Mateus 27
27
Jesu i la ndro Pilatus.
1Mabing, su ndurhian, ma su labenen ber gor, su gin vong le goure, beg dieni Jesu na gmed. 2Su lao asu, su hosi Jesu, su dulieni i le ndro ndorlaben Pontius Pilatus. 3Ar Judas, i da gin hevani Jesu, gin ilndri, su gin dieni Jesu na gmed, ndrnen, i irgu le longu aden momen i da gin hineni, i hedi moni madilingul le ndro su ndurhian, ma le ndro su labenen ber gor i hengen i mul le ndro su. 4I vong, i bai: Io gin hevani Jesu, io gin daui ndrai helian rosan le nemu, aga momen ge. 5Su vong su bai: Aga mburer adem ge, ghinen i, dege uo lengi. I bieni moni aden le lundieum ad Jehova, boen i gina i sindrdi golen. 6Su ndurhian, su hedi moni ad Judas, su boi: Dandu daui moni ogo le ndro Jehova bui, aga moni le ndrai ad homo. 7Su gin vong le goure, su beg semani beleng asu ndremdalus gle numenmad le ndro su ber manan, ar homo de homo na gmed le gor Jerusalem. 8Su da bosoui numenmad ogo, beleng ber ndrai, eruar lie. 9Dege Provet Jeremia i gin bai: Su gin hedi moni madilingul, aga i vonei moni gle beleng asu, dege su Israel su gin bai, 10su semani beleng asu ndremda lus, dege Jehova i gin bai le ndro su.
11Su gin dulieni Jesu le ndro ndorlaben. I ndemani Jesu i bai: Uo King asu Juda? Jesu i bode: Io ie. 12Su ndurhian, ma su labenen su lug bohosu, su bo gord le ndro i. Jesu i de vong heb de la ndro su bui. 13Pilatus i ndemani i: Uo de hirong bui, su da bo gord le ndro uo dagara? 14Jesu de vong heb de la ndro Pilatus bui, ndorlaben, meluan i ieb leri. 15Uru si, su hur gous asu manden, ndorlaben i rumburdi homo ir kalabus, dege voasuiso ad homo. 16Malabo homo ir kalabus, ngarn Barabas, hom ndramed momen ge. 17Be su da me goure, Pilatus i vong le ndro su: Io rumburdi sie le ndro mu, Barabas, de Jesu, su da bosoui ngarn Kristo. 18I danen i, ndrnen asu ndurhian i irgu le mburer aden mandromai, mburer ad hom ndorlaben. 19Pilatus im logna aden, le logna gord nambulen rendegien homo le ndro i, i bai: Mbue de gob momen le ndro ndramed ogo i homo hian, monen ge, io gin inhini lobing ogo mabosanged gle aden. 20Su ndurhian, ma su labenen, su ndouo le nongen le ndro su ndramed masi, su gbode ie, su ha lengi Barabas, i gdieni Jesu na gmed. 21Malabo ndorlaben i ndemani su: Ie lengi sie io grumburdi ie? Su bode: Barabas. 22Pilatus i ndemani su lie: Io gob sa le ndro Jesu, su bosoui ngarn Kristo? Su masi su bode: E dadhe i gle beldigei. 23Ndorlaben i bode: Sehe longu i da gin hinen i momen ge? Su lug bohosu manden, su loholo, su bai: Ar dehe gle beldigei. 24Pilatus i ilndri, i de ndoun de la ndro su bui, su da lug bohosu mandromai, i vong le ndro su, su hedi lus le ndro i, i surhi nemen gle ndran le bormarsu masi, i vong le ndro su, i bai: Mburer ordo bui, be io gdieni ndramed ogo na gmed, ghinen i dege mu lengi. 25Su ndramed masigane su vong su bai: Ndrai aden na gmeher ndro du, le ndro su ndurdu ge. 26Boen Pilatus i rumburdi Barabas, i daui Jesu le nemesu polisboi, su rii i, su dadhe i le gei.
Su polisboi bo momen le ndro Jesu.
27Boen su polisboi ad ndorlaben, su gin dulieni Jesu le lundieum su la goure, Jesu i da dogrosu. 28-29Boen su hedi salo aden giao, su daui salo ramen, eluen ge. Boen su hedi borndrui, su deien Jesu le balen, su daui ndes le nemen sengen, boen su godurhu ngondrnegesu, su boii i, su hal le aden, su vong, su boi: Iou bamugueni uo, King asu Juda. 30Boen su rogumbunhi i, su hedi ndes aden su ri borbalen. 31Be su gin bo momen le ndro i dagara, su hedi salo ramen gineao, su dou salo aden gle mandrn lie, boen su hedi i, dulieni i le logna be su beg dadhe i.
Su dadhe Jesu le gei.
32Su da le sal, hom ndramed ber Kirene, ngarn Simon i sohal sal le ndro su su boro i, su ndoun le ndro i, i sab gei ad Jesu. 33Su gin me ndre bahali Golgada, i vonei: longna bobalen le nongen asu. 34Su hengen ndrunvain le ndro i, su daui nosun leri, i hengen le ndro i, i gilmui. Jesu i ni hebe, i mbueren. 35Boen su dadhe Jesu le gei, su hedi salo aden, homo i hedi hasel, homo i hedi hasel. 36Boen su lugdo im boan, su bogulue Jesu. 37Su gin daui nongen le gei mburbalen, i da bosoui longu aden, i da gin hinen i. Nongen ogo dogoro: Aga Jesu, King asu Juda. 38Boen su dadhe sor daiandramed, homo le nemen sengen ad Jesu, homo le nemen gameao aden. 39Su da gin irgai bage, su boii i, su mounuei borbalsu. 40Su vong, su bai: Uo beg ndumbue um ad Jehova, uo beg mengseni lie, le bing madolo muren, be uo ndoa dagara, osbani uo. Be uo ndur Jehova, bieni gei, am boan. 41Su ndurhian, ma su ndremda hernou, dagara su labenen ber gor, su boii Jesu lie, su boi: 42I gin sobani su masi, de danen sobani i bui. I King asu Israel, i gbieni gei, i me boan, boen iou lao aden lie. 43I gin belengeni Jehova, i grumburdi i malabo, be i lengi. I gin bai: Io ndur Jehova. 44Sor daiandramed sor boii Jesu lie. 45I mesar, gor masi ndrogum sumburdi, i roh ibia. 46Ibia Jesu i loholo, i bodeie: Eli, Eli, Lama Sabagdani, i vonei: Ndorlaben ordo, Ndorlaben ordo, desa uo gin bieni io ie? 47Su holel, be su gin hirong nongen aden, su bai: I loh Elia. 48Boen homo i hilou, i hedi bermanda, ilgi i le ndrunvain, i daui i le ndes, i hengen Jesu. 49Su holel su vong, su bai: Malabo iou beg ilndri, Elias na gmeher ndangen, beg rumburdi i, de bui 50Jesu i loholo bersilie ndoundoun, boen meluan i bieni mandrn.
51Malabo salo eluen i da le Lundieum Helian i mbuser lege marnder, ber belengan me boan. 52Boan i nunueie, bad i ndumbue, ngai i ndeh, numbuesu ndramed, asu lao ad Jehova hohunan, gin ndne le lundiengad. 53Su gina su mbsig le ndro su ndramed ber gor Jerusalem. 54Polismaster, ma su lao aden, su da gin bogulue Jesu, be su gin ilndri, boan i nunueie, i rerr, noh asu dsoln, su vong: I ogo i Ndur Jehova ndangen. 55Su bihin mabosanged, su da manan hebe, su lele longu masi ogo, su ogo, su bihilou ad Jesu, su ndrbon Jesu, su gin bo mburer le gan anen. 56Homo asu, Maria Magdalena, e Maria, nanen ad Jakobus sor Jose, dagara nanen le ndursor Sebedeus.
Su doni Jesu le ngad.
57Mernal beg lol, hom labenen gin me, homo ber Arimatia, ngarn Josev, memrad aden dsoln, i hom lao ad Jesu lie. 58I iao le ndro Pilatus, i ndemani i le numbuen Jesu. Pilatus i bai le ndro polismaster, i ghengen i le ndro i. 59Josev i hedi numbuen Jesu, i nhui i le salo beren rosan ge, 60boen i daui i le ngaibad houen. Aga ngaibad aden, su gin mengseni le ndro i le bad mandromai. Be su gin doni Jesu le ngad, su daui bad manden le marbohonngai, boen su gina. 61Maria Magdalena, ma hom Maria lie, sor baghege le ngaibad. 62Bing si aga sabbath asu Juda, su ndurhian ma su Pharisi su la ndro Pilatus, 63su vong le ndro i, su bai: Ndorlaben, iou hanguruen i malabo ndramed ogo momen, be i da mamaren le boan, i gin vong: Io gedne lie le bing madolo muren. 64Hian, orgulue ngaibad le bing madolo, debosan su lao aden su gme, su behena numbuen. Boen su vong le ndro su ndramed: I gin ndne lie le ngad aden. Muren bahilou aden i hinen su ndramed gina momen ge. 65Pilatus i bode, hedi polisboi ogo, gobgulue ngaibad hian ge. 66Su gina, su hosi ngaibad ndoundoun, muren su daui polisboi baghege le ngaibad, su gobgulue i hian ge.
Valgt i Øjeblikket:
Mateus 27: LLENT
Markering
Del
Kopiér

Vil du have dine markeringer gemt på tværs af alle dine enheder? Tilmeld dig eller log ind
Published by the British and Foreign Bible Society 1956