Luka 23

Bʉsa nʉ Yeso apɛɛ ʉ Pilato

(Mat 27:1-2,11-14; Mak 15:1-5; Yʉa 18:28-38)

1Mbise ngiinanɨ, ɓombi ngiɓa ɓa꞉junikio kʉ ɓuɓomu ɓambʉʉngwa ɨkʉʉ, ɓambʉsa nʉ Yeso apɛɛ ʉ Pilato. 2Tiga nani, ɓambufaniso nayɔ kʉnapɨa nʉ 'ʉkɔmbɔ kusigo ɓɔ: « Mombi ngia kʉ꞉mʉgbʉka inyeni kubunzo ɓombi ngiɓʉndɛsʉ 'ʉtʉ. I꞉nye naɓɔ kusigio ɓɔ ɓɔɔlipakɔmʉ manzanza kʉ ngama ɔɔ ʉja wʉ Ɓalɔma. Nʉ ɓata, akusigo gʉ ɛyɔ a Klisito#23:2 Yɛmɔ ɓɔ: Masɨa. ngia a ngama ɔɔ 'ʉja. »

3Pilato ambumuɓukuo ɓɔ: « Ajʉ wa ngama ʉ Ɓayuda ɓiɛ? » Yeso ambumutisio ɓɔ: « Wusigo sigoo. » 4Pilato ambusigio ɓangama ɓʉ ɓakumu‑kumu nʉ ungbutu wʉ ɓombi ɓɔ: « Ɛmɛ mʉnakɔmʉ ɨngbaa yɨ moni gʉkʉ mɨngana iya yɨkwanana‑ɔɔ kʉnapɨa mombi ngia nʉ 'ʉkɔmbɔ. » 5Ɨkyɛmɨngana, ɛɓɔ kʉ ɓuɓomu ɓa꞉gbʉngana ɓʉmʉ kusigo ɓɔ: « Akutitio ɓombi ɓɔ ɓuɓundo mapanʉ kʉ ɨkʉmbʉ nʉ panɨa ngiangɔ. A꞉faniso tʉkʉ anʉ Galilaya, ambukumunio amati ʉ Yudɛa kʉ 'uɓomu, kʉɓʉya tiga andɛsʉ aka. »

Yeso apɛɛ ʉ Ɛlɔdɛ

6Iya Pilato a꞉kɔ nayɔ moni ngikʉnanɨ, kija a꞉ɓukuo ɓɔ: « Ajʉ mombi ngia a 'Ugalilaya ɓiɛ? » 7Iya ambɨa ɓɔ Yeso a mombi ngia ʉʉngwa akʉ gɨpa ngia Ɛlɔdɛ a‑ɔɔ ngama, ambʉtʉma Yeso ɔɔ Ɛlɔdɛ, jʉ amati ʉ makwaa ngikʉnanɨ Ɛlɔdɛ i꞉nye kʉ anʉ Yelusalɛma. 8Iya Ɛlɔdɛ a꞉na Yeso, ambʉkwa ɨgyagya nadɨndɨ, jʉ amati ʉ makwaa maja, i꞉nye kyɨa kʉkʉnda kʉna Yeso ekoo ʉ moni ngika i꞉nye kʉkyɨa engo. Nʉ i꞉nye kʉnapɨa itungwio kʉna kɔkɔ ɔɔ mbangɛ mʉngana Yeso ʉkyɨeni. 9Ambʉmʉkpɨngba kʉ tine tine, ɨkyɛmɨngana chʉkɔmʉ Yeso ambumutisio ɨngbaa yɨ moni gʉkʉ mɨngana. 10Ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓi꞉nye kʉ ɓuɓomu nanɨ, ɓambʉnapɨa Yeso nʉ mɨkɔmbɔ yɛɛ ɓʉka‑ɓʉkaɨ nadɨndɨ. 11Ɔɔ Ɛlɔdɛ, ɨzɔ nʉ ɓasʉda ngiɓangɔ ɓambufaniso nayɔ nʉa, nayɔ kʉna tʉkʉ ndʉ ɨkyɛmɛ ɨsʉkʉɓwanɨ. Kija ɓamupinyiso ɨpʉkʉ yɛɛ iɗo yɨ ɨgabʉ, ɓambumutuiso kʉ mbise ɔɔ Pilato 12Ʉna ti‑zʉ ɔɔ Pilato nʉ Ɛlɔdɛ ɓi꞉nye pɛɛ ɓʉyaaneni ɓʉkaɨ, ɨkyɛmɨngana isiinanɨ ɓa꞉ka tʉkʉ ɓadii.

Ɓʉtɨna 'ʉkɔmbɔ ɓɔ Yeso uwu woni

(Mat 27:15-26; Mak 15:6-15; Yʉa 8:39—19:16)

13Tiga nanɨ, Pilato ambʉmʉma ɓangama ɓʉ ɓakumu‑kumu, nʉ ɓangama ɓʉ ɨkʉmbʉ ɨzɔ nʉ ɓombi kʉ ɓuɓomu. 14Kija a꞉ɓusigio ɓɔ: « Nʉnɨkɨa nʉ mombi ngia kusigo ɓɔ akubunzo ɓombi 'ʉtʉ. Mu꞉muɓukuo tʉkʉ apɛɛ ʉndɛnʉ aka, ɨkyɛmɨngana ɛmɛ mʉ꞉mʉnakɔmʉ nɨngbaa yɨ moni yɛɛ ɓɨɓɨ gʉkʉ mɨngana ndʉ mɨkɔmbɔ ngia nʉmʉnapiikio akɛ. 15Abana tʉkʉ Ɛlɔdɛ ʉ꞉mʉnakɔmʉ nɨngbaa yɨ moni ngia yakwanana nayɔ kʉnapɨa nʉ 'ʉkɔmbɔ kʉ ɓwanɨ. Tiga kʉ ɓwanɨ, u꞉mutuiso kʉ mbise ya akʉ isu ka‑ɛɛ. Ʉna ti‑zʉ, mombi ngia ʉ꞉kyɨakɔmʉ ɨkyɛmɛ gʉkʉ mɨngana ngia yɨkwanana nʉ ingyo. 16Ndʉ ya tʉ ɓwanɨ, ma꞊titio ɓɔ ɓʉmʉɓɛnda tʉkʉ fimbo, mbise ɔngɔ mambumuɓono. » [ 17Akʉ wati wʉ ʉmbɔ wʉ Pasɨka kʉ uɓomu, Pilato i꞉nye ɓuɓunio mombi ʉ boloko mʉngana.]

18Kija ungbutu wʉ ɓombi wa꞉gbʉngana kusigo ɓɔ: « Wá mombi ngiinanɨ! Wambutiɓunio Balaba! » 19(Ɓi꞉nye ɓugiseni Balaba akʉ ɨkáa yɨ boloko jʉ a꞉bunzo ɓombi 'ʉtʉ akʉ gʉlʉ, ambʉwa kʉ nʉ mombi.) 20Ndʉ Pilato i꞉nye yangɔ tʉkʉ kʉkʉnda ɓono Yeso, ambuɓusigio ɓata tʉkʉ moni ngikʉnanɨ. 21Ɨkyɛmɨngana, ɓi꞉nye tʉkʉ kʉtʉɓɨa ɓɔ: « Ɓʉmʉɓakaka ekoo ʉ mʉsalaba! Ɓʉmʉɓakaka ekoo ʉ mʉsalaba! » 22Tiga akʉ nɨsɨ kaatʉ ɔngɔ, Pilato ambuɓuɓukuo ɓɔ: « Ɓʉɓɨɓɨ tɨmanɨ iɓa mombi ngia ʉkyɨa‑wʉ? Mʉ꞉mʉnakɔmʉ ɛmɛ nɨngbaa yɨ moni yɛɛ ɓɨɓɨ gʉkʉ mɨngana iya ʉkwanana‑ɔɔ nʉ ingyo. Ma꞊titio ɓɔ ɓʉmʉɓɛnda tʉkʉ fimbo, mbise ɔngɔ mambumuɓono. »

23Ɨkyɛmɨngana, ɛɓɔ ɓambʉtʉɓɨa tiga ɓʉmʉ nadɨndɨ, kʉkpakpa kʉta tʉkʉ ɓɔ ɓʉɓakaka Yeso ekoo ʉ mʉsalaba. Gbongbo ʉja ngiinanɨ ɓi꞉nye kʉkyɨa ambupipo Pilato angu. 24Tiga nanɨ, Pilato ambumaiso ɓɔ abaya tii tʉkʉ moni ngika ɛɓɔ ɓi꞉nye kʉta engo. 25Ambuɓono gwa ngia ɓi꞉nye nayɔ kʉta, iya ɓi꞉nye ɓʉmʉngeni akʉ ɨkáa yɨ boloko jʉ a꞉bunzo ɓombi 'ʉtʉ, nʉ i꞉nye ʉweni kʉ nʉ mombi. Ambuɓunzo Yeso ɓɔ ɓʉkyɨa nayɔ ndʉ akʉ 'ʉtʉma wʉndaɓʉ wi꞉nye‑ɔɔ kʉkʉnda.

Ɓombi ɓʉdyɨa Yeso ikoko

(Mat 27:32-44; Mak 15:21-32; Yʉa 19:17-27)

26Ati ngia ɓasʉda ɓi꞉nye tiga‑ɔɔ kʉsa nʉ Yeso, ɓambujono nʉ ɔɔ Simoni, 'Ʉkulɛnɛ, iya i꞉nye ʉʉngweni andei kʉtʉa akʉ gʉlʉ. Kija ɓa꞉mʉfa, ɓambumufuɓiso mʉsalaba, ambufaniso kpata nawɔ Yeso.

27Ungbutu wʉ ɓombi wɔɔ ʉja nʉ ɓoi kʉtaa ɓi꞉nye naɓɔ kʉkpata. Ɓoi ɓi꞉nye tii tʉkʉ amati ʉ ndɨa nʉ nayɔ kʉdyɨa ikoko. 28Yeso ambʉnɨtana mesu akʉ ɓoi ɓi꞉nye‑ɛɛ, ambuɓusigio ɓɔ: « Inu ɓoi ɓʉ Yelusalɛma, nɔɔnandɨakɔmʉ ɛmɛ, ɨkyɛmɨngana ndɨaneni tʉkʉ inu ɓakʉɓɔngɔ nʉ ɓana ɓʉndɛnʉ. 29Jʉ akʉ makwaa ngika kakʉka ɓombi ɓa꞊ɓusigo sinani ɓɔ: ‹ Ya ɨgyagya nʉ ɓoi ngiɓa ɓa lisude lɔngɔ, nʉ iɓa ɓa꞉nʉtakɔmʉ, nʉ ɓa꞉mwisokɔmʉ ɓana maɓɛɛ! › 30Ati ngiinanɨ, ɓombi ɓaɓio sina kusigio lɨkpangba ngila lɔɔ lɨkpɔkpɔ ɓɔ: ‹ Kweni ekoo ʉndɛsʉ! › Nʉ kusigio ila lɔɔ ɗɛ ɗɛ ɗɛ ɓɔ: ‹ Tɨnayeni nayaa! ›#Popoko Ɔsɛ 10:8 31Jʉ ɓʉkyɨeni pɛpɛ‑zʉ ɓʉtɨ ɓɔɔ ɓʉɓɨsɨnɨ ɓwanɨ, yaɓio tiga tanɨ akʉ ʉnzakaka? »#23:31 Ɓʉkyananakeni pɛpɛ‑zʉ Yeso ɓwanɨ yaɓio tiga tanɨ akʉ ɓakpataka.

32Ɓi꞉nye tiga kʉsa kʉwa ɓombi nga ɓɔmɔ ɓapɨnɨ ɓɔɔ ɓʉkyananakɛ ɓɨɓɨ ɨzɔ nʉ‑ɔɔ Yeso.

Ɓʉɓakaka Yeso ekoo ʉ mʉsalaba

33Iya ɓa꞉ɓʉya tiga akʉ mʉa ngua ɓausoko ɓɔ: « Ikpoko‑kpoko yɨ 'Ʉtʉ, » ɓasʉda ɓambʉɓakaka Yeso ekoo ʉ mʉsalaba akʉ mʉa nguʉnanɨ, ɨzɔ nʉ ɓombi ɓɔɔ ɓɨɓɨ ɓapɨnɨ ngiɓʉnanɨ. Mʉngana i꞉nye nʉ ɨkɔndɔ yɨ guɔngɔ, iya wɔmɔ nʉ ɨkɔndɔ yɨ moiɔngɔ. 34Kija Yeso a꞉sigo aka ɓɔ: « Tidoo, ɓʉpɨa pɨaa, jʉ ɓambʉkɔmʉ kʉmbɨa moni ngika ɓakʉkyɨa engo. » Kija ɓasʉda ɓa꞉ɨpakana lɨpʉkʉ ngilangɔ, nalɔ kʉya akʉ gbanda.#23:34 'Ʉkpanganɨa wʉ 'ʉngbɛ nguakɛ wambʉkɔmʉ amati ʉ mubio nga kɔmɔ. 35Ɓombi ɓi꞉nye ɓʉmaɨ ɓʉ guaa kʉna moni ngikʉnanɨ. Abana kʉndʉ ɓangama ɓʉ Ɓayuda, ɓa꞉faniso tiga kʉ kʉnʉa Yeso kusigo ɓɔ: « Ɛɛ, aakyɨa kuhiiso ɓombi nga ɓɔmɔ, ʉhɨana tiga‑zʉ kʉ ɛyɔ makʉɔngɔ ndʉ aɓio Masɨa ngia Asʉɓɨɨ a꞉mʉchwa! » 36Abana kʉndʉ ɓasʉda, ɓa꞉faniso kʉ kʉnʉa Yeso, ɓambʉka kʉ tinene nayɔ, ɓambumunzo vinyo ɔɔ kɔɨ. 37Ɓambumusigio ɓɔ: « Ndʉ waɓio ngama ɔɔ 'ʉja ʉ Ɓayuda, hɨana‑zʉ kʉ ɔwɛ makʉɔngɔ! » 38Mubio ki꞉nye mʉtɨndakɨɛ ekoo ʉ ɨkyɛmɛ mɨngana nɨkʉʉ akʉ 'ʉtʉ wangɔ ɓɔ: « Mombi ngiakɛ a Ngama ʉ Ɓayuda. »

39Mombi mʉngana ati ʉ ɓombi ɓɔɔ ɓɨɓɨ ngiɓa ɓi꞉nye ɓʉɓakakɛ ekoo ʉ mʉsalaba a꞉mʉzɨaka kusigo ɓɔ: « Chʉkɔmʉ‑zʉ ɔwɛ Masɨa iyakɛ ɓiɛ? Hɨana‑zʉ kʉ ɔwɛ makʉɔngɔ, wambutihiiso isu kʉ hiisoo! » 40Ɨkyɛmɨngana, gwa ngia kɔmɔ ambʉmʉgʉmʉa kusigo ɓɔ: « Ajʉ wambakakumo Asʉɓɨɨ ɓiɛ? Ɔwɛ wakʉdya ʉkʉa wʉ 'ʉkɔmbɔ mungono ngbanga kʉ nayɔ? 41Ʉna tɔ, akʉ isu ya ngbingbii, jʉ kakʉdya ɓʉka‑ɓʉkaɨ ngiɓa ɓʉkwanana nʉ ɨkyananakɨa yɛɛ ɓɨɓɨ ngiindɛsʉ. Ɨkyɛmɨngana, ɛyɔ ʉkyɨakɔmʉ ɨkyɛmɛ yɛɛ ɓɨɓɨ gʉkʉ mɨngana. » 42Kija a꞉musigio ɓɔ: « Yeso, wɔɔnapaa ati ngia wa꞊ka‑ɔɔ amati ʉ ɓʉngama ngiɓʉsɔɔ. » 43Kija Yeso a꞉mutisio ɓɔ: « Tʉkʉ kingono, manɔwɛ kusigio ɓɔ ɓʉɓʉnɨ kaɓio ɨzɔ nɔwɛ anʉ Paladiso. »#23:43 Yɛmɔ ɓɔ: Apɛɛ ʉ Asʉɓɨɨ.

Yeso ʉtɨnɨa 'ʉtʉma

(Mat 27:45-56; Mak 15:33-41; Yʉa 19:28-30)

44Tiga nusoti, ɨpá yambuimunio, umomo wambukuto ɨkʉmbʉ kʉ iɓomu ɓʉ ɗipa, kʉɓʉya tʉkʉ saa wʉ nʉɓɔkwɔngɔ mbise wʉ 'usoti.#23:44,45 Amati ʉ ɨkáa yɨ Asʉɓɨɨ, ɓa꞉nzinzo ɨpʉkʉ kʉnahʉa Mʉa wɔɔ Tu nʉ Mʉa wɔɔ Tu Nadɨndɨ. 45Wagba wʉ ɨpʉkʉ wɔɔ bamu ngua wi꞉nye unzinze amati ʉ ɨkáa yɨ Asʉɓɨɨ wa꞉natʉana akati magba kapɨnɨ ɓʉ hua. 46Kija Yeso a꞉natɨa nʉ iyo yɛɛ ɓʉmʉ ɓɔ: « Tidoo, mʉ꞉napɨa 'ʉtʉma nguʉsɛmɛ akʉ lɨkɔndɔ lʉsɔɔ. » Mbise ʉ sigo moni ngikʉnanɨ, kija a꞉tɨnɨa 'ʉtʉma. 47Iya ngama ʉ ɓasʉda a꞉na moni ngikʉnanɨ ka꞉kyɨanɨa, ambubibiso Asʉɓɨɨ kusigo ɓɔ: « Kingono mombi ngia i꞉nye bɛ tʉkʉ mombi ɔɔ ngbingbii. » 48Kija ungbutu wʉ ɓombi ngiɓa ɓa꞉ka kʉmaa akʉ ɨdɔdɔ yɨ moni ngikʉnanɨ, ɓa꞉na moni ngika ka꞉kyɨanɨa nʉ mesu. Tiga nanɨ, ɓambʉtʉa andei ɓuhueni nʉ ikoko yɛɛ ɨja. 49Ɓadii ɓʉ Yeso kʉ ɓuɓomu, ɨzɔ nʉ ɓoi ngiɓa ɓa꞉ka nayɔ kʉnapɨa kʉʉngwa tʉkʉ anʉ Galilaya, ɓi꞉nye ɓʉmaɨ tʉkʉ ɓʉ kɛlɛ, kʉna moni ngikʉnanɨ.

Napɨa Yeso amati ʉ ɓʉnzaʉ

(Mat 27:57-61; Mak 15:42-47; Yʉa 19:38-42)

50,51Mombi mʉngana ino ɓɔ Yɨjɛfʉ, i꞉nye ʉ꞉ʉngweni anʉ Alɨmatɛa, ɨkʉmbʉ yɨ gɨpa ʉ Ɓayuda. Mombi ngiinanɨ i꞉nye ngbingbii nʉ mombi ɔɔ iɗo. I꞉nye kyɨa kusiɓo wati ngua Ɓʉngama ɓʉ Asʉɓɨɨ ɓaka‑ɔɔ. I꞉nye kyɨa kʉ mʉngana ʉ ɓombi ɓʉ Ubua ngua wʉ ɓakumu‑kumu. Ɨkyɛmɨngana, ɛyɔ a꞉bayakɔmʉ moni ngika ɓangɛ ɓi꞉nye ɓumaiseni nʉ ika ɓa꞉kyɨa. 52Kija a꞉sa kʉgbʉka Pilato, ambʉmʉta ndʉtʉ yɨ Yeso. 53Iya a꞉ijiso ndʉtʉ ekoo ʉ mʉsalaba, ambuipokoɓo nʉ malikana. Ambʉʉnapɨa amati ʉ ɓʉnzaʉ ngiɓa ɓa꞉ɓʉchwa amati ʉ ikopi, akʉ ɓi꞉nye ɓambusingenikɔmʉ‑ɛɛ mombi nga kɔmɔ. 54Yi꞉nye nɨpasɨ yɨ ɓisi ɓʉ tambanakɨa ɓisi ɓʉ humuo.#23:54 Ɓisi ɓʉ humuo ɓi꞉nye faniso nɨpasɨ.

55Ɓoi ngiɓa ɓi꞉nye ɓʉkeni kʉnapɨa Yeso kʉʉngwa anʉ Galilaya, ɓa꞉ka ɨzɔ nʉ ɔɔ Yɨjɛfʉ, ɓambʉna ɓʉnzaʉ. Kija ɓa꞉na tʉkʉ ɓɔ ndʉtʉ yɨ Yeso yɛɛ ɨkwaise tanɨ. 56Mbise ngiinanɨ, ɓambʉtʉa andaɓʉ andei, ɓambʉtambanaka ɓana ɓʉ lɨgbɛɛ lɔɔ limve tɨpɨ#23:56 Ɓana ɓʉ lɨgbɛɛ ngiɓʉnanɨ ɓi꞉nye tindikio nalɔ mʉnda ambʉ wɔɔtambɨakɔmʉ gagaa. nʉ malazi ngia ɓi꞉nye ɗɨana nʉ ndʉtʉ. Tiga akʉ ɓisi ɓʉ humuo, ɓambikinye kyɨa kuu ngbanga ngbanga ndʉ akʉ mapanʉ kʉ Mʉsa ka꞉sigo‑ɔɔ.

Valgt i Øjeblikket:

Luka 23: BudKoya

Markering

Del

Kopiér