Luka 18
18
Yɨkwanana kʉta ati kʉ 'uɓomu
1Kija Yeso a꞉ɓunzo isisinio mɨngana, naɓɔ kʉpanɨa ɓɔ yɨkwanana kʉta Asʉɓɨɨ ati kʉ 'uɓomu chʉkɔmʉ nʉ ndokono. 2« Akʉ ɨkʉmbʉ mɨngana ɓɔmʉ, juji mʉngana i꞉nye nani, iya ambikinye kumo Asʉɓɨɨ, abana kʉndʉ mombi. 3Woko mʉngana i꞉nye kʉ akʉ gʉlʉ ngiinanɨ, i꞉nye kyɨa kʉka nayɔ kusigio ɓɔ: ‹ Tɨna ɓaka‑zʉ 'ʉkɔmbɔ nguʉndɛsʉ nʉ mombi ngia wambʉnaɓɨnyɨa tʉkʉ ɛmɛ. › 4Amati ʉ makwaa maja, juji ngiinanɨ ambikinye kʉnda kʉtɨna 'ʉkɔmbɔ nguʉnanɨ. Ɨkyɛmɨngana, mbise ɔngɔ, ambufaniso kʉyakanaka ɛyɔ kʉ nangana ɓɔ: ‹ Abana ndʉ mambakakumo Asʉɓɨɨ, gʉkʉ mombi kititi. 5Ndu woko ngia anɛmɛ kundukuniso ɓɔmʉ, ma꞊tɨna ɓʉnɨ‑zʉ 'ʉkɔmbɔ nguangɔ tʉkʉ tɨnaa nayɔ kʉɓɨnyɨa, ambʉ ɔɔɓʉka‑sa ɓata‑zʉ nɛmɛ kundukuniso. › »
6Makʉʉɓɨɨ ambusigo ɓata ɓɔ: « Keni moni ngika juji ɔɔ ɓɨɓɨ ngiinanɨ a꞉sigo kɔnɨ. 7Ndʉ juji ɔɔ ɓɨɓɨ ngiinanɨ aɓio ʉkyɨeni‑zʉ ɓwanɨ, ajʉ Asʉɓɨɨ ambʉkʉtɨna 'ʉkɔmbɔ wʉ ɓombi ngiɓa ɛyɔ a꞉ɓʉchwa tiga uɗo nadɨndɨ ɓiɛ? Ajʉ a꞊sɨa wati kʉɓaa ʉta ambʉsalɨenikɔmʉ ɓombi ngiɓa ɓaamʉndɨanɨa nuɓutu kʉndʉ nusoti sɨanɨ ɓiɛ? 8Maninu kʉɓɨa ɓɔ a꞊ɓʉɓɨnyɨa 'ʉkɔmbɔ nguʉndaɓʉ tʉkʉ gagaa. Ɨkyɛmɨngana, ati ngia ɛmɛ Mwana ngia ʉ Mombi ma꞊ka‑ɔɔ, ajʉ ma꞊gbʉka ɓombi ngiɓa ɓanʉ baya ya akʉ ɨtaka kʉ gbʉkanɨ ɓiɛ? »
Mɨgbʉ yɨ nɨta ɓepini
9Yeso ambunzo isisinio mɨngana ekoo ʉ ɓombi ngiɓa ɓi꞉nye nana ndʉ ɓa ɓombi ɓɔɔ ngbingbii apɛɛ ʉ Asʉɓɨɨ, ɓi꞉nye na ɓangɛ tʉkʉ ɨsʉkʉɓwanɨ. 10A꞉sigo ɓɔ: « Ɓombi ɓapɨnɨ ɓa꞉sa kʉta akʉ ɨkáa yɨ Asʉɓɨɨ. Mʉngana i꞉nye 'Ufalisayɔ, iya wɔmɔ ndɔmbɛ ɔɔ lipise manzanza. 11Iya 'Ufalisayɔ wɔngɔ a꞉maa apɛɛ ɓʉ gba, ambufaniso kʉta amati 'ʉtʉma nguangɔ ɓɔ: ‹ Oyi Asʉɓɨɨ, manɔwɛ kutuisio ɨbɨba jʉ mambʉkɔmʉ ndʉ ɓombi nga ɓɔmɔ: iɓa ɓa ɓombi ɓʉ ndiɓo, ɓombi ɓɔɔ ɓɨɓɨ, ɓombi ɓʉ ɨndambʉ, chʉkɔmʉ ndʉ ndɔmbɛ ɔɔ lipise manzanza ngia kʉ ɓwanɨ. 12Amati ʉ bɛlɛsɛ mʉngana, maatáa idyo akʉ wati nɨsɨ kapɨnɨ. Kumbo ngia maanyɨa nayɔ kʉ 'uɓomu, maanzo mungono ʉ kumi ɔngɔ. › 13Ɨkyɛmɨngana, ndɔmbɛ ɔɔ lipise manzanza pɛpɛ, i꞉nye yangɔ ɓʉmaɨ tʉkʉ numbise ɓʉ kɛlɛ, chʉkɔmʉ ambukanyo gʉkʉ kuzono waja nɨkʉʉ, ambʉnamatana nʉ ikoko i꞉nye kʉta ɓɔ: ‹ Asʉɓɨɨ, nanɨa tʉkʉ ikoko, ɛmɛ mombi ʉ ɓʉɓɨɓɨ. › » 14Kija Yeso a꞉sa kupipio kusigo ɓɔ: « Maninu kusigio ɓɔ ndɔmbɛ ɔɔ lipise manzanza ngiinanɨ a꞉tʉa andɔngɔ Asʉɓɨɨ ʉmʉbayeni bayanɨ ɓɔ a mombi ɔɔ ngbingbii, chʉkɔmʉ 'Ufalisayɔ. Jʉ mombi ngia aapanana akʉ mesu kʉ ɓombi, Asʉɓɨɨ a꞊mijiso tiga nɨsɨ, nʉ mombi ngia aajisiniso nɨsɨ, Asʉɓɨɨ a꞊muzono tiga nɨkʉʉ. »
Yeso umbuiso ɓana ɓɔɔ ɗɛ ɗɛ ɗɛ
(Mat 19:13-15; Mak 10:13-16)
15Tiga ɓombi ɓi꞉nye kʉka nʉ ɓana, nʉ iɓa ɓɔɔ kpala kpala kʉtaa, apɛɛ ʉ Yeso ɓɔ ʉnapɨa lɨkɔndɔ ekoo ʉndaɓʉ. Iya ɓakpataka ɓa꞉na ɓwanɨ, ɓambufaniso naɓɔ kʉngbaakɨa. 16Ɨkyɛmɨngana, Yeso a꞉soko ɓana ngiɓʉnanɨ ambusigio ɓakpataka ɓɔ: « Sieni ɓana ɓɔɔ ɗɛ ɗɛ ɗɛ kʉka ya andɛmɛ, nɔɔɓunangyokɔmʉ, jʉ Ɓʉngama ɓʉ Asʉɓɨɨ ɓa aka ekoo ʉ ɓombi ngiɓa ɓa ngbanga ndʉ ɛɓɔ. 17Maninu kusigio tʉkʉ kingono ɓɔ, mombi ngia ambʉkʉjananɨa Ɓʉngama ɓʉ Asʉɓɨɨ ngbanga ndʉ mwana ɔɔ ɗɛkɛkɛ, ambʉkʉkwanana kukumunio amati ɔngɔ gʉkʉ ɗɛkɛkɛ. »
Mombi ʉ lɨkyɛmɛ
(Mat 19:16-29; Mak 10:17-30)
18Ngama ʉ Ɓayuda mʉngana a꞉ɓukuo Yeso ɓɔ: « Mʉpananakɨa wɔɔ uɗo, mʉkwanana kʉkyɨa tanɨ kʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá? »
19Yeso ambumutisio ɓɔ: « Wʉnasoko ɓɔ mombi ɔɔ uɗo jʉtanɨ? Mombi ɔɔ 'uɗo ambʉkɔmʉ gʉkʉ mʉngana, tʉkʉ Asʉɓɨɨ kʉ nangana a 'uɗo. 20Nakʉmbɨa mapanʉ ngika kʉtaa ɓɔ: Wɔɔkyɨakɔmʉ ɨndambʉ, wɔɔwakɔmʉ mombi, wɔɔɓokɔmʉ, wɔɔɓʉakɔmʉ ɓʉtɛmʉ ɓʉ yakanaka, nʉ kumo ɔɔ atɔ nʉ anʉ. »
21Kija ngama ngiinanɨ a꞉tisio Yeso ɓɔ: « Ma꞉faniso kyananakɨa mapanʉ ngikʉnanɨ kʉ muɓomu kʉʉngwa tʉkʉ ɨɓwana ngiisɛmɛ. »
22Iya Yeso a꞉kɔ moni ngikʉnanɨ, ambumusigio ɓɔ: « Yinatukio ɨngbaa yɨ moni mɨngana. Sa kʉgaba kumbo ngiasɔɔ kʉ 'uɓomu, falanga ɔngɔ wambʉɨpakɨa ɓombi ɓʉ ɓanangyɨa. Kʉ ɓwanɨ, wa꞊nyɨa tiga nʉ ɨjangɨa yɛɛ ɨja ekoo ʉ ɓisi. Mbise ɔngɔ, wambʉnakpata! » 23Iya gue ngiinanɨ a꞉kɔ ɓwanɨ, kija a꞉dya ikoko nadɨndɨ! Jʉ i꞉nye nʉ lɨkyɛmɛ lɨja nadɨndɨ.
24Iya Yeso a꞉na ɓɔ gue ngiinanɨ ʉdya ikoko ɓwanɨ, ambusigo ɓɔ: « Ya ɓʉkaɨ ɓombi ɓʉ lɨkyɛmɛ kukumunio akʉ Ɓʉngama ɓʉ Asʉɓɨɨ. 25Kʉndʉ ya ɓʉkaɨ akʉ nama ɔɔ 'ʉja ngia ɓaamusoko ɓɔ ngamia kukumunio akʉ ihoo yɨ ɗipio, ya ɓata kʉ ɓʉkaɨ mombi ʉ lɨkyɛmɛ kukumunio akʉ Ɓʉngama ɓʉ Asʉɓɨɨ. »
26Kija ɓombi ngiɓa ɓi꞉nye kʉkɔ moni ngikʉnanɨ ɓa꞉ɓokono ɓɔ: « Ndʉ yaɓio tɔ ɓwanɨ, anɨ tiga a꞊nyɨa nʉ ɓʉhɨa? »
27Kija Yeso a꞉ɓutisio ɓɔ: « Moni ngika ka ɓʉkaɨ akʉ ɓombi, kambʉkɔmʉ ɓʉkaɨ akʉ Asʉɓɨɨ. »
28Pɛtɛlɔ ambusigo ɓɔ: « Andʉ tiga isu ɓombi ngiɓa ka꞉sɨa kumbo ngiʉndɛsʉ, nɔwɛ kʉkpata ɔwɛ? »
29Yeso ambuɓusigio ɓɔ: « Tʉkʉ kingono, maninu kusigio ɓɔ ndʉ mombi asɨa ɨkáa ngiangɔ, yɛmɔ moi angɔ, yɛmɔ ɓamanye, yɛmɔ ɨsɛ nʉ inye, yɛmɔ ɓana ɓangɔ aka ekoo ʉ Ɓʉngama ɓʉ Asʉɓɨɨ, 30a꞊nyɨa nʉ kumbo 'ʉja nadɨndɨ akʉ ʉɓɨɨ ngua wʉ ɓʉɓʉnɨ, nʉ tiga ɓisi ongo mbise, a꞊nyɨa nʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá. »
Yeso akʉyaka moni ekoo ʉ ikoko ngia a꞊ɓaa amati ɔngɔ
(Mat 20:17-19; Mak 10:32-34)
31Yeso ambʉchɨka ɓatitima ngiɓangɔ kumi nʉ ɓapɨnɨ kʉka naɓɔ anambamba angɔ, kija a꞉ɓusigio ɓɔ: « Ʉkeni, kɨnda ngiindɛsʉ yɨ Yelusalɛma iya. Moni kʉ muɓomu ngika lɨgbɛ lʉ Asʉɓɨɨ la꞉tɨndakɨa ekoo asɛmɛ Mwana ngia ʉ Mombi, kakʉsa kʉkyananakɨa. 32Jʉ ɓa꞊nanzo akʉ lɨkɔndɔ lʉ ɓombi ngiɓa ɓambʉkɔmʉ Ɓayuda. Ɛɓɔ ɓa꞊nanʉa, ɓa꞊mbʉnazɨaka, ɓambʉnatokoko nʉ mukoi. 33Ɓa꞊naɓɨnda fimbo, kija ɓa꞊nawa. Ɨkyɛmɨngana, mbise ʉ makwaa kaatʉ mambʉjʉkana akʉ ingyo. »
34Ɨkyɛmɨngana, ɓatitima ɓa꞉pimisokɔmʉ moni ngikʉnanɨ gʉkʉ ɗɛkɛkɛ, jʉ ki꞉nye naɓɔ mʉɓatanɨɛ. Ɓambikinye kʉmbɨa inyi yɛngɔ.
Yeso uhiiso mombi ngia ambikinye na
(Mat 20:29-34; Mak 10:46-52)
35Ati ngia Yeso i꞉nye‑ɔɔ kʉhʉyakɨa Yeliko, mombi mʉngana iya ambikinye na i꞉nye ɓuwei anambamba ʉ ɨngbaa kʉtakanaka. 36Iya a꞉kɔ ɓombi kʉɓaa, ambuɓukuo ɓɔ: « Ya tanɨ? »
37Ɓambʉmʉɓɨa ɓɔ: « Yeso ʉ Najalɛtɛ iinanɨ akʉɓaa. ».
38Kija a꞉tʉɓɨa ɓɔ: « Yeso, mwana ʉ mwana ʉ Daudi, nanɨa ɓaka ikoko! »
39Ɓombi ngiɓa ɓi꞉nye 'ʉtʉ pɛɛ ati ʉ ungbutu wʉ ɓombi nguʉnanɨ, ɓambufaniso nayɔ kʉngbaakɨa nʉ gbʉma ɓɔ: « Kata! Kata! » Ɨkyɛmɨngana, ambʉnatɨa ɓata tiga ɓʉmʉ nadɨndɨ ɓɔ: « Mwana ʉ mwana ʉ Daudi nanɨa tʉkʉ ikoko! »
40Kija Yeso a꞉maa, ambunzo ʉpanʉ ɓɔ: « Nikɨeni nʉ mombi ngiinanɨ aka. » Iya ɓa꞉ka nayɔ, Yeso ambumuɓukuo ɓɔ: 41« Wakʉkʉnda mʉnakyɨa ɨmanɨ? »
Ambumutisio ɓɔ: « Mʉpananakɨa, mufaniso ɓaka kʉna kʉtɔ. »
42Tiga nanɨ, Yeso ambumusigio ɓɔ: « Faniso kʉna kʉtɔ, baya ngiisɔɔ yinahiiso hiisoo. »
43Kʉ nɨma ngiinanɨ, mesu kambumuɓununio. Ambufaniso kpata Yeso, i꞉nyeni kʉtʉkʉa Asʉɓɨɨ. Kija ɓombi kʉ ɓuɓomu ngiɓa ɓa꞉na moni ngikʉnanɨ ɓambubibiso Asʉɓɨɨ.
Valgt i Øjeblikket:
Luka 18: BudKoya
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2021, Wycliffe Bible Translators, Inc.
