Luke 7
7
Jezi saligi ojanji a mfumu aworo
1Jezi kamana mbari eso ka miizi a baari baakiigi yuzuga nde, nde yeni nca kangundu ka kapenawume. 2Mfumu aworo a Arome kiigi ŋa oyiga omon eli nde malege otii ma nde. Ŋaa oyiga wua kiigi bila ngaa, nde kiigi yiga tuga kakpaa. 3Ŋaa mfumu wua kayuga ba alyele ma Jezi, nde tumi ajanji ba acuama kanca aZife a nde, ma kabwono Jezi ma kasalaga oyiga a mfumu aworo wua. 4Bo atoyi mpaana Jezi waa, bo abaani kampa nde akolokolo, bo ndi: «Balaga li kaave ka mbuuru, yamaŋa nde. 5Kabila nde ŋa njala kasi ka bizi, ŋaa nde mbuuru wo cua njo ye abwono bizi Njyami.» 6Bo amana lyele bwa Jezi yeni bila bo. Bo kiigi yiga mpaana njo mfumu aworo, wua tumi andigi a nde ma kalyele ŋa Jezi ndi: «Mfumu, ndaga se njuru a we kabuma, mi kunu ka mbuuru woove, eli wo nyunuŋa nca njo mi ŋi. 7Yia biri me ankulu ye mbiza mi we kaya mono, ŋaa lyele mi se mbila mon otu, ojanji a mi kawuuma. 8Kabila mimankulu kaje ma amigi ma ampa amfumu a mi, ŋa aworo a mi se kaje ma amigi ma empa mi bo. Aka mi elyele ŋa omon ndi: “Je!” Nde se yeni. Aka mi elyele ŋa okima ndi: “Ya!” Nde se yi. Ŋaa mi elyele ŋa oyiga omon ndi: “Sa bu!” Ŋa nde se si.» 9Ntini ye Jezi ye kayugi mbari yia, nde moni ove ma mfumu aworo. Ŋaa nde kaligi ma kacu ka lembuuru le lekiigi yuzuga nde, nde ndi: «Mi elyele ŋa be sisiele mi kinimono tari leenini mva li ŋi, se mpila baari ba Ezerayele.» 10Ŋa evurigi ba andigi ba mfumu aworo njo, bo amoni oyiga wua mi wuuma.
Jezi anyusa mwana okaazi wo okwulu wo Nayine
11Anyuzuga, Jezi bila alwoni a nde ŋa lembuuru, ayeni bila nde kangundu ka ba acwolo ma Nayini. 12Ŋaa etoyi e bo ncwo#7.12 Ka Ezrayel, aya ba kancua ampangi ma ma jeneŋe engundu bila ampugu, ŋaa ampagi maa ŋa kadubugu ka ba anyunuŋa. kangundu, bo avuniŋi bila lembuuru le kiigi je ancwo ma kaje jiiga kabiima. Bo amaabira okuba mwana wo okaazi okwulu, ŋaa nde mwana kiigi nde-ankulu wua. 13Ŋaa Mfumu Jezi kakese okaazi wua, nde moni nde nya ŋaa nde ŋa nde ndi: «Ndaga kalila!» 14Ŋaa nde yi nciina mpaana okuba ŋa Jezi ciili nde. Baari ba abiri asugi. Jezi ndi: «Onkere balaga nyuzuga! Mi dugi!» 15Ŋaa kabiima kia ka ki manci ŋaa ko yiga ke elyele. Jezi vuti nde ŋa ngwugu. 16Anyuzuga, Jezi bila alwoni a nde ŋa lembuuru, ayeni bila nde kangundu ka ba acwolo ma Nayini. 17Ŋaa ncia Jezi eyeni nca bungu le Jude bila atiniŋa ma aso.
Jan Batise atuma alwoni a nde mpila Jezi
18Alwoni a Jan ayeni naana maami ma Jezi makasi aso, ŋaa nde cwoli bwele. 19Nde tumi bo mpila Mfumu Jezi, ma kalyele nde ndi: «We mbuuru wo aya sikali bizi le jila okima?» 20Bo ato mpaana Jezi, bo ndi: «Jan Batise nciina bizi mpila we, ma ka piza ni: We mbuuru wo aya, abiza bizi lejila okima?» 21Ntini ye toyi alwoni a Jan Batise mpila Jezi, nde kiigi yiga asalaga bege le angaa angayi, ekara, ŋa angaa epundu beebi, ŋaa nde naani bege le baari eli miizi kiigi amabuluga. 22Ŋaa nde akaala ŋa bo ndi: «Leje naana ŋa Jan maami ma moni be ŋa ma yugi be: Baali kiigi miizi kali amimono, ŋa ebuka yiga be temeŋe, ŋa anga ebila ami salaga, ŋaa ba abaaka acu amakisa yiga baayuga, baama akpaa ami nyuzuga, ami mpa afuga Ncya Yeemve.» 23Mbuuru wo abiza kanyina lila le nde ma mi oli nca kase!»
Jezi ampa ncia kayila Jan Batise
24Ntini eli antuma a Jan kiigi ami mana je, Jezi yiga awobo bila lembuuru ma Jan ndi: «Be kiigi ema leje mono nca ncege? Lencicaŋi le lenyiga ma pyebi? Kali?» 25Ŋaa be kiigi ema leje mono? Balaga le laaza amfa ayiele? Ŋaa baari ba baalaaza amfa atali bila baari baali nca njele ba baaka nca anjo maanini ma akunji. 26Ŋaa be lesa bwa be ema leje mono? Ntuma Njyami? Ee! mi elyele be nde vuli ntuma Njyami. 27Kabila Jan mbuuru eli Mpiri ye elyele ndi:
“Mi etuma osizigi o mi kamiizi a we, ma kanaana we njila.”
28Jezi vuli dugi ndi: «Mi elyele be sisyele kanca ba acuugi ma amwon ba akaazi, wo ovuli Jan Batise onyaga. Okorogo wo ovuli obuzu nca baari ba ayalaga Njyami ndi nde Mfumu, vuli Jan Batise. 29Ŋaa baari aso bayuzigi Jan ŋa kaga le acwoli ma angaa lempo se amoni ndi Njyami tele, bo ayaligi ndi Jan kampa bo ateemi. 30Ŋaa Afarizi bila ayizigi angiri amaabiza maami a Njyami ma kadugi bo ma kasa. Ŋaa bo abizi ndi Jan kimpa bo ateemi ŋi.»
31Ŋaa Jezi vuri dugi ndi: «Mi leca le lubu li ma lini eyezege? Lo na le wuana? 32Be le wuana baana baali manci kayila biri lekuga baari, ŋaa bo ba acwolo abuga ndi: Bizi le mi wula be opari, ŋa be le kikina ŋi. Ŋaa bizi lemi luuma be aluumu ma obaraga, be leki lila ŋi. 33Ma lemigi loankulu lia, Jan Batise mi ya, nde a kaja biila ŋi, ŋa akanywa se mali ŋi. Be le ki yalaga nde ŋi, ŋaa be ni nde ŋa kapundu keebi. 34Mwana Mbuuru miya, aja anyua, ŋaa be ni: Lemono! Mbuuru wu ŋa njala kaja bila kanyua. Nde ndigi angaa lempo ŋa baari ba baasa amaami maabi. 35Ŋaa ba ayaligi ncimi a Njyami ba amvyere ndi ncimi yia eli tele.»
Jezi abologo okaazi wo ndumba
36Cugu lemon ofarizi ocigi Jezi ma kaya ja ka njo nde. Ŋaa Jezi nyuniŋi nca njo ma kaja bila nde. 37Kiigi ŋa okaazi wo ndumba nca kangundu kya. Nde kayaa ndi Jezi li nca njo ofarizi aja, nde yi bila mbaza ye alimbate ye ema alula ma ananasi ma ntali. 38Nde yiga ka mbiza Jezi, ka mpaana miili#7.38 Ka Ezrayel ntini ye eja baari kiigi kaka kayila ekala, miili ema vuna ka mbiza. Kia kabila ka aki okaazi odumba wua ka mbiza Jezi, nde lili ŋa nde cuozi aciya yila Jezi. e nde. Amana nde yiga alila, ŋaa nde bwozi Jezi miili bila anciya. Ŋaa nde siniŋi bila mfu a nde, nde pori miili e Jezi, ŋaa nde kili jo ananasi. 39Ofarizi wo cigi nde kamono bwa, kalyele nca otuma nde ndi: «Mbuuru wu ma kaka ntuma Njyami wo jaajaa, nke nde ayaa maami ma okaazi wu, ŋi nde ndumba.» 40Jezi yagi mbari, ŋaa nde ŋa nde ndi: «Simon mi ŋa jaa ma kalyele we.» Ŋaa Simon akaala ŋa nde ndi: «Mfumu lyele.» 41Jezi ŋa nde ndi: «Mbuuru ngaa kabaga bigi baari bwele ampara. Nca bo omon kiigi ŋa kabiimi ka nkama (500) ye ampara, ŋaa buga woomon kiigi ŋa kabiimi ka enkuumu etaani (50) ba ampara. 42Ŋaa nca bo abuele, mbuuru se omon wo buni kavuta nde ampara kali. Nde ka ma mono bwa, nde nyini ebiimi bia. Nca bo abwele wo nde wo kavuli njala buga wunu?» 43Simon kaali ndi: «Mi ecimiŋa ni mbuuru wo acyezi kabiimi keenini.» Ŋaa Jezi ŋa nde ndi: «We mi pama taataa.»
44Amana Jezi tali mpila okaazi wo ndumba wua, nde ŋa Simon ndi: «We amono okaazi wu? Mi nyuniŋa nca njo we, we kimpa mi anja ma kacuka miili emi ŋi, ŋa ma ka yamba mi. Ŋaa eto ma nde, nde bwozi mi miili ma anciya, ŋaa nde siniŋi mi miili ma mfu a nde. 45Ntini ye mi ye yi, we kiyamba mi ŋi. Ŋaa kaasa nyunuŋa nde, nde ma kaporo miili emi ma kamvyere jya le nde le kajya mi. 46We kiyira maari kayila ocu a mi ŋi, ŋaa nde yiri ananasi kayila miili emi. 47Ma bwa mi elyele we mini, okaazi wu ma mvyere mi jya leenini. Kabila mi ma abologo maami maabi a nde ma akukuna. Ŋaa mbuuru wo osi maami maabi nceti, le nde jya se nceti.» 48Ŋaa Jezi ŋa okaazi wua ndi: «Mi mi bologo maami a we maabi.» 49Baa baaja bila nde ba kacimiŋa nca etuma e bo ndi: «Nde wu na, wo abuna kabologo maami maabi a baari?» 50Ŋaa Jezi alyele ŋa okaazi wua ndi: «Tari le we lemi vuzuga we, je nca kadusu.»
Valgt i Øjeblikket:
Luke 7: teg
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
