Lukâs 23
23
Paylèt ə bəbə yə̀ àyiə â Yesù
(Matìyò 27.1,2,11-14; Mâk 15.1-5; Dzwan 18.28-38)
1Ŋwàâ kə̀ kə̀dzə̀m ə ŋwò kə nìy zù nə̀ Yesù akə̀lə̀ Paylèt. 2Ghu zù kaʼ ani gbù zoʼo ayiə azoŋə̀ Yesù dzìy tsə nə̀, “Ghèe mə̀ kwi wù wə̀ nə̀ ù tswə̀ bɛbə àghee ŋgàŋ, dzìy a ghu nə̀ ghu kə tsuw dzə̀ ŋwàʼà kìy â Kaʼisà. Kwoʼo sòʼò uwe nə̀ ghe də Kə̀litò, ghe də̀ sòʼo kədòŋ.”
3Paylèt ə bəb yə̀ â Yesù a we nə, “Wò də̌ dòŋ kə aghě Dzû ə̀?”
Yesù ə bə̀lì kə, a we nə, “Wò dzìy aghii.”
4Paylèt ə dzày yə̀ â ŋgəd tə aghè àlwaʼa yə nə̀ ŋwàâ kə ghù kə̀ a ghu nə, “Mə kə̀ kôʼ dzə̂ iyiə ìbɛbə yə wù wə̀ zəŋi nəniy yəə a ni wiy maʼà we.”
5Aghû yə̀ ə tsə̀ŋə̀ ndyimə kə ìwee, dzìy tsə nə̀, “Ù tyɛbə àghù anə ayiə we àtyi dee yiy, anə mbwòʼ ə̀ Dzùdiyà ìdzə̀m. Ù kə kaʼ tsə a Galìlî, ù mə bù nyiə fəə.”
Paylèt ə twum yə̀ Yesù â Helòd
6Abù Paylèt zuw tsə ghii, u bəb tsə nə̀, “Wù wə̀ fyi a Galìlî ə̀?” 7Abù Paylèt kəli fyi kə nəniy nə̀ Yesù ŋwò bə̀ anə inaʼ yə Helòd saʼa nəniy, u kàm twum dzwoŋi yə̀ Yesù a kə̀lə̀ Helòd, ù kə də̀ sòʼo a Yèlusalèm a soŋə fə ghà fə̀. 8Helòd ə ŋge dwiʼi yəə ù kòʼ fyi yə̂ Yesù, aŋwòə ghab kiy maa ŋge fyi yəə ù kə zuw nəniy mali tə yə tə Yesù fàʼa. U liə nə̀ ghe mə boŋ kôʼ soʼò we anə yiə yə ù zəŋə mali tə yiə tiy ate. 9Helòd ə bəb ndə̀mə̀ àyiə â Yesù, Yesù ə zuw təŋ kə moŋ kə̀ bəlì dzə̂. 10Ŋgəd tə aghè àlwaʼa tə nə̀ àghè tyi de ulàŋ wìy ə təmi fyi bə̀ isə, gbè zoʼo àyiə azoŋə̀ Yesù. 11Helòd nə̀ sǔgôʼ tə we tiy ə tsoʼ Yesù nyàʼì sòʼò we. Ghu nìy bə̀ sàŋə̀ kə̀dòŋ kwe azoŋə̀ Yesù ntwum dzwoŋi yə̀ we akə̀lə̀ Paylèt. 12A ntsuk fə ghè fə̀ kə, Helòd nə̀ Paylèt ə kàm dìì tsə ufwu, aŋwòə ghu kə dzwə tsə̀ ŋwò anə iwè.
Paylèt ə bɛmə yə̀ nə̀ ghu wiy Yesù
(Matìyò 27.15-26; Mâk 15.6-15; Dzwan 18.39–19.16)
13Paylèt ə twòŋə na fwumi bə̀ ŋgəd tə aghè àlwaʼa tiy, nə̀ ŋgəd tə inaʼ tiy, nə̀ ndə̀mə̀ àghè liy, 14dzày yə̀ a ghu nə, “Ghà nîy bù nə̀ wù wə̀ fə akə̀lə̀ miə̀ dzìy nə̀ ù tyɛbə nyə̀ àghù. Mə mə we toʼò fwə̀d anə sə kəli, mə kə̀ kôʼ dzə̂ nə̀ ù zəŋi bɛb ayiə yə ghà dzîy nəniy nə̀ ù zəŋi bɛb ŋwô.” 15Helòd ə kə̀ kòʼ sòʼò nəway iyiə ì bɛb yiy wù wə̀ zəŋi nəniy yəə ù nə pfə. À yù də̀ ighe ù twum dzwoŋi bə̂ nəniy we fə. 16Anə yiə ghè yə̀ ghi, mə bwalə tsə kə we nə̀ mbàŋ fìy, mə nyəli maʼà we ù ŋwò. 17#23.17 Paylèt kə bà tsə̀ ani dzùw màʼà wù ùmòʼ a ndàw ntsaʼ abu soŋə fə inyi fiy kpee tsə nəniy.
18Ŋwàâ kə ghù kə̀ ə dzày fyi bə̀ anə dzə̀ tə̀ taw tiy nə̀, “Wiy maʼa we, wə̀ dzwû maʼa fyi bə̂ ghə̀d nə̀ Bàlabàs.” 19Bàlabàs kə zù a ndàw ntsaʼ aŋwòə ù kə sə̀k ùtwə̀d, twe ani na ulâŋ u aghě Lûm.
20Paylèt kə liə ani nyəli màʼà Yesù. À yù də̀ ighe ù kə nam bwoʼ fwuli yə ŋwàâ kə̀ nə̀ wokiy. 21Ŋwàâ kə ghù kə̀ ə kwuni dzày yə̀ anə dzə̀ tə̀ taw tiy nə̀, “Baa we anə kàʼ fə təzəd, Ba we anə kàʼ fə təzəd.” 22Paylèt ə bəb yə̀ â ghu ani zù kwùm sòŋə inti nə̀, “Wù wə̀ byɛbi kìə̀ ghà si dziy nə̀ a ba wiy maʼa we ə? Mə mə fwə̀d we. Mə kə̀ kôʼ dzə iyiə ìbɛbə yiy ù zəŋi nəniy yəə ù nì pfə.”
23Aghû yə̀ ə kwu kə ani bvuʼi məmbòŋ idoŋ nə̀ ba wiy maʼa we. Ghu tsə̀ŋə̀ bvuʼə kə mə̀mbòŋ 24À yù də̀ ighe Paylèt kə dzây nə̀ ghu ba wiy maʼà Yesù. 25U dzwù maʼà fyi yə̀ wù wə̀ ghu kə liə nəniy. Wù ù ghè wə̀ kə də̌ wù wə̀ ghù kə fê na nəniy we nə ù kaw utwə̂d anə inaʼ, wiy myìʼà kyabi tsə̀ àghù. U dyaŋi nìy kə Yesù nyə̀ ŋwò yə̀ â ghu nə̀ ghu zəŋi yə̂ iyiə yə ghu liə nəniy ani zəŋi nə̀ we.
Ghu ba Yesù anə kàʼ fə təzəd
(Matìyò 27.31-44; Mâk 15.21-32; Dzwan 19.17-27)
26Anə yiə yə sǔgôʼ tìy nîy ŋwǒ yə̂ nə̀ Yesù, ghu kpe yə̀ nə̀ wè ìnaʼ i Sìlên ghu tyoŋə nə̀ à də̀ Simùn ù kə namə fənə bə̂ soʼò iwe yiy, ghu nìy kə kâʼ fə təzəd fə zòʼ tsə we ate. Ghu tyiŋi tsə we nə̀ ù bòʼò kəli kə, tə̀ ù dzwùmì yə̀ Yesù.
27Ndə̀mə̀ àghù ə dzwùmə yə̀ ghu. Iyəŋi də̀ ate ghu mwe yə̀, dìy yə̀ Yesù. 28Yesù ə kwuni kyèmì tsìy yə̀ dzày tsə aghu nə, “A ise Yèlusalèm, ghà kə dîy dzə̀ miə, ghà si diy yə iwe nəli yiy nə̀ àwa ghi yiy.” 29Soŋə fiy bê ŋwò aghe ni dziy tsə nə̀ “lwì kìy də awò àghù yə̀ ghu də nəniy ùŋkà wìy nə̀ iyəŋi yə ghu də kə̀ ŋwuŋi kôʼ nəway awa yiy, ghu də kə̀ kəli kôʼ soʼò àwa yiy” 30À ni də soŋə fə aghê nî dzìy nəniy â kàʼà tìy nə̀, “Bə̀li bvə̀ azoŋə̀ ghə̀d.” Dzìy â doŋə tiy nə̀ “Nùu na ghəd. 31Abu ndzòʼò àyiə yə̀ də ani fyi azoŋə̀ kàʼ fə zwû fìy, a də mə̀yiə ani dòʼò azoŋə̀ kàʼ fə̀ zwum fiy ə?”
32Ghu nìy fyi yə̀ soʼò nə̀ aghè bɛbə yiy àbè ani ba wiy màʼà fwumi ghu nə̀ Yesù 33Abù ghu bû nəniy anə loʼo kə ghu tyoŋə nə̀ à də̀ “Vəb k-a-tuw,” ghu ba wiy màʼà tsə Yesù awote nə̀ àghè bɛbə yə àbè. Ghu nìy kə ùmòʼ na yə̀ anə ukwe u Yesù ù nyiə wiy, nìy kə ù lìy wə̀ na yə̀ anə ukwe ùkwuə̀ wìy. 34Yesù ə dzày tsə nə̀, “A Zə̀kiy, nìiyzə̀ə ghu, ghu kwu dzə̀ way ayiə yə ghu zəŋə nəniy.”
Ghu nìy dzàw tsə ndzwu tə Yesù təm nyi ŋwò kə anə bòʼ 35Ŋwàâ kə ghù kə təmi dòʼò yə̀ awo lia kə yəə ghu zəŋə nəniy. Ŋged tə ghě Dzû tə̀ ə kwuni dzìy Yesù nə̀ àyiə àŋəmə fôŋ yìy. Ghu dzìy anə iwè nə̀ “Ù kə fày fyi aghè liy yiy na ù fày fyi kə uwe u we nyiə abu à də nə̀ ù də̌ wù wə̀ Zə̀kìy kə sûw kyili na nə̀ ù dòʼò kə̀dòŋ, toŋə wù wò Zəkiy sày kə nəniy.”
36Sǔgôʼ tə̀ ə swuʼə̀ sòʼò we. Ghu nìy bə̀ nlwù mə̀ tâw mìy nyə̀ yə̀ â we dziy a we nə, 37“Fày fyi kə uwe niə̀ wìy abu à də nə̀ wə̀ də̌ dòŋ kə ghě Dzû.”
38Ghu kə twà tsə ayiə anə bàŋ kə fəkàʼ nə̀, “À wə̀ də̌ dòŋ kə ghě Dzû,” ba na kə idoŋ anə tuw kə Yesù.
39Wu ù bɛbə̀ wìy ùmòʼ anə aghù yə̀ àbè, u nyàʼì yə̀ Yesù awe nə, “Wò we də̌ Kə̀litò ə? Fày kə uwe niə̀ wìy wò fày kə soʼò ghə̀d.”
40Wù ù bɛbə̀ ù lìy wə̀ ə kwà yə̀ àzə̀. U dzày tsə awe nə, “Wò tsəŋə way Zə̀kìy yə̀, anə yiə yə ghu dzəŋi nyiə̀ ŋgaŋ nə̀ ndzòʼò mfəm imòʼ ə̀? 41Mfəm yə ghu nyiə̀ nəniy â ŋgàŋ ì kpe ŋwô bòʼ àyiə yə ŋgà zəŋi nəniy. A kwuni bû we ù kə̀ zəŋi dzə̂ ìyiə ìliy yiy ani kəli ndzòʼò mfəm yə ghi.” 42U dzày yə̀ â Yesù nə̀. “A Yəsù kə̀lə̀ â wò, wò nî myìŋì tsə miə ani bu wò bù nəniy ani bù saʼ yəə à də̀ kədòŋ.”
43Yesù ə dzày yə̀ a we nə, “Mə ndzəmə̀ dzìy ŋwò, zii, wò kì dyòʼò nə̀ mìə̀ anə lòʼo kə̀ səaŋə kiy.”
Yesù ə pfə
(Matìyò 27.45-56; Mâk 15.33-41; Dzwan 19.28-30)
44Abù nə̀ fòŋə̀ ntsə̀, ləm kiy kəd bə̀ inaʼ idzə̀m. Kə dòʼò anə fwatəwùŋ ìti, 45aŋwòə tsə̀ kə tu way. Bə̀d kəndzwu kə̀ kə kə də̀ nəniy a ndàw Kə̀zə̀, kə ŋwò saa fyi kwoʼ yə̀ anə ubə̀d ùbè, kaʼ tsə idoŋ tswi kwùm tsə itəŋ. 46Yesù ə bwoʼ fyi kə kəbôŋ dzày tsə̀ nə̀ “A təli, mə kwe bə̀ uwee nam anə awo yə̂!” Abù ù dzày tsə ghii u dyaŋi pfə.
47Dòŋ kə təsǔgôʼ kìy ə kòʼ àyiə yə a kə fyi nəniy, u nyə̀ ùkali â Zə̀kìy dzìy tsə nə̀, “Wù wə̀ kə̀ ndzə̀m də̌ wù ù dzòŋə̀ wìy!”
48Aghû yə̀ ghu kə lwe dòʼò nəniy awo, ghu kòʼ àyiə yə a fyi nəniy, ghu ŋwò zù dzwoŋi anə təndàw nə̀ ghu mwe ŋwò. 49Aghù yə̀ àdzə̀m ghu kə kwu nəniy Yesù nə̀, iyəŋi yə ghu kə muə tsə a Galìlî ghu ŋwò dzwùmi yə̀ we. Ghu zù təmi dòʼò kə nàdiikiy fwə̀dlə̀ yə̀ àyiə yə a fyiə.
Yə ghu kə kələ Yesù ate
(Matìyò 27.57-61; Mâk 15.42-47; Dzwan 19.38-42)
50-51Wè lìy ghu kə tyoŋə nə̀ à də̀ Yùsə̂f ù kə də nəniy wè ìnaʼ i Àlimàtiyà i də nəniy a mbwòʼ ə̀ Dzudiyà. U də̌ wù ù dzòŋə wìy, u də̀ sòʼo wè tsitsi. U lyimə nə̀ ghe mboŋ kôʼ sòʼò yəə Zə̀kìy saʼa nəniy aghee we yiy ate. Yùsə̂f kə də̀ sòʼo anə dzəŋə kə saʼa kə inaʼ kiy, ù kə kə̀ kwùni bɛmə dzə̂ àyiə yə dzəŋə kə̀ kə səay ani zəŋi nə̀ Yesù. 52Yùsə̂f ə zù akə̀lə̀ Paylèt ŋwa yə̀ ivən i Yesù â we. 53U nìy fyi tswi tsə ivən i Yesù, baŋ kə anə ubə̀d u təndzwu, nə̀ŋì na nyi yə̀ anə isày ghu kə təm nyi yə̂ nəniy anə kəna nə̀ ghu kamə kələ kôʼ wù lìy ate. 54À kə də̀ a ntsuk fə aghê Dzû kə byay nia nəniy iwe yiy ani nyi utsuk ù zwaa wiy.
55Iyəŋi yə ghu kə dzwumì yə̂ nəniy Yesù nə̀ ghu ŋwò bə̀ a Galìlî, ghu zù fwumi nə̀ Yùsə̂f zù kòʼ tsə isây yə̀. Kòʼ tsə sòʼò yə ghu kə nəŋì naa nəniy ivən i Yesù yìy ate. 56Ghu dyaŋi ŋwò dzwoŋi zù a ndaw byay tsə uzuu ùlyimə wiy nə̀ mbvə mə̀lyimə̀ mìy ani zù kyili anə ivə̀n i Yesù.
Ghu zwày a ntsuk fə̀ zwaa fiy anə yiə yə lâŋ kìy dzîy.
Valgt i Øjeblikket:
Lukâs 23: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
