Lukâs 4
4
Yesù ə taw tsìy tsə ìmwàmkòʼ i Ambvə̂ntsə
(Matìyò 4.11; Mâk 1.12,13)
1Abù Yesù dzwoŋi ŋwô bə̂ anə dzwì Dzudàn nə̀ Zwàykə̀zwekiy də azoŋə̀ we, Zwàykə̀zwekiy nìy zù nə̀ we a mbvə̀n ə̀ kə̀sisi. 2U dòʼò awote anə məntsukə mə̀vəm inkyàʼì, Satàn ə mwàmə̀ kòʼò we awote. U kə kə̀ nyi dzə̂ fyiə kə̀ liy kiy anə tsukə mə̀ ghè mə̀. Abù ntsukə mə̀ mày tsə nəniy, dzoŋ ə kaʼ yə̀ we ani zab.
3Satàn ə dzày yə̀ a we nə, “Abu wò də Wà Kə̀zə̀, zəŋi tsə nə̀ itai yə̀ fə̀d kə kəba.”
4Yesù ə bə̀lì yə̀ we nə̀, “I twâ dòʼò anə ŋwàʼà k-a-zə̀ nə̀, ‘À kaʼi wày təŋ dzə kəba kə zəŋə wù nə̀ ù si muə.’ ”
5Satàn ə nìy fyi kwoʼ này kə nə̀ we idoŋ, dè yə̀ nàʼà tə mbyi tə tə̀dzə̀m â we anə kə̀mə̀ fə fəsòŋə. 6Satàn ə dzày yə̀ a we nə, “Mə ki nyiə̀ bə̂ wò nə̀ daʼa kədzə̀m nə̀ ùfyiə ùsoŋə̀ wə̀ ùdzə̀m. Ghu mə nyə̀ awò mìə̀, mə də ŋwô ani nyə̀ â wù wə̀ mə liə nəniy we. 7Abu wò bɛmə kə ani fwùlì mìə̀, ufyiə wə ùdzə̀m à ki də u yiə̀ wìy.”
8Yesù ə bə̀lì kə nə̀, “I twâ dòʼò anə ŋwàʼà k-a-zə̀ nə̀, ‘Ghà kwu ani fwùlì yə̀ kə Mwe ə̀ mbyi Zə̀ kəli, fàʼà yə̀ sòʼò â we kə.’”
9Satàn ə dyaŋi nìy zù nə̀ we a Yèlusalèm, təmi na fyi kwoʼ kə we anə lòʼo kə kə dâb tsìy fyi nəniy a ndàw Kə̀zə̀, Dzày yə̀ a we nə, “Abu wò də Wà Kə̀zə̀, tǎ ŋwòə fyi tswi yə̀ fəə anə lòʼò kə 10aŋwòə i twâ dòʼò anə ŋwàʼà k-a-zə̀ nə̀,
Zə̀kìy ki twum bə̂ tsə̀təndii tə we, ghu ki bû nîy ìyèmì azoŋə̀ wò.” 11Ghu ki fam kwi kə wô, tə̀ wò ki də kə̀ tswâb wu kiy anə itay.
12Yesù ə kwuni bə̀lì kə nə̀, “I twâ dòʼò anə ŋwàʼà k-a-zə̀ nə̀, ‘Kə̀ mwâm kòʼ dzə̀ Mwe ə̀ Mbyi Zə̀ kiə̀ kìy.’ ”
13Abù àmbvə̂ntsə mwâm kòʼ mà tsə nəniy Yesù, u ŋwò na sə tsə we, lyimə yə̀ soŋə fə̀ ŋwô fìy.
Yesù ə kaʼ tsə fàʼ kə we
(Matìyò 4.12-17; Mâk 14.15)
14Yesù ə ŋwò dzwoŋi zù a Galìlî anə daʼa kə Zwàykə̀zwekiy, ùzòŋ u Yesù wìy ə foŋ tsìy kpe yə̀ mbòʼ ì ghè yə̀ ìdzə̀m. 15U bwìy tyi dè tsə̀ àyiə anə ndaw tə udzəŋə tə aghě Dzû, aghê àdzə̀m ə kyalə we.
Ghu twe màʼà Yesù a Nazalèt
(Matìyò 13.53-58; Mâk 6.1-6)
16Yesù ə ŋwò zù a Nazalèt, a lòʼo kə ù kə nɛmə kwoʼ bə̂ ate. Abù a ntsuk fə̀ zwaa fə aghě Dzû, u ŋwò zù a ndàw dzəŋə kə aghě Dzû anə yiə yə ù kə zəŋə tsə̂ nəniy. U təmi kə idoŋ ani toŋə ŋwàʼà k-a-zə̀. 17Ghu nyə̀ yə̀ we nə̀ ŋwàʼà kə̀ kə kwu nəniy ayiə yə wè ntwùm ə̀ Kə̀zə̀ Ìzayà kə dzây nəniy. Abù ù zè fyi yə̂ ù kòʼ tsə loʼo kə ghu twâ na nəniy ate nə̀,
18“Zwày kə Mwe ə̀ Mbyi kiy də azoŋə̀ mìə̀,
aŋwòə ù mə mìə̀ sây na
nə̀ mə naʼà ntwùm ìdzòŋə̀ yìy awò àghè à la yiy.
U twum miə nə̀ mə naʼà awò àghě ndàw ntsaʼ nə̀ ghu kî fìy fyiə ŋwò ə ghu.
U twum sòʼò mìə̀ nə̀ mə dzây yə̂ awò aghê fɛbə a ghu nə̀ soŋə fiy mə kpe awò ghu ani kòʼ tə̀loʼo,
U mə twum sòʼò miə nə̀ mə fây ŋwô fyi bə̂ àghù yə̀ ghu fyaʼa anə awo ghù yə̀ ghu dzwəə nəniy nə̀ ghu
19U twum sòʼò mìə̀ nə̀ mə naʼà yə̂ awò àghù yìy a ghu nə̀,
à yù də̀ ŋə̂m kə̀ Mwe ə̀ Mbyi dě nəniy fòŋ ə̀ we ìdzòŋə̀ yìy â ŋgàŋ.”
20Abù ù twoŋə̀ mâ tsə nəniy, u gyɛli na nyi yə̀ ŋwàʼà kə ghè kə̀, nyə̀ dzwoŋi yə̀ â wè kə̀fàʼ ə̀ ndàw kədzəŋə, zù dòʼò tswi tsə. Aghê adzə̀m a ndàw dzəŋə kə ghě Dzû ghu fə̀lì na yə̀ àsə a zoŋə̀ we, 21U kaʼ yə̀ ani dzày a ghu nə, “Ayiə yə fə lòʼo kə mə twoŋə fyi kə anə ŋwàʼa k-a-zə̀ mə bù fyi ìsoŋì zii, anə yiə yə ghà zuw ghu toŋə fyi kə.”
22Aghê àdzə̀m ə dzìy nə̀, “Ayiə we à dzii yiy də àsoŋə̀ yìy.” Adzwə zwum sòʼò ghu anə dzə̀ ìdzòŋə̀ yə̀ ì kə fyi bə̂ anə idzwə i we. Ghu kaʼ yə̀ ani bəb nə̀ “Ù we mbaŋ də̌ wà Yùsə̂f ə̀?”
23Yesù ə dzày yə̀ a ghu nə, “Mə kwu ŋwô nə̀ ghà kî nìy kwoʼo bə̀ ŋwò idzəŋi mfən a mfən yə ghu dzîy tsə nə̀, ‘A wù mə̀ntyiə, zəŋi taw kə uwe niə̀ wìy.’ Ghà ki dzây sòʼò nə̀, ‘Zəŋi tsə sòʼò ndzòʼò àyiə yə̀ wò kə zəŋi nəniy a Kàpanùm,’” 24Yesù ə kàm dzày fwuli yə̀ a ghu nə, “Mə ndzəmə̀ dzìy bə̀ ŋwò â ghà nə̀, Ghu byemə tsə̀ dzə̀ wày wè ntwùm ə̀ Kə̀zə̀ anə inaʼ yə ù fyi bə̂ ate.
25Mə ndzəmə̀ dzìy bə̀ ŋwò â ghà nə̀, iyəŋi mpfənsə ə kə dùw ŋwò anə inaʼ i Islàel anə ntsukə mə̀ Èlaydzà. Zə̀kìy kə zəŋi tsə iwe i nìʼà wày anə təŋə̀mə̀ ìti nə̀ boʼ kiy. Dzoŋ ə ŋge də̀ sòʼo anə nàʼà tə̀dzə̀m. 26Ù kə kə̀ kwuni twum zû dzə̂ Èlaydzà a kə̀lə̀ yəŋə̀ mpfənsə ù lìy anə inaʼ i Islàel, ù kə fə̀d twum zù we a kə̀lə̀ yəŋə̀ mpfənsə ghu tyoŋə nə à də Zelefàt anə inaʼ i Sidòn. 27Ndə̀mə̀ àghè kə də̀ ŋwô anə inaʼ i Islàel ghu kə kwu nəniy ùŋkə̀m wìy anə sòŋə fə Èlishà, wè ntwùm ə̀ Kə̀zə̀. Zə̀kìy kə kə̀ zəŋi taw dzəə wù lìy wìy, anə uzə u ghu, à kə mày kə Namàn wè ìnaʼ i Silìyà.”
28Fôŋ tìy kə ŋge ŋə̀m ŋwò aghû yə̀ ghu kə də nəniy a ndàw dzəŋə kə aghě Dzû anə ayiə yə ghu kə zuw tsə yiə yə Yesù dzày tsə̀ nəniy. 29Ghu ŋwò kə, dzwùm fyi ŋwò Yesù anə inaʼ. Ghu nìy zù nə̀ we anə tuw kə udoŋ kə inaʼ i ghu yiy kə byiə doʼo ate. Ghu liə ani twùŋì byiŋi màʼà fyi tswi yə̀ we awo. 30U kwumi tsìy nyi yə̀ anə fwumi kə ŋwàâ kə̀, ŋwò zù loʼo tə we.
Yesù ə dzwùm fyi usîy ù bɛbə wiy azoŋə̀ wù lìy
(Mâk 1.21-28)
31Yesù ə dyaŋi tswi yə̀ anə inaʼ i Kàpanùm a mbwòʼ ə̀ Galìlî. Abù a ntsuk fə aghě Dzû fə̀ zwaa fiy, u zù kaʼ yə̀ ani tyi dè ayiə a ndàw dzəŋə kə aghě Dzû. 32Adzwə yiy ŋge zwum ghu anə yiə yə ù kə tyi dê àyiə yiy ate, aŋwòə ù kə tyi dè nə̀ daʼa kə̀soŋə̀ kìy. 33Wù lìy kə də̀ awote, a ndàw dzəŋə kə aghě Dzû ù kə kwu nəniy usîy ùbɛbə wiy. U bwoʼ fyi này kə kəbôŋ dzìy tsə nə̀, 34Hêy! Yesù wà ìnaʼ i Nazalèt, wò liə kìə̀ nə̀ ghə̀d ə? Wò mə bù ani bù byɛbi màʼà ghə̀d ə̀? Mə kwu ŋwô wù wə̀ wò də nəniy we! Wò də̌ wè Kə̀zə̀ ù zwê wìy.
35Yesù ə kwuni tsày tsə kəlâŋ awò ùsìy ù bɛbə wə a we nə, “Dòʼò moŋ. Fyi ŋwò azoŋə̀ we!” Usîy ùbɛbə wə bòʼò təm bə̀ wù wə̀ ambvə̀d anə səkə aghù, dyaŋi ŋwò fyi sòʼò azoŋə̀ we, nə̀ u kə̀ kwe nəway ifoŋ ìliy yiy azoŋə̀ we.
36Adzwə ŋge zwum aghê adzə̀m. Ghu bəbə anə iwè i ghu nə̀, “À yù də̌ ndzòʼò ìtyi dè ìghaa yiy? Ù tsày kə̀làŋ nə̀ daʼa kiy â ùsìy ùbɛbə wiy, u tuu fyi nəniy!” 37Ùzòŋ u Yesù wìy ə foŋ tsìy kpe yə̀ mbwòʼ ìghè yə̀ ìdzə̀m.
Yesù ə zəŋi taw kə ndə̀mə̀ àghù
(Matìyò 8.14-17; Mâk 1.29-34)
38Yesù ə ŋwò tsə a ndàw dzəŋə kə aghě Dzû, zù a ndàw Simùn. A də̌ nə̀ nèwìy Simùn kə ŋge dzàŋə̀ ùwe. Ghu bwoʼ yə̀ Yesù nə̀ wokiy nə̀ ù fày kə we. 39Yesù ə zù a kə̀lə̀ we, tsày yə̀ kə̀làŋ nə̀ uwe u ghè wə̀ mày. Uwe ughè wə̀ ə mày yə̀ sòʼò. U dyaŋi ŋwò kə idoŋ, kaʼ yə̀ ani dèm ghu.
40Abù nə̀ nyiŋkwubì tìy, aghû yə̀ ghu kə kwu nəniy aghû yə̀ ghu kə dzaŋə nəniy ndə̀mə̀ ndə̀mə̀ tə tədzàŋ tìy, ghu byòʼò bè nə̀ ghu a kə̀lə̀ Yesù, Yesù ə gaʼa yə̀ àwo azoŋə̀ wù ùmoʼ umòʼ, zəŋi taw kə ghu. 41Nsìy mə̀bɛbə̀ mìy ə fyi ŋwò azoŋə̀ ndə̀mə̀ àghù, nə̀ ìm bvoʼə yə̀ mə̀mbòŋ, dzìy tsə nə̀, “Wò də̌ Wà Kə̀zə̀!”
Yesù ə kwà ghu, kə̀ bɛmə nə̀ ghu kâm dzây ìyiə ìliy yiy, aŋwòə ghu kə kwu ŋwô nə̀ ù də̌ Kə̀litò.
Yesù ə nàʼà ntwùm ə Kə̀zə̀ a ndàw dzəŋə kə aghě Dzû
(Mâk 1.35-39)
42Abù utsuk wiy zwu tsə, Yesù ə zù dòʼò yə̀ a loʼo kə̀liy kiy nə̀ noŋə̀ we. Aghê ghà yə̀ ə khu kyabə tsə̀ we. Abù ghu kwûm tsə a lòʼo kə ù kə də nəniy ate, ghu khu dzəd ani zəŋi tsə nə̀ ù kə ŋwô na sə dzə̀ ə ghu. 43Yesù ə kwuni dzày yə̀ awò ghu nə̀, “Mə kwu ani nàʼà ntwùm ìdzòŋə̀ yə̀ kwùmə̀ yə̀ nə̀ àyiə yə Zə̀kìy saʼa nəniy aghe we yiy ate anə nàʼà tə̀liy tiy soʼo, aŋwòə à də̀ iyiə yə Zə̀kìy kə twum bə̂ nəniy miə nə̀ mə bû fâʼ.”
44U tsə̀ŋə̀ nìʼà yə̀ kə ntwùm ə̀ Kə̀zə̀ anə ndaw tə udzəŋə tə aghě Dzû a mbwòʼ ə̀ Dzùdiyà.
Valgt i Øjeblikket:
Lukâs 4: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
