Lukâs 17
17
Ibɛb
(Matìyò 18.6,7,21,22; Mâk 9.42)
1Yesù ə dzày yə̀ awò tsə̀təndii tə we tiy nə̀, “Ayiə yiy də ŋwô a zəŋə nə̀ aghê bvə̂ nyi tswi anə ibɛb, i kwuni də̀ kə nə̀, mfəm kî bèe ŋwò azoŋə̀ wù wə̀ ù zəŋə nə̀ imwâm kòʼ i ghè yə̀ si fyiə! 2I dzwabə̀ tsìy fyi â ghu ani kwù tsə itay ìgwuə ì nê yìy anə umwìy u we, tə̀ ghu zû maʼà nyi tswi yə̂ we anə dzwì ì nè yìy, tə̀ ù mələ yə̀ awote, tsìy fyi â we ani zəŋi tə̀ ànìsə̀ ù lìy te à də à yuu ani zəŋi iyiə ìbɛbə yiy. 3Yəə i də nəniy aghi, nìy nənìy iyemì anə iwè nəli, abu àzə̀ yə̂ u lìy zə̀ŋi tsə wô nə̀ iyiə ìbɛbə yiy, kwàa tsə we.
Abu ù kwuni kə dzə̂, Wò ə nìyzə̀ ibɛb i we. 4Abu ù bòʼò zəŋi kə ibɛb yiy nə̀ wò soŋə insèmbe anə fəntsuk, bè dzwəŋə akə̀lə̀ wò dzìy tsə nə̀ nìiyzə̀ ayiə yam àbɛbə yiy, Mə mə kyèmì ŋwò fyi bə̀ anə ibɛb, wò kwu ani nìyzə̀ ayiə yə ù zəŋi bɛb nəniy awò wò.”
Daʼa kə ibɛmə yiy kwu
5Aghee ntwùm ə̀ Yesù yiy mee a we nə̀, “A Mwe ə̀ mbyi, kwuni zəŋi tsə nə̀ ibɛmə ghələ yiy nɛmə fwuli kə.”
6Mwe mbyi mee a ghu nə, “Abu ghà mə̀ kwu nəniy ŋyoŋə fə ibɛmə fiy yəə à də nyoŋə fə sàm ə̀ fə̀kàʼ yə̀ i tɛb tsî fyi nəniy sam tə ufyiə tə tədzə̀m, ghà tsəb də̀ ani dzày tsə â kàʼ fə̀ nə̂nê fìy nə̀, ‘Ŋwô kə anə aghaŋə’ wò zû zu dòʼò yə̂ anə dzwì ì nè yìy, fə ki zuw â ghà.”
Ayiə yə wù kə̀fàʼ kwu ani zəŋə yə.
7Abu wè ù lìy anə uzə ghi kwu nəniy wù kəfaʼ, ù faʼa nəniy anə uswum moo ù də nəniy nə̀ ù lia tə̀ndzwù. Abu wù kə̀fàʼ wə̀ fən bə̂ nəniy, gha də̀ ŋwò ani dzày yə a we nə̀ zəaŋi bù wò bû nyi ə? 8Ghà zəŋə tsə̀ dzə̀ wày ghi, gha ə fə̀dlə̀ dzìy tsə nə̀ byay tsə miə nə̀ fànyiə kə mə kî nyiə gwùŋə, ləmə tsə miə mə nyi mâ kə tə̀ mə mu mâ kə sòʼò mə̀nlwù, ghà ə dyaŋi nyi anə sòŋə fə ghè fə̀. 9Ghà kwu dzə̀ way ani nyiə zòŋə̀ kə wù kə̀fàʼ ù ghè wə̀ aŋwòə ù màŋə faʼ yə̀ faʼ kə ù kwu nəniy ani faʼ. 10À yù də̀ ighe abu ghà fâʼ mà tsə nəniy ayiə yə mə twum gha ate, ghà dzày tsə nə̀, “Ghè màŋ də̀ aghee kəfàʼ, ghè mə fàʼ mà fyiə kə ghě mə kwu nəniy ani fàʼ.”
Yesù ə zəŋi taw kə aghû àvəm
11Abù Yesù zè nəniy a Yèlusalèm u tsìy yə̀ dzəd anə mbwòʼ yə̀ i dzàw na nəniy Sàmaliyà nə̀ Galìlî. 12Abù ù nyiə yə̂ anə nàʼà fə̀ liy fiy, u kpe yə̀ nə̀ àghè àvəm ghu dzaŋə̀ nəniy ùŋkə̀m wìy. Aghê uŋkə̀m wə̀ təmi tsə nàdiikiy, 13dzày fyi bə̀ anə dzə̂ ì tâw yìy nə̀, “A Yesù! A Mwe, kwoʼ nə̀ mwuli kiy azòŋə ghə̀d.”
14Yesù ə kòʼ yə̀ ghu dzày tsə â ghu nə̀, “Zù dě yə̀ nə iwe nəli yiy awò àghè lwaʼa yiy.” Yəə ghu ŋwò tsə nəniy zè, ùŋkə̀m u ghu wə dyaŋi saŋ mày yə̀.
15Wù umòʼ anə uzə u ghu kòʼ, tsə nə̀ ghe mə taw, u ŋwò dzwoŋi bə̀ ibàm bù kaʼ ani zɛm tə ndzàŋə kyalə yə̀ Kə̀zə̀ anə dzə̀ ìtaw yìy. 16U nyaʼa yə̀ a təŋə̀ Yesù nyə̀ we nə̀ zòŋə̀ kiy. Ù kə də wè inaʼ i Sàmaliyà. 17Yesù ə bəb yə̀ a we nə̀, “Mə mə̀ zəŋi taw kə utuw ghi ùvəm, aghê liy yə àbwùkə kwuni də̀ yə?” 18À fyi kìə̀, à sì bù kə wù kə̀twum wə̀ ani bù nyə̀ zòŋə̀ K-a-zə̀ ə? 19Yesù ə dzày yə̀ a we nə̀, “Ŋwò kə wò zû loʼo tiə, ibɛmə yiə̀ yìy mə zəŋi nə̀ wò taw.”
Soŋə fi nyiə̀ kpe bə̀ ŋwò â Zə̀kìy ani saʼ aghee we
20Aghee Falàsî à liy yiy kə bəb yə̀ â Yesù a we nə, “Zə̀kìy ki ba saʼa zəŋi aghê we yiy ə?” U bə̀lì kə a ghu nə, “Ayiə yə Zə̀kìy saʼa nəniy ate, à wày dzə fyiə kə ghà də ani kòʼ yə̀ nə̀ asə ghii yiy. 21Wù lìy nì dzày dzə̀ wày nə̀, Ayiə yə Zə̀kìy saʼa nəniy aghee we yiy ate də à yu moo a də yəə à də̌ à yiy.” Ayiə yə Zə̀kìy saʼa aghee we yiy ate a də anə fòŋ təli.
22U dzày yə̀ â tsə̀təndii tə we tiy nə̀, “Soŋə fiy nî bê ŋwò, ghà ni liə ani kòʼ nə̀ Wà Wù dè bə̀ ùwee â ghà. Ghà nî kwuni kòʼò dzə̀ wày we. 23Aghê ni dziy tsə â ghà nə̀, Ghà liay yə̂ fìy, ghà lia bə̂ fə̀. Kəə ghaa nì ŋwò dzwùmə̀ yəə dzə̂ ə ghu.” 24Ntsuk fə Wà Wù nì bè nəniy ate, fə nî də̀ yəə à də̀ iwe i mwâ tsə nəniy tìyàd tìyàd. 25Iyiə i səsə yiy də nə̀, ù ni kwuni ŋge fyaʼa tsə dzə̀ ŋwò, aghû yə̀ ghu muə nəniy nyiə ghu ni twe maʼà we. 26Anə yiə yə i kə də nəniy a ntsuk fə Nuwà, i nî dyòʼò sòʼò ìghəd anə ntsukə mə̀ Wà Wù nì bè nəniy ate. 27Aghê kə nyiə ŋwò, muə sòʼò mə̀nlwù, nìy sòʼò ìwee zù kwùm anə ntsuk fə Nuwà kə nyi kwoʼ yə̂ an-a-mfə̀n kə̀ nê kiy. 28Ayiə yə̀ nì də̀ ighəd anə yiə yə i kə də nəniy ate anə sòŋə fə Lôt. Aghê kə tsə̀ŋ kwu kə ani nyi, muə mə̀nlwù, fyiè yə̀ ùfyiə, zwe yə̀ ùfyiə, ze yə̀ ùfyiə, biə yə̀ tə̀ ndaw. 29Ntsuk fə Lôt ŋwô fyi yə̂ nəniy ate a Sodòm, uvələ ù soŋə̀ wìy màŋ fyi tswi bə̀ ana byiwuŋ, fwu maʼa kə aghê àdzə̀m. 30Ayiə yə̀ ni bvwami dyòʼò sòʼò ìghəd a ntsuk fə Wà Wù ni bê nəniy ate.
31Ani bu ntsuk fə ghè fə kpe tsə, Abu wù nì də kə anə tuw kə ndàw, ù kwu dzə̀ way ani nyàb fə̀ soŋə ani tswi zù nìy fyi kə̀fyiə a ndaw. Ighəd soʼo nə̀ wù wə̀ ù də nəniy ambvən, ikwu ù nì la ŋwô bə̂ dzə̂ nə̀ ìfən yiy. 32Ghà môʼ tsə wìy Lôt, 33Wù wə̀ ù khu dzəd ani bii fyi uwe u we, ù ki nìì myìʼà ŋwò. Akwuni bû wù wə̀ ù này maʼà uwe u we wiy awò mìə̀, ù kì bii fyiə ŋwò imuə̀ iwe yiy 34Mə dziy bə̀ ŋwò â ghà nə̀ ani bu nə̀ ntsuk ə tə ghà tə, aghê ni nəŋ àbè anə ukày Zə̀kìy ni nîy ŋwô kə umòʼ ù na sə tsə umòʼ awote. 35Iyəŋi àbè ni dzəŋə gwuə, Zə̀kìy ni sây ŋwô kə ùmòʼ, ù màʼà na sə tsə ù lìy awote. 36Iŋə̀mə̀ àbè ni də ambvən, Zə̀kìy ni bû nîy kə ùmòʼ, ù màʼà na sə yə̀ ù liy wə̀ awote.
37Abù ù dzày mâ tsə nəniy, tsə̀təndii tə we tiy bə̀lì yə̀ awe nə̀, “A mwe, ànì də̀ yə?” Yesù ə mee a ghu nə, “Loʼo kə ghà kôʼ dzə̂ udzidzi wiy tsəà nəniy ate, à ghi də̌ nə̀ ivən yiy də awote.”
Valgt i Øjeblikket:
Lukâs 17: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
