Markus 1

1
Mburer ad Johanes ndremda surhi su.
1Aga negdunongen Helian ad Jesu Kristo, Ndur Jehova. 2Dege hom lao ad Jehova gin hondre dugian: Ar io gurdegieni hom lao ordo i hanu, hinen sal adem bomud. 3Nongen ad homo i da marboga: Mu ghinen sal ad Ndorlaben gbomud, ghinen masigane gmonen. 4Johanes i da marboga i surhi su, i bohernou le ndro su i henunuen su, su da belueni longu asu momen, boen Jehova i sbui longu asu momen giao. 5Su masi ber Juda ma su Jerusalem su la ndro i, i surhi su masi le ndran haga ngarn Jordan su boharni longu asu momen here sumburdi. 6Salo ad Johanes lomonme, i hosi i le gogei aden, gan anen gusiandas e guner. 7I bohernou i boi: Hom ndoundoun gir muren, io de vonei bui io godurhu io dari sumianegen. 8Io surhi mu gle ge ndran, i gi surhi mu le Melua Jehova. 9Malabo Jesu i meher Nasared Galilea le ndro Johanes, Johanes i surhi i le ndran Jordan. 10I gobad me belengan lie i lele lang i reu, Melua Jehova me ndre Jesu dege bal si. 11I hirong nongen ber lang: Uo Nduro, golisden uo, io muguen uo.
Sadan seslaini Jesu.
12Boen Meluan le bur Jesu le marboga. 13I medir i ri mahangul da marboga, Sadan i me i seslaini i, i da ndro longu ber marboga su Angelo su me gulue i.
Mburer ad Jesu le Galilea.
14Muren su gin hosi Johanes, boen Jesu me Galilea i bohernou nongen hian ad Jehova, 15i boi: Bing e longu aden Jehova i meher beg sobani mu. Hian mu garbeluen bern ademu mu ghirong Nongen Helian ad Jehova.
Jesu eloh mahamou le mburer aden.
16Jesu irgai le Galilea le leng, i ilndri Simon ma ndern Andreas sor dou gahu le ndran sor ndremda ni. 17Jesu i boi le ndro soro: Mor gorndrbo, io ghinen uomoro gle gulue su ndramed. 18Malabo sor bieni gahu i asoro sor ie ndrbo Jesu. 19I iao la hebe i dilingi Jakobus ndur Sebedeus ma ndern Johanes sor do da ndol asu, su suedi gahu lie. 20Malabo i loh sor, sor bieni damsor Sebedeus i da lundiendol le bor su lao aden sor do ndrbo Jesu.
Mburer ad Jesu le gor Kapernaum.
21Boen su meher me Kapernaum, malabo le sabbath Jesu i le numo bohernou i henunuen su. 22Meluasu i ieb le nongen aden, i enger ndorlaben, su ndremda bohernou su de ndoun bui. 23Homo, ngongong i da ndren, i da numo hernou i loholo, 24i bode: Uo Jesu ber Nasaret! Uo hesa am ndro du e? Uo gin me beg rii du ie? Iou dandu uo, uo Ndur Jehova, Helian! 25Jesu i habai i, i bode: E simge, alndi! 26Ngongong i rosni ndramed i loholo i iao. 27Meluasu masi i ieb manden su vong le goure, su bode ie: Aga sa? Sehe longu me malabo, i dege ndorlaben manden, i robuldi ngongong, ngongong hirong nongen aden i iao. 28Malabo ngarnongen le gor masi asu Galilea.
29Su do numo hernou su iao landi su iao la um ad Simon sor Andreas, Jakobus e Johanes sor la born ndro su. 30Naloson Simon i med i busngad, su me bai me ndro Jesu. 31Jesu i le ndro i, i boro i le nemen, i sori i, malabo iab aden gineao, i dne hedi gan me ndro su. 32Ibia mernal gina boan su hur iab mabosanged me ndro i ma su ndramed beld i rii su. 33Su ndramed masi ber gor su do da, lobonhonum ndro Jesu. 34I soban su, iab i rii su, su maren lie, i robuldi su beld mabosanged su iao: i mbueren beld mbue de gvong
Jesu bieni Kapernaum.
35Mabing mernal ma de gobad, Jesu i dne i dogi le lonhao le vong le ndro Jehova. 36Simon e su masi su da ndro i su hilou me ndrbo Jesu. 37Su meher ndro Jesu su boi: Su masi su gahi uo. 38Jesu i boi me ndro su: Du gao gle gor hoger lie, io beg bohernou gle ndro su, io meher me ri. 39I henunuen su le numo hernou masi le gor asu Galilea, i robuldi beld.
Jesu sobani homo, lepra i da ndro i.
40Hom ndramed mandrn masi legen ge i me ndro Jesu i godurhu i ndemani i, i boi: Be uo somui, uo danem sobani io. 41Jesu i golnisden i ilgi nemen le ndro i, i dori i, i boi: Io somui, mandrm masi rosan gane. 42Jesu i vong dogoro, legen gineao, mandrn masi gin hivur boen. 43Boen Jesu i habai i, i bieni, 44i bodeie: Naiu, mbue de vong gle ndro homo, al iao sal adem, al ndro lao ad Jehova gle gan si, dege Mose gin bai, su masi su dilingi i. 45I iao leli, nongen aden dsoln le ndro su masi, Jesu i mbueren le gor hoger lie, irgai le lonhou ge, su ndramed ber gor masi me ge ndro i.

Valgt i Øjeblikket:

Markus 1: LLENT

Markering

Del

Kopiér

None

Vil du have dine markeringer gemt på tværs af alle dine enheder? Tilmeld dig eller log ind