ଼ୁଦେରା? 4ମିବେ ଗାଜା ଦସ୍ ମାନିହିଙ୍ଗ୍ ଇନେସ୍କିଜି ଜେକନି ଇଚ୍ରୁ ଦସ୍ ବିଷୟରେ ବିଚାର୍ କିଜି ୱେଚ୍ଚେଙ୍ଗ୍ ଆଡ୍ନାଦେରା? ଟଣ୍ଡେନ୍ ଆନେଙ୍ଗ୍ ନି ଦେସ୍ତିଙ୍ଗ୍ ରକ୍ଷା କିଜିହିଦ୍ନାଙ୍ଗ୍। 5ଏପେଙ୍ଗ୍ ପାଟ୍କାର୍ କାଦେର୍, ଏପେଙ୍ଗ୍ ଆଗେ ମି ଜାର୍ ଦସ୍ତିଙ୍ଗ୍ ପିହାଟ୍। ଲାଗିଙ୍ଗ୍ ଏପେଙ୍ଗ୍ ଜେକନିକାର୍ ଦସ୍ତିଙ୍ଗ୍ ଇନେସ୍କିଜି ବୁଜାଇ କିଦେଙ୍ଗ୍ ଆନାତ୍ ହେ ବିଷୟରେ ପୁଞ୍ଜେଙ୍ଗ୍ ଆଡ୍ନାଦେର୍, ଆରେ ହେୱାର୍ ଦସ୍ତିଙ୍ଗ୍ ହାର୍କିଦେଙ୍ଗ୍ ଆଡ୍ନାଦେର୍।
6ମାପୃକାତାତିଙ୍ଗ୍ ଇନେର୍ ୱେଞ୍ଜେଙ୍ଗ୍ ଇଚାକିଉର୍ ହେୱାନିଙ୍ଗ୍ ୱେଚ୍ମାଟ୍। ଯଦି ଏପେଙ୍ଗ୍ ୱେଚ୍ନାଦେର୍, ପବିତ୍ର ଜିନିଷ୍ ନିକୁଡ଼ିଙ୍ଗ୍ ଆଗେ ତୁସିହିତି ଲେକେ, ଆରେ ପାଞ୍ଜିଙ୍ଗ୍ ମୁମ୍ଦ ମୁକ୍ତା ତୁସିହିତି ଲେକେ ଆନାତ୍। ଇନେସ୍କି ହେଦାଙ୍ଗ୍ତିଙ୍ଗ୍ ହେୱେକ୍ ତଗାୱିହା କିନିକ୍ ଆରେ ମିଙ୍ଗେଙ୍ଗ୍ କାପ୍ତେଦେଙ୍ଗ୍ ୱାନିକ୍।
ଏନାଟ୍, ଡେକାଟ୍ ଆରେ ଦୁୱେର୍ତ ଇହାଟ୍
(ଲୁକ. ୧୧:୯-୧୩)
7ମିଙ୍ଗେଙ୍ଗ୍ ଇମ୍ଣାକା ଦର୍କାର୍ ମାପୃତିଙ୍ଗ୍ ଏନାଟ୍, ଲାଗିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ହିଦ୍ନାନ୍। ଡେକାଟ୍ ମିଙ୍ଗେଙ୍ଗ୍ ଈଶ୍ୱର ଡେକ୍ଚି ହିଦ୍ନାନ୍। କାପାଟ୍ତାକେ ଇହାଟ୍ ଲାଗିଙ୍ଗ୍ ମି କାଜିଙ୍ଗ୍ ଈଶ୍ୱର ଦୁୱେର୍ ଜେସି ହିଦ୍ନାନ୍। 8ମାତର୍ ଇମ୍ଣାକାର୍ ଏନ୍ନାର୍, ହେୱାର୍ ୱିଜୁ ପାୟାଆନାର୍। ଇମ୍ଣାକାର୍ କାପାଟ୍ ଇସ୍ତି ମାନାର୍, ହେୱାର୍ କାଜିଙ୍ଗ୍ ଦୁୱେର୍ ଜେୟା ଆନାତ୍। 9ଯଦି ମି ବିତ୍ରେ ଇମ୍ଣି ଆବା ମାନାନ୍, ତା ହିମ୍ଣା ରୁଟି ଏନ୍ତିସ୍ ହେୱାନିଙ୍ଗ୍ କାଲ୍ ହିନାନ୍, 10ଆରେ ତା ହିମ୍ଣା ମିନ୍ ଏନ୍ତିସ୍, ହେୱାନିଙ୍ଗ୍ ରାଚ୍ ହିନାନ୍ କି? 11ଏପେଙ୍ଗ୍ ବାନ୍ଯା ମାନାୟ୍ ଆଜି ମାଚିସ୍ ପା ମି ହିମ୍ଣାକାଙ୍ଗ୍ ଇନେସ୍ ଲେଗ୍ଦି ହାର୍ଦି ଜିନିଷ୍ ହିଦେଙ୍ଗ୍ ପୁନାଦେର୍। ଲାଗିଙ୍ଗ୍ ସରଗ୍ତାକେ ମାନି ମି ଆବା ପୁନାନ୍ ଯେ ହେୱାନିଙ୍ଗ୍ ଏନ୍ନି ମାନାୟାରିଙ୍ଗ୍ ହେୱାନ୍ ହାର୍ଦି ଜିନିଷ୍ ହିନାନ୍।”
ଦରମ୍ ସାସ୍ତର୍ନି ମୁଡ଼୍ଦି କାତା
(ଲୁକ. ୧୩:୨୪)
12“ମାନାୟାର୍ ମି କାଜିଙ୍ଗ୍ ଇନାକାପା କିଦେର୍ ଇଞ୍ଜି ଇଚା କିନାଦେର୍, ଏପେଙ୍ଗ୍ ପା ହେୱାର୍ କାଜିଙ୍ଗ୍ ଇୱିଜୁ କିୟାଟ୍, ଇନେସ୍କି ଇଦାଙ୍ଗ୍ ନେ ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତା ତା ଦରମ୍ ସାସ୍ତର୍ନି ମୁଡ଼୍ଦି ବିଷୟ।
13ଏପେଙ୍ଗ୍ ସରଗ୍ ରାଜିତାକେ ହାଞ୍ଜେଙ୍ଗ୍ ଚିପା ଦୁୱେର୍ ନିପଣ୍ ଆଜି ହାଞ୍ଜେଙ୍ଗ୍ ଉପାୟ୍ କିୟାଟ୍। ଇନେସ୍କି ଅହାର୍ ହାଜି ଆରେ ସିଦା ହାଜି ନରକ୍ ନିପଣ୍ ହାନାତ୍। ବେସିହେନି ମାନାୟ୍ ହେ ହାଜ୍ଦିଙ୍ଗ୍ ହାନାର୍। 14ଆରେ ୱିଜ୍ୱି ଜିବୁନ୍ ଅନି ହାଜି ହିରୁ ଆରେ କଷ୍ଟ, ଆରେ ହେଦିଲିଙ୍ଗ୍ ଦାହ୍ନି ମାନାୟ୍ ଅଲପ୍।
ମାର୍ ଆରେ ତା ପାଡ଼୍
(ଲୁକ. ୬:୪୩-୪୪-୪୬; ୧୩:୨୫-୨୭)
15ମିଚ୍ୱା ଭବିଷ୍ଯତବକ୍ତାତାଙ୍ଗ୍ ସାବ୍ଦାନ୍ ଆଜି ମାନାଟ୍, ଇନେର୍କି ଦରମ୍ ମେଣ୍ଢାଲେକେ ଦରମ୍ଆଜି ୱାନାର୍। ମାତର୍ ହେୱାର୍ ହାତ୍ପା ହୁଣ୍ଡେର୍ ଲେକେ ନଷ୍ଟ କିଦ୍ନାର୍। 16ୱିଜାକାର୍ ତା କାମାୟ୍ ହୁଡ଼୍ଜି ହେୱାରିଙ୍ଗ୍ ଚିନ୍ କିନାର୍। ମାନାୟାର୍ ୱାଡ଼ି ମାର୍ତାଙ୍ଗ୍ ଅଙ୍ଗୁର୍ ପାଡ଼୍ କି ଗ୍ରଟା ମାର୍ତାଙ୍ଗ୍ ତଗାପାଡ଼୍ ଏଚ୍ନାର୍ କି? 17ହେଲେକେନେ ହାର୍ଦି ମାନାୟ୍ ହାର୍ଦି କାମାୟ୍ କିନାନ୍ ଆରେ ବାନ୍ୟା ମାନାୟ୍ ବାନ୍ୟା କାମାୟ୍ କିନାନ୍। ହେଲେକେ ମାନାୟ୍ ପା ହାର୍ଦି ମାର୍ ଲେକେ ଆନାକା ମାନାତ୍। 18ହାର୍ଦି ମାନାୟ୍ ବାନ୍ୟା କାମାୟ୍ କିଉନ୍ କି ବାନ୍ଯା ମାନାୟ୍ ହାର୍ଦି କାମାୟ୍ କିଉନ୍। ହେଲେକେନେ ବାନ୍ଯା ମାର୍ ବାନ୍ୟା ପାଡ଼୍ ଆହ୍ନାତ୍। 19ଇମ୍ଣି ମାର୍ ହାର୍ଦି ପାଡ଼୍ ଆହୁତ୍ ହେଦାଙ୍ଗ୍ତିଙ୍ଗ୍ କାଦ୍ଦି ନାଣିତାକେ ତୁହିୟା ଆନାତ୍, ହେଲେକେ ଇମ୍ଣାକାନ୍ ହାର୍ଦି ବେଣ୍ ଇନ୍ୱିତିସ୍ ହେୱାନିଙ୍ଗ୍ ଈଶ୍ୱର ନାଣିନି ନରକ୍ତାକେ ତୁସିହିନାନ୍। 20ମାତର୍ ୱିଜାକାର୍ ତା କାମାୟ୍ ହୁଡ଼୍ଜି ହେୱାରିଙ୍ଗ୍ ଚିନ୍ କିନାର୍।
ଆନେଙ୍ଗ୍ ମିଙ୍ଗେଙ୍ଗ୍ ପୁଞ୍ଜୁଙ୍ଗ୍
(ମାଥି. ୨୫:୧୨; ଯିଶା. ୨୯:୧୩)
21ନାଙ୍ଗେଙ୍ଗ୍ ମାପୃ, ମାପୃ ଇଞ୍ଜି କୁକ୍ତିନି ୱିଜୁ ମାନାୟାର୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁର୍। ଇମ୍ଣାକାନ୍ ସରଗ୍ତାକେ ମାନି ନା ଆବା ଇଚାତାଙ୍ଗ୍ କାମାୟ୍ କିନାନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡ୍ନାନ୍। 22ବିଚାର୍ ଦିନ୍ତ କେତ୍ଜାଣ୍ ନାଙ୍ଗେଙ୍ଗ୍ ୱେନ୍ବା ଆଦ୍ନାର୍, ‘ମାପୃ, ଆପେଙ୍ଗ୍ ଇନାକା ନି ତର୍ଦାଙ୍ଗ୍ ନି କାତା ୱେଚ୍ୱା ତାପ୍ନାକି? ଆରେ, ନି ତର୍ଦାଙ୍ଗ୍ ବୁତ୍ଆତ୍ମାକାଙ୍ଗ୍ ପିହିକିୱା ତାପ୍ନାକି? ଆରେ ନି ତର୍ଦାଙ୍ଗ୍ କେତେକ୍ ଚାନିଆ ଆନି କାମାୟ୍ କିୱାତାପ୍ନା କି?’ 23ହେପାଦ୍ନା ଆନେଙ୍ଗ୍ ହେୱାରିଙ୍ଗ୍ ହାର୍ଦାଙ୍ଗ୍ ୱେଚ୍ନାଙ୍ଗ୍, ଆନେଙ୍ଗ୍ ମିଙ୍ଗେଙ୍ଗ୍ ଇନାୱେଡ଼ାଙ୍ଗ୍ ପା ପୁଞ୍ଜୁଙ୍ଗ୍। ଏ ଅଦରମ୍ନି ମାନାୟାର୍ ନା ଲାଗାୟ୍ତାଙ୍ଗ୍ ଦେହାଆଡ।
ରିଣ୍ଡାଙ୍ଗ୍ ଇଲ୍ ରହ୍ନାକାର୍
(ଲୁକ. ୬:୪୭-୪୯)
24ଇମ୍ଣାକାନ୍ ନା ଲାଗାୟ୍ ୱାଜି ନା କାତା ୱେନାନ୍ ଆରେ ହେ କାତାତିଙ୍ଗ୍ ମାନି କିନାନ୍, ହେୱାନ୍ ରକାନ୍ କାଲ୍ଜପି କୁନାଦି କିଜି ଇଲ୍ ଗାଚ୍ନି ବୁଦିକାଟି ମାନାୟ୍ ଲେକେ। 25ହେୱାନ୍ କାଲ୍କୁ ଜପି କୁନାଦି କିଜି ହାର୍ଦାଙ୍ଗ୍ ଇଲ୍ ଗାଚ୍ଚି ମାନାୟ୍ତି, ଏଚେକାଡ଼୍ଦ ପା ବାର୍ହା ୱାତିସ୍, ଡ଼ୁଇଦୁକା ଆତିସ୍, ପୁର୍ ୱାଜି ହେ ଇଞ୍ଜିଙ୍ଗ୍ ଏଜୁଙ୍ଗ୍ ଡୁକା ଆତିସ୍ପା ହାର୍ଦାଙ୍ଗ୍ ଗାଚ୍ଚି ଇଲ୍ ବାଡ଼୍ହା ଆଉତ୍। 26ମାତର୍ ଇମ୍ଣାକାନ୍ ନା କାତାତିଙ୍ଗ୍ ୱେନ୍ଞ୍ଜି ହେ କାତାତିଙ୍ଗ୍ ମାନିକିଉନ୍, ହେୱାନ୍ କୁନାଦି କିୱାଦାଙ୍ଗ୍ ବାଲିଜପି ଇଲ୍ ଗାଚ୍ଚି ମାନାୟ୍ ର ବକୁୱା ମାନାୟ୍ ଲେକେ ଆନାନ୍। 27ଏଚେପାଦ୍ନା ଡ଼ୁଇ ବାର୍ହା ଆଜି ବାତ୍ୟା ଆତିସ୍ ହେ ବାଲିଜପି ଗାଚ୍ଚି ଇଲ୍ତିଙ୍ଗ୍ ହେପ୍କା ଇଡ଼୍ତିସ୍, ହେ ଇଲ୍ ଅଲପ୍ତିଙ୍ଗ୍ ୱିଜୁ ବାଡ଼୍ହା ଆନାତ୍।”
ଯୀଶୁତି ଆଦିକାର୍
(ମାଥି. ୧୩:୫୪; ୨୨:୩୩; ଲୁକ. ୪:୨୨-୩୨; ମାର୍କ. ୬:୨)
28ଯୀଶୁ ଇ ୱିଜୁବେଣ୍ ୱେଚ୍ଚି ୱିସ୍ତି ପାଚେ, ହେବେ ରୁଣ୍ଡାଆତି ମାନାୟାର୍ ତା ହିକ୍ଷା ୱେନ୍ଞ୍ଜି କାବା ଆତାର୍, 29ଇନେସ୍କି ହେୱାନ୍ ଯିହୁଦି ଦରମ୍ନି ପଣ୍ଡିତ୍ଲେକେ ହିକ୍ଷା ହିୱାଦାଙ୍ଗ୍ ଆଦିକାର୍ ପାୟାଆତି ମାନାୟ୍ ଲେକେ ହେୱାରିଙ୍ଗ୍ ହିକ୍ଷାହିଜି ମାଚାନ୍।
Valgt i Øjeblikket:
ମାଥିଉ 7: PEGNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
